ಆಲ್ ಇನ್ ಒನ್ ಪರ್ಸನಲ್ ಕಂಪ್ಯುಟರ್, ಸ್ಮಾಲ್ ಫಾರ್ಮ್ ಫ್ಯಾಕ್ಟರ್ ಕಂಪ್ಯೂಟರ್, ಲ್ಯಾಪ್ಟಾಪ್, ಟ್ಯಾಬ್ಲೆಟ್ಗಳ ಆಮದು ವಿರುದ್ಧ ಕೇಂದ್ರ ವಾಣಿಜ್ಯ ಸಚಿವಾಲಯ ನಿರ್ಬಂಧವನ್ನು ಹೇರಿದೆ. ನಿರ್ಬಂಧಿತ ಆಮದಿಗೆ ಪರವಾನಿಗೆ ಹೊಂದಿರುವವರು ಮಾತ್ರ ಇವುಗಳನ್ನು ಆಮದು ಮಾಡಿಕೊಳ್ಳಬಹುದಾಗಿದೆ.
ನಿರ್ಬಂಧಿತ ಆಮದುಗಳಿಗೆಂದು ಪರವಾನಿಗೆ ಹೊಂದಿದವರು ಬಿಟ್ಟು ಉಳಿದವರು ಯಾರೂ ಕೂಡ ಈ ಮೇಲಿನ ಎಲೆಕ್ಟ್ರಾನಿಕ್ ಉತ್ಪನ್ನಗಳನ್ನು ಆಮದು ಮಾಡಿಕೊಳ್ಳುವಂತಿಲ್ಲ. ಕೇಂದ್ರ ವಾಣಿಜ್ಯ ಸಚಿವಾಲಯ ಗುರುವಾರ ಈ ಅಧಿಸೂಚನೆ ಹೊರಡಿಸಿದ್ದು, ತತ್ಕ್ಷಣದಿಂದಲೇ ಈ ನಿರ್ಬಂಧ ಜಾರಿಗೆ ಬರುತ್ತದೆ ಎಂದು ಹೇಳಿಕೆ ನೀಡಿದೆ.
ಎಚ್ಎಸ್ಎನ್8741 ಅಡಿಯಲ್ಲಿ ಬರುವ ಲ್ಯಾಪ್ಟಾಪ್, ಟ್ಯಾಬ್ಲೆಟ್, ಆಲ್ ಇನ್ ಒನ್ ಪರ್ಸನಲ್ ಕಂಪ್ಯೂಟರ್ ಮತ್ತು ಅತಿಚಿಕ್ಕ ಕಂಪ್ಯೂಟರ್ ಮತ್ತು ಸರ್ವರ್ಗಳ ಆಮದನ್ನು ನಿರ್ಬಂಧಿಸಲಾಗಿದೆ. ನಿರ್ಬಂಧಿತ ಆಮದಿಗೆ ಸೂಕ್ತ ಪರವಾನಿಗೆ ಇದ್ದವರು ಮಾತ್ರ ಆಮದು ಮಾಡಿಕೊಳ್ಳಲು ಅವಕಾಶ ಇರುತ್ತದೆ’ ಎಂದು ವಾಣಿಜ್ಯ ಸಚಿವಾಲಯದ ಅಧಿಸೂಚನೆಯಲ್ಲಿ ತಿಳಿಸಲಾಗಿದೆ.
ಇಲ್ಲಿ ಬ್ಯಾಗೇಜ್ ನಿಯಮಗಳ ಅಡಿಯಲ್ಲಿ ಬರುವ ಆಮದುಗಳಿಗೆ ಯಾವುದೇ ನಿರ್ಬಂಧ ಇರುವುದಿಲ್ಲ. ಮೇಲೆ ತಿಳಿಸಲಾಗಿರುವ ಎಚ್ಎಸ್ಎನ್8741 ಕೋಡ್ ಜಿಎಸ್ಟಿಗೆ ಮಾಡಲಾದ ವರ್ಗೀಕರಣ. ಆಮದು ಮಾಡಲಾದ ಕಂಪ್ಯೂಟರ್, ಲ್ಯಾಪ್ಟಾಪ್, ಟ್ಯಾಬ್ಲೆಟ್ಗಳು ಈ ಗುಂಪಿಗೆ ಸೇರುತ್ತವೆ. ಇವಕ್ಕೆ ಶೇ. 18ರಷ್ಟು ತೆರಿಗೆ ಇರುತ್ತದೆ. ಇನ್ನು, ಅಲ್ಟ್ರಾ ಸ್ಮಾಲ್ ಫಾರ್ಮ್ ಫ್ಯಾಕ್ಟರ್ ಕಂಪ್ಯೂಟರ್ ಎಂಬುದು ಅತಿಸಣ್ಣ ಕಂಪ್ಯೂಟರ್. ಇದರ ಸಿಪಿಯು ಅಥವಾ ಕೇಸ್ 20 ಲೀಟರ್ ಗಾತ್ರಕ್ಕಿಂತ ಕಡಿಮೆ ಆಗಿರುತ್ತವೆ. ಇಂತಹವುಗಳಿಗೆ ಆಮದು ನಿರ್ಬಂಧ ಇರುವುದಿಲ್ಲ.
ಮೇಲೆ ತಿಳಿಸಲಾದ ಲ್ಯಾಪ್ಟಾಪ್, ಮುಂತಾದ ಯಂತ್ರೋಪಕರಣಗಳ ಭಾಗವನ್ನು ಆಮದು ಮಾಡಿಕೊಳ್ಳಲು ನಿರ್ಬಂಧ ಇರುವುದಿಲ್ಲ. ಸಂಶೋಧನೆ ಮತ್ತು ಅಭಿವೃದ್ಧಿ, ಟೆಸ್ಟಿಂಗ್, ಬೆಂಚ್ಮಾರ್ಕಿಂಗ್, ಇವ್ಯಾಲುಯೇಶನ್, ದುರಸ್ತಿ ಮತ್ತು ಮರು ರಫ್ತು, ಉತ್ಪನ್ನ ಅಭಿವೃದ್ಧಿ ಈ ಉದ್ದೇಶಗಳಿಗೆ ಸಂಬಂಧಿಸಿದವುಗಳನ್ನು ಆಮದು ಮಾಡಿಕೊಳ್ಳಬಹುದು ಎಂದು ವಾಣಿಜ್ಯ ಸಚಿವಾಲಯದ ಅಧಿಸೂಚನೆಯಲ್ಲಿ ತಿಳಿಸಲಾಗಿದೆ.