ಆ್ಯಪಲ್ ಸಂಸ್ಥೆಯ ವರ್ಲ್ಡ್ ವೈಡ್ ಡೆವಲಪರ್ ಕಾನ್ಫರೆನ್ಸ್ 2023 ಈವೆಂಟ್ ಆರಂಭವಾಗಿದೆ. ಮೊದಲ ದಿನವೇ ಹಲವು ಪ್ರಮುಖ ಉತ್ಪನ್ನಗಳನ್ನು ಘೋಷಣೆ ಮಾಡಿದೆ. ಇದರಲ್ಲಿ ಬಹುನಿರೀಕ್ಷಿತ ಆ್ಯಪಲ್ವಿಷನ್ ಪ್ರೊವನ್ನು ಆ್ಯಪಲ್ ಸಂಸ್ಥೆ ಅನಾವರಣಗೊಳಿಸಿದೆ. ಇದು ಅತ್ಯಾಧುನಿಕ ತಂತ್ರಜ್ಣಾನ ಹೊಂದಿರುವ ಉತ್ಪನ್ನವಾಗಿದ್ದು, ಶೀಘ್ರದಲ್ಲೇ ಮಾರುಕಟ್ಟೆಗೆ ಪರಿಚಯಿಸುವುದಾಗಿ ಆಪಲ್ ಸಿಇಒ ಟಿಮ್ ಕುಕ್ ತಿಳಿಸಿದ್ದಾರೆ.
ವಿಷನ್ ಪ್ರೊ ವಿಶೇಷತೆ:
ವಿಷನ್ ಪ್ರೋ ಅನ್ನು ವರ್ಚುವಲ್ ರಿಯಾಲಿಟಿ ಮತ್ತು ಆಗ್ಮೆಂಟೆಡ್ ರಿಯಾಲಿಟಿಯೊಂದಿಗೆ ರೂಪಿಸಲಾಗಿದ್ದು, ಇದು ಡಿಜಿಟಲ್ ವೀಕ್ಷಣೆಯನ್ನು ನೈಜ ವೀಕ್ಷಣೆಗೆ ಪರಿವರ್ತಿಸುವ ಕೆಲಸವನ್ನು ಮಾಡುತ್ತದೆ. ಇದನ್ನು ಕನ್ನಡಕದಂತೆ ಧರಿಸಬೇಕು. ಕಣ್ಣು ಮತ್ತು ಧ್ವನಿ ಆಯ್ಕೆಯ ಕಂಟ್ರೋಲ್ ಬೆಂಬಲವನ್ನು ಹೊಂದಿದ್ದು, ಬಹು ಸೆನ್ಸರ್ಗಳು ಹಾಗೂ ಕ್ಯಾಮೆರಾಗಳಿಂದ ಪ್ಯಾಕ್ ಆಗಿದೆ. ಕಣ್ಣಿನ ಟ್ರ್ಯಾಕಿಂಗ್, ಕೈ ಸನ್ನೆಗಳು ಮತ್ತು ವಾಯಿಸ್ ಕಮಾಂಡ್ಗಳಿಂದ ನ್ಯಾವಿಗೇಟ್ ಮಾಡಲಾದ ಇಂಟರ್ಫೇಸ್ ಅನ್ನು ಇದರಲ್ಲಿ ಬಳಸಲಾಗಿದೆ.
ಇದು ಎಮ್2 ಚಿಪ್ನಿಂದ ಕಾರ್ಯನಿರ್ವಹಿಸಲಿದ್ದು, ಆರ್1 ಎಂಬ ಹೊಸ ಚಿಪ್ ಎಮ್2 ಅನ್ನು ಆಧರಿಸಿ ಕೆಲಸ ಮಾಡುತ್ತದೆ. ಕಂಪನಿಯ ಪ್ರಕಾರ ಇದು 12 ಕ್ಯಾಮೆರಾಗಳು, ಐದು ಸೆನ್ಸರ್ಗಳು ಮತ್ತು ಆರು ಮೈಕ್ರೊಫೋನ್ಗಳನ್ನು ಬೆಂಬಲಿಸುತ್ತದೆ.
ವಿಷನ್ ಪ್ರೊ ಹೆಡ್ಸೆಟ್ನೊಳಗೆ ಹಲವು ಆಪ್ಗಳನ್ನು ಒಟ್ಟಾಗಿ ಬಳಸಬಹುದು. ಮೊಬೈಲ್ ಕಾಲ್, ಮೆಸೆಜ್, ವಾಟ್ಸಪ್ ಇತ್ಯಾದಿಗಳನ್ನು ನೋಡುತ್ತಿರಬಹುದು.ಇದರಲ್ಲಿ ವಿಡಿಯೋ ಕಾಲ್ ಕೂಡ ಮಾಡಬಹುದು. ಇದರಲ್ಲಿ ಫೇಸ್ಟೈಮ್ ವಿಡಿಯೋ ಕಾಲ್ ಸೌಲಭ್ಯವಿದೆ.
ವಿಷನ್ ಪ್ರೊ ಬೆಲೆ:
ವಿಷನ್ ಪ್ರೊ ಬೆಲೆ $ 3,499 ಭಾರತದ ರೂಪಾಯಿಯಲ್ಲಿ ಹೋಲಿಸಿದರೆ 2,89,131 ರೂ ಇರಲಿದೆ. ಮುಂದಿನ ದಿನಗಳಲ್ಲಿ ಅಮೆರಿಕಾ ಮಾರುಕಟ್ಟೆಯಲ್ಲಿ ಹೆಡ್ಸೆಟ್ ದೊರೆಯಲಿದೆ, ಮುಂದಿನ ವರ್ಷಗಳಲ್ಲಿ ಇತರ ಪ್ರದೇಶಗಳಿಗೂ ವಿಸ್ತರಿಸಲು ಯೋಜಿಸಲಾಗಿದೆ ಎಂದು ಮೂಲಗಳು ತಿಳಿಸಿವೆ.