ಮಾವಿನಹಣ್ಣು ಎಲ್ಲ ಸೀಸನ್ನಲ್ಲೂ ಸಿಗುವುದಿಲ್ಲ ಅದು ಸಿಕ್ಕಾಗ ಮಾತ್ರ ಅದನ್ನು ಬಳಸಿ ಖಾದ್ಯಗಳನ್ನು ಮಾಡಿಕೊಳ್ಳಬಹುದು. ಮಾವಿನ ಹಣ್ಣಿನಂತೆಯೇ ಮಾವಿನ ಕಾಯಿಯಲ್ಲಿ ಅಡುಗೆಯನ್ನು ತಯಾರಿಸಬಹುದು. ಮಾವಿನ ಸೀಸನ್ನಲ್ಲಿ ವಿವಿಧ ರುಚಿಯನ್ನು ಮಾಡಿ ಸವಿಯುವವರಿಗೆ ಮಾವಿನಕಾಯಿ ಚಿತ್ರನ್ನ ಉತ್ತಮ ರೆಸಿಪಿಯಾಗಿದೆ.
ಬೇಕಾಗುವ ಸಾಮಾಗ್ರಿಗಳು:
ಬೇಯಿಸಿದ ಅನ್ನ – 2ಕಪ್
ತುರಿದ ಮಾವು – 1
ಉದ್ದಿನಬೇಳೆ- 1/2 ಟೀಚಮಚ
ಕಡಲೆ ಬೇಳೆ- 1 ಟೀಚಮಚ
ಸಾಸಿವೆ – 1/2 ಟೀಚಮಚ
ಹಸಿರು ಮೆಣಸಿನಕಾಯಿಗಳು – 2
ಕರಿಬೇವಿನ ಎಲೆಗಳು
ಅರಿಶಿನ ಪುಡಿ -1/4 ಟೀಚಮಚ
ಇಂಗು -1/2 ಟೀಚಮಚ
ಉಪ್ಪು, ರುಚಿಗೆ ತಕ್ಕಷ್ಟು
ಅಗತ್ಯಕ್ಕೆ ತಕ್ಕಷ್ಟು ಎಣ್ಣೆ
ಕೊತ್ತಂಬರಿಸೊಪ್ಪು
ತಯಾರಿಸುವ ವಿಧಾನ:
ಮೊದಲು ಅನ್ನವನ್ನು ತಯಾರಿಸಿ ತಣ್ಣಗೆ ಆಗಲು ಬಿಡಿ ಇಲ್ಲವೇ ಬೆಳಗ್ಗಿನ ತಿಂಡಿಗೆ ಇದನ್ನು ಮಾಡುವುದಾದರೆ ರಾತ್ರಿಯ ಅನ್ನವನ್ನು ಬಳಸಬಹುದು.
ಬಾಣಲೆಯನ್ನು ಮಧ್ಯಮ ಉರಿಯಲ್ಲಿ ಇಟ್ಟು ಅದಕ್ಕೆ ಸಾಸಿವೆ ಕಡಲೆಬೇಳೆ ಉದ್ದಿನ ಬೇಳೆಯನ್ನು ಹಾಕಿ ಗೋಲ್ಡನ್ ಬ್ರೌನ್ ಬಣ್ಣಕ್ಕೆ ಬರುವವರೆಗೆ ಹುರಿಯಿರಿ. ನಂತರ ಅದಕ್ಕೆ ಕರಿಬೇವಿನ ಎಲೆಗಳು, ಇಂಗು ಮತ್ತು ಹಸಿರು ಮೆಣಸಿನಕಾಯಿಗಳನ್ನು ಸೇರಿಸಿ, ಇಂಗು ಮತ್ತು ಕರಿಬೇವಿನ ಸೊಪ್ಪಿನ ಪರಿಮಳ ಬರುವವರೆಗೆ ಹುರಿಯಿರಿ.
ಬಳಿಕ ತುರಿದ ಹಸಿ ಮಾವಿನಕಾಯಿ, ಅರಿಶಿನ ಪುಡಿಯನ್ನು ಸೇರಿಸಿ ಮಾವಿನಕಾಯಿ ಮೃದುವಾದ ನಂತರ, ಬೇಯಿಸಿದ ಅನ್ನವನ್ನು ಸೇರಿಸಿ, ರುಚಿಗೆ ಉಪ್ಪು ಸೇರಿಸಿ ಚೆನ್ನಾಗಿ ಬೆರೆಸಿ. 2 ರಿಂದ 3 ನಿಮಿಷಗಳ ನಂತರ, ಕತ್ತರಿಸಿದ ಕೊತ್ತಂಬರಿ ಸೊಪ್ಪನ್ನು ಹಾಕಿ ಚೆನ್ನಾಗಿ ಮಿಶ್ರಣ ಮಾಡಿದರೆ ರುಚಿಯಾದ ಮಾವಿನಕಾಯಿ ಚಿತ್ರನ್ನ ಸವಿಯಲು ಸಿದ್ಧ ಬಿಸಿಯಾಗಿದ್ದಾಗಲೇ ಬಡಿಸಿ.