ಲಕ್ನೋ: ಉತ್ತರ ಪ್ರದೇಶದ ಘಾಜಿಯಾಬಾದ್ನಿಂದ ಇತ್ತೀಚೆಗೆ ನಡೆದ ಕೊಲೆ ಪ್ರಕರಣವೊಂದು ಬೆಳಕಿಗೆ ಬಂದಿದ್ದು, ಖೋಡಾ ಪೊಲೀಸ್ ಠಾಣೆಯ ವ್ಯಾಪ್ತಿಯ ವಂದನಾ ವಿಹಾರ್ನಲ್ಲಿ ಮೊಹಮದ್ ಪರ್ವೇಜ್ ಎಂಬ ಮುಸ್ಲಿಂ ಯುವಕ ತನ್ನ ಗರ್ಲ್ ಫ್ರೆಂಡ್ ಮನೆಗೆ ಹೋಗಿ ಕೊಲೆಯಾಗಿದ್ದಾನೆ.
ಬಾಲಕಿಯು 10ನೇ ತರಗತಿ ವಿದ್ಯಾರ್ಥಿನಿಯಾಗಿದ್ದು, ಆತನ ಗೆಳತಿ ಎನ್ನಲಾಗಿದೆ. ಈತನು ಯುವತಿಯೊಂದಿಗೆ ಸಿಕ್ಕಿಬಿದ್ದ ನಂತರ ಆಕೆಯ ಮನೆಯವರು ಮತ್ತು ನೆರೆಹೊರೆಯವರು ಆತನ ಮೇಲೆ ಹಲ್ಲೆ ನಡೆಸಿದ್ದು ಆತನ ಸಾವಿಗೆ ಕಾರಣವಾಗಿದೆ. ಈ ಘಟನೆಯು ಜೂನ್ 29 ರಂದು ಈದ್ ಉಲ್-ಅಧಾ ಸಂಜೆ ಸಂಭವಿಸಿದೆ ಎಂದು ವರದಿಯಾಗಿದೆ.
ಗುರುವಾರ 7 ಗಂಟೆ ಸುಮಾರಿಗೆ ಬಾಲಕಿಯನ್ನು ಭೇಟಿಯಾಗಲು ಪರ್ವೇಜ್ ಆಕೆಯ ನಿವಾಸಕ್ಕೆ ಬಂದಿದ್ದ. ಆದರೆ, ಅಷ್ಟರಲ್ಲಿ ಅಲ್ಲಿಗೆ ಆಗಮಿಸಿದ ಆಕೆಯ ಪೋಷಕರು ಇಬ್ಬರನ್ನೂ ಒಟ್ಟಿಗೆ ನೋಡಿದ್ದಾರೆ. ನಂತರ ಅವರ ಮೇಲೆ ಹಲ್ಲೆ ಮಾಡಲು ಆರಂಭಿಸಿದರು. ಆಕೆಯ ಸಂಬಂಧಿ ಹಾಗೂ ಮತ್ತೊಬ್ಬ ಸ್ಥಳೀಯ ನಿವಾಸಿ ಕೂಡ ಸ್ಥಳಕ್ಕೆ ಬಂದಿದ್ದಾರೆ.
ಹೊಡೆತಕ್ಕೆ ಆತನ ತಲೆ ಹಾಗೂ ಇತರೆಡೆ ತೀವ್ರ ಪೆಟ್ಟಾಗಿದೆ. ತಲೆಗೆ ಕಬ್ಬಿಣದ ರಾಡ್ನಿಂದ ಹೊಡೆದಿದ್ದಾರೆ ಎಂದು ವರದಿಯಾಗಿದೆ. ಘಟನೆ ಬಗ್ಗೆ ಮಾಹಿತಿ ತಿಳಿದ ಪೊಲೀಸರು ಕೂಡ ಸ್ಥಳಕ್ಕೆ ದೌಡಾಯಿಸಿ ಪರ್ವೇಜ್ ನನ್ನು ಚಿಕಿತ್ಸೆಗಾಗಿ ಆಸ್ಪತ್ರೆಗೆ ಕರೆದೊಯ್ಯಲಾಯಿತಾದರೂ , ಅಲ್ಲಿ ವೈದ್ಯಕೀಯ ಸಿಬ್ಬಂದಿ ಅವರು ಸಾವನ್ನಪ್ಪಿದ್ದಾರೆ ಎಂದು ಘೋಷಿಸಿದರು.
ಹಿರಿಯ ಪೊಲೀಸ್ ಅಧಿಕಾರಿಯೊಬ್ಬರು, ಮಾತನಾಡಿ “ಜೂನ್ 29 ರಂದು, ಥಾನಾ ಖೋಡಾ ಪ್ರದೇಶದ ಪೋಲೀಸ್ ಥಾಣಾಧಿಕಾರಿಗೆ ಉತ್ತರ ಪ್ರದೇಶದ ಮುಸ್ತಫಾಬಾದ್, ಲೋನಿ ದೇಹತ್ ನಿವಾಸಿ 23 ವರ್ಷದ ಪರ್ವೇಜ್, ಎಂಬಾತನಿಗೆ ವಂದನಾ ವಿಹಾರ್ನಲ್ಲಿ ಕೆಲವು ವ್ಯಕ್ತಿಗಳಿಂದ ಹಲ್ಲೆಗೀಡಾಗಿದ್ದಾನೆ ಎಂದು ದೂರು ಬಂದಿತ್ತು. ಕಳ್ಳತನ ಮಾಡಿರುವ ಶಂಕೆಯ ಮೇರೆಗೆ ಆತನನ್ನು ಥಳಿಸಲಾಗಿದೆ ಎಂದು ತಿಳಿದುಬಂದಿತ್ತು. ನಂತರದ ತನಿಖೆಯಲ್ಲಿ “ಪೊಲೀಸರು ಎಲ್ಲಾ ವಿವರಗಳನ್ನು ಪರಿಶೀಲಿಸಿದಾಗ, ವಂದನಾ ವಿಹಾರ್ನಲ್ಲಿ ವಾಸಿಸುವ 42 ವರ್ಷದ ಸಂಜಯ್ ಎಂಬ ವ್ಯಕ್ತಿ ಮತ್ತು ಅವನ ಸಹೋದರ ಮತ್ತೊಬ್ಬ ನೆರೆ ಹೊರೆಯವನು ಪರ್ವೇಜ್ ಗೆ ತೀವ್ರವಾಗಿ ಥಳಿಸಿದ್ದುದೇ ಮರಣಕ್ಕೆ ಕಾರಣವಾಗಿದ್ದು ಮೂವರನ್ನೂ ಬಂಧಿಸಲಾಗಿದೆ ಎಂದು ತಿಳಿಸಿದರು.
ಆತನ ಕುಟುಂಬದವರು ನೀಡಿದ ದೂರಿನ ಮೇರೆಗೆ ಪ್ರಕರಣ ದಾಖಲಿಸಿಕೊಂಡುಕಾನೂನು ಕ್ರಮ ಕೈಗೊಳ್ಳಲಾಗುತ್ತಿದೆ,” ಎಂದು ತಿಳಿಸಿದರು. ಬಾಲಕಿಯ ಮನೆಯವರು ಕಳ್ಳತನದ ಆಧಾರದ ಮೇಲೆ ಪ್ರಾಥಮಿಕ ವಿಚಾರಣೆಯಲ್ಲಿ ಪರ್ವೇಜ್ನನ್ನು ಹೊಡೆದಿರುವುದನ್ನು ಒಪ್ಪಿಕೊಂಡಿದ್ದಾರೆ. ಆದರೆ, ಇದು ಪ್ರೇಮ ಪ್ರಕರಣ ಎಂಬುದು ಪೊಲೀಸರ ವಿಚಾರಣೆಯಿಂದ ತಿಳಿದುಬಂದಿದೆ. ಅವರ ಮಗಳು ಮತ್ತು ಪರ್ವೇಜ್ ಒಂದು ವರ್ಷದಿಂದ ಪರಸ್ಪರ ಸಂಪರ್ಕದಲ್ಲಿದ್ದರು ಎನ್ನಲಾಗಿದೆ. ಅವರಿಬ್ಬರನ್ನು ಒಟ್ಟಿಗೆ ನೋಡಿದ ಬಳಿಕ ಆತನಿಗೆ ಥಳಿಸಿದ್ದಾರೆ. ಹುಡುಗಿಯನ್ನು ಭೇಟಿಯಾಗಲು ಪರ್ವೇಜ್ ಮನೆಗೆ ಹೋಗುತ್ತಿದ್ದ ಎಂದು ಸ್ಥಳೀಯರು ಹೇಳಿದ್ದಾರೆ.