ರಾಜ್ಯದ ಎಡಪಂಥೀಯ ಬುದ್ಧಿಜೀವಿ ಚಿಂತಕರೆಂದು ಕರೆಸಿಕೊಳ್ಳುತ್ತಿರುವ ಒಂದಿಷ್ಟು ಜನ ಈಗಾಗಲೇ ಸಾಕಷ್ಟು ಅಪಹಾಸ್ಯಕ್ಕೀಡಾಗಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಂತೂ ಅವರನ್ನು ಬಹಳ ವ್ಯಂಗ್ಯವಾಗಿ ಗೇಲಿ ಮಾಡಲಾಗುತ್ತಿದೆ. ಅದಕ್ಕೆ ಆ ಬುದ್ಧಿಜೀವಿಗಳೆಂದುಕೊಳ್ಳುವವರು ಬೇರೆ ಬೇರೆ ಸಂದರ್ಭಗಳಲ್ಲಿ ನಡೆದುಕೊಳ್ಳುವ ರೀತಿ, ಆಡುವ ಮಾತುಗಳು ಕಾರಣವಾಗಿವೆ. ಅಂಥವರಲ್ಲಿ ಹಲವು ಸಾಹಿತಿಗಳು, ಪ್ರಾಧ್ಯಾಪಕರು, ಕಲಾವಿದರು ಸೇರಿದ್ದಾರೆ. ಅವರಲ್ಲಿ ಹೆಚ್ಚಿನವರು ಪ್ರಧಾನಿ ನರೇಂದ್ರ ಮೋದಿಯವರನ್ನು ವಿರೋಧಿಸುವ ಮನಸ್ಥಿತಿಯನ್ನು ಹೊಂದಿದವರು. ಆದರೆ ರಾಜಕೀಯವಾಗಿ ಮೋದಿಯವರನ್ನೋ ಬಿಜೆಪಿಯನ್ನೋ ವಿರೋಧಿಸುವದು ತಪ್ಪಲ್ಲ. ಅಂತಹ ಅಭಿವ್ಯಕ್ತಿ ಸ್ವಾತಂತ್ರ್ಯ ಎಲ್ಲರಿಗೂ ಇದೆ. ಆದರೆ ಮೋದಿ ವಿರೋಧಕ್ಕಾಗಿ ದೇಶದ ಮಿಲಿಟರಿ ಶಕ್ತಿಯನ್ನೋ, ವಿಜ್ಞಾನಿಗಳನ್ನೋ ಅಭಿವೃದ್ಧಿ ವಿಚಾರಗಳನ್ನೋ ಟೀಕಿಸುವುದು ಸದಭಿರುಚಿಯ ನಡತೆ ಅಲ್ಲ.
ಇದೀಗ ದೇಶದ ಜನರು ಬಾಹ್ಯಾಕಾಶ ವಿಜ್ಞಾನಿಗಳು ಹಾರಿಬಿಟ್ಟ ಉಪಗ್ರಹ ಯಶಸ್ವಿಯಾಗಿ ಚಂದ್ರನಲ್ಲಿ ಇಳಿಯುವಂತಹ ಸಂಭ್ರಮದಲ್ಲಿ ಇರುವಾಗ ಚಲನಚಿತ್ರ ನಟ ಪ್ರಕಾಶ ರಾಜ ಎಂಬಾತ ವಿಜ್ಞಾನಿಗಳನ್ನೇ ಗೇಲಿ ಮಾಡುವ ರೀತಿಯಲ್ಲಿ ವ್ಯಂಗ್ಯ ಚಿತ್ರವೊಂದನ್ನು ಹಾಕಿ ಅದರಲ್ಲಿ ಮೋದಿಯನ್ನೂ ಅಪಹಾಸ್ಯ ಮಾಡುವಂತಹ ಮಾತುಗಳನ್ನು ಬರೆದಿರುವುದು ಜನರನ್ನು ಕೆರಳಿಸಿದೆ. ಸಾಮಾಜಿಕ ಜಾಲತಾಣಗಳಲ್ಲೂ , ಮಾಧ್ಯಮಗಳಲ್ಲೂ ಸಾಕಷ್ಟು ತೀಕ್ಷ್ಣವಾದ ಪ್ರತಿಕ್ರಿಯೆಗೆ ಕಾರಣವಾಗಿದೆ. ಇದು ತೀರಾ ಕೆಳಮಟ್ಟದ ಮನಸ್ಥಿತಿಯೆಂದು ಜನರು ಆ ನಟನನ್ನು ಜರಿದಿದ್ದಾರೆ.
ಪ್ರಕಾಶರಾಜ ಈ ಹಿಂದೆಯೂ ಇದೇ ಬಗೆಯಲ್ಲಿ ವಿವಾದಾಸ್ಪದ ಹೇಳಿಕೆಗಳನ್ನು ನೀಡಿ ಜನರ ಆಕ್ರೋಶ ಕ್ಕೆ ಗುರಿಯಾಗಿದ್ದುಂಟು. ಇದೇ ಬಗೆಯ ವಿಕೃತ ಮನಸ್ಥಿತಿ ಹೊಂದಿದ ಇತರ ಹಲವರೂ ಇದ್ದಾರೆ. ಅವರಿಗೆ ದೇಶದ ಪ್ರಗತಿಗಿಂತ ಮೋದಿಯನ್ನು ಎಲ್ಲದಕ್ಕೂ ವಿರೋಧಿಸುವುದೇ ಮುಖ್ಯವೆನಿಸಿದೆ. ಭಾರತದ ಕೋಟಿ ಕೋಟಿ ಜನ ಭಾರತೀಯರಷ್ಟೇ ಅಲ್ಲ, ಇಡೀವಿಶ್ವವೇ ನಮ್ಮ ವಿಜ್ಞಾನಿಗಳ ಸಾಧನೆಯನ್ನು ಕೊಂಡಾಡುತ್ತಿರುವಂತಹ ಸಂದರ್ಭದಲ್ಲಿ ಈ ಬಗೆಯ ಕುತ್ಸಿತ ಮನೋಭಾವದ ಮಾತುಗಳನ್ನಾಡುವ ಮೂಲಕ ಪ್ರಕಾಶ ರಾಜನಂತಹ ವ್ಯಕ್ತಿಗಳು ತಾವೆಷ್ಟು ಕೆಳಮಟ್ಟದವರು ಎನ್ನುವುದನ್ನು ತೋರಿಸಿಕೊಳ್ಳುತ್ತಿದ್ದಾರೆ. ಇದರಿಂದ ಅವರ ಕಿಮ್ಮತ್ತು ಕಡಿಮೆಯಾದೀತೇ ಹೊರತು ಭಾರತೀಯ ಸಾಧಕರದಲ್ಲ. ಮೋದಿಯವರ ಸಮರ್ಥ ನಾಯಕತ್ವದಲ್ಲಿ ಭಾರತ ಪ್ರಗತಿಯತ್ತ ನಾಗಾಲೋಟದಲ್ಲಿ ಸಾಗಿದೆ. ಅದನ್ನು ಸಹಿಸಲಾಗದವರ ಅಸಹನೆಯ ಮಾತುಗಳಿಂದ ಆ ಪ್ರಗತಿ ನಿಲ್ಲಲಾರದು.