ಜೀವನದಲ್ಲಿ ಯಶಸ್ಸು ಸಾಧಿಸಬೇಕು, ಅಂದುಕೊಂಡಿದ್ದೆಲ್ಲವೂ ನಮ್ಮದಾಗಬೇಕು ಎನ್ನುವುದು ಎಲ್ಲರ ಬಯಕೆಯಾಗಿರುತ್ತದೆ. ನೆಮ್ಮದಿಯಿಂದ ಜೀವಿಸಬೇಕು ಎಂದು ಅಂದುಕೊಳ್ಳುತ್ತೇವೆ. ಜೀವನದಲ್ಲಿ ಯಾವುದು ನಮ್ಮ ನಿಯಂತ್ರಣದಲ್ಲಿ ಇಲ್ಲ, ಯಾವುದು ನಮ್ಮ ನಿಯಂತ್ರಣದಲ್ಲಿ ಇದೆ ಎನ್ನುವುದನ್ನು ಅರಿತುಕೊಂಡು ಮನಸ್ಸನ್ನು ಹಿಡಿತದಲ್ಲಿ ಇಟ್ಟುಕೊಳ್ಳುವುದು ವಿವೇಚನೆ ಎನಿಸಿಕೊಳ್ಳುತ್ತದೆ.
ಜೀವನದಲ್ಲಿ ನೆಮ್ಮದಿ ಹೊಂದಬೇಕು ಎನ್ನುವುದು ನಮ್ಮೆಲ್ಲರ ಆಸೆಯಾಗಿರುತ್ತದೆ. ಯಾವುದು ನಮ್ಮ ನಿಯಂತ್ರಣದಲ್ಲಿ ಇದೆಯೋ, ಯಾವುದನ್ನು ನಮಗೆ ನಿಯಂತ್ರಿಸಲು ಸಾಧ್ಯವಾಗುವುದಿಲ್ಲೋ ಅವುಗಳ ಬಗ್ಗೆ ಸ್ಪಷ್ಟತೆ ಹೊಂದುವುದು ಮತ್ತು ಅವುಗಳನ್ನು ಸರಿಯಾಗಿ ನಿಭಾಯಿಸುವುದು ವಿವೇಚನೆಯನ್ನು ಆಧರಿಸಿರುತ್ತದೆ. ಕೆಲವರನ್ನು ನೋಡಿ, ಎಷ್ಟು ಬುದ್ಧಿವಂತರಾದರೂ ವಿವೇಚನಾ ಶಕ್ತಿಯನ್ನು ಹೊಂದಿರುವುದಿಲ್ಲ. ವಿವೇಚನಾ ಶಕ್ತಿ ಶೂನ್ಯವಾಗಿದ್ದಾಗ ನಾವು ಅಂದುಕೊಂಡಿದ್ದು ಖಂಡಿತವಾಗಿ ನೆರವೇರುವುದಿಲ್ಲ. ಏಕೆಂದರೆ, ಅದಕ್ಕೆ ಬೇಕಾದ ಪ್ರಯತ್ನಗಳನ್ನು ನಾವು ಧನಾತ್ಮಕವಾಗಿ ಮಾಡಿರುವುದಿಲ್ಲ. ಹಠಮಾರಿತನಕ್ಕೆ ಬಿದ್ದು ಇರುವುದನ್ನೂ ಕಳೆದುಕೊಳ್ಳುತ್ತೇವೆ.
ಮೊಟ್ಟಮೊದಲು ಜೀವನದಲ್ಲಿ ಯಾವುದು ನಮ್ಮ ನಿಯಂತ್ರಣದಲ್ಲಿದೆ, ಯಾವುದು ನಮ್ಮ ನಿಯಂತ್ರಣದಲ್ಲಿಲ್ಲ ಎನ್ನುವ ಬಗ್ಗೆ ಅತ್ಯಂತ ಸ್ಪಷ್ಟತೆ ಬೇಕಾಗುತ್ತದೆ. ಯಾವುದು ನಮ್ಮ ನಿಯಂತ್ರಣದಲ್ಲಿಲ್ಲ ಎನ್ನುವುದನ್ನು ಮೊದಲು ತಿಳಿಯೋಣ.
ಮತ್ತೊಬ್ಬರ ಭಾವನೆಗಳು
ನಮ್ಮ ಬಗ್ಗೆ ಮತ್ತೊಬ್ಬರು ಏನು ಯೋಚಿಸುತ್ತಾರೆ? ಏನು ಮಾತನಾಡಿಕೊಳ್ಳುತ್ತಾರೆ ಎನ್ನುವುದು ಖಂಡಿತವಾಗಿ ನಮ್ಮ ನಿಯಂತ್ರಣದಲ್ಲಿ ಇಲ್ಲ. ಹೀಗಾಗಿ, ಈ ಬಗ್ಗೆ ಯೋಚಿಸುವುದು ಅನಗತ್ಯ. ಒಂದೊಮ್ಮೆ ಅವರು ನಿಮ್ಮ ಬಗ್ಗೆ ಕೆಟ್ಟ ಮಾತುಗಳನ್ನೇ ಆಡಿದರೂ ತಲೆಕೆಡಿಸಿಕೊಳ್ಳುವುದು ಸರಿಯಲ್ಲ. ಏಕೆಂದರೆ, ಅದು ಅವರ ಭಾವನೆಗೆ ಮಾತ್ರ ಸೀಮಿತ.
ಇತರರ ಉದ್ದೇಶ
ಯಾರಿಗಾದರೂ ನಮಗೆ ಕೆಡುಕನ್ನೇ ಮಾಡಬೇಕೆಂಬ ಉದ್ದೇಶ ಇದ್ದಿರಬಹುದು. ಆದರೆ, ಅದನ್ನು ನಿಯಂತ್ರಿಸಲು ಸಾಧ್ಯವಿಲ್ಲ. ಹೀಗಾಗಿ, ಅದರ ಬಗ್ಗೆ ಚಿಂತೆ ಮಾಡುವುದನ್ನು ಬಿಟ್ಟು ನಮ್ಮ ಪಥದಲ್ಲಿ ನಾವು ಸಾಗುವುದು ಒಳ್ಳೆಯದು.
ಇತರರ ನಂಬಿಕೆಗಳು
ಯಾರಿಗಾದರೂ ನಮ್ಮ ಬಗ್ಗೆ ತಪ್ಪು ತಿಳಿವಳಿಕೆ, ನಂಬಿಕೆ ಮೂಡಿದ್ದರೆ ಏನು ಮಾಡಲು ಸಾಧ್ಯ? ಅದನ್ನು ಹೋಗಲಾಡಿಸಲು ಪ್ರಯತ್ನ ಪಡುತ್ತ ಅನಗತ್ಯವಾಗಿ ಶ್ರಮ ಪಡುತ್ತೀರಾ? ನಮ್ಮ ಆದ್ಯತೆಯನ್ನು ಬಿಟ್ಟು ಇನ್ನೊಬ್ಬರ ಬಗ್ಗೆ ಗಮನಹರಿಸುವ ಬದಲು ಅವರ ನಂಬಿಕೆಗಳು ಅವರಿಗೆ ಎಂದು ಬಿಟ್ಟುಬಿಡುವುದು ಸರಿ.
ಇತಿಹಾಸ
ಆಗಿಹೋದ ಇತಿಹಾಸ ನಮ್ಮ ಕೈಯಲ್ಲಿರುತ್ತದೆಯೇ? ಒಂದೊಮ್ಮೆ ನಾವೇ ತಪ್ಪು ಮಾಡಿದ್ದರೂ, ಅದರ ಬಗ್ಗೆ ಪಶ್ಚಾತ್ತಾಪ ಪಟ್ಟರೂ ಅದು ಸರಿಹೋಗದು. ಕಳೆದು ಹೋದ ಸಮಯ ಮತ್ತೆ ಬರುವುದಿಲ್ಲ. ತಪ್ಪುಗಳಿಂದ ಪಾಠ ಕಲಿಯಬೇಕೇ ವಿನಾ ಆಗಿಹೋದುದರ ಬಗ್ಗೆ ಹೆಚ್ಚು ಚಿಂತಿಸಬಾರದು.
ನಮ್ಮ ನಿಯಂತ್ರಣದಲ್ಲಿರುವುದೇನು ಎಂದು ತಿಳಿದುಕೊಳ್ಳೋಣ
ನಮ್ಮ ವರ್ತನೆ:
ನಮ್ಮ ವರ್ತನೆ ನಮ್ಮದೇ ಕೈಯಲ್ಲಿದೆ. ಮತ್ತೊಬ್ಬರನ್ನು ಇದಕ್ಕೆ ಯಾವುದೇ ಕಾರಣಕ್ಕೂ ಹೊಣೆಗಾರರನ್ನಾಗಿ ಮಾಡುವುದು ಸರಿಯಲ್ಲ.
ನಮ್ಮ ಆರೋಗ್ಯ:
ಆರೋಗ್ಯವಂತರಾಗಿರಲು ನಾವು ಒಳ್ಳೆಯ ಆಹಾರ ಪದ್ಧತಿಯನ್ನು ರೂಢಿಸಿಕೊಳ್ಳಬೇಕು. ಪರಿಸ್ಥಿತಿ ಹಾಗೂ ಹವಾಮಾನವನ್ನು ದೂಷಿಸುವುದರಿಂದ ಪ್ರಯೋಜನವಿಲ್ಲ. ಆರೋಗ್ಯಕ್ಕೆ ಬೇಕಾದುದನ್ನು ನಾವೇ ಅರಿತುಕೊಂಡು ಅಳವಡಿಸಿಕೊಳ್ಳಬೇಕು.
ಆಂತರಿಕ ನೆಮ್ಮದಿ:
ಆಂತರಿಕ ನೆಮ್ಮದಿ ನಮ್ಮಲ್ಲೇ ಇದ್ದು ಅದನ್ನು ಅನುಭವಿಸಬೇಕು. ಹೊರಗಿನ ಪರಿಸ್ಥಿತಿಯಿಂದ ಅದು ದಕ್ಕುವುದಿಲ್ಲ.
ನಮ್ಮ ಉತ್ಪಾದಕತೆ:
ನಮ್ಮ ಕ್ರಿಯಾಶೀಲತೆ, ಉತ್ಸಾಹದಿಂದ ಇದು ಸಾಧ್ಯ.
ಕೆಟ್ಟ ಮನಸ್ಥಿತಿ:
ಇದನ್ನು ನಿಯಂತ್ರಣಕ್ಕೆ ತರಬೇಕಾದವರೂ ನಾವೇ ಆಗಿರುತ್ತೇವೆ.
ಸಂಬಂಧ:
ಸ್ನೇಹ – ಸಂಬಂಧ ಎರಡೂ ನಮ್ಮದು. ಅವುಗಳನ್ನು ಒಳ್ಳೆಯವರ ಜೊತೆಗೂಡಿ ಚೆನ್ನಾಗಿ ರೂಪಿಸಿಕೊಳ್ಳುವುದು ನಮ್ಮ ಕೈಯಲ್ಲಿದೆ.
ಎಲ್ಲರಿಗೂ ಯಶಸ್ಸು ಅಥವಾ ನೆಮ್ಮದಿ ಖಂಡಿತ ದೊರೆಯುವುದಿಲ್ಲ. ಏಕೆಂದರೆ, ಕೆಲವೊಮ್ಮೆ ಅದಕ್ಕೆ ಬೇಕಾದ ವಿವೇಚನೆಯೇ ನಮ್ಮಲ್ಲಿ ಇರುವುದಿಲ್ಲ. ವಿವೇಚನೆಯಿದ್ದರೆ ಖಂಡಿತವಾಗಿ ಜೀವನ ಸುಂದರವಾಗುತ್ತದೆ.