ಬಡವರ ಬಾದಾಮಿ ಎಂದು ಕರೆಸಿಕೊಳ್ಳುವ ಕಡಲೆಕಾಯಿಯಲ್ಲಿ ಆರೋಗ್ಯದ ಗುಟ್ಟು ಅಡಗಿದೆ ಅನ್ನುವುದು ಎಲ್ಲರಿಗೂ ಸಾಮಾನ್ಯವಾಗಿ ತಿಳಿದಿದೆ ಏನೆಲ್ಲಾ ಪ್ರೋಟೀನ್ಸ್ ಇದೆ? ಇದರಿಂದ ಆರೋಗ್ಯಕ್ಕೆ ಎಷ್ಟೆಲ್ಲಾ ಪ್ರಯೋಜನಕಾರಿ ಎಂದು ನೋಡೋಣ.
ಬಡವರ ಬಾದಾಮಿ ಕಡಲೆಕಾಯಿ ಬೀಜವನ್ನು ದಿನ ನಿತ್ಯದ ಅಡುಗೆಗೆ ಬಳಸಲಾಗುತ್ತದೆ. ಆದರೆ ಈ ಕಡಲೆಕಾಯಿ ಬೀಜದಲ್ಲಿ ಯಾವ ಪ್ರಮಾಣದಲ್ಲಿ ಪ್ರೋಟೀನ್ ಅಂಶಗಳು ಇರುತ್ತದೆ ಎಂಬುದು ನಿಮಗೆ ತಿಳಿದರೆ ನಿಜಕ್ಕೂ ನೀವು ಆಶ್ಚರ್ಯ ಪಡುತ್ತೀರಿ. ಹೌದು ಕಡಲೆಕಾಯಿ ಬೀಜದಲ್ಲಿ ಸಾಕಷ್ಟು ವಿಟಮಿನ್ ಮತ್ತು ಮಿನರಲ್ಸ್ಗಳು ಹೇರಳವಾಗಿವೆ.
ಇದರ ಪ್ರಯೋಜನಗಳು
ಕೊಬ್ಬಿನಾಂಶ ನಿಯಂತ್ರಣ:
ಮೂವತ್ತು ಗ್ರಾಂ ಕಡಲೆಕಾಯಿಯನ್ನು ಸೇವಿಸಿದರೆ ದೇಹಕ್ಕೆ ಎಂಟು ಗ್ರಾಂನಷ್ಟು ಪ್ರೋಟೀನ್ ದೊರೆಯುತ್ತದೆ. ಜೊತೆಗೆ, ನಾರಿನಾಂಶ, ಉತ್ತಮ ಮಟ್ಟದ ಕೊಬ್ಬು ಪೊಟ್ಯಾಷಿಯಂ ಕೂಡ ಇದರಿಂದ ಸಿಗುತ್ತದೆ. ಒಲೇಕ್ ಆಸಿಡ್ ಕಡಲೆಕಾಯಿಯಲ್ಲಿ ಇರುವುದರಿಂದ ದೇಹದಲ್ಲಿರುವ ಕೊಲೆಸ್ಟ್ರಾಲ್ ಅಂಶವನ್ನು ನಿಯಂತ್ರಿಸುತ್ತದೆ.
ವಾರದಲ್ಲಿ ಎರಡರಿಂದ ಮೂರು ದಿನ ಕಡಲೆಕಾಯಿ ಸೇವಿಸಿದರೆ ಹೃದಯಕ್ಕೆ ಸಂಬಂಧಪಟ್ಟ ಕಾಯಿಲೆಗಳು ದೂರವಾಗುತ್ತವೆ. ರಕ್ತ ಹೀನತೆ ಇದ್ದವರು ಮರೆಯದೆ ಕಡಲೆ ಬೀಜವನ್ನು ತಿನ್ನಬೇಕು. ಒಟ್ಟಾರೆಯಾಗಿ, ಆರೋಗ್ಯದ ಹಿತದೃಷ್ಟಿಯಿಂದ ಬಡವರ ಬಾದಾಮಿ ಆರೋಗ್ಯದ ಕಣಜ ಎಂದು ಕರೆಸಿಕೊಳ್ಳುತ್ತದೆ.
ಡಯಟ್ ಮಾಡಲು ಬೆಸ್ಟ್ ಫುಡ್:
ಬೀಜದಲ್ಲಿರುವ ನಾರಿನಾಂಶ ಬೇಗ ಹಸಿವಾಗದಂತೆ ತಡೆಯುತ್ತದೆ. ಅದಲ್ಲದೆ, ದೇಹದ ತೂಕವನ್ನು ಕಡಿಮೆ ಮಾಡಲು ಇದು ಸಹಕಾರಿ. ಹೀಗಾಗಿಯೇ ಮಹಿಳೆಯರು ಡಯಟ್ ಮಾಡುವುದಕ್ಕೆ ಕಡಲೆ ಬೀಜವನ್ನು ಹೆಚ್ಚಾಗಿ ಸೇವಿಸುತ್ತಾರೆ. ಜೊತೆಗೆ ಕಡಲೆಕಾಯಿಯಲ್ಲಿ ಪ್ರೊಟೀನ್, ಉತ್ತಮ ಕೊಬ್ಬು, ಕ್ಯಾಲ್ಸಿಯಂ ಅಪಾರ ಪ್ರಮಾಣದಲ್ಲಿ ಇರುತ್ತದೆ. ಮೈಯಲ್ಲಿನ ಮೂಳೆಗಳನ್ನು ಬಲಪಡಿಸಲು ಮತ್ತು ನೀವು ಫಿಟ್ ಆಗಿ ಕಾಣುವಂತೆ ಮಾಡಲು ಇದು ಸಹಕಾರಿ.
ಕಡಲೆಕಾಯಿ ಬೀಜ ಚರ್ಮದ ಕಾಂತಿ ಹೆಚ್ಚಿಸುತ್ತದೆ: ಇದರಲ್ಲಿ ಒಮೆಗಾ 6 ಕೊಬ್ಬಿನಂಶ ಇರುವುದರಿಂದ ಇದರ ಸೇವನೆ ಅತಿಯಾಗಿ ಮಾಡುವುದರಿಂದ ಚರ್ಮದ ಕಾಂತಿ ಹೆಚ್ಚಲಿದೆ.
ಮಕ್ಕಳಿಗೆ ಪ್ರಯೋಜನ:
ಪ್ರತಿ ದಿನ ಬೆಳೆಯುವ ಮಕ್ಕಳು ಹೆಚ್ಚು ಆಟವಾಡುತ್ತಾರೆ. ಅವರಿಗೆ ಪ್ರೋಟೀನ್ಯುಕ್ತ ಆಹಾರದ ಅವಶ್ಯಕತೆ ಇರುತ್ತದೆ. ದೇಹದ ಮಾಂಸಖಂಡಗಳ ಬೆಳವಣಿಗೆಗೆ ಕಡ್ಲೆಬೀಜ ಹಾಗೂ ಅದರಿಂದ ತಯಾರಿಸಿದ ತಿನಿಸುಗಳನ್ನು ತಿನ್ನಿಸುವುದು ತುಂಬಾ ಸಹಕಾರಿ. ಮೆದುಳಿನ ಬೆಳವಣಿಗೆಯಿಂದ ಮಕ್ಕಳು ಹೆಚ್ಚು ಚುರುಕಾಗಿಯೂ ಕೂಡ ಇರುತ್ತಾರೆ. ಮುಖ್ಯವಾಗಿ ಮಕ್ಕಳಲ್ಲಿ ಬರುವ ಒಬೆಸಿಟಿ ನಿಯಂತ್ರಿಸಲು ಸಾಧ್ಯವಾಗುತ್ತದೆ.
ಪುಟ್ಟ ಮಕ್ಕಳಿಗೆ ಪೀನಟ್ ಬಟರ್:
ದೋಸೆ, ಚಪಾತಿ ಮೇಲೆ ಪೀನಟ್ ಬಟರ್ (ಕಡ್ಲೆಬೀಜ ಬೆಣ್ಣೆ) ಅನ್ನು ಸವರಿ ಕೊಡುವುದರಿಂದ ಮಕ್ಕಳು ಖುಷಿಯಿಂದ ತಿನ್ನುತ್ತಾರೆ. ಹಿರಿಯರು ಮತ್ತು ಡಯಟ್ ಮಾಡುವವರು ಕಡ್ಲೆಬೀಜವನ್ನು ನೆನೆಸಿ ಸಲಾಡ್ ಮಾಡಿಕೊಂಡು ತಿಂದರೆ ಚೆನ್ನಾಗಿರುತ್ತದೆ. ದಿನನಿತ್ಯದ ತಿಂಡಿಗಳ ಜೊತೆಗೆ ಕಡ್ಲೆಬೀಜದ ಚಟ್ನಿಯನ್ನು ಕೂಡ ಮಾಡಿಕೊಂಡು ತಿನ್ನವುದು ಒಳ್ಳೆಯದು. ಹೀಗೆ ಹಲವು ರೀತಿಯ ಪ್ರಯೋಜನಗಳು ಈ ಕಡಲೆ ಬೀಜದಲ್ಲಿ ಇದೆ.