ಬಾಗಲಕೋಟೆ: ವಿಶ್ವಮಾನ್ಯತೆ ಪಡೆದ ಪ್ರವಾಸಿ ತಾಣಗಳಿದ್ದರೂ ಜಿಲ್ಲೆಯತ್ತ ಪ್ರವಾಸಿಗರಿಗೆ ಆಕರ್ಷಣೆಯಿಲ್ಲ, ತಾಣಗಳನ್ನು ಅತ್ಯಾಕರ್ಷಕವಾಗಿ ಪರಿಚಯಿಸಿದರೆ ಮಾತ್ರ ಪ್ರವಾಸ ಉದ್ಯಮವಾಗಲಿದೆ.
ಬಾದಾಮಿ ಬನಶಂಕರಿ ದೇವಸ್ಥಾನ, ಗುಹಾಂತರ ದೇವಾಲಯಗಳು, ಪಟ್ಟದಕಲ್ಲ, ಐಹೊಳೆ, ಸಮೃದ್ಧ ಹಿನ್ನೀರು ಇಷ್ಟೆಲ್ಲ ಇದ್ದರೂ ಪ್ರವಾಸೋದ್ಯಮದಿಂದ ಉದ್ಯೋಗಾವಕಾಶ ಅಷ್ಟಕ್ಕಷ್ಟೇ. ಪ್ರವಾಸಿ ತಾಣಗಳನ್ನು ಜಾಗತಿಕವಾಗಿ ಪರಿಚಯಿಸಿ ಪ್ರವಾಸಿಗರನ್ನು ಸೆಳೆಯುವುದು ಸಾಧ್ಯವಾಗಿಲ್ಲ.
ಜಿಲ್ಲೆಯ ಪ್ರವಾಸಿ ತಾಣಗಳಿಗೆ ಪ್ರತಿ ವರ್ಷ ಅಂದಾಜು 4 ಲಕ್ಷದಷ್ಟು ಪ್ರವಾಸಿಗರು ಭೇಟಿ ನೀಡುತ್ತಾರೆ. ರಾಜ್ಯದ ಇತರ ಪ್ರವಾಸಿ ತಾಣಗಳಿಗೆ ಹೋಲಿಸಿದರೆ ಇಲ್ಲಿ ಭೇಟಿ ನೀಡುವ ಪ್ರವಾಸಿಗರ ಸಂಖ್ಯೆ ಕಡಿಮೆ. ವಿಶೇಷವೆಂದರೆ ಜಿಲ್ಲೆಯ ಎಲ್ಲ ಪ್ರವಾಸಿ ತಾಣಗಳು 40 ಕಿ.ಮೀ. ವ್ಯಾಪ್ತಿಯೊಳಗಿವೆ. ಆದರೆ ಬನಶಂಕರಿ ದೇವಸ್ಥಾನಕ್ಕೆ ಬಂದ ಭಕ್ತರು ಬಾದಾಮಿ ವೀಕ್ಷಣೆ ಮಾಡಿ ವಾಪಸ್ ಹೋಗುತ್ತಾರೆ. ಯುನೆಸ್ಕೊ ವಿಶ್ವ ಪರಂಪರೆ ಪಟ್ಟಿಯಲ್ಲಿರುವ ಪಟ್ಟದಕಲ್ಲು, ಸುಂದರ ಪ್ರಕೃತಿಯಿಂದ ಸೆಳೆಯುವ ಮಹಾಕೂಟ, ಐಹೊಳೆಗಳ ಬಗ್ಗೆ ಸರಕಾರ ವ್ಯಾಪಕ ಪ್ರಚಾರ ನೀಡಬೇಕು.
ಇನ್ನು ಕೂಡಲಸಂಗಮದಲ್ಲಿ ನಡೆಯುವ ಸಂಗಮೇಶ್ವರ ಜಾತ್ರೆಗೆ ಒಂದು ಲಕ್ಷದಷ್ಟು ಜನ ಬರುತ್ತಾರೆ. ಎರಡೂ ಜಾತ್ರೆಗಳಿಗೆ ಬರುವ ಜನರಿಗೆ ಪ್ರವಾಸಿ ತಾಣಗಳ ಮಾಹಿತಿ, ವಿಶೇಷ ಬಸ್ ಸೌಲಭ್ಯ ಒದಗಿಸಿದರೆ ತಾಣಗಳಲ್ಲಿ ಪ್ರವಾಸಿಗರ ಸಂಖ್ಯೆ ಹೆಚ್ಚಾಗುತ್ತದೆ.
ಜಿಲ್ಲೆಯಲ್ಲಿ ಘಟಪ್ರಭಾ ನದಿ ದಡದಲ್ಲಿರುವ ಚಿಕ್ಕಸಂಗಮ ಪಕ್ಕಾ ಪ್ರವಾಸಿ ತಾಣ. ಇಲ್ಲಿಪಕ್ಷಿ ಸಂರಕ್ಷಣಾ ವಲಯ ರೂಪಿಸಲು ಅನುಮತಿ ದೊರೆತಿದೆ. ಡಿಸೆಂಬರ್ನಲ್ಲಿ ಸಾವಿರಾರು ದೇಶ, ವಿದೇಶದ ಪಕ್ಷಿಗಳನ್ನು ವೀಕ್ಷಿಸಬಹುದು. ಮುಚಖಂಡಿ ಕೆರೆಯಲ್ಲಿಸಂಗೀತ ಕಾರಂಜಿ ಸಿದ್ಧಗೊಳ್ಳುತ್ತಿದೆ.
ಸಿದ್ದನಕೊಳ್ಳ, ಹುಲಿಗೆಮ್ಮನಕೊಳ್ಳಗಳಲ್ಲಿ ಪುಟ್ಟ ಜಲಪಾತಗಳಿವೆ. ಈ ಬಗ್ಗೆ ಮಾಹಿತಿಯೇ ಇರುವುದಿಲ್ಲ. ಈ ತಾಣಗಳು ಆಕರ್ಷಕವಾಗಿ ಪ್ರಚಾರ ಪಡೆದರೆ ಹೋಟೆಲ್, ಸಣ್ಣ ಪುಟ್ಟ ವ್ಯಾಪಾರಿಗಳು, ಕ್ಯಾಬ್ ಕ್ಷೇತ್ರಗಳಲ್ಲಿ ವಹಿವಾಟು ಹೆಚ್ಚಾಗುತ್ತದೆ, ಪ್ರವಾಸೋದ್ಯಮ ಬೆಳೆಯುತ್ತದೆ.
ಬಾಗಲಕೋಟೆ ಜಿಲ್ಲೆಯಲ್ಲಿ ಘಟಪ್ರಭಾ ನದಿ ಹಿನ್ನೀರು, ವಿಜಯಪುರ ಜಿಲ್ಲೆಯಲ್ಲಿ ಕೃಷ್ಣಾ ನದಿ ಒಂದಕ್ಕೊಂದು ಸಂಪರ್ಕಿಸಿವೆ. ಕೇರಳ ಮಾದರಿಯಲ್ಲಿ ಹಿನ್ನೀರು ಪ್ರವಾಸ ಅಭಿವೃದ್ಧಿಪಡಿಸಲು ಹೇರಳ ಜಲ ಲಭ್ಯ. ವರ್ಷದ 9 ತಿಂಗಳೂ ಇಲ್ಲಿ ನೀರಿರುತ್ತದೆ.
ಕೇಂದ್ರ ಸರಕಾರದಿಂದ ಜೆಟ್ಟಿ, ಕ್ರೂಸ್ನ ಯೋಜನೆ ರೂಪಿಸಲಾಗಿದೆ. ಇನ್ನೂ ಕಾರ್ಯಾರಂಭ ಮಾಡಿಲ್ಲ. ಆಲಮಟ್ಟಿಯಿಂದ ಬೀಳಗಿ ತಾಲೂಕಿನ ಹೆರಕಲ್ ಬ್ಯಾರೇಜ್ವರೆಗೆ ಜಲಸಾರಿಗೆ ಸಾಧ್ಯವಾದರೆ ರೆಸಾರ್ಟ್ ಉದ್ಯಮ ವೃದ್ಧಿಯಾಗಲಿದೆ. ಪ್ರವಾಸಿಗರಿಗೆ ಹೊಸ ಆಕರ್ಷಣೆ ಸೇರ್ಪಡೆಯಾಗುತ್ತದೆ.