ಇಂದಿನ ದಿನಗಳಲ್ಲಿ ಸೋಷಿಯಲ್ ಮೀಡಿಯಾದಲ್ಲಿ ಫೇಮಸ್ ಆಗುವ ಸಲುವಾಗಿ ಯುವಜನತೆ ಎಲ್ಲೆಂದರಲ್ಲಿ ವಿಡಿಯೋ ರೆಕಾರ್ಡ್ ಮಾಡುತ್ತಾರೆ. ಸಣ್ಣ ಮಕ್ಕಳಿಂದ ಹಿಡಿದು ವಯಸ್ಸಾದವರವರೆಗೂ ರೀಲ್ಸ್ ಮಾಡುವ ಕ್ರೇಜ್ ಹುಟ್ಟುಕೊಂಡಿದೆ. ಆದರೆ ಈ ಕ್ರೇಜ್ ಮಿತಿ ಮೀರಿ ಬೆಳೆದಿದ್ದು, ಜನರು ಜೀವದ ಹಂಗನ್ನು ತೊರೆದು ಲೈಕ್ ಕಾಮೆಂಟ್ ಹಿಂದೆ ಬಿಂದಿದ್ದಾರೆ. ಒಳ್ಳೆ ರೀಲ್ಸ್ ಮಾಡಿ ಮಿಲಿಯನ್ ವೀವ್ಸ್ ಲೈಕ್ ಪಡೆದುಕೊಂಡು ಸೋಷಿಯಲ್ ಮೀಡಿಯಾದಲ್ಲಿ ಸ್ಟಾರ್ ಆಗಿ ಮಿಂಚಬೇಕು ಎನ್ನುವುದು ಹೆಚ್ಚಿನವರು ಬಯಕೆ.
ರೀಲ್ಸ್ ಮಾಡಲು ಎಂತಹ ಅಪಾಯಕಾರಿಯಾದ ಕೃತ್ಯಕ್ಕೂ ಹಿಂದು ಮುಂದೂ ಯೋಚನೆ ಮಾಡದೇ ಕೈ ಹಾಕುತ್ತಿದ್ದು, ತಮ್ಮ ಜೀವಕ್ಕಿಂತಲೂ ಹೆಚ್ಚು ಬೆಲೆಯನ್ನು ಇಂದಿನ ಯುವ ಜನತೆ ರೀಲ್ಸ್ಗೆ ಕೊಡುತ್ತಿರುವುದಕ್ಕೆ ಪ್ರತಿ ದಿನ ಒಂದೊಂದು ಘಟನೆಗಳು ನಿದರ್ಶನವಾಗಿ ನಮ್ಮ ಮುಂದಿದೆ. ನೀರಿನ ಬಳಿ ರೀಲ್ಸ್ ಮಾಡಲು ಹೋಗಿ ನೀರಿನಲ್ಲಿ ಬಿದ್ದು ಮೃತಪಟ್ಟವರ ಬಗ್ಗೆ ಆಗಾಗ ವರದಿಗಳು ಆಗುತ್ತಲೇ ಇವೆ. ಆದರೂ ಕೂಡ ಯುವ ಜನತೆ ಎಚ್ಚೆತ್ತುಕೊಂಡಿಲ್ಲ. ಇತ್ತೀಚೆಗೆ ಕೊಲ್ಲೂರು ಸಮೀಪದ ಅರಿಶಿನಗುಂಡಿ ಫಾಲ್ಸ್ನಲ್ಲಿ ರೀಲ್ಸ್ ಮಾಡಲು ಹೋಗಿ ಶರತ್ ಎಂಬ ಯುವಕ ಪ್ರಾಣ ಕಳೆದುಕೊಂಡ ಘಟನೆ ಮತ್ತೆ ರೀಲ್ಸ್ ಕ್ರೇಜ್ ಹೊಂದಿರುವವರನ್ನು ಬಡಿದೆಬ್ಬಿಸಿದೆ.
ಇಂದಿನ ಯುವ ಜನತೆ ಒಂದೇ ದಿನದಲ್ಲಿ ಪೇಮಸ್ ಆಗುವ ಗೀಳಿಗೆ ಬಿದ್ದು, ಕಷ್ಟದಲ್ಲಿ ಹೆತ್ತು ಹೊತ್ತು ಸಾಕಿ ಸಲಹಿದ ತಂದೆ ತಾಯಿ ಜೀವನ ಪೂರ್ತಿ ಕೊರಗುವಂತಹ ಪರಿಸ್ಥಿತಿ ದೂಡಿ ತಮ್ಮ ಜೀವನವನ್ನು ಅಂತ್ಯಗೊಳಿಸುತ್ತಿದ್ದಾರೆ. ಇನ್ನು ಚಿಕ್ಕ ಮಕ್ಕಳೂ ಕೂಡಾ ರೀಲ್ಸ್ ಮೋಹಕ್ಕೆ ಬಿದ್ದಿದ್ದು ತಮ್ಮ ವಿದ್ಯಾಭ್ಯಾಸವನ್ನು ಕಡೆಗಣಿಸುತ್ತಿದ್ದಾರೆ. ನಮ್ಮ ದೇಶದ ಭವಿಷ್ಯವಾಗಬೇಕಿರುವ ಯುವ ಪೀಳಿಗೆ ಲೈಕ್ ಕಮೆಂಟ್ನ ಹಿಂದೆ ಬಿದ್ದು ತಮ್ಮ ಭವಿಷ್ಯವನ್ನೇ ಅಂತ್ಯಗೊಳಿಸಿಕೊಳ್ಳುತ್ತಿದ್ದಾರೆ.
ಒಂದೆಡೆ ರೀಲ್ಸ್ನಿಂದ ತಮ್ಮ ಮಕ್ಕಳನ್ನು ಕಳೆದುಕೊಂಡು ಕೊರಗುವ ಪೋಷಕರಿದ್ದರೇ ಇನ್ನೊದೆಡೆ ರೀಲ್ಸ್ ಹುಚ್ಚುನಿಂದ ಐಫೋನ್ ಖರೀದಿಸಲು ಕರುಳ ಕುಡಿಯನ್ನೇ ಮಾರಿದ ದುಷ್ಟ ಪೋಷಕರು ಇದ್ದಾರೆ. ರೀಲ್ಸ್ ಮೇಲಿನ ಮೋಹ, ಐಫೋನ್ ಕೊಳ್ಳುವ ಆಸೆಯಿಂದಾಗಿ ದಂಪತಿಗಳು ತಮ್ಮ 8 ತಿಂಗಳ ಮಗುವನ್ನೇ ಮಾರಿರುವ ಆಘಾತಕಾರಿ ಘಟನೆ ಪಶ್ಚಿಮ ಬಂಗಾಳದಲ್ಲಿ ನಡೆದಿದೆ. ಇನ್ಸ್ಟಾಗ್ರಾಮ್ ರೀಲ್ಗಳನ್ನು ರಚಿಸಲು ಐಫೋನ್ ಖರೀದಿಸಲು ಬಯಸಿದ್ದ ದಂಪತಿ ಈ ನೀಚ ಕೆಲಸಕ್ಕೆ ಕೈಹಾಕಿದ್ದಾರೆ.
ಸಾಮಾಜಿಕ ಜಾಲತಾಣದ ಗೀಳು ಜನರನ್ನು ಯಾವ ಮಟ್ಟಕ್ಕೂ ಇಳಿಸುತ್ತದೆ ಎಂಬುದಕ್ಕೆ ಇದು ಸ್ಪಷ್ಟ ಉದಾಹರಣೆ. ಒಳ್ಳೆಯ ಉದ್ದೇಶಕ್ಕೆ ಬಳಕೆಯಾಗಬೇಕಿದ್ದ ಸಾಮಾಜಿಕ ಜಾಲತಾಣ ಈಗ ಜನರನ್ನು ದಾರಿ ತಪ್ಪಿಸುವ ತಾಣವಾಗಿ ರೂಪ ಪಡೆದಿರುವುದು ದುರದೃಷ್ಟಕರ ಸಂಗತಿ.