ಕರ್ನಾಟಕದ ಟಿವಿ ಚಾನೆಲ್ ದಿಗ್ವಿಜಯ ರಿಪಬ್ಲಿಕ್ ಚಾನೆಲ್ ವ್ಯವಸ್ಥೆಗೊಳಪಟ್ಟಿತು. ವಿಜಯ ಸಂಕೇಶ್ವರ ಅವರು ತಮ್ಮ ಚಾನೆಲ್ಲನ್ನು ಮಾರಿದ್ದಾರೆ. ಅವರಿಗೆ ಅದೂ ಒಂದು ಉದ್ಯಮ. ಪ್ರಾರಂಭದ ವೇಳೆಗೆ ಅರ್ನಾಬ್ ಗೋಸ್ವಾಮಿ ಮಾತನಾಡುತ್ತ ಕನ್ನಡ ಚಾನೆಲ್ ನವರಿಗೆ ಕೆಲವು ಕಿವಿಮಾತು ಹೇಳಿದ್ದಾರೆ ಅಥವಾ ಸಲಹೆ ನೀಡಿದ್ದಾರೆ. ಅವರು ಹೇಳಿದ್ದು ಸರಿಯಾದರೂ ನಮ್ಮ ಚಾನೆಲ್ ನವರು ಆ ಸಲಹೆಗಳನ್ನು ಸ್ವೀಕರಿಸುವ ಸಾಧ್ಯತೆಗಳೇನೂ ಇಲ್ಲ. ನಮ್ಮ ಚಟ ಅಥವಾ ಹಟ ನಾವು ಬಿಡಲಾದೀತೇ?
ನ್ಯೂಸ್ ಚಾನೆಲ್ ಗಳು ಏನನ್ನು ಮಾಡಬಾರದು, ಏನು ಮಾಡಬೇಕು ಎಂದು ಅರ್ನಾಬ್ ಹೇಳಿದ್ದಾರೆ. ಇಡೀದಿನ ಸಾಂಸಾರಿಕ ಕಲಹಗಳನ್ನು ಪ್ರಸಾರ ಮಾಡೋದು, ಜ್ಯೋತಿಷಗಳಿಂದ ಸಲಹೆ ಕೊಡಿಸೋದು, ಮೂಢನಂಬಿಕೆಗಳನ್ನು ಬಿತ್ತೋದು ಇವೆಲ್ಲ ನ್ಯೂಸ್ ಚಾನೆಲ್ ಗಳ ಕೆಲಸ ಅಲ್ಲ ಎಂದು ಅವರು ಹೇಳಿದ್ದಾರೆ. ಆದರೆ ನಮ್ಮದು ನಮಗೆ, ನಿಮ್ಮದು ನಿಮಗೆ ಎಂದು ಈ ನಮ್ಮ ಕನ್ನಡ ಚಾನೆಲ್ ನವರು ತಮ್ಮದೇ ದಾರಿಯಲ್ಲಿ ಮುಂದೆ ಸಾಗಬಹುದು.
ಟಿವಿ ಚಾನೆಲ್ ಗಳು ಬಹುತೇಕ ಜನರ ವಿಶ್ವಾಸ ಕಳೆದುಕೊಂಡು ಬಹಳ ಕಾಲವಾಗಿದೆ. ತಮ್ಮ ಸಾಮಾಜಿಕ ಜವಾಬ್ದಾರಿಯ ಅರಿವಿಲ್ಲದೆ ಕೇವಲ ಟಿ. ಆರ್. ಪಿ. ಹೆಚ್ಚಿಸಿಕೊಳ್ಳಲು ಏನೆಲ್ಲ ಕಸರತ್ತುಗಳನ್ನು ಮಾಡುವ ಅಭ್ಯಾಸ ಬೆಳೆದಿದೆ. ಜನರಲ್ಲಿ , ಅದರಲ್ಲೂ ಮಕ್ಕಳಲ್ಲಿ ಸಾಮಾಜಿಕ, ಶೈಕ್ಷಣಿಕ, ವೈಜ್ಞಾನಿಕ ತಿಳಿವಳಿಕೆ ಹೆಚ್ಚಿಸಲು ಟಿವಿ ಮಾಧ್ಯಮ ಅತ್ಯಂತ ಪರಿಣಾಮಕಾರಿಯಾದದ್ದು. ಯಾರಿಗೂ ಅದು ಬೇಕಾಗಿಲ್ಲ. ಮನಸ್ಸುಗಳನ್ನು ಜೋಡಿಸುವ ಕೆಲಸ ಮಾಡುವ ಬದಲು ಒಡೆಯುವ ಕೆಲಸವನ್ನೇ ಹೆಚ್ಚು ಮಾಡುತ್ತಿವೆ. ಯಾರೋ ಒಬ್ಬಳು ಸಿನಿಮಾ ನಟಿ ಗರ್ಭಿಣಿಯಾದರೆ ಈ ಟಿವಿಯವರಿಗೆ ಅದು ಬಹಳ ದೊಡ್ಡ ಸುದ್ದಿಯಾಗಿಬಿಡುತ್ತದೆ. ಯಾರೋ ಒಬ್ಬ ಸಾಮಾನ್ಯ ನಟ ಸತ್ತರೆ ಎರಡು ದಿನ ಅದನ್ನೇ ಪ್ರಸಾರ ಮಾಡುತ್ತಿರುತ್ತಾರೆ. ( ಬೊಮ್ಮಾಯಿಯಂತಹ ಮುಖ್ಯಮಂತ್ರಿ ಎರಡು ದಿನ ಅಲ್ಲೇ ಕಾಲ ಕಳೆಯುತ್ತಾರೆ) . ಬೇಜವಾಬ್ದಾರಿತನದ ಪರಮಾವಧಿ ಇದು.
ಅರ್ನಾಬ್ ಕನ್ನಡಕ್ಕೆ ಬಂದಿದ್ದಾರೆ. ಗದ್ದಲಕ್ಕೆ ಹೆಸರಾದ ಅವರು ಇಲ್ಲಿ ಏನು ಮಾಡುತ್ತಾರೆ ಕಾದು ನೋಡೋಣ. ಅವರಿಗಂತೂ ಕನ್ನಡ ಬರೋದಿಲ್ಲ. ಸದ್ಯ ನಾವು ಬಚಾವ್. ಆದರೆ ಇತರ ಟಿವಿಯವರಿಗಿಂತ ಬೇರೆಯದಾದ ಏನನ್ನು ಅವರು ನೀಡುತ್ತಾರೆಂಬುದು ಮುಖ್ಯ.