ವಂದೇಭಾರತ್ ಎಕ್ಸ್ಪ್ರೆಸ್ ಉದ್ಘಾಟನೆಯಾದ ದಿನದಿಂದಲೂ ಒಂದಲ್ಲಾ ಒಂದು ವಿಷಯವಾಗಿ ಸುದ್ದಿಯಾಗುತ್ತಿತ್ತು. ಇತ್ತೀಚೆಗಷ್ಟೇ ಪರೀಕ್ಷಾರ್ಥ ಚಲಾವಣೆಯಾಗುತ್ತಿದ್ದ ವಂದೇಭಾರತ್ನ ವಿಡಿಯೋವನ್ನು ಸುಳ್ಳು ಮಾಹಿತಿ ನೀಡಿ ಹಂಚಿಕೊಂಡಿದ್ದರು. ರೈಲ್ವೆ ಇಲಾಖೆಯೇ ಇದು ಸುಳ್ಳು ಮಾಹಿತಿ ಎಂದು ಸ್ಪಷ್ಟನೆ ನೀಡಿತ್ತು. ಆದರೆ ಕೆಲದಿನಗಳ ಹಿಂದೆ ಮತ್ತೊಂದು ಅಂಥದ್ದೇ ಸುಳ್ಳು ಪ್ರಕರಣ ಬೆಳಕಿಗೆ ಬಂದಿದೆ.
ಕರ್ನಾಟಕದ ಸುದರ್ಶನ್ ಜಯರಾಮು ಎಂಬುವವರು ‘ಹೊರಗೆ ಥಳುಕು, ಒಳಗೆ ಹುಳುಕು’ ಎಂದು ಬರೆದು ಟ್ವಿಟರ್ ನಲ್ಲಿ ವಿಡಿಯೊವೊಂದನ್ನು ಹಂಚಿಕೊಂಡಿದ್ದಾರೆ. ‘ನಾನು ಹೇಳುತ್ತಿರುವುದು ಅತ್ತಿ ಹಣ್ಣೋ, ಮೋದಿಯವರ ವ್ಯಕ್ತಿತ್ವ ಅಲ್ಲ’ ಎಂದೂ ಬರೆದುಕೊಂಡು, ವಂದೇ ಭಾರತ್ ರೈಲಿನ ಗುಣಮಟ್ಟ ಸರಿಯಿಲ್ಲವೆಂದಿದ್ದಾರೆ.
ವಿಡಿಯೊದಲ್ಲಿ ರೈಲು ಬೋಗಿಯೊಂದರ ಸೀಟು ಮುರಿದು ಹೋಗಿರುವುದು ಕಂಡು ಬರುತ್ತದೆ. ಆದರೆ, ಅದು ವಂದೇಭಾರತ್ ರೈಲಿನ ಬೋಗಿಯೇ ಅಲ್ಲ. ಈಶಾನ್ಯ ರೈಲಿನ ಅಧಿಕೃತ ಟ್ವಿಟರ್ ಅಕೌಂಟಿನಿಂದ ಇದಕ್ಕೆ ಉತ್ತರಿಸಲಾಗಿದ್ದು, ‘ಇದು ವಂದೇ ಭಾರತ್ ಎಕ್ಸ್ಪ್ರೆಸ್ ಅಲ್ಲ. ಇದು ಗೊರಖ್ ಪುರ್-ಬನಾರಸ್ ಇಂಟರ್ಸಿಟಿ ಎಕ್ಸ್ ಪ್ರೆಸ್. ಇದರಲ್ಲಿ ಸಿ-2 ಕೋಚಿನ ಸೀಟು ಹಾಳಾಗಿತ್ತು. ದೂರನ್ನು ರೈಲ್ವೆ ಇಲಾಖೆ ತಕ್ಷಣವೇ ಸ್ವೀಕರಿಸಿ, ಅಂದೇ ಅದನ್ನು ರಿಪೇರಿ ಕೂಡ ಮಾಡಲಾಗಿದೆ’ ಎಂದು ರೈಲ್ವೆ ಇಲಾಖೆ ಪ್ರತಿಕ್ರಿಯೆ ನೀಡಿದೆ.
ರೈಲ್ವೆ ಇಲಾಖೆಯಷ್ಟೇ ಅಲ್ಲದೇ, ಹಲವರು ಈ ವಿಡಿಯೊಗೆ ಪ್ರತಿಕ್ರಿಯಿಸಿದ್ದು, ಅದು ವಂದೇಭಾರತ್ ರೈಲು ಅಲ್ಲವೆಂದು ತಿಳಿಸಿದ್ದಾರೆ. ‘ರೈಲಿಗೆ ಕಲ್ಲು ಹೊಡೆಯುವ ಬಾಂಧವರಿಗೆ ಇದನ್ನು ಕಿತ್ತು ಹಾಕುವುದು ಕಷ್ಟವಲ್ಲ’ ಎಂದೊಬ್ಬರು ಉತ್ತರಿಸಿದ್ದರೆ, ನಿಮ್ಮಂತವರೇ ಹಾಳುಗೆಡವಿರಬೇಕು ಎಂದು ಹಲವರು ಬೈದು ಕಾಮೆಂಟ್ ಮಾಡಿದ್ದಾರೆ. ಸಾಮಾಜಿಕ ಜಾಲತಾಣದಲ್ಲಿ ಈಗ ಹೆಚ್ಚಾಗಿ ಜನರನ್ನು ದಾರಿ ತಪ್ಪಿಸುವಂತಹ ಕೆಲಸವನ್ನು ಕೆಲವರು ಮಾಡುತ್ತಿದ್ದು, ಅಂತವರಿಗೆ ಇದು ತಕ್ಕ ಶಾಸ್ತಿಯಾಗಿದೆ