ಶಿವಮೊಗ್ಗ: ಮನೆ ಕಳ್ಳತನ ಮಾಡಲು ಮನೆಗಳನ್ನು ಹುಡುಕಬೇಕು, ಮನೆಗಳಲ್ಲಿ ಹಣ ಒಡವೆ ಇರುತ್ತದೋ ಇದ್ದರೂ ಎಲ್ಲಿರುತ್ತದೆ ಅಂತ ಗೊತ್ತಿರೋದಿಲ್ಲ. ಆದರೆ ಏಟಿಎಂ ಗಳಲ್ಲಿ ಹಣ ಇರುವುದು ಖಚಿತ ಎಂದು ತಿಳಿದುಕೊಂಡಿರುವ ಖದೀಮರು ಈಗ ಇದಕ್ಕೇ ಕನ್ನ ಹಾಕಲು ಮುಂದಾಗುತ್ತಿದ್ದಾರೆ. ಏಟಿಎಂ ದೋಚಲು ಪದೇ ಪದೇ ಪ್ರಯತ್ನಗಳು ನಡೆಯುತ್ತಲೇ ಇವೆ. ದೇಶದ ಕೆಲವೆಡೆ ಗ್ಯಾಸ್ ಕಟ್ಟರ್ ನಿಂದ ಏಟಿಎಂ ದೋಚಿದ್ದರೆ ಈ ಬಾರಿ ಖದೀಮ ಕಳ್ಳರು ಜೆಸಿಬಿ ಬಳಸಿಕೊಂಡು ಎಟಿಎಂ ಲೂಟಿಗೆ ಮುಂದಾಗಿದ್ದಾರೆ. ಆದರೆ ಜೆಸಿಬಿ ನಂಬರ್ ಮೂಲಕ ತಮ್ಮ ಗುರುತು ಪತ್ತೆ ಆಗುವ ಹಿನ್ನೆಲೆಯಲ್ಲಿ ಅದಕ್ಕೂ ಕತರ್ನಾಕ್ ಐಡಿಯಾ ಮಾಡಿಕೊಂಡು ಜೆಸಿಬಿಯೊಂದನ್ನೇ ಕಳ್ಳತನ ಮಾಡಿ ತಮ್ಮ ದುಷ್ಕ್ರ್ಥತ್ಯ ಎಸಗಲು ಮುಂದಾಗಿದ್ದಾರೆ. ರಾತ್ರಿ ಮಳೆ ಇದ್ದುದರಿಂದ ಮಳೆಯ ಶಬ್ದದ ನಡುವೆ ಜೆಸಿಬಿ ಕಾರ್ಯಾಚರಣೆ ಅಕ್ಕಪಕ್ಕದವರಿಗೆ ಗೊತ್ತಾಗುವುದಿಲ್ಲ ಎಂಬುದು ಕಳ್ಳರ ಪ್ಲಾನ್ ಆಗಿತ್ತು.
ಆದರೆ ಪೋಲೀಸರ ಸಕಾಲಿಕ ಆಗಮನದಿಂದ ಇವರ ಪ್ರಯತ್ನ ವಿಫಲಗೊಂಡಿದೆ. ಶಿವಮೊಗ್ಗ ನಗರದ ವಿನೋಬ ನಗರದ ಎಟಿಎಂ ಕದಿಯಲು ಕಳ್ಳರು ಯತ್ನಿಸಿದ್ದು, ರಾತ್ರಿ ಗಸ್ತು ಪೊಲೀಸರ ಸಕಾಲಿಕ ಆಗಮನದಿಂದ ಅವರ ಯೋಜನೆ ವಿಫಲವಾಗಿದೆ.
ಏಕ್ಸಿಸ್ ಬ್ಯಾಂಕಿನ ಏಟಿಎಂ ಲೂಟಿ ಮಾಡಲು ಸಂಚು ರೂಪಿಸಿದ ಕಳ್ಳರು ಅದಕ್ಕೆ ನಿಲ್ಲಿಸಿದ್ದ ಜೆಸಿಬಿಯೊಂದನ್ನು ಕಳ್ಳತನ ಮಾಡಿ ಲೂಟಿಗೆ ಮುಂದಾಗಿದ್ದಾರೆ. ಇನ್ನೇನು ಹಣ ಕೈಸೇರುತ್ತೆ ಅನ್ನುವಷ್ಟರಲ್ಲಿ ಕಳ್ಳರ ಅದೃಷ್ಟ ಕೈ ಕೊಟ್ಟಿತ್ತು. ಜೆಸಿಬಿಯು ಎಟಿಎಂ ನ್ನು ಬಗೆಯುವಷ್ಟರಲ್ಲೇ ರಾತ್ರಿ ಬೀಟ್ ಪೋಲೀಸರು ಬಂದಿದ್ದಾರೆ. ಕೂಡಲೇ ಕಳ್ಳರು ಜೆಸಿಬಿಯನ್ನು ಬಿಟ್ಟು ಕಾಲಿಗೆ ಬುದ್ದಿ ಹೇಳಿದ್ದಾರೆ.
ಪೋಲೀಸ್ ತನಿಖೆಯಲ್ಲಿ ಜೆಸಿಬಿಯನ್ನೂ ಕದ್ದಿರುವ ವಿಷಯ ತಿಳಿದುಬಂದಿದ್ದು, ಪೋಲೀಸರು ಕಳ್ಳರ ಹೆಡೆಮುರಿ ಕಟ್ಟಲು ಬಲೆ ಬೀಸಿದ್ದಾರೆ. ವಿನೋಬನಗರ ಪೊಲೀಸ್ ಠಾಣೆಯಲ್ಲಿ ಪ್ರಕರಣ ದಾಖಲಿಸಿದ್ದು, ಪೋಲೀಸ್ ತನಿಖೆ ಮುಂದುವರೆದಿದೆ.
ಪೊಲೀಸರು ಸಕಾಲದಲ್ಲಿ ಮಧ್ಯಪ್ರವೇಶಿಸಿ ಎಟಿಎಂ ಕಳ್ಳತನಕ್ಕೆ ಯತ್ನಿಸಿದ ಸಾರ್ವಜನಿಕರ ಹಣದ ನಷ್ಟವನ್ನು ತಪ್ಪಿಸಿದರು ಎಂದು ಸ್ಥಳೀಯ ನಿವಾಸಿಗಳು ಶ್ಲಾಘಿಸಿದ್ದಾರೆ.