ಆಂತರಿಕವಾಗಿ ಶಾಂತವಾಗಿರುವ ಜನರು ಕೆಲವು ನಿರ್ದಿಷ್ಟ ಕೆಲಸಗಳಿಂದ ದೂರವಿರುತ್ತಾರೆ. ಜೀವನದಲ್ಲಿ ನಿಜವಾಗಿಯೂ ಬೇಕಿರುವುದು ಏನು ಎನ್ನುವ ಪ್ರಶ್ನೆ ಕಾಡಿದಾಗ ಶಾಂತವಾಗಿ ಯೋಚನೆ ಮಾಡಿದರೆ ದೊರಕುವ ಉತ್ತರ ‘ನೆಮ್ಮದಿ ಹಾಗೂ ಶಾಂತಿ’ ಆಗಿರುತ್ತದೆ.
ಶಾಂತವಾದ ಮನಸ್ಥಿತಿ ನಮಗೆ ಎಲ್ಲಿಂದಲೋ ಸಿಗುವುದಿಲ್ಲ. ಅದೊಂದು ನಮ್ಮ ಮನಸ್ಸಿನ ನಿರ್ಧಾರ. ಜೀವನದ ತಿರುವುಗಳು ಹೇಗೆಯೇ ಇರಲಿ, ಶಾಂತಿಯನ್ನು ಕಳೆದುಕೊಳ್ಳದೆ, ಶಾಂತವಾದ ಧೋರಣೆಯಿಂದಲೇ ಎಲ್ಲವನ್ನೂ ಸ್ವೀಕರಿಸುವ ನಿರ್ಧಾರ ನಮ್ಮಲ್ಲಿರಬೇಕು.
ನಮ್ಮ ಮೆದುಳಿನಲ್ಲಿ ನಿರಂತರವಾಗಿ ಹಲವು ವಿಚಾರಗಳು ಬಂದು ಹೋಗುತ್ತಿರುತ್ತವೆ. ಅವುಗಳಿಂದ ಕೆಲವೊಮ್ಮೆ ಗೊಂದಲ ಉಂಟಾಗುತ್ತದೆ, ಅಶಾಂತಿಯಿಂದ ತೊಳಲಾಟವಾಗಬಹುದು. ಶಾಂತವಾದ ಮನಸ್ಥಿತಿ ಇರುವಾಗ ಯಾರೂ ಸಹ ಕೆಲವು ಕೆಲಸಗಳನ್ನು ಮಾಡಲು ಹೋಗುವುದಿಲ್ಲ. ಅವುಗಳನ್ನು ನೀವು ಮಾಡುತ್ತಿಲ್ಲವೆಂದಾದರೆ ನಿಮ್ಮಲ್ಲಿ ಆಂತರಿಕವಾಗಿ ಶಾಂತಿಯಿದೆ ಎಂದು ಹೇಳಬಹುದು.
ನಿಮ್ಮಲ್ಲಿ ಇತರರೊಂದಿಗೆ ಹೋಲಿಕೆ ಮಾಡಿಕೊಳ್ಳದ ಗುಣವಿದೆ ಎಂದಾದರೆ ನಿಮ್ಮಷ್ಟು ಸುಖಿಗಳು ಬೇರ್ಯಾರೂ ಇಲ್ಲ. ಹೋಲಿಕೆ ಮಾಡಿಕೊಳ್ಳುವ ಸ್ವಭಾವ ನಮ್ಮ ಶಾಂತಿಯನ್ನು ಹಾಳುಮಾಡುತ್ತದೆ. ಇತರರ ಸೌಂದರ್ಯ, ಶ್ರೀಮಂತಿಕೆ, ವೃತ್ತಿ , ಸಂಬಂಧಗಳನ್ನು ನೋಡಿ ಹೋಲಿಕೆ ಮಾಡಿಕೊಳ್ಳುವುದರಿಂದ ಮನಸ್ಸಿನ ಶಾಂತಿಯನ್ನು ಕಳೆದುಕೊಳ್ಳಬೇಕಾಗುತ್ತದೆ. ನಾವು ಹೇಗಿದ್ದೇವೆಯೋ ಹಾಗೆಯೇ ಕಂಫರ್ಟ್ ಆಗಿರುವುದು ಮುಖ್ಯ. ಹೀಗಾಗಿ, ಕಷ್ಟಪಟ್ಟಾದರೂ ಈ ಗುಣವನ್ನು ಬೆಳೆಸಿಕೊಳ್ಳುವುದು ಅಗತ್ಯವಾಗಿದೆ.
ಜೀವನದಲ್ಲಿ ಎಲ್ಲವೂ ಅಂದುಕೊಂಡಂತೆ ಆಗುವುದಿಲ್ಲ. ಕೆಲವು ಸನ್ನಿವೇಶಗಳು ನಮ್ಮ ನಿಯಂತ್ರಣಕ್ಕೆ ಸಿಗುವುದಿಲ್ಲ. ಕೆಲವನ್ನು ಬದಲಾಯಿಸಲು ಯಾರಿಗೂ ಸಾಧ್ಯವಿಲ್ಲ. ಅಂಥವುಗಳನ್ನು ನೀವು ಸುಲಭವಾಗಿ ಒಪ್ಪಿಕೊಂಡರೆ ಮಾತ್ರ ಶಾಂತಿ ದೊರೆಯುತ್ತದೆ. ಬದಲಿಗೆ, ಬದಲಿಸುತ್ತೇನೆಂಬ ಹಠಮಾರಿ ಧೋರಣೆ ತಾಳಿದರೆ ಶಾಂತಿ ನಮ್ಮಿಂದ ದೂರವಾಗುತ್ತದೆ.
ಆಶಾವಾದಿಗಳು ಕೆಟ್ಟ ಸಮಯದಲ್ಲೂ ಒಳ್ಳೆಯ ದಿನಗಳು ಬರುತ್ತವೆ ಎನ್ನುವುದನ್ನು ದೃಢವಾಗಿ ನಂಬುತ್ತಾರೆ. ಕೈ ಮೀರಿದ ಸನ್ನಿವೇಶಗಳು “ಆಗುವುದೆಲ್ಲವೂ ಒಳ್ಳೆಯದಕ್ಕೆ’ ಎನ್ನುವ ವಿಶ್ವಾಸ ಹೊಂದಿ ನಂಬಿಕೆಯಿಂದ ಇರುತ್ತಾರೊ ಅವರು ಜೀವನದಲ್ಲಿ ಶಾಂತಿಯುತವಾಗಿ ಬದುಕು ನಡೆಸುತ್ತಿರುತ್ತಾರೆ.
ನಿಮಗೆ ಕೆಟ್ಟದ್ದನ್ನು ಬಯಸಿದವರನ್ನೂ ಕ್ಷಮಿಸುವ ಗುಣ ಹೊಂದಿದ್ದರೆ ಖಂಡಿತವಾಗಿ ಶಾಂತಿ ನಿಮ್ಮಲ್ಲಿದೆ ಎಂದು ಅರ್ಥ. ದ್ವೇಷ ಮತ್ತು ಪ್ರತೀಕಾರದ ಭಾವನೆಯಿಂದ ಯಾವುದೇ ಪ್ರಯೋಜನವಿಲ್ಲ ಎನ್ನುವುದು ನಿಮ್ಮ ಭಾವನೆಯಾಗಿದ್ದರೆ ನಿಮ್ಮದು ಪ್ರಬುದ್ಧ ಮನಸ್ಥಿತಿಯೇ ಸರಿ. ಕ್ಷಮಾ ಗುಣ ಬಹು ದೊಡ್ಡದು, ಅದು ನಿಮ್ಮಲ್ಲಿದ್ದರೆ ನೆಮ್ಮದಿ ಖಂಡಿತ. ಈ ಒಂದಿಷ್ಟು ಗುಣಗಳನ್ನು ಬೆಳೆಸಿಕೊಂಡರೆ ನಿಮ್ಮ ಜೀವನ ಸುಖಕರವಾಗಿರುತ್ತದೆ.