ಭಾರತದಲ್ಲಿ ಎಲೆಕ್ಟ್ರಿಕ್ ಕಾರು ತಯಾರಿಕೆ ಘಟಕ ಸ್ಥಾಪಿಸಲು ಸಿದ್ಧವಾಗಿರುವ ಟೆಸ್ಲಾ ಸಂಸ್ಥೆ ಶೀಘ್ರದಲ್ಲೇ ಕೇಂದ್ರ ವಾಣಿಜ್ಯ ಸಚಿವರನ್ನು ಭೇಟಿಯಾಗಿ ಮಾತುಕತೆ ನಡೆಸುವ ಸಾಧ್ಯತೆ ಕಂಡುಬರುತ್ತಿದೆ.
ವಿಶ್ವ ಎಲೆಕ್ಟ್ರಿಕ್ ಕಾರು ಮಾರುಕಟ್ಟೆಯಲ್ಲಿ ಅಗ್ರಗಣ್ಯ ಎನಿಸಿರುವ ಇಲಾನ್ ಮಸ್ಕ್ ಮಾಲಕತ್ವದ ಟೆಸ್ಲಾ ಸಂಸ್ಥೆ ಇದೀಗ ಭಾರತದ ಮಾರುಕಟ್ಟೆಗೆ ಆಕ್ರಮಿಸಲು ತಯಾರಿ ನಡೆಸಿದೆ. ವರದಿಗಳ ಪ್ರಕಾರ ಭಾರತದ ಮಾರುಕಟ್ಟೆಯನ್ನು ಗಮನದಲ್ಲಿರಿಸಿಕೊಂಡು ಕಡಿಮೆ ಬೆಲೆಯ ಎಲೆಕ್ಟ್ರಿಕ್ ಕಾರೊಂದನ್ನು ತಯಾರಿಸಲು ಟೆಸ್ಲಾ ನಿರ್ಧರಿಸಿದೆ. ಅದರಲ್ಲೂ, ಭಾರತದಲ್ಲೇ ಘಟಕ ಸ್ಥಾಪಿಸಿ ಅಲ್ಲಿಯೇ ಕಾರಿನ ಉತ್ಪಾದನೆ ಮಾಡುವುದು ಟೆಸ್ಲಾ ಕಂಪನಿಯ ಉದ್ದೇಶ ಆಗಿದೆ.
ರಾಯ್ಟರ್ಸ್ ಸುದ್ದಿ ಸಂಸ್ಥೆಯ ವರದಿ ಪ್ರಕಾರ ಟೆಸ್ಲಾದ ನಿಯೋಗವೊಂದು ಕೇಂದ್ರ ವಾಣಿಜ್ಯ ಸಚಿವ ಪೀಯುಶ್ ಗೋಯಲ್ ಅವರನ್ನು ಶೀಘ್ರದಲ್ಲೇ ಭೇಟಿಯಾಗಿ ಈ ಸಂಬಂಧ ಮಾತುಕತೆ ನಡೆಸುವ ಸಾಧ್ಯತೆ ಇದೆ ಎಂದು ತಿಳಿಸಿದೆ.
ಭಾರತದಲ್ಲಿ ಟೆಸ್ಲಾ ನಿರ್ಮಿಸಲು ಉದ್ದೇಶಿಸಿರುವ ಕಾರಿನ ಬೆಲೆ ಅಂದಾಜು ಮೊತ್ತ 20 ಲಕ್ಷ ರೂ ಇರಬಹುದು. ಇಲ್ಲಿ ತಯಾರಾಗುವ ಕಾರುಗಳು ಕೇವಲ ಭಾರತದ ಮಾರುಕಟ್ಟೆಗೆ ಮಾತ್ರವಲ್ಲ, ವಿದೇಶಗಳಿಗೆ ರಫ್ತು ಮಾಡುವ ಉದ್ದೇಶ ಇದೆ.
ಟೆಸ್ಲಾದ ಎಲೆಕ್ಟ್ರಿಕ್ ಕಾರುಗಳು ಉತ್ಕೃಷ್ಟ ಗುಣಮಟ್ಟಕ್ಕೆ ಹೆಸರುವಾಸಿಯಾಗಿವೆ. ಇದರ ಅತ್ಯಂತ ಕಡಿಮೆ ಬೆಲೆಯ ಕಾರೆಂದರೆ ಅದು ಮಾಡೆಲ್ 3 ರೇರ್ ವೀಲ್ ಡ್ರೈವ್. ಇದರ ಬೆಲೆ ಸುಮಾರು 35ರಿಂದ 40 ಲಕ್ಷ ರೂನಿಂದ ಆರಂಭವಾಗುತ್ತದೆ. ಆದರೆ ಭಾರತದಲ್ಲಿ ಇದಕ್ಕಿಂತಲೂ ಕಡಿಮೆ ಬೆಲೆಗೆ ಗುಣಮಟ್ಟದ ಎಲೆಕ್ಟ್ರಿಕ್ ಕಾರು ನಿರ್ಮಿಸುವ ಗುರಿ ಟೆಸ್ಲಾ ಆಲೋಚಿಸಿದೆ.
ಈ ಹಿಂದೆ ಟೆಸ್ಲಾ ಕಾರನ್ನು ಭಾರತಕ್ಕೆ ರಫ್ತು ಮಾಡಿ ಆ ಮೂಲಕ ಮಾರುಕಟ್ಟೆಗೆ ಲಗ್ಗೆ ಇಡಲು ಬಹಳ ಪ್ರಯತ್ನಿಸಿತ್ತು. ಆದರೆ, ಕಾರುಗಳ ಆಮದಿಗೆ ಸರ್ಕಾರ ಸಾಕಷ್ಟು ಸುಂಕ ವಿಧಿಸುತ್ತಿರುವುದರಿಂದ ಟೆಸ್ಲಾಗೆ ಈ ರೀತಿ ಮಾಡಲು ಸಾಧ್ಯವಾಗಿಲ್ಲ. ಆಮದು ತೆರಿಗೆ ಕಡಿಮೆಗೊಳಿಸಬೇಕೆಂಬ ಟೆಸ್ಲಾ ಬೇಡಿಕೆಗೆ ಸರ್ಕಾರ ಒಪ್ಪಿಕೊಂಡಿರಲಿಲ್ಲ. ಸ್ಥಳೀಯವಾಗಿ ಕಾರು ತಯಾರಿಕೆ ಮಾಡಬೇಕೆನ್ನುವುದು ಸರಕಾರದ ಷರತ್ತಾಗಿತ್ತು. ಕೊನೆಗೂ ಸರ್ಕಾರದ ಮಾತಿಗೆ ಟೆಸ್ಲಾ ತಲೆಬಾಗುವುದು ಅನಿವಾರ್ಯ ಆಗಿ ಈಗ ಭಾರತದಲ್ಲಿಯೇ ಕಂಪನಿಯನ್ನು ಪ್ರಾರಂಭಿಸಲು ಮುಂದಾಗಿದೆ.
ಭಾರತದಲ್ಲಿ ಹೆಚ್ಚಿನ ಸಂಖ್ಯೆಯಲ್ಲಿ ಇವಿಗಳು ಇಲ್ಲದೆ ಇರುವುದರಿಂದ ಈ ವಾಹನಗಳು ಬಂದರೆ ಬೇಡಿಕೆ ಹೆಚ್ಚುತ್ತದೆ. ಈ ಸಂದರ್ಭದಲ್ಲಿ ಉತ್ತಮ ಗುಣಮಟ್ಟದ ಕಡಿಮೆ ಬೆಲೆಯ ಟೆಸ್ಲಾ ಕಾರು ಮಾರುಕಟ್ಟೆಗೆ ಬಂದರೆ ಹಿಟ್ ಆಗುವುದರಲ್ಲಿ ಅನುಮಾನ ಇಲ್ಲ ಎನ್ನುತ್ತಾರೆ ಮಾರುಕಟ್ಟೆ ತಜ್ಞರು.