ಬಾಗಲಕೋಟೆ: ರಾಜ್ಯದಲ್ಲಿ ಮತ್ತೊಂದು ಸರ್ಕಾರ ಬದಲಾಗಿದೆ. ಅನೇಕ ಹೊಸಬರು ಜನಪ್ರತಿನಿಧಿಗಳಾಗಿ ಆಯ್ಕೆ ಆಗಿದ್ದಾರೆ. ಈ ಬದಲಾವಣೆಯ ಹಾದಿ ಕೃಷ್ಣಾ ಮೇಲ್ದಂಡೆ ಯೋಜನೆ ಸಂತ್ರಸ್ತರಿಗೂ ಇದೆಯಾ ಎನ್ನುವ ಪ್ರಶ್ನೆಗೆ ಉತ್ತರ ಸಿಗಬೇಕಿದೆ.
ಹೌದು, ಸರ್ಕಾರಗಳು ಬದಲಾದರೂ, ಕೃಷ್ಣಾ ತೀರದ ಸಂತ್ರಸ್ತರ ಗೋಳು ಮಾತ್ರ ತಪ್ಪುತ್ತಿಲ್ಲ. ಕೃಷ್ಣಾ ನ್ಯಾಯಾಧಿಕರಣ-2 ತೀರ್ಪು ಬಂದು ದಶಕ ಮುಗಿದರೂ, ಮೂರ್ನಾಲ್ಕು ಸರ್ಕಾರಗಳು ಬಂದು ಹೋದರೂ, ಬಾಧಿತ ಜಿಲ್ಲೆ ಬಾಗಲಕೋಟೆ ಸಂತ್ರಸ್ತರಿಗೆ ಮಾತ್ರ ನ್ಯಾಯ ಎನ್ನುವುದು ಇನ್ನೂ ಮರೀಚಿಕೆಯಾಗಿಯೇ ಉಳಿದಿದೆ.
ಯೋಜನೆಯ ಫಲಾನುಭವಿ ಜಿಲ್ಲೆಗಳು ಹಚ್ಚಹಸಿರಿನಿಂದ ಕಂಗೊಳಿಸಬೇಕಾದರೆ ಅದಕ್ಕಾಗಿ ತಮ್ಮದೆಲ್ಲವನ್ನು ಕಳೆದುಕೊಂಡು ತ್ಯಾಗಿಯ ಪಟ್ಟ ಹೊರುವ ಬಾಗಲಕೋಟೆ ಜಿಲ್ಲೆಯ ಸಂತ್ರಸ್ತರಿಗೆ ಮೊದಲು ನ್ಯಾಯ ಸಿಗಬೇಕು. ಆದರೆ, ಕಳೆದ ಹತ್ತು ವರ್ಷಗಳ ಅವಧಿಯಲ್ಲಿ ಅದ್ಯಾವುದೂ ನಿರೀಕ್ಷಿತ ಪ್ರಮಾಣದಲ್ಲಿ ಆಗಿಲ್ಲ ಎನ್ನುವುದನ್ನು ಅಲ್ಲಗಳೆಯುವಂತಿಲ್ಲ.
ಬಾಗಲಕೋಟೆ ಜಿಲ್ಲೆಯ ಗೋವಿಂದ ಕಾರಜೋಳ ಅವರು ಬೊಮ್ಮಾಯಿ ಸರ್ಕಾರದಲ್ಲಿ ಸಂತ್ರಸ್ತರ ವಿಚಾರದಲ್ಲಿ ಒಂದು ದೃಢವಾದ ಹೆಜ್ಜೆ ಇಟ್ಟಿದ್ದರು. ಯೋಜನೆಗೆ ಭೂಮಿ ಕಳೆದುಕೊಳ್ಳುವ ಸಂತ್ರಸ್ತರಿಗೆ ಒಣಭೂಮಿಗೆ ಎಕರೆಗೆ 5 ಲಕ್ಷ ಹಾಗೂ ನೀರಾವರಿಗೆ 6 ಲಕ್ಷ ಅಂದರೆ ನಾಲ್ಕು ಪಟ್ಟು ಸೇರಿ ಕ್ರಮವಾಗಿ 20 ಹಾಗೂ 24 ಲಕ್ಷ ರೂ. ಬೆಲೆ ನಿಗದಿ ಮಾಡಿ, ಭೂಸ್ವಾಧೀನ ಪ್ರಕ್ರಿಯೆ ಆರಂಭಿಸಿದ್ದರು.
ಇದೀಗ ಬಿಜೆಪಿ ಸರ್ಕಾರ ಹೋಗಿ, ಕಾಂಗ್ರೆಸ್ ಸರ್ಕಾರ ಬಂದಿದೆ. ಮತ್ತೊಮ್ಮೆ ಸಿದ್ದರಾಮಯ್ಯ ಮುಖ್ಯಮಂತ್ರಿ ಆಗಿದ್ದಾರೆ. ಉಪ ಮುಖ್ಯಮಂತ್ರಿ ಡಿ. ಕೆ. ಶಿವಕುಮಾರ್ ಜಲಸಂಪನ್ಮೂಲ ಸಚಿವರಾಗಿದ್ದಾರೆ. ಈ ಹಿಂದೆ ಡಿಕೆಶಿ ಅವರು ಈ ಖಾತೆಯನ್ನು ಹೊಂದಿದ ಅವಧಿಯಲ್ಲಿ ಯೋಜನೆ ಪ್ರಗತಿ ಕಂಡಿರಲಿಲ್ಲ. ರಮೇಶ ಜಾರಕಿಹೊಳಿ ಅವಧಿಯಲ್ಲೂ ಹೇಳಿಕೊಳ್ಳುವ ಪ್ರಗತಿ ಕಾಣಲಿಲ್ಲ. ಇದಕ್ಕೂ ಮುನ್ನ 2013ರಿಂದ 2018ರಲ್ಲಿ ಯೋಜನೆಯ ಫಲಾನುಭವಿ ಜಿಲ್ಲೆಯ ಎಂ. ಬಿ. ಪಾಟೀಲ್ ಅವರೇ ಐದು ವರ್ಷ ಜಲಸಂಪನ್ಮೂಲ ಸಚಿವರಾಗಿದ್ದ ವೇಳೆ ಅವರು ವಿಜಯಪುರ ಜಿಲ್ಲೆಗೆ ಭಗೀರಥ ಎನ್ನಿಸಿಕೊಂಡರೂ ಬಾಗಲಕೋಟೆ ಸಂತ್ರಸ್ತರ ಕಡೆಗೆ ಗಮನ ಹರಿಸಲಿಲ್ಲ ಎನ್ನುವ ಆರೋಪ ಇತ್ತು.
ಈಗ ಹೊಸ ಸರ್ಕಾರ ಬಂದಿದೆ. ನೂತನ ಸರ್ಕಾರ ಚುನಾವಣೆ ವೇಳೆ ನೀಡಿದ್ದ ಆರ್ಥಿಕ ಭಾರದ ಐದು ಗ್ಯಾರಂಟಿ ಯೋಜನೆಗಳ ಅನುಷ್ಠಾನಕ್ಕೆ ಹೆಚ್ಚಿನ ಒತ್ತು ಕೊಡುತ್ತದೆ ಎನ್ನುವ ಆರಂಭದ ಸುಳಿವು ನೀಡಿದೆ. ಇದಕ್ಕಾಗಿ ಅನುದಾನ ಹೊಂದಿಸಲು ಇನ್ನಿಲ್ಲದ ಹರಸಾಹಸ ಪಡಬೇಕಾದ ಪರಿಸ್ಥಿತಿ ಇದೆ. ಹೀಗಾಗಿ ಅಂದಾಜು 70 ಸಾವಿರ ಕೋಟಿ ರೂ. ವೆಚ್ಚದ ಕೃಷ್ಣಾ ಮೇಲ್ದಂಡೆ ಯೋಜನೆ ಹಂತ-3ಕ್ಕೆ ಎಷ್ಟು ಪ್ರಮಾಣದಲ್ಲಿ ಅನುದಾನ ಒದಗಿಸುತ್ತದೆ ಎನ್ನುವುದು ಸದ್ಯಕ್ಕಿರುವ ಪ್ರಶ್ನೆ. ಒದಗಿಸುವ ಅನುದಾನದ ಮೇಲೆ ಕೃಷ್ಣಾ ಸಂತ್ರಸ್ತರ ಭವಿಷ್ಯ ಅಡಗಿದೆ.
ನೀರು ನಿಲ್ಲಿಸುವ ಮುನ್ನ ಏನಾಗಬೇಕಿದೆ…?
ಆಲಮಟ್ಟಿ ಜಲಾಶಯದ ಎತ್ತರನ್ನು ಈಗ ಇರುವ 519.6 ಮೀಟರ್ ನಿಂದ 524.256 ಮೀಟರ್ ಗೆ ಎತ್ತರಿಸಬೇಕಿದೆ. ಇದಾಗಬೇಕಿದ್ದರೆ ಮೊದಲು ಮುಳುಗಡೆ ಆಗುವ ಜಮೀನು, ಗ್ರಾಮಗಳು, ಪುನರ್ ವಸತಿ ಮತ್ತು ಪುನರ್ ನಿರ್ಮಾಣ ಎಲ್ಲವೂ ಸೇರಿದಂತೆ 1.32 ಲಕ್ಷ ಎಕರೆ ಜಮೀನು ಸ್ವಾಧೀನ ಪಡಿಸಿಕೊಂಡು ಪರಿಹಾರ ಕೊಡಬೇಕು. ಮುಳುಗಡೆ ಆಗುವ 20 ಗ್ರಾಮಗಳಿಗೆ ಪುನರ್ ವಸತಿ ಮತ್ತು ಪುನರ್ ನಿರ್ಮಾಣ ಆಗಬೇಕು. ಆ ನಂತರವೇ ಜಲಾಶಯ ಮಟ್ಟ ಎತ್ತರಿಸಿ ನೀರು ನಿಲ್ಲಿಸಬಹುದು.
ಸದ್ಯ 20 ಗ್ರಾಮಗಳ 23321 ಕಟ್ಟಡಗಳು ಸ್ವಾಧೀನ ನಡೆದಿದೆ. 3738 ಕಟ್ಟಡಗಳ ಪರಿಹಾರ ವಿಚಾರ ಐತೀರ್ಪು ಹಂತದಲ್ಲಿದೆ. ಬಾಗಲಕೋಟೆ ನಗರದ 2330 ಕಟ್ಟಡಗಳಗಳಿಗೆ ಪರಿಹಾರವನ್ನು ಕೊಡಲಾಗಿದೆ. ಅವರಿಗೆ ಪುನರ್ ವಸತಿ ಕಲ್ಪಿಸಲು ಯುನಿಟ್-3ಕ್ಕೆ ಕಾಮಗಾರಿ ಚಾಲನೆ ನೀಡಲಾಗಿದೆ. 48427 ಎಕರೆ ಜಮೀನು ಸ್ವಾಧೀನ ವಿವಿಧ ಹಂತದಲ್ಲಿದೆ. ಇದೀಗ ಸರ್ಕಾರ ಬದಲಾಗಿ, ಇಲಾಖೆ ಸಚಿವರು ಹಳೇ ಮೈಸೂರು ಭಾಗದ ಡಿ. ಕೆ. ಶಿವಕುಮಾರ್ ಅವರು ವಹಿಸಿಕೊಂಡಿರೆ.
ಮಾಜಿ ಸಚಿವ ಕಾರಜೋಳ ಏನಂತಾರೆ…?
ಕೃಷ್ಣಾ ಮೇಲ್ದಂಡೆ ಯೋಜನೆ ಹಂತ-3 ರ ಬಗ್ಗೆ ಈ ಸರ್ಕಾರ ಯಾವ ತೀರ್ಮಾನ ತೆಗೆದುಕೊಳ್ಳುತ್ತದೆ. ಬಜೆಟ್ ನಲ್ಲಿ ನಾವು ಇಟ್ಟಿದ್ದ ಅನುದಾನದ ವಿಚಾರವಾಗಿ ಏನು ಮಾಡುತ್ತದೆ ಎಂದು ಗೊತ್ತಿಲ್ಲ. ಹೀಗಾಗಿ ಸದ್ಯ ಆ ಬಗ್ಗೆ ನಾನು ಹೆಚ್ಚೇನು ಹೇಳಲ್ಲ. ನಮ್ಮ ಸರ್ಕಾರದಲ್ಲಿ ನಾನು ಇಲಾಖೆ ಸಚಿವನಾಗಿದ್ದಾಗ ಮುಳುಗಡೆ ಜಮೀನಿಗೆ ಒಣಭೂಮಿಗೆ 20 ಲಕ್ಷ ಹಾಗೂ ನೀರಾವರಿಗೆ 24 ಲಕ್ಷ ರೂ. ಬೆಲೆ ನಿಗದಿ ಪಡಿಸಿ, ಪೇಮೆಂಟ್ ಸಹ ಆರಂಭಿಸಿದ್ದೇವು. ಮುಖ್ಯವಾಗಿ ಮುಳುಗಡೆ ಆಗುವ ಕಟ್ಟಡಗಳಿಗೆ ಹಿಂದೆ ಸವಕಳಿ ತೆಗೆಯುತ್ತಿದ್ದ ನಿಯಮ ಬದಲಾವಣೆ ಮಾಡಿ ಕಟ್ಟಡಕ್ಕೆ ಸಿಎಸ್ ಆರ್ ಬೆಲೆಯ ಜೊತೆಗೆ ಹೆಚ್ಚುವರಿಯಾಗಿ ಶೇ.20 ರಷ್ಟು ಪರಿಹಾರ ಸೇರಿಸಿ ಕೊಟ್ಟಿದ್ದೇವೆ. ಇನ್ನು ಬಜೆಟ್ ನಲ್ಲಿ ಈ ವರ್ಷ 5 ಸಾವಿರ ಕೋಟಿ ರೂ. ಅನುದಾನ ಇಟ್ಟಿದ್ದು, ಅದನ್ನು ಖರ್ಚು ಮಾಡಿದಲ್ಲಿ ಹೆಚ್ಚುವರಿ 2.5 ಸಾವಿರ ಕೋಟಿ ರೂ. ಅನುದಾನ ನೀಡಲು ಮುಖ್ಯಮಂತ್ರಿಗಳು ಅನುಮೋದನೆ ನೀಡಿದ್ದರು. ಈಗ ಹೊಸ ಸರ್ಕಾರ ಏನು ಮಾಡುತ್ತದೆ ನೋಡಬೇಕು. ಸದ್ಯ ಪೇಮೆಂಟ್ ಸ್ಟಾಪ್ ಮಾಡಿಸಿದ್ದಾರೆ ಎನ್ನುವ ಮಾಹಿತಿ ಕೇಳಿ ಬಂದಿದೆ. ಮೊದಲು ಯೋಜನೆ ವಿಚಾರವಾಗಿ ಸರ್ಕಾರ ಯಾವ ಹೆಜ್ಜೆ ಇಡುತ್ತದೆ ನೋಡಿಕೊಂಡು ಮುಂದೆ ಈ ಬಗ್ಗೆ ವಿಸ್ತೃತವಾಗಿ ಮಾತನಾಡುತ್ತೇನೆ ಎಂದು ತಿಳಿಸಿದ್ದಾರೆ.
ಸಿದ್ದರಾಮಯ್ಯ ಅವರು ಚುನಾವಣೆ ವೇಳೆ ಈ ಭಾಗದ ಪ್ರಚಾರ ಭಾಷಣದಲ್ಲಿ ಕೃಷ್ಣಾ ಯೋಜನೆ ಸೇರಿ ಎಲ್ಲ ನೀರಾವರಿ ಯೋಜನೆಗಳಿಗೆ ವಾರ್ಷಿಕ 40 ಸಾವಿರ ಕೋಟಿ ರೂ.ಗಳಂತೆ ಐದು ವರ್ಷದಲ್ಲಿ 2 ಲಕ್ಷ ಕೋಟಿ ಖರ್ಚು ಮಾಡುವುದಾಗಿ ಹೇಳಿದ್ದರು. ಈಗ ನುಡಿದಂತೆ ನಡೆದುಕೊಳ್ಳಬೇಕು. ಕೃಷ್ಣಾ ಯೋಜನೆಗೆ ಪ್ರತಿ ವರ್ಷ 20 ಸಾವಿರ ಕೋಟಿ ಅನುದಾನ ಕೊಟ್ಟು ಐದು ವರ್ಷದಲ್ಲಿ ಪೂರ್ಣಗೊಳಿಸಬೇಕು. ಆ ಮೂಲಕ ತಮ್ಮ ಸರ್ಕಾರ ಬದ್ದತೆ ತೋರಿಸಬೇಕು ಎಂದು ಬಾಗಲಕೋಟೆ ಉತ್ತರ ಕರ್ನಾಟಕ ಸ್ವಾಭಿಮಾನ ವೇದಿಕೆ ಸಂಚಾಲಕರು ಪ್ರಕಾಶ ಅಂತರಗೊಂಡ ಹೇಳಿದರು.