ಹೊಸದಿಲ್ಲಿ: ನೈಸರ್ಗಿಕ ವಿಕೋಪಗಳ ಸಂದರ್ಭದಲ್ಲಿ ಅಪಾಯದಲ್ಲಿ ಸಿಲುಕಿದ ಜನರ ಪ್ರಾಣ ಉಳಿಸುವ ನಿಟ್ಟಿನಲ್ಲಿ ಕೇಂದ್ರ ಸರಕಾರ ಗುರುವಾರ ಜನರ ಸ್ಮಾರ್ಟ್ಫೋನ್ಗಳಿಗೆ ತುರ್ತು ಎಚ್ಚರಿಕೆ ಸಂದೇಶ ರವಾನಿಸುವ ಪ್ರಯೋಗ ಕೈಗೊಂಡು ಅದರಲ್ಲಿ ಯಶಸ್ವಿಯಾಗಿದೆ.
ದೂರಸಂಪರ್ಕ ಇಲಾಖೆಯು ಹಲವರ ಸ್ಮಾರ್ಟ್ಫೋನ್ಗಳಿಗೆ ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಪ್ರಾಧಿಕಾರವು ಅಭಿವೃದ್ಧಿಪಡಿಸಿದ ಬೀಪ್ ಸೌಂಡ್ ಮತ್ತು ಫ್ಲ್ಯಾಶ್ ಆಗುವ ತುರ್ತು ಎಚ್ಚರಿಕೆ ಸಂದೇಶವನ್ನು ಕಳುಹಿಸುವ ಮೂಲಕ ಪರೀಕ್ಷಿಸಿದೆ.
ಕೆಲವರ ಆಂಡ್ರಾಯ್ಡ್ ಫೋನ್ ಬಳಕೆದಾರರಿಗೆ ಗುರುವಾರ ಮಧ್ಯಾಹ್ನ 1.35ರ ಸುಮಾರಿಗೆ ‘ತುರ್ತು ಎಚ್ಚರಿಕೆ: ತೀವ್ರತರದ ಪರಿಸ್ಥಿತಿ ಇದೆ’ ಎಂಬ ಫ್ಲ್ಯಾಶ್ ಮೆಸೇಜ್ನೊಂದಿಗೆ ಜೋರಾದ ಬೀಪ್ ಶಬ್ದದೊಂದಿಗೆ ಬಂದಿದೆ.
”ಕೇಂದ್ರ ಸರಕಾರದ ದೂರಸಂಪರ್ಕ ಇಲಾಖೆಯಿಂದ ‘ಸೆಲ್ ಬ್ರಾಡ್ಕಾಸ್ಟಿಂಗ್ ಸಿಸ್ಟಮ್’ ಮೂಲಕ ಕಳುಹಿಸಲಾದ ಪರೀಕ್ಷಾರ್ಥ ಮಾದರಿ ತುರ್ತು ಸಂದೇಶವಾಗಿದೆ. ದಯವಿಟ್ಟು ಇದನ್ನು ನಿರ್ಲಕ್ಷಿಸಿ, ನಿಮ್ಮ ಕಡೆಯಿಂದ ಯಾವುದೇ ಕ್ರಮದ ಅಗತ್ಯವಿಲ್ಲ. ಈ ಸಂದೇಶವನ್ನು ರಾಷ್ಟ್ರೀಯ ವಿಪತ್ತು ನಿರ್ವಹಣಾ ಪ್ರಾಧಿಕಾರವು ಟೆಸ್ಟ್ ಪ್ಯಾನ್- ಇಂಡಿಯಾ ತುರ್ತು ಎಚ್ಚರಿಕೆ ವ್ಯವಸ್ಥೆಗೆ ಕಳುಹಿಸಲಾಗಿದೆ. ಇದು ಸಾರ್ವಜನಿಕರ ಸುರಕ್ಷತೆಯನ್ನು ಹೆಚ್ಚಿಸಲು ಮತ್ತು ತುರ್ತು ಸನ್ನಿವೇಶಗಳಲ್ಲಿ ಸಕಾಲಿಕ ಎಚ್ಚರಿಕೆಯನ್ನು ರವಾನಿಸುವ ಉದ್ದೇಶವನ್ನು ಹೊಂದಿದೆ,” ಫ್ಲ್ಯಾಶ್ ಸಂದೇಶದಲ್ಲಿ ತಿಳಿಸಲಾಗಿದೆ.