ಬೆಂಗಳೂರು: ರಾಜ್ಯದಲ್ಲಿ ಟೊಮೆಟೊ ಬೆಲೆ ಗಗನಕ್ಕೇರುತ್ತಿದ್ದಂತೆ, ಮೋಸ, ಕಳ್ಳತನ ಪ್ರಕರಣಗಳು ಹೆಚ್ಚಾಗುತ್ತಿದೆ. ಇನ್ನು ಹೊಲಗಳಲ್ಲಿ ಬೆಳೆದಿರುವ ಟೊಮೆಟೊಗಳನ್ನು ರಕ್ಷಿಸಿಕೊಳ್ಳಲು ರೈತರು ರಾತ್ರಿ ಇಡೀ ಹೊಲದಲ್ಲೇ ಟೆಂಟ್ ಹಾಕಿದ್ದಾರೆ.
ದಾವಣಗೆರೆಯ ಕೊಡಗನೂರು ಗ್ರಾಮದಲ್ಲಿ ಟೊಮೆಟೊ ಬೆಳೆಗಾರರು ತಮ್ಮ ಬೆಳೆಗಳನ್ನು ರಕ್ಷಿಸಿಕೊಳ್ಳಲು ಜಮೀನಿನಲ್ಲಿ ಹಗಲು- ರಾತ್ರಿ ಕಾವಲು ಕಾಯುವಂತಾಗಿದೆ.
ಸದ್ಯ ಟೊಮೆಟೊಗೆ ರಾಜ್ಯದಲ್ಲಿ ಬಂಪರ್ ದರ ಸಿಕ್ಕಿದ್ದು, ಪ್ರತಿದಿನ ಟೊಮೆಟೊ ದರ ಏರಿಕೆಯಾಗುತ್ತಲೇ ಇದೆ. ಇದರಿಂದ ಕಳ್ಳರ ಕಾಟವೂ ಹೆಚ್ಚಾಗಿದೆ. ರೈತರ ಜಮೀನುಗಳಿಗೆ ನುಗ್ಗಿ ಟೊಮೆಟೊ ಕಿತ್ತುಕೊಂಡು ಹೋಗುವ ಆತಂಕದಲ್ಲಿ ರೈತರಿದ್ದಾರೆ. ಇದರಿಂದ ರೈತರು ತಮ್ಮ ಸಹಚರರು, ಸಾಕು ನಾಯಿಗಳೊಂದಿಗೆ ಹೊಲದಲ್ಲೇ ಟೊಮೆಟೊ ಕಾಯುತ್ತಾ ಬೀಡುಬಿಟ್ಟಿದ್ದಾರೆ. ಜಮೀನುಗಳಲ್ಲಿ ಟೆಂಟ್, ಸಣ್ಣ ಗುಡಿಸಲು ಹಾಕಿಕೊಂಡು ದೊಣ್ಣೆ ಹಿಡಿದು ಬೆಳೆ ಕಾಯುತ್ತಿದ್ದಾರೆ.
ಲಕ್ಷಾಂತರ ರೂ. ಖರ್ಚು ಮಾಡಿ ಎಕರೆ ಭೂಮಿಯಲ್ಲಿ ಟೊಮೆಟೊ ಬೆಳೆದಿದ್ದಾರೆ. ಇದರಿಂದ ಸಾವಿರಾರು ರೂಪಾಯಿ ಲಾಭ ಸಿಗುತ್ತದೆ. ಆದರೆ ಇಲ್ಲೂ ಕಳ್ಳರ ಕೈಚಳಕದಿಂದ ರೈತರು ಹಗಲು ರಾತ್ರಿ ಹೊಲ ಕಾಯುವ ಪರಿಸ್ಥಿತಿ ಎದುರಾಗಿದೆ.