ಎಸ್.ಎಸ್ .ಎಲ್.ಸಿ ಮತ್ತು ಪಿಯುಸಿ ಫಲಿತಾಂಶ ಹೊರ ಬಂದಿದ್ದೇ ತಡ ಪಾಲಕರು ಮತ್ತು ವಿದ್ಯಾರ್ಥಿಗಳಲ್ಲಿ ಮುಂದೇನು ? ಎಂಬ ಚಿಂತೆ ಉದ್ಭವಿಸುತ್ತದೆ. ಒಂದು ಕಡೆ ಇಷ್ಟು ವರ್ಷ ಜೋತೆಗಿದ್ದ ಸ್ನೇಹಿತರು ಬೇರೆಯಾಗುತ್ತೇವೆ ಎಂಬ ಚಿಂತೆಯಾದರೆ ಮತ್ತೋಂದು ಕಡೆ ಕೋರ್ಸ್ ಆಯ್ಕೆಯ ಚಿಂತೆ: ಹೀಗಾಗಿ ಪ್ರತಿ ವಿದ್ಯಾರ್ಥಿಗೂ ತನ್ನ ಕನಸಿನ ಕೋರ್ಸ್ ಆಯ್ಕೆಯ ಬಗ್ಗೆ ಗೊಂದಲ ಇದ್ದೇ ಇರುತ್ತದೆ. ಈ ಹಿನ್ನೆಲೆಯಲ್ಲಿ ಯಾವ ಕಾಲೇಜು ಮತ್ತು ಯಾವ ಕೋರ್ಸ್ ಆಯ್ಕೆ ಮಾಡಬೇಕು ಎನ್ನುವ ಕುರಿತು ನಿರ್ಧಾರ ತೆಗೆದುಕೊಳ್ಳುವ ಮುನ್ನ ತೆಗೆದುಕೊಳ್ಳಬೇಕಾದ ಮುನ್ನೆಚ್ಚರಿಕೆಯ ಬಗ್ಗೆ ಇಲ್ಲಿದೆ ಒಂದಿಷ್ಟು ಮಾಹಿತಿ.
ಆಸಕ್ತಿ
ವಿದ್ಯಾರ್ಥಿಗಳು ಯಾವ ಕೋರ್ಸ್ನಲ್ಲಿ ತಾವು ಆಸಕ್ತಿಯನ್ನು ಹೊಂದಿದ್ದೇವೆ ಎಂದು ತಿಳಿಯುವುದು ಅತ್ಯಂತ ಅವಶ್ಯಕ. ನಮ್ಮ ಮಿತ್ರರು ಯಾವ ಕೋರ್ಸ್ ಮಾಡುತ್ತರೋ ನಾನು ಅದನ್ನೇ ಮಾಡುತ್ತೇನೆ ಎಂದು ವಿದ್ಯಾರ್ಥಿಗಳ ಮನಸ್ಸಿನಲ್ಲಿ ಬರುವುದು ಸಹಜ ಆದರೆ ಅವರಿಗೆ ಸೂಕ್ತ ರೀತಿಯಾದ ಮಾರ್ಗದರ್ಶನವನ್ನು ನೀಡಬೇಕಾದದ್ದು ಪಾಲಕರ ಹಾಗೂ ಶಿಕ್ಷಕರ ಕರ್ತವ್ಯವಾಗಿದೆ. ಕಾರಣ ನಿಮ್ಮ ಮಕ್ಕಳ ಹಾಗೂ ವಿದ್ಯಾರ್ಥಿಗಳ ಸಾಮರ್ಥ್ಯ ನಿಮಗಿಂತ ಚನ್ನಾಗಿ ಬೇರಾರೂ ತಿಳಿದಿರುವದಿಲ್ಲ.
ವೃತ್ತಿಪರ ಕೋರ್ಸಗಳ ಬಗ್ಗೆ ಮಾಹಿತಿ
ಸರ್ಕಾರ ಹೊಸ ಶಿಕ್ಷಣ ನೀತಿಯನ್ನು ಜಾರಿಗೊಳಿಸಿದಾಗಿನಿಂದ ಅನೇಕ ವೃತ್ತಿಪರ ಕೋರ್ಸಗಳು ಪ್ರಾಮುಖ್ಯತೆಯನ್ನು ಪಡೆದುಕೊಂಡಿವೆ. ಕೋರ್ಸ ಮುಗಿದ ನಂತರ ಅನಾಯಾಸವಾಗಿ ಉದ್ಯೋಗವನ್ನು ಸಹ ಪಡೆಯಬಹುದು. ಉದಾಹರಣೆಗೆ ದ್ವಿತೀಯ ಪಿಯುಸಿ ನಂತರ ಕೇವಲ PCMB ಯಲ್ಲಿ Bsc ಮಾಡುವ ಬದಲು ಹೊಸ ಕೋರ್ಸಗಳಾದ
ಪತ್ರಿಕೋದ್ಯಮ
Bsc Anastasia,
Bsc cardic care,
Bsc Nero science
Bsc critical care
Bsc in ophthalmology
MLT
Bsc in hotel management
Grafic design
ಇಂತಹ ಅನೇಕ ವೃತಿಪರ ಕೋರ್ಸಗಳು ಕಲಿಕೆಯ ನಂತರ ತ್ವರಿತವಾಗಿ ಉದ್ಯೋಗವನ್ನು ನೀಡಬಲ್ಲಂತಹ ಕೋರ್ಸಗಳಾಗಿವೆ.ಇನ್ನು ಎಸ್.ಎಸ್.ಎಲ್.ಸಿ ವಿದ್ಯಾರ್ಥಿಗಳು ಪಿಯುಸಿ ಕಲಾ, ವಿಜ್ಞಾನ, ವಾಣಿಜ್ಯ ವಿಭಾಗಗಳಲ್ಲಿ ಮಾತ್ರವೇ ಮಾಡದೆ ಅನೇಕ Diploma , certificate ಕೋರ್ಸಗಳನ್ನುಅನೇಕ ಖಾಸಗಿ ಕಂಪನಿಗಳು ಪ್ರಾರಂಭಿಸಿದ್ದು ಅವುಗಳನ್ನು ಕಲಿತು ಸ್ವಂತ ಉದ್ಯಮವನ್ನು ಸಹ ಪ್ರಾರಂಭಿಸ ಬಹುದಾಗಿದೆ.
ಅನಗತ್ಯ ಹೋಲಿಕೆ ನಿಲ್ಲಲಿ
ಪ್ರತಿ ವಿದ್ಯಾರ್ಥಿಯ ಯೋಚನಾಶಕ್ತಿ ಮತ್ತು ಬುದ್ಧಿಮಟ್ಟ ಒಂದೇ ತೇರನಾಗಿ ಇರುವದಿಲ್ಲ. ಆದ್ದರಿಂದ ಪಾಲಕರು ತಮ್ಮ ಮಕ್ಕಳನ್ನು ಇನ್ನಿತರ ಮಕ್ಕಳೊಂದಿಗೆ ಹೋಲಿಕೆ ಮಾಡುವುದನ್ನು ನಿಲ್ಲಿಸಬೇಕು. ಮತ್ತು ವೈದ್ಯ ಅಥವಾ ಇಂಜಿನಿಯರ್ ಆದರೆ ಮಾತ್ರವೇ ಉತ್ತಮ ಜೀವನ ನಡೆಸುತ್ತಾರೆ ಅಥವಾ ಬೇರೆಲ್ಲ ಕೋರ್ಸಗಳು ಕನಿಷ್ಠ ಎಂಬ ವಿಚಾರದಿಂದ ಹೊರಬರಬೇಕು. ತಮ್ಮ ಸ್ವಹಿತಾಸಕ್ತಿಗಾಗಿ ವಿದ್ಯಾರ್ಥಿಗಳ ಆಸೆಯನ್ನು ಬಲಿಕೊಡುವುದು ಬೇಡ.
ಕಾಲೇಜಿನ ವಾತಾವರಣದ ಬಗ್ಗೆ ಎಚ್ಚರವಿರಲಿ
ಕಾಲೇಜು ಜೀವನ ಮಕ್ಕಳ ಸರ್ವಾಂಗೀಣ ಬೆಳವಣಿಗೆಯಲ್ಲಿ ಅತ್ಯಂತ ಪ್ರಮುಖ ಪಾತ್ರವನ್ನು ವಹಿಸುತ್ತದೆ. ಈ ಸಮಯದಲ್ಲಿ ಮಕ್ಕಳು ಮನೆಗಿಂತ ಹೆಚ್ಚಿನ ಸಮಯವನ್ನು ಸ್ನೇಹಿತರೊಂದಿಗೆ ಕಾಲೇಜಿನಲ್ಲಿ ಕಳೆಯುತ್ತಾರೆ: ಆದ್ದರಿಂದ ಕಾಲೇಜಿನ ವಾತಾವರಣ ಮತ್ತು ಸ್ನೇಹಿತರ ಬಗ್ಗೆ ತಿಳಿಯುವುದು ಅಗತ್ಯ ಇಂತಹ ಸಮಯದಲ್ಲೇ ಮಕ್ಕಳು ದುಷ್ಚಟಗಳಿಗೆ ಬಲಿಯಾಗುತ್ತಾರೆ. ಈ ವಯಸ್ಸಿನ ಮಕ್ಕಳ ಮನಸ್ಸು ಮರ್ಕಟದಂತೆ ವರ್ತಿಸುತ್ತಿರುತ್ತದೆ ಆದ್ದರಿಂದ ಪಾಲಕರಾದವರು ಮಕ್ಕಳತ್ತ ಗಮನಹರಿಸುವುದು ಉತ್ತಮ.
ಸೂಕ್ತ ವ್ಯಕ್ತಿಗಳ ಮಾರ್ಗದರ್ಶನ
ಪಾಲಕರು ಸ್ನೇಹಿತರು ಮಾತ್ರವಲ್ಲದೆ, ಹಿರಿಯರ ಮತ್ತು ಅದೇ ಕೋರ್ಸ್ಅನ್ನು ಆಯ್ಕೆ ಮಾಡಿಕೊಂಡು ವೃತ್ತಿ ಜೀವನವನ್ನು ನಡೆಸುತ್ತಿರುವವರ ಸಲಹೆ ಸೂಚನೆಯು ಅಷ್ಟೇ ಪ್ರಮುಖವಾಗಿದೆ. ಇದರಿಂದ ನವ ಯುವಕರಿಗೆ ಸೂಕ್ತ ಮಾರ್ಗದರ್ಶನ ಲಭಿಸುತ್ತದೆ.
ಈ ಎಲ್ಲ ಸಲಹೆಗಳನ್ನು ಪಾಲಕರು ಮತ್ತು ವಿದ್ಯಾರ್ಥಿಗಳು ಗಮನ ಹರಿಸಿದರೆ ತಮ್ಮ ಭವಿಷ್ಯವನ್ನು ಉಜ್ವಲಗೋಳಿಸಲು ಸಹಾಯವಾಗುತ್ತದೆ.