ಹೂಗಳ ವಿಧಗಳಲ್ಲಿ ದಾಸವಾಳ ಹೂವಿಗೆ ತನ್ನದೇ ಆದ ವೈಶಿಷ್ಟ್ಯವಿದೆ. ದಾಸವಾಳ ಹೂ ಪೂಜೆ ಬಳಕೆಗೆ ಮಾತ್ರವಲ್ಲದೇ ಸೌಂದರ್ಯ ವರ್ಧಕ ಹಾಗೂ ಹಲವು ರೋಗಗಳಿಗೆ ಔಷಧಿಯಾಗಿ ಬಳಸಲಾಗುತ್ತದೆ.
ನಿಸರ್ಗದತ್ತವಾಗಿ ಸಿಗುವ ಈ ಹೂವನ್ನು ಮನೆ ಮದ್ದಾಗಿ ಬಳಸಲಾಗುತ್ತದೆ. ದಾಸವಾಳ ಹೂವಿನ ದಳಗಳು, ಎಲೆಗಳು ಹೆಚ್ಚಿನ ಪ್ರಮಾಣದಲ್ಲಿ ಲೋಳೆ ಅಂಶ ಹೊಂದಿರುವುದರಿಂದ ಕೂದಲನ್ನು ನೈಸರ್ಗಿಕ ವಾಗಿ ನಯವಾಗಿಸುತ್ತದೆ. ಅಲ್ಲದೇ ಕೂದಲಿನ ಸುರಕ್ಷತೆಗೂ ಕಾರಣವಾಗಿದೆ. ಕೆಂಪು ದಾಸವಾಳ ಮತ್ತು ಎಲೆಯನ್ನು ಕೂದಲು ಉದುರುವಿಕೆ ತಡೆಗೆ ಮನೆಮದ್ದಾಗಿ ಬಳಕೆ ಮಾಡಬಹುದಾಗಿದೆ. ರಾತ್ರಿ ಮಲಗುವ ವೇಳೆಗೆ ಹೂ ಮುಡಿದು ಮಲಗಿದರೂ ಸಾಕು. ಕೂದಲಿನ ಆರೋಗ್ಯ ಕಾಪಾಡಿಕೊಳ್ಳಲು ದಾಸವಾಳ ಸಹಾಯ ಮಾಡುತ್ತದೆ.
ದಾಸವಾಳ ಹೂವಿನ ದಳಗಳನ್ನು ನೈಸರ್ಗಿಕ ಮಾಯಿಶ್ಚರೈಸರ್ ಆಗಿ ಬಳಸಲಾಗುತ್ತದೆ.
ದಾಸವಾಳದಲ್ಲಿ ವಿಟಮಿನ್ ಸಿ ಹೇರಳವಾಗಿದೆ. ಆದ್ದರಿಂದ ಇದರ ಬಳಕೆಯು ಚರ್ಮದ ಸುಕ್ಕನ್ನು ತಡೆಯುತ್ತದೆ. ದಾಸವಾಳವು ಮಾಲಿಕ್ ಆಮ್ಲ, ಸಿಟ್ರಿಕ್ ಆಮ್ಲ ಮತ್ತು ಆಲ್ಫಾ ಹೈಡ್ರಾಕ್ಸಿ ಆಮ್ಲಗಳನ್ನು ಹೊಂದಿರುವುದರಿಂದ ಚರ್ಮದ ಕಾಂತಿಯನ್ನು ಹೆಚ್ಚು ಕಾಪಾಡುತ್ತದೆ. ದಾಸವಾಳ, ಅದರಲ್ಲೂ ವಿಶೇಷವಾಗಿ ಬಿಳಿ ದಾಸವಾಳ ಹಾಗು ಕೆಂಪು ದಾಸವಾಳ(ಹೈಬಿಸ್ಕಸ್ ರೋಸಾ-ಸಿನೆನ್ಸಿಸ್ ), ಭಾರತೀಯ ಸಾಂಪ್ರದಾಯಿಕ ಔಷಧ ವಿಧಾನವಾಗಿರುವ ಆಯುರ್ವೇದದಲ್ಲಿ ಔಷಧೀಯ ಗುಣಗಳನ್ನು ಹೊಂದಿದೆ ಎಂದು ಹೇಳಲಾಗುತ್ತದೆ.
ದಾಸವಾಳದ ಬೇರುಗಳಲ್ಲಿರುವ ಹಲವಾರು ಔಷಧೀಯ ಗುಣದ ಮಿಶ್ರಣಗಳನ್ನು ಕೆಮ್ಮಿನಂತಹ ಹಲವು ಕಾಯಿಲೆಗಳನ್ನು ಗುಣಪಡಿಸಲು ಬಳಸಲಾಗುತ್ತದೆ.
ದಾಸವಾಳ ಎಂದರೆ ಮನೆಯ ಅಂಗಳದಲ್ಲಿ ಅರಳುವ ಹೂವಷ್ಟೇ ಅಲ್ಲ. ದೇವರ ಪೂಜೆಗೆ, ಮಕ್ಕಳ ಆಟಕ್ಕೆ ಮಾತ್ರ ಈ ಹೂ ಬಳಕೆಯಾಗುತ್ತದೆ ಎಂದು ಅಂದುಕೊಂಡರೆ ನಿಮ್ಮ ಊಹೆ ತಪ್ಪು. ಕೆಂಪು, ಹಳದಿ, ಕೇಸರಿ ಹೀಗೆ ವಿವಿಧ ಬಣ್ಣಗಳಲ್ಲಿ ಕಾಣುವ ಈ ಹೂವು ಅಂಗಳದ ಅಂದಕ್ಕೆ ಮಾತ್ರವಲ್ಲ, ನಮ್ಮ ಆರೋಗ್ಯ ಕಾಪಾಡಿಕೊಳ್ಳಲೂ ದಾಸವಾಳ ಅತ್ಯುತ್ತಮ ಆಯ್ಕೆಯಾಗಿದೆ.
ದಿನನಿತ್ಯದ ಜೀವನದಲ್ಲಿ ಹಲವು ಆರೋಗ್ಯ ಉಪಯೋಗಗಳನ್ನು ನೀಡುವ ಈ ಹೂವು ಎಲ್ಲಾ ವಯಸ್ಸಿನವರಿಗೆ ಉಪಯೋಗಕಾರಿಯಾಗಿದೆ.
ಮಹಿಳೆಯರ ಆರೋಗ್ಯ ಸಮಸ್ಯೆಗಳಿಗೂ ದಾಸವಾಳ ರಾಮಬಾಣವಾಗಿದೆ. ಋತುಚಕ್ರದ ಸಂದರ್ಭದಲ್ಲಿ ಹೆಚ್ಚು ರಕ್ತಸ್ರಾವವಾದರೆ ದಾಸವಾಳದ ಹೂವಿನ ದಳವನ್ನು ಜಗಿಯಬಹುದು. ಬೆಳಗ್ಗೆ ಎದ್ದು, ಐದಾರು ದಾಸವಾಳದ ಎಸಳು ಜಗಿದು, ನೀರು ಕುಡಿದರೆ ಗಂಭೀರ ಸಮಸ್ಯೆ ದೂರವಾಗಲು ಸಹಕಾರಿಯಾಗುತ್ತದೆ. ಋತುಚಕ್ರ ಸರಿಯಾದ ಸಮಯದಲ್ಲಿ ಆಗುತ್ತಿಲ್ಲವಾದರೆ ದಾಸವಾಳದ ಜ್ಯೂಸ್ ಮಾಡಿ, ಅದನ್ನು ಕುಡಿದರೆ ಕೂಡ ಆರೋಗ್ಯ ಸರಿ ಹೋಗುತ್ತದೆ.
ಕೆಳ ಬೆನ್ನು ನೋವು ಮತ್ತು ಅನಿಮಿಯಾ ಸಮಸ್ಯೆಗೂ ದಾಸವಾಳ ಮದ್ದಾಗಿ ಕೆಲಸ ಮಾಡುತ್ತದೆ
ಇಷ್ಟೆಲ್ಲಾ ಉಪಯೋಗಕಾರಿ ಗುಣ ಹೊಂದಿರುವ ದಾಸವಾಳ ಒಂದು ರೀತಿಯಲ್ಲಿ ಸಂಜೀವಿನಿ ಎಂದೂ ಹೇಳಬಹುದಾಗಿದೆ.