ಕೇಂದ್ರ ಸಚಿವ ಸಂಪುಟವು ಭಾರತ್ ಸಂಚಾರ್ ನಿಗಮ್ ಲಿಮಿಟೆಡ್ (ಬಿಎಸ್ಎನ್ಎಲ್)ಗೆ ಮರುಜೀವ ನೀಡಲು 89,000 ಕೋಟಿ ರೂಪಾಯಿಗಳ ಪುನರುಜ್ಜೀವನ ಪ್ಯಾಕೇಜ್ಗೆ ಬುಧವಾರ ಅನುಮೋದನೆ ನೀಡಿದೆ.
ಈ ಪ್ಯಾಕೇಜ್ನ್ನು ಬಿಎಸ್ಎನ್ಎಲ್ನ 4ಜಿ ಮತ್ತು 5ಜಿ ಸೇವೆಗಳನ್ನು ಹೆಚ್ಚಿಸಲು ಬಳಸಿಕೊಳ್ಳಲಾಗುತ್ತದೆ. ಇದರೊಂದಿಗೆ ಬಿಎಸ್ಎನ್ಎಲ್ನ ಅಧಿಕೃತ ಬಂಡವಾಳವನ್ನು 1 ಲಕ್ಷದ 50 ಸಾವಿರ ಕೋಟಿಯಿಂದ 2 ಲಕ್ಷದ 10 ಸಾವಿರ ಕೋಟಿಗೆ ಹೆಚ್ಚಿಸಲಾಗುವುದು ಎಂದು ಸರ್ಕಾರದ ಪ್ರಕಟಣೆ ತಿಳಿಸಿದೆ.
ಪುನರುಜ್ಜೀವನ ಪ್ಯಾಕೇಜ್ನಿಂದಾಗಿ ಬಿಎಸ್ಎನ್ಎಲ್ ಇನ್ನು ಮುಂದೆ ತನ್ನ ಸೇವೆಯನ್ನು ಹೆಚ್ಚಿಸಲಿದ್ದು,ಪ್ಯಾನ್ ಇಂಡಿಯಾ ಮಟ್ಟದಲ್ಲಿ 4ಜಿ ಮತ್ತು 5ಜಿ ಸೇವೆಗಳನ್ನು ಒದಗಿಸಲಿದೆ. ಹಾಗೆಯೇ ವಿವಿಧ ಸಂಪರ್ಕ ಯೋಜನೆಗಳ ಅಡಿಯಲ್ಲಿ ಗ್ರಾಮೀಣ ಮತ್ತು ಟೆಲಿಕಾಂ ಸೇವೆಗಳು ತಲುಪದ ಗ್ರಾಮಗಳನ್ನು 4ಜಿ ವ್ಯಾಪ್ತಿಗೆ ತರಲಿದೆ. ಇನ್ನು ಹೆಚ್ಚಿನ ವೇಗದ ಇಂಟರ್ನೆಟ್ಗಾಗಿ ಫಿಕ್ಸೆಡ್ ವೈರ್ಲೆಸ್ ಆಕ್ಸೆಸ್ ಸೇವೆಗಳನ್ನು ಒದಗಿಸಲಿದೆ. ಕ್ಯಾಪ್ಟಿವ್ ನಾನ್-ಪಬ್ಲಿಕ್ ನೆಟ್ವರ್ಕ್ಗಾಗಿ ಸೇವೆಗಳು/ಸ್ಪೆಕ್ಟ್ರಮ್ ಒದಗಿಸಲಿದೆ ಎಂದು ಸರ್ಕಾರ ತಿಳಿಸಿದೆ.
ಸರ್ಕಾರ ಬಿಎಸ್ಎನ್ಎಲ್ಗೆ ಇದೇ ಮೊದಲ ಬಾರಿಗೆ ಪುನರುಜ್ಜೀವನ ಪ್ಯಾಕೇಜ್ ಅನ್ನು ಘೋಷಿಸುತ್ತಿರುವುದಲ್ಲ. ಈ ಹಿಂದೆ 2019ರಲ್ಲಿ ಸರ್ಕಾರವು ಬಿಎಸ್ಎನ್ಎಲ್/ಎಂಟಿಎನ್ಎಲ್ಗಾಗಿ 69,000 ಕೋಟಿ ರೂ. ಮೊತ್ತದ ಮೊದಲ ಪುನರುಜ್ಜೀವನ ಪ್ಯಾಕೇಜ್ ಅನ್ನು ನೀಡಿತ್ತು. ನಂತರ 2022ರಲ್ಲಿ ಸರ್ಕಾರವು ಬಿಎಸ್ಎನ್ಎಲ್/ಎಂಟಿಎನ್ಎಲ್ಗಾಗಿ 1.64 ಲಕ್ಷ ಕೋಟಿ ರೂ. ಮೊತ್ತದ ಎರಡನೇ ಪುನರುಜ್ಜೀವನ ಪ್ಯಾಕೇಜ್ ಅನ್ನು ಘೋಷಿಸಿತ್ತು. ಇದೀಗ ಮೂರನೇ ಪ್ಯಾಕೇಜ್ ಅನ್ನು ಘೋಷಿಸಲಾಗಿದೆ.
ಈ ಪುನರುಜ್ಜೀವನ ಪ್ಯಾಕೇಜ್ನಿಂದ ಭಾರತದ ದೂರದ ಭಾಗಗಳಿಗೆ ಸಂಪರ್ಕವನ್ನು ಒದಗಿಸುವುದರ ಮೇಲೆ ಹೆಚ್ಚಿನ ಗಮನ ಕೇಂದ್ರೀಕರಿಸಿ, ಸ್ಥಿರ ಟೆಲಿಕಾಂ ಸೇವಾ ಪೂರೈಕೆದಾರ ಸಂಸ್ಥೆಯಾಗಿ ಹೊರಹೊಮ್ಮಲು ಬಿಎಸ್ಎನ್ಎಲ್ಗೆ ಅವಕಾಶ ಸಿಗಲಿದೆ ಎಂದು ಸರ್ಕಾರ ಹೇಳಿದೆ.