ಮಳೆಗಾಲದಲ್ಲಿ ಹೆಚ್ಚಾಗಿ ಎಲ್ಲರೂ ಆರೋಗ್ಯದ ಬಗ್ಗೆ ಕಾಳಜಿ ವಹಿಸಬೇಕಾಗುತ್ತದೆ. ಈ ಸಮಯದಲ್ಲಿ ಗಾಡಿಯಲ್ಲಿ ಪ್ರಯಾಣ ಮಾಡುವಾಗ ಇನ್ನು ಹೆಚ್ಚಿನ ಎಚ್ಚರಿಕೆವಹಿಸಬೇಕಾಗುತ್ತದೆ. ಮಳೆ ಹೆಚ್ಚಾದಾಗ ರಸ್ತೆ ಕಾಣದ ಹಾಗೆ ನೀರು ತುಂಬಿಕೊಳ್ಳುತ್ತದೆ. ಅಂತಹ ಸಮಯದಲ್ಲಿ ಚಾಲಕರು ತುಂಬಾ ಜಾಗೃತೆಯಿಂದ ಗಾಡಿ ಓಡಿಸಬೇಕಾಗುತ್ತದೆ.
ಮಳೆಯಲ್ಲೇ ವಾಹನ ಚಲಾಯಿಸುವುದು ಎಂದರೆ ಅನೇಕರಿಗೆ ಇಷ್ಟವಾಗುತ್ತದೆ. ಆದರೆ ಇನ್ನೂ ಕೆಲವರಿಗೆ ಮಳೆ ಎಂದರೆ ಆಗುವುದಿಲ್ಲ. ತುಂಬಾ ಕಷ್ಟಪಟ್ಟು ಮಳೆಯಲ್ಲಿ ಗಾಡಿ ಓಡಿಸುತ್ತಿರುತ್ತಾರೆ. ಆದರೆ ಮಳೆಗಾಲದಲ್ಲಿ ವಾಹನ ಚಾಲನೆ ಮಾಡುವಾಗ ಬಹಳ ಎಚ್ಚರಿಕೆವಹಿಸಬೇಕು. ಅಪಘಾತಗಳಾಗುವ ಸಾಧ್ಯತೆ ಹೆಚ್ಚಿರುತ್ತದೆ.
ಸ್ಕೂಟರ್ ಅಥವಾ ಬೈಕ್ನಂತಹ ದ್ವಿಚಕ್ರ ವಾಹನವನ್ನು ಓಡಿಸುವಾಗ ವಿಶೇಷ ಕಾಳಜಿ ವಹಿಸುವುದು ಬಹಳ ಅನಿವಾರ್ಯವಾಗಿದೆ. ಭಾರಿ ಮಳೆಯಿಂದಾಗಿ ನಗರಗಳ ಬಹುತೇಕ ರಸ್ತೆಗಳಲ್ಲಿ ನೀರು ತುಂಬಿ, ನದಿಯಂತಾಗುತ್ತದೆ. ಕೆಲವೆಡೆ ರಸ್ತೆ ಜಾರಿಕೆ ಇರುತ್ತದೆ. ಹಾಗಾಗಿ ಮಳೆಗಾಲದಲ್ಲಿ ಗಾಡಿ ಓಡಿಸುವಾಗ ಯಾವ ಕ್ರಮಗಳನ್ನ ತೆಗೆದುಕೊಳ್ಳಬೇಕು ಎಂಬ ಸಲಹೆ ಇಲ್ಲಿದೆ.
ಟೈರ್ ಬಗ್ಗೆ ಕಾಳಜಿ ವಹಿಸುವುದು: ಮಳೆಯಲ್ಲಿ ಬೈಕ್ ಅಥವಾ ಸ್ಕೂಟಿ ಓಡಿಸುವಾಗ ಟೈರ್ ಯಾವ ಪರಿಸ್ಥಿತಿಯಲ್ಲಿದೆ ಎಂಬುದನ್ನ ನಾವು ನೋಡಿಕೊಂಡಿರಬೇಕು. ನಿಮ್ಮ ಟೈರ್ಗಳು ಸವೆದಿದ್ದರೆ, ಬೀಳುವ ಸಾಧ್ಯತೆ ಹೆಚ್ಚಿದೆ. ಹಾಗಾಗಿ ಟೈರ್ನಲ್ಲಿ ಸ್ವಲ್ಪ ಸಮಸ್ಯೆ ಕಂಡರೂ ಸಹ ತಡಮಾಡದೆ ಹಿಡಿತವಿರುವ ಟೈರ್ ನ್ನು ಹಾಕಿಸಬೇಕು.
ನೀರಿರುವ ಕಡೆ ನಿಧಾನವಾಗಿ ಚಾಲನೆ ಮಾಡಿ: ನೀವು ಅದೆಷ್ಟೇ ಪಳಗಿದ ಚಾಲಕರಾಗಿದ್ದರೂ ಸಹ ಮಳೆಗಾಲದಲ್ಲಿ ನಿಧಾನವಾಗಿ ಬೈಕ್ ಓಡಿಸುವುದು ಉತ್ತಮ. ಅದರಲ್ಲೂ ನೀರು ಇರುವ ಕಡೆ ನಿಧಾನವಾಗಿ ನೋಡಿಕೊಂಡು ವಾಹನವನ್ನು ಚಲಾಯಿಸಬೇಕು.
ಅಂತರ ಕಾಯ್ದುಕೊಳ್ಳಿ: ಮಳೆಗಾಲದಲ್ಲಿ ಹಿಂದೆ ಮುಂದೆ ಬರುವ ವಾಹನಗಳ ಬಗ್ಗೆ ಎಚ್ಚರಿಕೆ ಇರಲಿ. ಸಾಧ್ಯವಾದಷ್ಟು ಅಂತರ ಇಟ್ಟುಕೊಂಡರೆ ಬಹಳ ಉತ್ತಮವೆನಿಸುತ್ತದೆ.
ವಾಹನದ ಹೆಡ್ಲೈಟ್ಗಳನ್ನು ಸಹ ಆನ್ ಮಾಡಿ. ಇದರಿಂದ ಮಳೆಯಲ್ಲಿ ತೊಂದರೆ ಆಗುವ ಸಾಧ್ಯತೆ ಕಡಿಮೆ ಇರುತ್ತದೆ.
ಬ್ರೇಕ್ಗಳ ಸರಿಯಾದ ಬಳಕೆ: ಮಳೆಗಾಲದಲ್ಲಿ ಹೇಗೆ ನೀವ್ ಟೈರ್ ಬಗ್ಗೆ ಗಮನ ಕೊಡುತ್ತಿರೋ ಹಾಗೆಯೇ, ಬ್ರೇಕ್ ಬಗ್ಗೆ ಸಹ ಗಮನಕೊಡಬೇಕು. ಬ್ರೇಕ್ ನಲ್ಲಿ ಸಮಸ್ಯೆ ಇದ್ದರೆ ಬಹಳ ಕಷ್ಟವಾಗುತ್ತದೆ. ಇದರಿಂದ ಅಪಘಾತವಾಗುವ ಸಾಧ್ಯತೆ ಇರುತ್ತದೆ.
ಜಾಸ್ತಿ ನೀರಿರುವ ರಸ್ತೆಗೆ ಹೋಗಬೇಡಿ: ಮಳೆಗಾಲದಲ್ಲಿ ನಿಮಗೆ ಯಾವ ರಸ್ತೆಯಲ್ಲಿ ಹೆಚ್ಚು ನೀರು ಇರುತ್ತದೆ ಎಂದು ಮಾಹಿತಿ ಇದ್ದರೆ ಆ ಕಡೆ ಹೋಗಬೇಡಿ. ಸ್ವಲ್ಪ ನೀರು ಇದ್ದರೂ ಬೇರೆ ಮಾರ್ಗ ಇದ್ದರೆ ಬದಲಾಯಿಸುವುದು ಉತ್ತಮ ಎಂದು ಹೇಯಳಬಹುದು.