ಶ್ರೀ ವಿಶ್ವನಾಥನ ಪುಣ್ಯ ಕ್ಷೇತ್ರ ವಾರಣಾಸಿಯಲ್ಲಿ ನೂತನ ಕ್ರಿಕೆಟ್ ಸ್ಟೇಡಿಯಂ ನಿರ್ಮಾಣವಾಗಲಿದ್ದು, ಸ್ಥಳ ಪುರಾಣಕ್ಕೆ ಪೂರಕವಾಗಿ ಸ್ಟೇಡಿಯಂ ರಚನೆಯಾಗಲಿದೆ. ಈ ನಿಟ್ಟಿನಲ್ಲಿ ಎಲ್ಲೆಡೆ ಶಿವ ಅಂಶಗಳ ಸ್ಪರ್ಶವಿರಲಿದೆ ಎಂದು ತಿಳಿದುಬಂದಿದೆ.
ಇಂದು ಪ್ರಧಾನಿ ನರೇಂದ್ರ ಮೋದಿ ವಾರಣಾಸಿಯಲ್ಲಿ ಅಂತಾರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂಗೆ ಶಂಕುಸ್ಥಾಪನೆ ಮಾಡಲಿದ್ದಾರೆ. ಈ ಸ್ಟೇಡಿಯಂ ಢಮರು, ತ್ರಿಶೂಲ ಮುಂತಾದ ವಿನ್ಯಾಸಗಳನ್ನು ಹೊಂದಿರಲಿದೆ. ಈ ವಿನ್ಯಾಸದ 3ಡಿ ಚಿತ್ರವು ಬಿಡುಗಡೆಗೊಳ್ಳಲಿದೆ.
ಕ್ರೀಡಾಂಗಣದ ಮುಂಭಾಗದಲ್ಲಿ ನಿರ್ಮಿಸಲಿರುವ ಮಾಧ್ಯಮ ವಿನ್ಯಾಸವು ಶಿವನ ಢಮರುವಿನಂತೆ ಕಾಣಲಿದೆ. ಇನ್ನು ಫ್ಲಡ್ ಲೈಟ್ ಗಳು ತ್ರಿಶೂಲದಂತೆಯೂ ಕಾಣಲಿದೆ.
ಇನ್ನು ಸಾಮಾಜಿಕ ಜಾಲತಾಣದಲ್ಲಿ ಹರಿದಾಡುತ್ತಿರುವ ಚಿತ್ರಗಳಲ್ಲಿ ಕ್ರೀಡಾಂಗಣದ ಪ್ರವೇಶದ್ವಾರವು ಬಿಲ್ವ ಪತ್ರೆಯ ಆಕಾರದಲ್ಲಿದ್ದು, ಕ್ರೀಡಾಂಗಣದ ಮೇಲ್ಛಾವಣಿ ಚಂದ್ರನ ಆಕಾರದಲ್ಲಿ ಇರಲಿದೆ. ಈ ಕ್ರೀಡಾಂಗಣವು 30 ಸಾವಿರ ಜನರು ಕುಳಿತುಕೊಳ್ಳುವ ಸಾಮರ್ಥ್ಯ ಹೊಂದಿರುತ್ತದೆ.
ಈ ಕ್ರೀಡಾಂಗಣವು ಮುಂದಿನ 2 ವರ್ಷಗಳಲ್ಲಿ ನಿರ್ಮಾಣ ಕಾರ್ಯ ಮುಕ್ತಾಯಗೊಳ್ಳಲಿದ್ದು, ಕಾಶಿಯ ಸಾಂಸ್ಕೃತಿಕ ಪ್ರತಿಬಿಂಬ ಈ ಕ್ರೀಡಾಂಗಣದಲ್ಲಿ ಕಾಣಬಹುದಾಗಿದೆ.
ಮುಂದಿನ ಬಾರಿ ಪ್ರಧಾನಿ ಮೋದಿ ಅವರ ವಾರಣಾಸಿ ಭೇಟಿ ವೇಳೆಗೆ 1000 ಕೋಟಿ ರೂ. ಯೋಜನೆಗಳ ಉಡುಗೊರೆ ಸಿಗಲಿದೆ. ಈ ಮೊತ್ತದಲ್ಲಿ 325 ಕೋಟಿ ರೂ. ವೆಚ್ಚದಲ್ಲಿ ಈ ಅಂತಾರಾಷ್ಟ್ರೀಯ ಕ್ರಿಕೆಟ್ ಸ್ಟೇಡಿಯಂ ನಿರ್ಮಾಣಗೊಳ್ಳಲಿದೆ.
ಇಂದು ಈ ಕ್ರೀಡಾಂಗಣ ನಿರ್ಮಾಣ ಕಾರ್ಯಕ್ಕೆ ಪ್ರಧಾನಿ ಮೋದಿ, ಕಪಿಲ್ ದೇವ್, ಸುನಿಲ್ ಗವಾಸ್ಕರ್, ರವಿಶಾಸ್ತ್ರಿ ಮತ್ತು ಸಚಿನ್ ತೆಂಡೂಲ್ಕರ್ ಸೇರಿದಂತೆ ಹಲವು ದಿಗ್ಗಜರು ಭೂಮಿ ಪೂಜೆ ಸಮಾರಂಭದಲ್ಲಿ ಭಾಗಿಯಾಗಿದ್ದರು.