ಗಣೇಶ ಚತುರ್ಥಿ ಬಂತೆಂದೆರೆ ಎಲ್ಲರ ಮನೆಯಲ್ಲೊಂದು ಗಣೇಶ ಕಾಣಿಸಿಕೊಳ್ಳುತ್ತಾನೆ. ಮಾತ್ರವಲ್ಲದೆ ನಗರದ ಎಲ್ಲೆಲ್ಲೂ ಗಣೇಶ ಕಾಣ ಸಿಗುತ್ತಾನೆ. ಆದರೆ ಇಲ್ಲೊಂದು ಮನೆಯಲ್ಲಿ ಬರೋಬ್ಬರಿ 260 ಗಣೇಶಂದಿರೇ ತುಂಬಿದ್ದಾರೆ. ಮನೆಯ ಎಲ್ಲಿ ನೋಡಿದರೂ ವಿವಿಧ ರೀತಿಯ ಗಣೇಶಂದಿರು. ಇದೇನು ಇಷ್ಟೊಂದು ಗಣೇಶನ್ನು ಪ್ರತಿಷ್ಠಾಪಿಸಿದ್ದಾರೆ ಅಂದುಕೊಂಡಿರಾ? ಹಾಗಾದರೆ ಈ ಗಣೇಶಾಲಯವನ್ನು ನಾವೂ ಒಂದು ಸಲ ನೋಡೋಣ.
ಈ ಮನೆಯ ಎಲ್ಲು ನೋಡಿದ್ರೂ ಗಣೇಶನ ವಿಗ್ರಹಗಳು. ಒಂದೇ ಮನೆಯೊಳಗೆ ಬರೋಬ್ಬರಿ 260 ಗಣೇಶನ ಮೂರ್ತಿ.
ಗಣೇಶೋತ್ಸವಕ್ಕೆ ತಯಾರಾದ ಪರಿಸರ ಪ್ರೇಮಿ ಗಣೇಶಂದಿರು
ಫುಲ್ ಬ್ಯೂಸೀಯಾಗಿರುವ ಈಗಿನ ಆಧುನಿಕ ಯುಗದಲ್ಲಿ ಹಿಂದಿನ ಕಾಲದ ಎಲ್ಲಾ ಪಾರಂಪರಿಕಾ ಕೆಲಸಗಳು ಕಣ್ಮರೆಯಾಗುತ್ತಿದೆ. ಇದಕ್ಕೆಲ್ಲ ಭಿನ್ನವೆಂಬಂತೆ ಮಂಗಳೂರಿನಲ್ಲೊಂದು ಕಲಾಕಾರರ ಕುಟುಂಬವಿದೆ. ನಗರದ ಮಣ್ಣಗುಡ್ಡ ಸಮೀಪ ಇರುವ ಈ ಶ್ರೀಗಣೇಶ ಎಂಬ ಮನೆ ಅಕ್ಷರಶಃ ಗಣೇಶಾಲಯ. ಈ ಮನೆಯೇ ನೂರಾರು ಗಣೇಶರು ಜನ್ಮ ತಾಳುವ ಗಣೇಶಾಲಯವಾಗಿದೆ. ಕಳೆದ 94 ವರ್ಷಗಳ ಹಿಂದೆ ಕುಟುಂಬದ ಹಿರಿಯರು ಒಂದೆರಡು ವಿಗ್ರಹಗಳಿಂದ ಆರಂಭಿಸಿದ ಗಣೇಶನ ವಿಗ್ರಹ ತಯಾರಿ ಇಂದಿಗೂ ಉಳಿದುಕೊಂಡಿದೆ. ಇದೀಗ ಈ ಮನೆಯಲ್ಲಿ ಬರೋಬ್ಬರಿ 260 ಗಣೇಶನ ವಿಗ್ರಹಗಳು ತಯಾರಾಗುತ್ತದೆ. ಇತ್ತೀಚಿನ ದಿನಗಳಲ್ಲಿ ಎಲ್ಲವೂ ಮೋಲ್ಡ್ನಿಂದ (ಅಚ್ಚಿನಿಂದ) ರಚನೆಗೊಳ್ಳುವುದರ ಜೊತೆಗೆ ಗಣೇಶನ ವಿಗ್ರಹವೂ ಪ್ಲಾಷ್ಟರ್ ಆಫ್ ಪ್ಯಾರೀಸ್ನಿಂದಲೇ ರಚನೆಯಾಗುತ್ತದೆ. ಆದರೆ ಈ ಮನೆಯಲ್ಲಿ ಇಂದಿಗೂ ಎಲ್ಲಾ ಗಣಪತಿಗಳನ್ನೂ ಆವೆಮಣ್ಣು ಹಾಗೂ ಬೈಹುಲ್ಲುಗಳನ್ನು ಹಾಕಿ ರಚಿಸಲಾಗುತ್ತದೆ. ಪರಿಸರಕ್ಕೆ ಹಾನಿಕಾರಕವೆನಿಸುವ ಲೆಡ್ ಅಂಶವಿರುವ ಬಣ್ಣಗಳನ್ನು ಬಳಸದೇ ಈ ಗಣೇಶನ ವಿಗ್ರಹಗಳನ್ನು ರಚಿಸಿದ್ದಾರೆ.
ಈ ಮನೆಯಲ್ಲಿ ಕುಟುಂಬಿಕರೆಲ್ಲರೂ ಒಂದಾಗಿ ಗಣೇಶನ ಜನ್ಮನಕ್ಷತ್ರವಾದ ಚಿತ್ರಾನಕ್ಷತ್ರದ ದಿನದಂದು ಎಲ್ಲಾ ಗಣಪತಿ ತಯಾರಿಗೆ ಮುಹೂರ್ತ ಇಟ್ಟು ವಿಗ್ರಹದ ಕೆಲಸ ಮಾಡಲಾರಂಭಿಸುತ್ತಾರೆ. ನಂತರ ಬರುವ ಹುಣ್ಣಿಮೆಯ ದಿನದಂದು ವಿಗ್ರಹಕ್ಕೆ ಬಣ್ಣವನ್ನು ಕೊಡಲು ಆರಂಭಿಸುತ್ತಾರೆ. ಸುಮಾರು ಎರಡು ತಿಂಗಳ ಅವಧಿಯಲ್ಲಿ ಬರೋಬ್ಬರಿ 260 ದೊಡ್ಡ ಹಾಗೂ ಚಿಕ್ಕ ಗಣಪತಿಯ ವಿಗ್ರಹಗಳನ್ನು ಇಲ್ಲಿ ತಯಾರಿಸಲಾಗುತ್ತದೆ. ಹಿಂದಿನಿಂದಲೂ ನಡೆದುಕೊಂಡು ಬಂದ ಈ ಮನೆಯ ಸಂಪ್ರದಾಯದಂತೆ ದೇಶ ವಿದೇಶದಲ್ಲಿರುವ ಕುಟುಂಬಿಕರೆಲ್ಲರೂ ಮಂಗಳೂರಿನ ಈ ಮನೆಗೆ ಬಂದು, ಒಂದು ದಿನವಾದರೂ ಈ ಗಣಪತಿ ತಯಾರಿಕೆಗೆ ಕೈ ಜೋಡಿಸುತ್ತಾರೆ. ಇತ್ತೀಚಿನ ದಿನಗಳಲ್ಲಿ ಮಣ್ಣಿನ ಅಭಾವದಿಂದಾಗಿ ಹೆಚ್ಚಿನ ಬೇಡಿಕೆ ಇದ್ದರೂ ಅದನ್ನು ತಯಾರಿಸಿ ಕೊಡಲು ಸಾಧ್ಯವಾಗುತ್ತಿಲ್ಲ. ಆದರೂ ಪ್ರತೀವರ್ಷವೂ ಒಂದೆರೆಡು ಗಣಪತಿ ವಿಗ್ರಹ ಹೆಚ್ಚಿಗೆಯಾಗುತ್ತಲೇ ಇದೆ. ಬೇರೆ ಬೇರೆ ಉದ್ಯೋಗದಲ್ಲಿರುವ ಕುಟುಂಬಿಕರೆಲ್ಲೂ ಇಂದಿಗೂ ಈ ಮಣ್ಣಿನ ಗಣಪತಿಯ ತಯಾರಿಕೆಯಲ್ಲಿ ಕೈ ಜೋಡಿಸುತ್ತಾರೆ, ಎ೦ದು ರಾಮಚಂದ್ರ ರಾವ್, ವಿಗ್ರಹ ತಯಾರಕರು ಹೇಳಿದರು.
ಈ ಗಣಪತಿಯ ವಿಗ್ರಹ ತಯಾರಿಯನ್ನು ದೇವರ ಒಂದು ಸೇವೆ ಎಂದುಕೊಂಡಿರುವ ಈ ಕುಟುಂಬ ವಿಗ್ರಹವನ್ನು ಕೊಳ್ಳುವವರಿಗೆ ಇಷ್ಟು ಹಣ ಎಂದು ನಿಗದಿಪಡಿಸೋದಿಲ್ಲ. ಗಣೇಶನ ವಿಗ್ರಹವನ್ನು ಕೊಳ್ಳುವವರು ನೀಡಿದ ಹಣವನ್ನು ಪಡೆಯುವ ಈ ಕುಟುಂಬ ಅದರಲ್ಲೇ ಸಂತೋಷದಿಂದಿರುತ್ತದೆ. ಜಿಲ್ಲೆಯ ವಿವಿಧೆಡೆ ನಡೆಯುವ ಹೆಚ್ಚಿನ ಸಾರ್ವಜನಿಕ ಗಣೇಶೋತ್ಸವಕ್ಕೆ ಇಲ್ಲಿಂದಲೇ ವಿಗ್ರಹಗಳನ್ನು ಕೊಂಡೊಯ್ಯಲಾಗುತ್ತದೆ. ಇಂತಹ ಮಣ್ಣಿನ ವಿಗ್ರಹಗಳನ್ನು ವಿಸರ್ಜನೆ ಮಾಡೋದರಿಂದ ಪರಿಸರ ಮಾಲಿನ್ಯವೂ ಆಗೋದಿಲ್ಲ. ಒಟ್ಟಿನಲ್ಲಿ ಈ ಕುಟುಂಬದ ಗಣೇಶ ಸೇವೆ ಎಲ್ಲರಿಂದಲೂ ಸೈ ಎಂದಿನಿಸಿಕೊಂಡಿದೆ, ಎಂದು ವೆಂಕಟೇಶ್ ರಾವ್, ವಿಗ್ರಹ ತಯಾರಕರು ಹೇಳಿದರು.