ಮಡಿಕೇರಿ: ಲೋಕಾಯುಕ್ತ ಪೊಲೀಸರು ಆಗಾಗ ಭ್ರಷ್ಟ ಅಧಿಕಾರಿಗಳಿಗೆ ಶಾಕ್ ಕೊಡುವುದು ಹೊಸತೇನಲ್ಲ. ಅದರಲ್ಲೂ ಗುರುವಾರ ಕೊಡಗಿನ ಹಿರಿಯ ಅಧಿಕಾರಿ, ಅಪರ ಜಿಲ್ಲಾಧಿಕಾರಿ ನಂಜುಂಡೇ ಗೌಡ ಅವರ ಮೇಲೆ ಲೋಕಾಯುಕ್ತ ಧಾಳಿ ನಡೆಸಿದ್ದು ಇವರನ್ನು ಬಲ್ಲವರಿಗೆ ಅಚ್ಚರಿಯೇನೂ ಆಗಲಿಲ್ಲ. ಹಾಸಿಗೆಯಿಂದ ಏಳುವುದಕ್ಕೂ ಮುನ್ನವೇ ಸಕ್ಕರೆ ನಿದ್ರೆಯಲ್ಲಿದ್ದ ಗೌಡರನ್ನ ಬೆಳಿಗ್ಗೆ 5 ಘಂಟೆಗೇ ಎಬ್ಬಿಸಿದ ಲೋಕಾಯುಕ್ತ ಅಧಿಕಾರಿಗಳ ತಂಡವನ್ನು ನೋಡಿಯೇ ಹಿರಿಯ ಅಧಿಕಾರಿ ಛಳಿಯಲ್ಲೂ ಬೆವೆತು ಹೋಗಿದ್ದರು.
ಕಂದಾಯ ಇಲಾಖೆಯ ಉನ್ನತ ದರ್ಜೆಯ ಅಧಿಕಾರಿಯ ಮನೆಗೆ ರೈಡ್ ಆಗಿದ್ದು ಬಹುಶಃ ಪುಟ್ಟ ಜಿಲ್ಲೆಯ ಇತಿಹಾಸದಲ್ಲೇ ಮೊದಲು ಇರಬೇಕು. ಅಲ್ಲದೆ ಕೆಏಎಸ್ ಅಧಿಕಾರಿಯೊಬ್ಬರು 8 ವರ್ಷಕ್ಕೂ ಹೆಚ್ಚು ಕಾಲ ಕೊಡಗಿನಲ್ಲೇ ಇದ್ದುದು ಇದೇ ಮೊದಲಾಗಿದೆ. ಬೆಳಿಗ್ಗೆಯಿಂದಲೇ ದಾಖಲೆಗಳ ಪರಿಶೀಲನೆ ನಡೆಸಿದ ಅಧಿಕಾರಿಗಳಿಗೆ ಮನೆಯಲ್ಲಿ 23 ಲಕ್ಷ ನಗದು, 21.34 ಲಕ್ಷದ ಮೌಲ್ಯದ 388.2 ಗ್ರಾಂ ಚಿನ್ನಾಭರಣ, 9.408 ರೂಪಾಯಿಯ ಮೌಲ್ಯದ 235 ಗ್ರಾಂ ಬೆಳ್ಳಿಯ ವಸ್ತುಗಳು, 5 ಲಕ್ಷ ಮೌಲ್ಯದ ಕಾರು, 35 ಲಕ್ಷ ರೂಪಾಯಿ ಫಿಕ್ಸೆಡ್ ಡೆಪಾಸಿಟ್, ಮತ್ತೊಂದು ಬ್ಯಾಂಕ್ ಖಾತೆಯಲ್ಲಿ 4 ಲಕ್ಷ ಹಣ ಸಿಕ್ಕಿದೆ.
ಜೊತೆಗೆ ವಿವಿಧೆಡೆ 2.55 ಕೋಟಿ ರೂಪಾಯಿ ಮೌಲ್ಯದ ಆಸ್ತಿ ಖರೀದಿಸಿದ್ದಾರೆ. ತಮ್ಮ ಊರು ಚಾಮರಾಜನಗರದ ಕೊಳ್ಳೆಗಾಲದಲ್ಲಿ 83 ಲಕ್ಷ ಮೌಲ್ಯದ 23.74 ಎಕರೆ ಭೂಮಿ, ಕೊಡಗಿನ ಸುಂಟಿಕೊಪ್ಪದಲ್ಲಿ 10 ಲಕ್ಷ ಮೌಲ್ಯದ ಸೈಟ್, ಭಾಗಮಂಡಲದಲ್ಲಿ 40.30 ಲಕ್ಷ ಮೌಲ್ಯದ 6.80 ಎಕರೆ ಕೃಷಿ ಭೂಮಿ, ಪಿರಿಯಾಪಟ್ಟಣ ತಾಲ್ಲೂಕಿನ ವಿವಿಧೆಡೆ 71 ಲಕ್ಷ ಮೌಲ್ಯದ 20 ಎಕರೆ ಕೃಷಿ ಭೂಮಿ, ಜೊತೆಗೆ ಮೈಸೂರಿನ ವಿವಿಧೆಡೆ 36 ಲಕ್ಷ ಮೌಲ್ಯದ ಎರಡು ನಿವೇಶನ ಜೊತೆಗೆ 14.70 ಲಕ್ಷ ಮೌಲ್ಯದ 1.09 ಎಕರೆ ಕೃಷಿ ಭೂಮಿ ಖರೀದಿಸಿರುವುದು ಪತ್ತೆಯಾಗಿದೆ. ಒಟ್ಟಿನಲ್ಲಿ ಸ್ಥಿರಾಸ್ತಿ ಮತ್ತು ಚರಾಸ್ತಿ ಸೇರಿ 3.53 ಕೋಟಿ ಮೌಲ್ಯದ ಸಂಪತ್ತನ್ನು ಬಯಲಿಗೆಳೆದಿದ್ದಾರೆ.
ಕೊಡಗು ಲೋಕಾಯುಕ್ತ ಡಿವೈಎಸ್ಪಿ ಪವನ್ ಕುಮಾರ್ ನೇತೃತ್ವದಲ್ಲಿ ಮೂವರು ಇನ್ಸ್ಪೆಕ್ಟರ್ಗಳು ಮತ್ತು ಹತ್ತಕ್ಕೂ ಹೆಚ್ಚು ಸಿಬ್ಬಂದಿಗಳ ತಂಡ ಬೆಳಿಗ್ಗೆ 5.50 ಗಂಟೆಗೆ ದಾಳಿ ನಡೆಸಿತ್ತು. ಎಡಿಸಿ ಅವರ ಮನೆಯ ಯಾವ ಕಡೆಗೆ ಹೋಗಿ ನೋಡಿದರೂ ದುಡ್ಡಿನ ಕಂತೆಗಳೇ ಸಿಕ್ಕಿದ್ದವು. ಆರಂಭದಲ್ಲಿ ಕೈಯಿಂದಲೇ ಲೆಕ್ಕ ಹಾಕಿ ಸುಸ್ತಾದ ಅಧಿಕಾರಿಗಳು ನಂತರ ಹಣ ಎಣಿಸುವ ಯಂತ್ರವನ್ನೇ ಮನೆಗೆ ತಂದು ಲೆಕ್ಕ ಹಾಕಿದರು. ಮನೆ ಜೊತೆಗೆ ಕಚೇರಿಯಲ್ಲಿಯೂ ಸಾಕಷ್ಟು ಆಸ್ತಿ ದಾಖಲೆ ಪತ್ರಗಳು ದೊರೆ ತಿವೆ. ಡಾ. ನಂಜುಂಡೇಗೌಡ ಅವರು ತಾವು ಎಲ್ಲಿಲ್ಲೆ ಸೇವೆ ಸಲ್ಲಿಸಿದ್ದಾರೆಯೋ ಅಲ್ಲೆಲ್ಲಾ ಆಸ್ತಿ ಖರೀದಿಸಿದ್ದಾರೆ ಎನ್ನುವುದು ಲೋಕಾಯುಕ್ತ ಪೊಲೀಸರ ಪ್ರಾಥಮಿಕ ತನಿಖೆಯಲ್ಲಿ ಗೊತ್ತಾಗಿದೆ. ಸ್ಥಳಕ್ಕೆ ಲೋಕಾಯುಕ್ತ ಎಸ್ಪಿ ಸುರೇಶ್ ಬಾಬು ಅವರು ಭೇಟಿ ನೀಡಿ ಪರಿಶೀಲನೆ ನಡೆಸಿದರು.
ಕೊಳ್ಳೇಗಾಲ ಮೂಲದ ಗೌಡರು ಮೈಸೂರು, ಚಾಮರಾಜನಗರ ಜಿಲ್ಲೆಗಳಲ್ಲಿ ಸೇವೆ ಸಲ್ಲಿಸಿ 2016ರಲ್ಲಿ ಕೆಏಎಸ್ ಗೆ ಭಡ್ತಿ ಪಡೆದು ಕೊಡಗಿಗೆ ಉಪವಿಭಾಗಾಧಿಕಾರಿಯಾಗಿ ಬಂದರು. ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರ ಪುತ್ರ ರಾಕೇಶ್ ಪ್ರಭಾವದಿಂದ ಈ ವರ್ಗಾವಣೆ ಮಾಡಿಸಿಕೊಂಡಿದ್ದರು ಎನ್ನಲಾಗಿದೆ. ನಂತರ ಮೂರು ವರ್ಷಗಳ ಕಾಲ ಸಾಕಷ್ಟು ಅಮದನಿಯ ರುಚಿ ಕಂಡ ಗೌಡರಿಗೆ ಕೊಡಗು ಬಿಟ್ಟು ಹೋಗಲು ಮನಸ್ಸೇ ಬರಲಿಲ್ಲ. 2019 ರಲ್ಲಿ ಕುಮಾರ ಕೃಪ ಅತಿಧಿ ಗೃಹದ ಆಡಳಿತಾಧಿಕಾರಿ ಆಗಿ ವರ್ಗಾವಣೆ ಆದರೂ ಇವರು ಹೋಗಲಿಲ್ಲ , ಪ್ರಭಾವ ಬೀರಿ ಮಡಿಕೇರಿಯ ಮೆಡಿಕಲ್ ಕಾಲೇಜಿಗೆ ಒಳಾಡಳಿತ ಅಧಿಕಾರಿಯಾಗಿ ವರ್ಗಾವಣೆ ಮಾಡಿಸಿಕೊಂಡರು. ನಂತರ ಶಾಸಕರಿಬ್ಬರಿಂದಲೂ ಶಿಫಾರಸು ಪತ್ರ ಪಡೆದುಕೊಂದು ಅಪರ ಜಿಲ್ಲಾದಿಕಾರಿಯಾಗಿ ವರ್ಗಾವಣೆ ಮಾಡಿಸಿಕೊಂಡರು.
ಇವರ ಕಾರ್ಯ ವೈಖರಿಯನ್ನು ಹತ್ತಿರದಿಂದ ಬಲ್ಲವರಿಗೆ ಇವರು ಲೋಕಾಯುಕ್ತ ಬಲೆಗೆ ಬಿದ್ದಿರುವುದು ಆಶ್ಚರ್ಯವೇ ಆಗಿದೆ. ಏಕೆಂದರೆ ಇವರು ಎಂದಿಗೂ ತಾವು ಕೈಯಿಂದ ಲಂಚ ಸ್ವೀಕರಿಸುತ್ತಿರಲಿಲ್ಲ. ಇವರ ಪರವಾಗಿ ಸಿಬ್ಬಂದಿಗಳೋ ಅಥವಾ ಏಜೆಂಟರೋ ಪಡೆದುಕೊಳ್ಳುತಿದ್ದರು. ಇವರ ಭ್ರಷ್ಟಾಚಾರದ ಮೇಲೆ ಮೊದಲಿನಿಂದಲೂ ಕಣ್ಣಿಟ್ಟಿದ್ದ ಲೋಕಾಯುಕ್ತ ಅಧಿಕಾರಿಗಳು 2018 ರ ಮೇ 18 ರಂದು ರೆಡ್ ಹ್ಯಾಂಡಾಗಿ ಏಸಿ ಕಚೇರಿಯಲ್ಲೇ ಬಲೆಗೆ ಕೆಡವಲು ಧಾಳಿ ನಡೆಸಿದರು. ಆದರೆ ಆವತ್ತು ಇವರ ಪರವಾಗಿ 50 ಸಾವಿರ ಲಂಚ ಸ್ವೀಕರಿಸಿದ ಕಚೇರಿಯ ಶಿರಸ್ತೆದಾರ್ ಉಮೇಶ್ ಸಿಕ್ಕಿಬಿದ್ದಿದ್ದರು. ಗೌಡರು ಬಚಾವ್ ಆಗಿದ್ದರು.
2017 ರಲ್ಲಿ ಸೋಮವಾರಪೇಟೆ ತಾಲ್ಲೂಕಿನ ಚಿಕ್ಕ ಕುಂದ ಗ್ರಾಮದ ರೈತ ದರ್ಶನ್ ಎಂಬುವವರ ದಾಯಾದಿ ವ್ಯಾಜ್ಯದ ಜಮೀನಿನ ಮೊಕದ್ದಮೆಯಲ್ಲಿ ಅಧಿಕಾರ ದುರುಪಯೋಗಪಡಿಸಿಕೊಂಡು ಜಮೀನನ್ನು ಬೇರೊಬ್ಬರಿಗೆ ಖಾತೆ ವರ್ಗಾವಣೆ ಮಾಡಿಸಿಕೊಟ್ಟಿದ್ದರು. ಏಸಿ ಕೋರ್ಟಿನ ತೀರ್ಪಿನ ವಿರುದ್ದ ಅಂದಿನ ಅಪರ ಜಿಲ್ಲಾಧಿಕಾರಿ ಆಗಿದ್ದ ಸತೀಶ್ ಅವರಿಗೆ ದರ್ಶನ್ ದೂರು ನೀಡಿದ್ದರು. ತನಿಖೆ ನಡೆಸಿದ ಅಪರ ಜಿಲ್ಲಾಧಿಕಾರಿಗಳ ನ್ಯಾಯಾಲಯ ಗೌಡರು ಅಧಿಕಾರ ದುರುಪಯೋಗ ಪಡಿಸಿಕೊಂಡಿರುವುದನ್ನು ತೀರ್ಪಿನ ಮೂಲಕ ಖಚಿತಪಡಿಸಿ ಶಿಸ್ತು ಕ್ರಮಕ್ಕೆ ರಾಜ್ಯ ಸರ್ಕಾರಕ್ಕೆ ಶಿಫಾರಸು ಮಾಡಿತ್ತು. ಆದರೆ ರಾಜಕೀಯ ಪ್ರಭಾವ ಬಳಸಿ ಇದರಿಂದಲೂ ಬಚಾವ್ ಆಗಿದ್ದರು. ಏಸಿ ಆಗಿದ್ದಾಗಲೇ ಕೊಡಗಿನ ಜನ ಧಾರಾಳಿಗಳು ಎಂದು ಕಂಡುಕೊಂಡಿದ್ದ ಗೌಡರು ಇಲ್ಲಿಯೇ ಇನ್ನಷ್ಟು ವರುಷ ಮುಂದುವರೆಯುವ ಆಸೆ ಹೊಂದಿದ್ದರು. ಆದರೆ ಅಷ್ಟರಲ್ಲಿ ಲೋಕಾಯುಕ್ತ ಅಧಿಕಾರಿಗಳು ಇವರ ಭ್ರಷ್ಟಾಚಾರಕ್ಕೆ ತಾತ್ಕಾಲಿಕವಾಗಿಯಾದರೂ ಬ್ರೇಕ್ ಹಾಕಿದ್ದಾರೆ.