ಭಾರತದ ಮೊದಲ ಹಸಿರು ಹೈಡ್ರೋಜನ್ ಇಂಧನ ಚಾಲಿತ ಬಸ್ ಸಂಚಾರಕ್ಕೆ ಮಂಗಳವಾರ ಅಧಿಕೃತವಾಗಿ ಚಾಲನೆ ನೀಡಲಾಗಿದೆ. ಈ ಮೂಲಕ ಸಾರಿಗೆ ವಲಯದಲ್ಲಿ ಹೊಸ ಕ್ರಾಂತಿಗೆ ಮುನ್ನುಡಿ ಬರೆದಾಗಿದೆ. ಇದರ ಸಂಪೂರ್ಣ ಮಾಹಿತಿ ಇಲ್ಲಿದೆ.
ಭಾರತವು ನವೀಕರಿಸಬಹುದಾದ ಶಕ್ತಿಯ ಮೂಲಗಳನ್ನು ಬಳಸಿಕೊಂಡು ಸುಸ್ಥಿರ ಸಾರಿಗೆ ವ್ಯವಸ್ಥೆಯತ್ತ ಮಹತ್ವದ ದಾಪುಗಾಲು ಹಾಕಿದೆ. ಎಲೆಕ್ಟ್ರಿಕ್ ವಾಹನಗಳ ಜೊತೆಗೆ ಹಸಿರು ಹೈಡ್ರೋಜನ್ ಇಂಧನ ಚಾಲಿತ ವಾಹನಗಳ ಬಳಕೆಗೆ ಆದ್ಯತೆ ನೀಡುತ್ತಿದೆ. ಈ ನಿಟ್ಟಿನಲ್ಲಿ ದೇಶದ ಮೊದಲ ಹಸಿರು ಹೈಡ್ರೋಜನ್ ಇಂಧನ ಚಾಲಿತ ಬಸ್ ಸಂಚಾರಕ್ಕೆ ಅಧಿಕೃತವಾಗಿ ಚಾಲನೆ ನೀಡಲಾಗಿದೆ. ಇದು ಸಾರ್ವಜನಿಕ ಸಾರಿಗೆ ವಲಯದಲ್ಲಿ ಹೊಸ ಕ್ರಾಂತಿಗೆ ಮುನ್ನುಡಿಯಾಗಿದೆ.
ಎಲ್ಲಿ ಇದರ ಮೊದಲ ಪ್ರಯೋಗ ?
ಇಂಗಾಲಾಮ್ಲ ಹೊರಸೂಸುವಿಕೆ ಪ್ರಮಾಣ ತಗ್ಗಿಸುವ ನಿಟ್ಟಿನಲ್ಲಿ ಭಾರತದಲ್ಲಿ ಪರಿಸರ ಸ್ನೇಹಿ ಸಮೂಹ ಸಾರಿಗೆ ವ್ಯವಸ್ಥೆಗೆ ಕೆಲವು ವರ್ಷಗಳಿಂದ ಒತ್ತು ನೀಡಲಾಗುತ್ತಿದೆ. ಈಗಾಗಲೇ ಎಲೆಕ್ಟ್ರಿಕ್ ಬಸ್ಗಳು ದೇಶದ ಹಲವು ನಗರಗಳ ರಸ್ತೆಗಳಲ್ಲಿ ಸಂಚರಿಸುತ್ತಿವೆ. ಈಗ ಹಸಿರು ಹೈಡ್ರೋಜನ್ (ಜಲಜನಕ) ಚಾಲಿತ ದೇಶದ ಮೊದಲ ಬಸ್ಅನ್ನು ದಿಲ್ಲಿಯಲ್ಲಿ ಸೋಮವಾರ ಪೆಟ್ರೋಲಿಯಂ ಮತ್ತು ನೈಸರ್ಗಿಕ ಅನಿಲ ಖಾತೆ ಸಚಿವ ಹರ್ದೀಪ್ ಸಿಂಗ್ ಪುರಿ ಲೋಕಾರ್ಪಣೆಗೊಳಿಸಿದರು.
ವರ್ಷಾಂತ್ಯಕ್ಕೆ ಕಾರ್ಯಾರಂಭ ಮಾಡಲಿವೆ 15 ಬಸ್ಸುಗಳು
ದಿಲ್ಲಿ, ಹರಿಯಾಣ ಮತ್ತು ಉತ್ತರ ಪ್ರದೇಶಗಳಲ್ಲಿ ಗುರುತಿಸಲಾದ ಮಾರ್ಗಗಳಲ್ಲಿ ಈ ಬಸ್ಗಳು ಆರಂಭಿಕ ಹಂತದಲ್ಲಿ ಸಂಚರಿಸಲಿವೆ. 2023ರ ಡಿಸೆಂಬರ್ ಹೊತ್ತಿಗೆ 15 ಬಸ್ಗಳು ರಸ್ತೆಗಿಳಿಯಲಿವೆ.
ದೀರ್ಘಾವಧಿಯ ಬಾಳಿಕೆ
ಹೈಡ್ರೋಜನ್ ಇಂಧನ ಚಾಲಿತ ಬಸ್ಗಳು ಬ್ಯಾಟರಿ ಚಾಲಿತ ಬಸ್ಗಳ ಸಂಚಾರಕ್ಕೆ ಹೋಲಿಸಿದರೆ ದೀರ್ಘಾವಧಿಯ ಬಾಳಿಕೆ ಹೊಂದಿವೆ. ಹಂತ, ಹಂತವಾಗಿ ಹೆಚ್ಚು ಇಂಗಾಲಾಮ್ಲ ಹೊರಸೂಸುವ ಡೀಸೆಲ್ ಚಾಲಿತ ಬಸ್ಗಳ ಅವಲಂಬನೆ ತಗ್ಗಿಸಲು ಸಹಕಾರಿಯಾಗಲಿದೆ.ಸದ್ಯಕ್ಕೆ ಇಂಡಿಯನ್ ಆಯಿಲ್ ಕಂಪನಿಯು ಒಟ್ಟು 15 ಹಸಿರು ಹೈಡ್ರೋಜನ್ ಬಸ್ಗಳ ಮೂಲಕ 3 ಲಕ್ಷ ಕಿ.ಮೀ ಸಂಚಾರವನ್ನು ಪ್ರಾಯೋಗಿಕವಾಗಿ ನಡೆಸುವ ಯೋಜನೆ ಹೊಂದಿದೆ. ಈ ಪ್ರಯೋಗದಲ್ಲಿ ಸಂಗ್ರಹಿಸಲಾಗುವ ಡೇಟಾ ಆಧರಿಸಿ ಮುಂಬರುವ ದಿನಗಳಲ್ಲಿ ಹೈಡ್ರೋಜನ್ ಇಂಧನ ಚಾಲಿತ ಬಸ್ ಸಂಚಾರದ ಮಾರ್ಗಗಳನ್ನು ಹೆಚ್ಚಿಸುವ ಗುರಿ ಹೊಂದಲಾಗಿದೆ.
ಯಾವ ರೀತಿಯ ತಂತ್ರಜ್ಞಾನದ ಬಳಕೆ?
ನವೀಕರಿಸಬಹುದಾದ ಶಕ್ತಿಯನ್ನು ಬಳಸಿಕೊಂಡು ಉತ್ಪಾದಿಸಲಾದ ಹಸಿರು ಹೈಡ್ರೋಜನ್ ಕಡಿಮೆ ಇಂಗಾಲಾಮ್ಲ ಹೊರಸೂಸುತ್ತದೆ. ಇಲ್ಲಿ ಹೈಡ್ರೋಜನ್ಅನ್ನು ಬಸ್ನ ಇಂಧನ ಕೋಶಗಳಿಗೆ ಇಂಧನವಾಗಿ ಬಳಸಲಾಗುತ್ತದೆ. ಜಲಜನಕ ಮತ್ತು ಆಮ್ಲಜನಕದ ಎಲೆಕ್ಟ್ರೋಕೆಮಿಕಲ್ ಕ್ರಿಯೆಯು ಎಲೆಕ್ಟ್ರಾನ್ಗಳ ರೂಪದಲ್ಲಿ ವಿದ್ಯುತ್ ಶಕ್ತಿ ಬಿಡುಗಡೆ ಮಾಡುತ್ತದೆ. ಸೌರ ಫಲಕಗಳನ್ನೂ ಇಲ್ಲಿ ಬಳಸಲಾಗುತ್ತದೆ. ಟಾಟಾ ಮೋಟಾರ್ಸ್ ಈ ಹೊಸ ಬಗೆಯ ಬಸ್ಗಳನ್ನು ಉತ್ಪಾದಿಸುತ್ತಿದೆ. ಈ ಬಸ್ಸು ಹೊಗೆಯನ್ನು ಹೊರಸೂಸುವ ಬದಲು ನೀರನ್ನು ಹೊರಹಾಕುತ್ತದೆ.