2024ರ ಆರಂಭಿಕ ವೇಳೆಯಲ್ಲಿ ಎಲಾನ್ ಮಸ್ಕ್ ಒಡೆತನದ ಎಕ್ಸ್ (ಟ್ವಿಟರ್) ಲಾಭ ಕಾಣಲಿದೆ ಎಂದು ಸಿಇಒ ಲಿಂಡಾ ಯಕಾರಿನೊ ಭರವಸೆಯ ಮಾತುಗಳನ್ನಾಡಿದ್ದಾರೆ.
ಸದ್ಯ ಸಂಪೂರ್ಣವಾಗಿ ವ್ಯವಹಾರದಲ್ಲಿ ಸಂಪೂರ್ಣವಾಗಿ ತೊಡಗಿಸಿಕೊಂಡಿದ್ದು, ಮುಂದೆ ನಡೆಯಬಹುದಾದ ಕೆಲಸಗಳ ಬಗ್ಗೆ ಹೆಚ್ಚಿನ ಗಮನ ನೀಡಲಾಗುತ್ತಿದೆ. ಹಾಗಾಗಿ 2024ರ ಆರಂಭದಲ್ಲಿ ನಾವು ಲಾಭ ಗಳಿಸುತ್ತೇವೆ ಎಂದು ಲಿಂಡಾ ತಿಳಿಸಿದ್ದಾರೆ.
ಕಳೆದ 12 ವಾರಗಳಲ್ಲಿ ಟಾಪ್ 100 ಜಾಹಿತಾತುಗಾರರಲ್ಲಿ ಶೇ.90ರಷ್ಟು ಮಂದಿ ಎಕ್ಸ್ ಗೆ ಮರಳಿದ್ದಾರೆ. ಇನ್ನು ಜೂನ್ ತಿಂಗಳಿನಿಂದ ಎಕ್ಸ್ ಅನ್ನು ಬಳಕೆ ಮಾಡುವವರ ಸಂಖ್ಯೆ ಹೆಚ್ಚಾಗಿದೆ.
ಕಳೆದ ವರ್ಷ ಎಲಾನ್ ಮಸ್ಕ್ ಸ್ವಾಧೀನಪಡಿಸಿಕೊಂಡಾಗಿನಿಂದ ಸೈಟ್ ನಲ್ಲಿ ಸೂಕ್ತವಲ್ಲದ ವಿಷಯ ಹಾಗೂ ದ್ವೇಷ ಪೂರಿತ ಪೋಸ್ಟ್ ಗಳ ಹೆಚ್ಚಳವಾಗುವ ಬಗ್ಗೆ ಜಾಹಿರಾತುದಾರರು ಆತಂಕ ವ್ಯಕ್ತಪಡಿಸಿದ್ದರು ಎಂದು ವರದಿ ತಿಳಿಸಿದೆ.
ಕಳೆದ ವರ್ಷಕ್ಕೆ ಹೋಲಿಸಿದರೆ ಏ.1ರಿಂದ ಮೇ ತಿಂಗಳ ಮೊದಲ ವಾರದವರೆಗೆ ಜಾಹಿರಾತಿನ ಆದಾಯ ಕಡಿಮೆಯಾಗಿದೆ ಎಂದು ತಿಳಿದುಬಂದಿದೆ. ಇಷ್ಟು ಮಾತ್ರವಲ್ಲದೆ ಎಕ್ಸ್ ತನ್ನಲ್ಲಿನ ಉದ್ಯೋಗಿಗಳನ್ನು ವಜಾಗೊಳಿಸಿ 8000 ದಿಂದ ಈಗ 1500 ಉದ್ಯೋಗಿಗಳನ್ನು ಇರಿಸಿಕೊಂಡಿದೆ. ವಜಾಗೊಂಡ ಉದ್ಯೋಗಿಗಳಿಗೆ ಸಲ್ಲಬೇಕಾದ ಹಣವನ್ನು ನೀಡಿಲ್ಲ ಹಾಗೂ ಹಲವು ರಾಷ್ಟ್ರಗಳಲ್ಲಿ ಎಕ್ಸ್ ಸಂಸ್ಥೆ ಇರುವ ಆಫೀಸ್ ಸ್ಥಳದ ಬಾಡಿಗೆ ಕೂಡ ಪಾವತಿ ಮಾಡಿಲ್ಲ ಎಂದು ತಿಳಿದು ಬಂದಿದೆ.
ಎಲಾನ್ ಮಸ್ಕ್ ಸ್ವಾಧಿನಕ್ಕೆ ಬಂದ ಬಳಿಕ ಎಕ್ಸ್ ನಲ್ಲಿ ಸಾಕಷ್ಟು ಕಟ್ಟು ನಿಟ್ಟಿನ ನಿಯಮಗಳನ್ನು ಅನಗತ್ಯವಾಗಿ ಹೇರುವ ಮೂಲಕ ಬಳಕೆದಾರರ ಸಂಖ್ಯೆ ಕೂಡ ಕ್ರಮೇಣ ಇಳಿಕೆಯಾಗಲಾರಂಭಿಸಿದೆ.