ಪ್ರಧಾನಿ ನರೇಂದ್ರ ಮೋದಿ ಅವ್ರು ಕೆಂಪು ಕೋಟೆಯಲ್ಲಿ ರಾಷ್ಟ್ರಧ್ವಜವನ್ನ ಹಾರಿಸಿ ರಾಷ್ಟ್ರವನ್ನುದ್ದೇಶಿಸಿ ಮಾತನಾಡಿದರು. ಮುಂದಿನ ದಿನಗಳಲ್ಲಿ ‘ವಿಶ್ವಕರ್ಮ ಕೌಶಲ್ ಸಮ್ಮಾನ್ ಯೋಜನೆ’ ಎಂಬ ಹೊಸ ಯೋಜನೆಯನ್ನ ಪ್ರಾರಂಭಿಸುವುದಾಗಿ ಭರವಸೆ ನೀಡಿದರು. ಈ ಯೋಜನೆಯನ್ನು ಮುಂಬರುವ ವಿಶ್ವಕರ್ಮ ಜಯಂತಿಯಿಂದ ಪ್ರಾರಂಭಿಸಲಾಗುವುದು. ಕರಕುಶಲ ಮತ್ತು ಕುಶಲಕರ್ಮಿಗಳಿಗೆ ಸಮಗ್ರ ಬೆಂಬಲ ಒದಗಿಸಲು ಹೊಸದಾಗಿ ಘೋಷಿಸಲಾದ ಯೋಜನೆ ಇದಾಗಿದ್ದು, ಪ್ರಧಾನಮಂತ್ರಿ ವಿಕಾಸ್ ಯೋಜನೆಯಡಿ ಇದನ್ನು ಪ್ರತ್ಯೇಕವಾಗಿ ಸಮರ್ಪಿಸಲಾಗಿದೆ.
ಈ ಯೋಜನೆಯ ಬಜೆಟ್ 13 ರಿಂದ 15 ಸಾವಿರ ಕೋಟಿ ರೂಪಾಯಿಗಳಾಗಲಿದೆ ಎಂದು ಪ್ರಧಾನಿ ಹೇಳಿದರು. ವಿಶ್ವಕರ್ಮ ಕೌಶಲ್ ಸಮ್ಮಾನ್ (ಪಿಎಂ-ವಿಕಾಸ್) ಯೋಜನೆಯಡಿ ದೇಶದ ಚಿತ್ರಕಲಾವಿದರು ಮತ್ತು ಕರಕುಶಲಕರ್ಮಿಗಳ ಅಭಿವೃದ್ಧಿಗಾಗಿ ವಿಶೇಷ ಪ್ಯಾಕೇಜ್ ನೀಡಿದ್ದಾರೆ. ಇದೇ ಮೊದಲ ಬಾರಿಗೆ ದೇಶದ ವಿಶ್ವಕರ್ಮರು ಎಂದು ಕರೆಯಲ್ಪಡುವ ಚಿತ್ರಕಲಾವಿದರು ಮತ್ತು ಕುಶಲಕರ್ಮಿಗಳ ಅಭಿವೃದ್ಧಿಗಾಗಿ ಪ್ಯಾಕೇಜ್ ಕಲ್ಪಿಸಲಾಗಿದೆ. ಭಾರತೀಯ ತತ್ವಗಳಲ್ಲಿ ಭಗವಾನ್ ವಿಶ್ವಕರ್ಮರ ಉನ್ನತ ಸ್ಥಾನಮಾನ ಮತ್ತು ಉಪಕರಣಗಳೊಂದಿಗೆ ಕೈಯಿಂದ ಕೆಲಸ ಮಾಡುವವರಿಗೆ ಗೌರವದ ಶ್ರೀಮಂತ ಸಂಪ್ರದಾಯ ಇರುವ ಬಗ್ಗೆ ಮಾತನಾಡಿದರು.
ಕೆಲವು ವಲಯಗಳ ಕುಶಲಕರ್ಮಿಗಳ ಬಗ್ಗೆ ಗಮನ ಸೆಳೆದ ಅವರು, ಅಕ್ಕಸಾಲಿಗರು, ಕಮ್ಮಾರರು, ಮೇಸ್ತ್ರಿಗಳು, ಕ್ಷೌರಿಕರು ಮತ್ತು ಬಡಗಿಗಳು, ಶಿಲ್ಪಿಗಳು ಮತ್ತು ನಿರ್ಲಕ್ಷ್ಯಕ್ಕೊಳಗಾಗಿರುವ ಸಮಾಜದ ಅವಿಭಾಜ್ಯ ಅಂಗವಾಗಿರುವ ಅನೇಕ ವರ್ಗದ ಕುಶಲಕರ್ಮಿಗಳು ಬದಲಾಗಿರುವ ಕಾಲಕ್ಕೆ ತಕ್ಕಂತೆ ಹೊಂದಿಕೊಳ್ಳುತ್ತಿದ್ದಾರೆ ಎಂದರು. ತಮ್ಮ ಕೈಗಳಿಂದಲೇ ಕೆಲಸ ಮಾಡುವ ಚಿತ್ರಕಲಾವಿದರು, ಕರಕುಶಲಕರ್ಮಿಗಳು ಭಾರತಕ್ಕೆ ಯುಗಯುಗಾಂತರಗಳಿಂದ ಕೀರ್ತಿ ತಂದಿದ್ದಾರೆ.
‘ಆತ್ಮನಿರ್ಭರ ಭಾರತ’ದ ನಿಜವಾದ ಚೈತನ್ಯವನ್ನು ಪ್ರತಿನಿಧಿಸುವವರು ಈ ಕರಕುಶಲಕರ್ಮಿಗಳು. ಈ ವಿಶ್ವಕರ್ಮ ಕೌಶಲ್ ಸಮ್ಮಾನ್ ಹೊಸ ಯೋಜನೆಯು ಅವರ ಉತ್ಪನ್ನಗಳ ಪ್ರಮಾಣ ಮತ್ತು ಗುಣಮಟ್ಟವನ್ನು ಸುಧಾರಿಸಲು ಅನುವು ಮಾಡಿಕೊಡುತ್ತದೆ. ಕೈಯಿಂದ ಕೆಲವು ನುರಿತ ಕೆಲಸಗಳನ್ನ ಮಾಡುವ ಮತ್ತು ತಲೆಮಾರುಗಳಿಂದ ಈ ಕೆಲಸವನ್ನ ಮಾಡುತ್ತಿರುವ ಜನರಿಗೆ ಪ್ರಯೋಜನ ನೀಡುವುದು ಈ ಯೋಜನೆಯ ಉದ್ದೇಶವಾಗಿದೆ. ಈ ಕುಶಲಕರ್ಮಿಗಳಿಗೆ ಅವರ ಉತ್ಪನ್ನಗಳಿಗೆ ವ್ಯಾಪಕ ಮಾರುಕಟ್ಟೆಯನ್ನ ಒದಗಿಸಲು ಈ ಯೋಜನೆಯಲ್ಲಿ ನಿಬಂಧನೆಗಳನ್ನ ಸಹ ಮಾಡಲಾಗಿದೆ.
ಕೈಗಳಿಂದ ಉತ್ಪಾದಿಸುವ ಉತ್ಪನ್ನಗಳು ನಿರಂತರವಾಗಿ ಆಕರ್ಷಣೀಯವಾಗಿರುವುದರಿಂದ ದೇಶದ ವಿಶ್ವಕರ್ಮರಿಗೆ ಸರ್ಕಾರ ಸಮಗ್ರ ಸಾಂಸ್ಥಿಕ ಬೆಂಬಲ ಒದಗಿಸಲಿದೆ. ಇದರಿಂದ ಸುಲಭವಾಗಿ ಸಾಲ, ಕೌಶಲ್ಯ, ತಾಂತ್ರಿಕ ಬೆಂಬಲ, ಡಿಜಿಟಲ್ ಸಬಲೀಕರಣ, ಬ್ರ್ಯಾಂಡ್ ಉತ್ತೇಜನ, ಮಾರುಕಟ್ಟೆ ಮತ್ತು ಕಚ್ಚಾ ವಸ್ತುಗಳನ್ನು ಖಚಿತಪಡಿಸುತ್ತದೆ. ಪ್ರಧಾನಮಂತ್ರಿ ವಿಶ್ವಕರ್ಮ ಯೋಜನೆ ಸಾಂಪ್ರದಾಯಿಕ ಕುಶಲಕರ್ಮಿಗಳು ಮತ್ತು ಶ್ರೀಮಂತ ಕರಕುಶಲ ಸಂಪ್ರದಾಯಗಳನ್ನು ಉಳಿಸುವ ಗುರಿ ಹೊಂದಿದೆ. ಇಂದಿನ ವಿಶ್ವಕರ್ಮ ಸಮುದಾಯದವರು ನಾಳಿನ ಉದ್ಯಮಿಗಳಾಗುತ್ತಾರೆ. ಇದಕ್ಕಾಗಿ ಅವರ ವ್ಯವಹಾರ ಮಾದರಿಯಲ್ಲಿ ಸುಸ್ಥಿರತೆ ಅಗತ್ಯ ಎಂದು ಹೇಳಿದರು.
ಈ ಯೋಜನೆಯಡಿ ಗರಿಷ್ಠ 5% ಬಡ್ಡಿದರದಲ್ಲಿ 1 ಲಕ್ಷ ರೂ.ಗಳ ಸಾಲ ನೀಡಲಾಗುವುದು. ದೇಶದ ದೂರದ ಭಾಗದ ಜನರನ್ನು ತಲುಪಲು ಸರ್ಕಾರ ಪ್ರಯತ್ನಿಸುತ್ತಿದೆ ಮತ್ತು ಅವರಲ್ಲಿ ಅನೇಕರು ಮೊದಲ ಬಾರಿಗೆ ಸರ್ಕಾರದ ಯೋಜನೆಗಳ ಲಾಭ ಪಡೆಯಲಿದ್ದಾರೆ.