ಭಾರತದ ಸ್ಮಾರ್ಟ್ಪೋನ್ ಬಳಕೆಯ ಮೂಲಕ ಡಿಜಿಟಲ್ ಕ್ರಾಂತಿ ಉಂಟಾಗಿದ್ದು, ದೇಶದಲ್ಲಿ 120 ಕೋಟಿ ಮಂದಿ ಮೊಬೈಲ್ ಹಾಗೂ 60 ಕೋಟಿ ಮಂದಿ ಸ್ಮಾರ್ಟ್ಪೋನ್ ಬಳಸುತ್ತಿದ್ದಾರೆ. ಲ್ಯಾಪ್ಟಾಪ್, ಕಂಪ್ಯೂಟರ್ಗಳು ಸಾಮಾನ್ಯ ಎನಿಸಿವೆ. ದೇಶದ ನಾಗರಿಕರೀಗ ಬಹುತೇಕ ಪಾವತಿಗಳನ್ನು ಡಿಜಿಟಲ್ ಮೂಲಕ ಮಾಡುತ್ತಿದ್ದಾರೆ. ಗ್ರಾಮೀಣ ಜನತೆ ಕೂಡಾ ಆನ್ಲೈನ್ ಪಾವತಿ ಪಳಗಿದ್ದಾರೆ. ಆದರೆ ಡಿಜಿಟಲ್ ಬಳಕೆ ಹೆಚ್ಚಾದಂತೆ ದೇಶದ ನಾಗರಿಕರ ವೈಯಕ್ತಿಕ ಡೇಟಾದ ದುರ್ಬಳಕೆ ಕೂಡಾ ಹೆಚ್ಚಾಗಿದೆ.
ಮೊಬೈಲ್ನಲ್ಲಿ ಆ್ಯಪ್ಗಳನ್ನು ಡೌನ್ಲೋಡ್ ಮಾಡಿಕೊಳ್ಳುವಾಗ ಆರಂಭದಲ್ಲಿ ಕೇಳುವ ‘Allow’ ಎಂಬ ಆಯ್ಕೆ ನಮ್ಮ ದತ್ತಾಂಶದ ಬಹುದೊಡ್ಡ ಚೋರ ಎನ್ನುವುದು ಹಲವರ ಗಮನಕ್ಕೆ ಬರುವುದೇ ಇಲ್ಲ. ಮೊಬೈಲ್ನಲ್ಲಿ ನೀವು ಯಾವುದೋ ಕಂಪನಿಯ ಆ್ಯಪ್ ಡೌನ್ಲೋಡ್ ಮಾಡಿಕೊಳ್ಳುವಾಗ ಅದು ಕ್ಯಾಮೆರಾ, ಗ್ಯಾಲರಿ, ಸಂಪರ್ಕ , ಜಿಪಿಎಸ್ನಂಥ ಇತರ ವಿಭಾಗಗಳ ಪ್ರವೇಶಿಸುವ ಕುರಿತೂ ಅನುಮತಿ ಕೇಳುತ್ತದೆ. ಆ್ಯಪ್ ಡೌನ್ಲೋಡ್ ಆದರೆ ಸಾಕೆಂಬ ಗಡಿಬಿಡಿಯಲ್ಲಿರುವ ನಿಮಗೆ, ಆ್ಯಪ್ ಕೇಳಿದ್ದಕ್ಕೆಲ್ಲ ‘ಓಕೆ’ ಕೊಡುವ ಒತ್ತಡ ಸಹಜವಾಗಿ ನಿಮ್ಮೊಳಗೆ ಸೃಷ್ಟಿಯಾಗುತ್ತದೆ. ನೀವು ಇದಕ್ಕೆ ಅನುಮತಿಸಿದರೆ, ನಿಮ್ಮ ವೈಯಕ್ತಿಕ ದತ್ತಾಂಶಗಳೆಲ್ಲ ಆ ಕಂಪನಿಗಳು ತಮ್ಮ ಸರ್ವರ್ಗಳಿಗೆ ಅಪ್ಲೋಡ್ ಮಾಡುತ್ತವೆ. ಚುನಾವಣೆ, ವ್ಯವಹಾರ ಅಥವಾ ಬೇರಾವುದೋ ಸಂದರ್ಭಗಳಲ್ಲಿ ಈ ದತ್ತಾಂಶಗಳನ್ನು ಆ ಕಂಪನಿಗಳು ಹಣಕ್ಕೆ ಮಾರಿಕೊಳ್ಳುತ್ತವೆ. ಈ ಮೋಸವನ್ನು ಅಧಿಕಾರಯುತವಾಗಿ ಪ್ರಶ್ನಿಸಲು ಇದುವರೆಗೆ ಭಾರತದಲ್ಲಿ ಯಾವುದೇ ಕಟ್ಟುನಿಟ್ಟಿನ ಕಾನೂನುಗಳಿರಲಿಲ್ಲ. ಈ ಸಮಸ್ಯೆಗಳಿಗೆ ತೆರೆ ಎಳೆಯುವುದಕ್ಕಾಗಿಯೇ ಕೇಂದ್ರ ಸರಕಾರ ಇದೀಗ ಡಿಜಿಟಲ್ ಪರ್ಸನಲ್ ಡೇಟಾ ಪ್ರೊಟೆಕ್ಷನ್ ಬಿಲ್-2023 (ಡಿಪಿಡಿಪಿ) ಜಾರಿ ಮಾಡಿದೆ.
ಮೂಲ ಉದ್ದೇಶವೇನು?
ಸುಳ್ಳು ಸುದ್ದಿಗಳ ಮೂಲಕ ಸಾಮರಸ್ಯ ಕದಡುವುದಕ್ಕೆ ಕಡಿವಾಣ ಹಾಕುವುದು, ಅಂತರ್ಜಾಲ ಹಾಗೂ ಹೊಸ ಬಗೆಯ ಸೈಬರ್ ಅಪರಾಧಗಳನ್ನು ನಿಯಂತ್ರಿಸುವುದು, ನಾಗರಿಕರ ಮಾಹಿತಿ ರಕ್ಷಣೆ, ಭಾರತ ಏಕತೆ ಮತ್ತು ಸಾರ್ವಭೌಮತೆಗೆ ಧಕ್ಕೆ ತರುವ ವಿಷಯಗಳನ್ನು ನಿಯಂತ್ರಿಸುವುದು ಮುಂತಾದವು ಡೇಟಾ ಪ್ರೊಟೆಕ್ಷನ್ ಬಿಲ್ನ ಮುಖ್ಯ ಉದ್ದೇಶವಾಗಿದೆ.
ಡೇಟಾ ಪ್ರೊಟೆಕ್ಷನ್ ಬಿಲ್ನ ಮುಖ್ಯಾಂಶಗಳು:
*ಹಣಕಾಸಿನ ದತ್ತಾಂಶ, ಆರೋಗ್ಯ ದತ್ತಾಂಶ, ಲೈಂಗಿಕ ಜೀವನ, ಲೈಂಗಿಕ ದೃಷ್ಟಿಕೋನ, ಬಯೋಮೆಟ್ರಿಕ್ ದತ್ತಾಂಶ, ಜೆನೆಟಿಕ್ ದತ್ತಾಂಶ, ಟಾನ್ಸ್ಜೆಂಡರ್ ಮಾಹಿತಿ, ಇಂಟರ್ಸೆಕ್ಸ್ ಮಾಹಿತಿ, ಜಾತಿ ಅಥವಾ ಬುಡಕಟ್ಟು, ಧಾರ್ಮಿಕ ಮತ್ತು ರಾಜಕೀಯ ನಂಬಿಕೆಗಳು ಇತ್ಯಾದಿಗಳನ್ನು ಸೂಕ್ಷ್ಮ ವೈಯಕ್ತಿಕ ದತ್ತಾಂಶ ಎಂದು ವಿಧೇಯಕ ಪರಿಗಣಿಸಿದೆ.
*ಎರಡು ಅಥವಾ ಅದಕ್ಕಿಂತ ಹೆಚ್ಚು ಬಳಕೆದಾರರ ನಡುವೆ ಆನ್ಲೈನ್ ಸಂವಹನವನ್ನು ಸಕ್ರಿಯಗೊಳಿಸುವ ಸಾಮಾಜಿಕ ಮಾಧ್ಯಮಗಳು ಭಾರತೀಯ ಕಾನೂನಿನಡಿಯಲ್ಲಿ ನೋಂದಾಯಿಸಿಕೊಳ್ಳುವುದು ಕಡ್ಡಾಯ ಎಂದು ಮಸೂದೆ ಹೇಳಿದೆ. ಅಲ್ಲದೆ, ಅವರು ತಮ್ಮ ಬಳಕೆದಾರರಿಗೆ ಸ್ವಯಂಪ್ರೇರಿತ ಪರಿಶೀಲನಾ ವ್ಯವಸ್ಥೆಯನ್ನೂ ಒದಗಿಸಬೇಕು ಎಂದೂ ಸೂಚಿಸಿದೆ.
*ದತ್ತಾಂಶ ಸಂರಕ್ಷಣಾ ಕಾನೂನಿನ ನಿಯಮ ಉಲ್ಲಂಘಿಸಿದರೆ ಕಾನೂನು ಕ್ರಮ ಜರುಗಿಸಲಾಗುತ್ತದೆ. ಭಾರತೀಯ ಕಾನೂನು ಮಾನದಂಡಗಳನ್ನು ಅನುಸರಿಸಲು ಅಥವಾ ದತ್ತಾಂಶ ರಕ್ಷಣೆಯಲ್ಲಿ ವಿಫಲವಾದರೆ ಸಂಬಂಧಪಟ್ಟ ಸಂಸ್ಥೆಗಳಿಗೆ ಭಾರೀ ದಂಡ ವಿಧಿಸಲಾಗುತ್ತದೆ. ಇಂಥ ನಿಯಮ ಉಲ್ಲಂಘನೆ ವ್ಯಾಜ್ಯಗಳನ್ನು ಬಗೆಹರಿಸಲು ದತ್ತಾಂಶ ಸಂರಕ್ಷಣಾ ಮಂಡಳಿಯನ್ನು ರಚಿಸಲಾಗುತ್ತದೆ. ಮಂಡಳಿಯ ಅಧ್ಯಕ್ಷರು ಮತ್ತು ಸದಸ್ಯರನ್ನು ಕೇಂದ್ರ ಸರಕಾರವೇ ನೇಮಿಸಲಿದೆ.
*ದತ್ತಾಂಶ ಸಂಗ್ರಹಣೆಗೆ ಒಪ್ಪಿಗೆ ನೀಡುವ ಆಯ್ಕೆಯನ್ನು ಅವರು ಬಳಕೆದಾರರ ವಿವೇಚನೆಗೆ ಬಿಡಬೇಕು. ಒಂದುವೇಳೆ, ಬಳಕೆದಾರ ತನ್ನ ಸಮ್ಮತಿಯನ್ನು ಹಿಂಪಡೆಯಲು ಬಯಸಿದರೆ, ಅದಕ್ಕೆ ಅನುಮತಿಸಬೇಕು. ಆತನ ದತ್ತಾಂಶವನ್ನು ಸಂಸ್ಥೆ ಕಡ್ಡಾಯವಾಗಿ ಅಳಿಸಬೇಕು.
*ಮಕ್ಕಳ ದತ್ತಾಂಶ ರಕ್ಷಣೆ ವಿಚಾರದ ಬಗ್ಗೆಯ ಮಸೂದೆ ಗಮನ ಹರಿಸಿದ್ದು, ದತ್ತಾಂಶ ಪಡೆಯುವ ಮುನ್ನ ಕಂಪನಿಗಳು ಮಗುವಿನ ವಯಸ್ಸನ್ನು ಪರಿಶೀಲಿಸುವುದು ಕಡ್ಡಾಯ. 18 ವರ್ಷದೊಳಗಿನವರ ವೈಯಕ್ತಿಕ ಮಾಹಿತಿಗಳನ್ನು ಪೋಷಕರ ಒಪ್ಪಿಗೆಯಿಲ್ಲದೆ ಆನ್ಲೈನ್ ಸಂಸ್ಥೆಗಳು ಬಳಸುವಂತಿಲ್ಲ. 15-18 ವಯಸ್ಸಿನ ನಡುವಿನ ಮಕ್ಕಳ ದತ್ತಾಂಶ ಪಡೆಯುವ ಮುನ್ನ ಎಜುಕೇಶನ್ ಟೆಕ್ ಪ್ಲಾಟ್ಫಾರಂನ ಆ್ಯಪ್ಗಳಿಗೆ ಕೇಂದ್ರ ಸರಕಾರದ ಅನುಮತಿ ಪಡೆಯುವುದು ಕಡ್ಡಾಯ.
*ಯಾವುದೇ ಕಂಪನಿ ಒಬ್ಬ ವ್ಯಕ್ತಿಯ ವೈಯಕ್ತಿಕ ಡೇಟಾವನ್ನು ಅವನ ಒಪ್ಪಿಗೆಯಿಲ್ಲದೆ ಬಳಸಿದರೆ, ಅವನು ದತ್ತಾಂಶ ಸಂರಕ್ಷಣಾ ಮಂಡಳಿಯ ಮುಂದೆ ತನ್ನ ದೂರನ್ನು ದಾಖಲಿಸಬಹುದು. ಈ ಕಾನೂನು ಹೋರಾಟದಲ್ಲಿ ಸಂಸ್ಥೆ ತಪ್ಪಾಗಿ ನಡೆದುಕೊಂಡಿದ್ದರೆ ಭಾರೀ ದಂಡ ವಿಧಿಸಲಾಗುತ್ತದೆ. ಮಕ್ಕಳಿಗೆ ಸಂಬಂಧಿಸಿದ ಪ್ರಕರಣದಲ್ಲಿ ಉಲ್ಲಂಘನೆಯಾದರೆ 150 ಕೋಟಿ ರೂ.ಗಳವರೆಗೆ ದಂಡ, ಹಾಗೆಯೇ ಡೇಟಾ ರಕ್ಷಣೆಗೆ ಸಂಬಂಧಿಸಿದ ಕ್ರಮಗಳನ್ನು ಪೂರ್ಣಗೊಳಿಸದಿದ್ದಕ್ಕಾಗಿ 250 ಕೋಟಿ ರೂ. ವರೆಗೂ ದಂಡ ವಿಧಿಸಬಹುದು.