ಬೆಂಗಳೂರು: ಸರ್ಕಾರದ ಮಹತ್ವಕಾಂಕ್ಷಿ ಶಕ್ತಿ ಯೋಜನೆ ಹೆಣ್ಣು ಮಕ್ಕಳಿಗೆ ವರದಾನವಾಗಿದೆ. ಆದರೆ ಇನ್ನೊಂದೆಡೆ ನಿತ್ಯ ಪ್ರಯಾಣಿಸುವ ಮಹಿಳೆಯಾರಿಗೆ ಶಾಪವಾಗಿ ಪರಿಣಮಿಸುತ್ತಿರುವುದುದಂತು ನಿಜ.
ಶಕ್ತಿ ಯೋಜನೆಯಿಂದಾಗಿ ಸರಕಾರಿ ಸಂಸ್ಥೆಯ ಬಸ್ಗಳು ತುಂಬಿ ತುಳುಕುತ್ತಿವೆ. ಬಸ್ನಲ್ಲಿಅರ್ಧಕ್ಕಿಂತ ಹೆಚ್ಚಿನ ಸಂಖ್ಯೆಯಲ್ಲಿ ಮಹಿಳೆಯರೇ ಇರುತ್ತಾರೆ. ಟಂಟಂ, ಆಟೋದಂತಹ ಖಾಸಗಿ ವಾಹನಗಳ ಸಂಚಾರವನ್ನು ಕೈಬಿಟ್ಟಿರುವ ಮಹಿಳೆಯರು ಬಸ್ಗಳಿಗಾಗಿ ಕಾಯ್ದು ನಿಲ್ಲುತ್ತಾರೆ. ಪುರುಷ ಪ್ರಯಾಣಿಕರೂ ಸೇರಿದಂತೆ ಒಂದು ಬಸ್ನಲ್ಲಿ 100 ಜನರವರೆಗೆ ಪ್ರಯಾಣಿಸುತ್ತಾರೆ. ಬಸ್ಗಳಿಗೆ ಸೀಟ್ ಹಿಡಿಯಲು ಮಹಿಳೆಯರು ಹೋರಾಟವನ್ನೇ ಮಾಡಬೇಕು. ಅಕಸ್ಮಾತ್ ಸೀಟ್ ಸಿಗದಿದ್ದರೆ ನಿಂತುಕೊಂಡೇ ಪ್ರಯಾಣಿಸಬೇಕು.
ಪ್ರಮುಖ ಧಾರ್ಮಿಕ ಕ್ಷೇತ್ರಗಳು, ನಗರಗಳಿಗೆ ತೆರಳುವ ಬಸ್ಗಳಲ್ಲಿ ಶಾರ್ಟ್ ಸಂಚಾರ ಮಾಡುವ ಮಹಿಳೆಯರ ಸ್ಥಿತಿ ಇನ್ನೂ ಕಷ್ಟ. ದೂರದೂರಿಗೆ ಹೋಗುವ ಪ್ರಯಾಣಿಕರ ಸಂಖ್ಯೆ ಹೇರಳವಾಗಿರುವ ಕಾರಣ ಸೀಟ್ ಎನ್ನುವುದು ಕನಸು. ಅರ್ಧ ಗಂಟೆ, ಒಂದು ಗಂಟೆಯವರೆಗೆ ನಿಂತುಕೊಂಡು ಪ್ರಯಾಣಿಸಿ ಹೈರಾಣಾಗಬೇಕು. ನಂತರ ದೈನಂದಿನ ಕರ್ತವ್ಯಕ್ಕೆ ತೆರಳಬೇಕು, ಸಂಜೆಯಾಗುತ್ತಿದ್ದಂತೆ ಮರುಪ್ರಯಾಣ ಯಾತನೆ ಧುತ್ತೆಂದು ಕಣ್ಣೆದುರು ನಿಲ್ಲುತ್ತದೆ. ಸತತ ಪ್ರಯಾಣ, ಕೆಲಸದ ಒತ್ತಡ, ಆಯಾಸದಿಂದ ಮಹಿಳೆಯರಲ್ಲಿ ಅನಾರೋಗ್ಯ ಕಾಣಿಸಿಕೊಳ್ಳುತ್ತಿದೆ. ಬಸ್ಗಳಲ್ಲಿ ತಳ್ಳಾಟ, ನೂಕಾಟದಿಂದ ಡಿಸ್ಕ್ ಸಮಸ್ಯೆ ಕಾಡುತ್ತಿದೆ. ಕೆಲವರಿಗೆ ಕಾಲು, ಕುತ್ತಿಗೆ ನೋವು ಕಾಣಿಸಿಕೊಂಡಿವೆ. ಕೆಲಸದ ಒತ್ತಡದೊಂದಿಗೆ ಬಸ್ ಪ್ರಯಾಣವೂ ಹರಸಾಹಸವಾಗಿದ್ದು, ಈ ಸಹವಾಸವೇ ಬೇಡ ಎನ್ನುವ ಸ್ಥಿತಿಯಿದೆ.
ಸಾರಿಗೆ ಸಂಸ್ಥೆಗಳಿಂದ ರಸ್ತೆಗಿಳಿದಿರುವ ಗುಜರಿ ಬಸ್ಗಳು ಶಕ್ತಿ ಯೋಜನೆ ಪ್ರಯಾಣಿಕರನ್ನು ಅಶಕ್ತರನ್ನಾಗಿ ಮಾಡುತ್ತಿವೆ. 12 ಲಕ್ಷ ಕಿ.ಮೀ. ಕ್ರಮಿಸಿದ ಬಸ್ಗಳನ್ನು ಗುಜರಿಗೆ ಕಳುಹಿಸಬೇಕು ಎಂಬ ನಿಯಮಕ್ಕೆ ಕಿಮ್ಮತ್ತಿಲ್ಲ. ಸಾರಿಗೆ ಸಂಸ್ಥೆ ಹೆಚ್ಚುವರಿ ಬಸ್ ಓಡಿಸದೇ ಇರುವ ಬಸ್ಗಳಲ್ಲೇ ಲಾಭ ತೋರಿಸುತ್ತಿವೆ. ಈ ಬಸ್ಗಳಲ್ಲಿರುವ ‘ನಿಮ್ಮ ಪ್ರಯಾಣ ಸುಖಕರವಾಗಿರಲಿ’ ಎಂಬ ಪೋಸ್ಟರ್ ಪ್ರಯಾಣಿಕರನ್ನು ಅಣಕಿಸುವಂತಿರುತ್ತದೆ !
ಈ ಜಂಜಾಟದಿಂದ ಬೇಸತ್ತು ಹಲವು ಮಹಿಳೆಯರು ಅಂತಾರಾಜ್ಯ ಬಸ್ಗಳನ್ನು ಆಯ್ಕೆ ಮಾಡಿಕೊಂಡಿದ್ದಾರೆ. ಈ ಬಸ್ಗಳಲ್ಲಿಉಚಿತ ಪ್ರಯಾಣಕ್ಕೆ ಅವಕಾಶವಿರದ ಕಾರಣ ರಶ್ ಕಡಿಮೆ. ಹಣ ಹೋದರೆ ಹೋಗಲಿ ಆರೋಗ್ಯ ಉಳಿಯಲಿ ಎಂಬುದು ನಿತ್ಯ ಸಂಚರಿಸುವ ಮಹಿಳೆಯರ ಉದ್ದೇಶ. ನಗರ ಪ್ರದೇಶಗಳಲ್ಲಿ ಉತ್ತಮ ರಸ್ತೆಯಿರುವ ಕಾರಣ ಬಸ್ ಹಳೆಯದಾದರೂ ಪ್ರಯಾಣ ಕಷ್ಟಕರವಾಗುವುದಿಲ್ಲ. ಗ್ರಾಮೀಣ ಪ್ರದೇಶಕ್ಕೆ ತೆರಳುವ ಬಸ್ಗಳ ಸ್ಥಿತಿ ದಯನೀಯ. ಈ ಬಸ್ಗಳಲ್ಲಿಸೀಟ್ ಸಿಕ್ಕರೂ ಗುಂಡಿಗಳಿಗೆ ಬಸ್ ಇಳಿದಾಗ ಎತ್ತಿ ಒಗೆಯುವ ಅನುಭವ. ಕಿಕ್ಕಿರಿದು ತುಂಬಿದ ಬಸ್ನಲ್ಲಿ ಉಸಿರಾಡಲೂ ಕಷ್ಟವಿರುವಾಗ ಮೈ ಕೈ ನೋವು ಹೆಚ್ಚುವರಿ ಕೊಡುಗೆ. ಮುಧೋಳ ತಾಲೂಕಿನ ಮಹಿಳೆಯೊಬ್ಬರು ಬಸ್ ಸಂಚಾರದಿಂದ ಹೈರಾಣಾಗಿ ಬಟ್ಟೆ ಅಂಗಡಿಯ ಕೆಲಸವನ್ನೇ ಬಿಟ್ಟಿದ್ದಾರೆ.