ಅಪ್ಪ ಎನ್ನುವ ಈ ಎರಡಕ್ಷರದ ಪದದಲ್ಲಿ ಅದೆಷ್ಟು ಗಾಂಭೀರ್ಯ, ದರ್ಪ, ಕೋಪ, ಮುನಿಸು ಜತೆಗೆ ಅಳೆಯಲಾಗದಷ್ಟು ಪ್ರೀತಿ ಇದೆ ಇದನ್ನು ಪದಗಳಲ್ಲಿ ವರ್ಣಿಸಲು ಸಾಧ್ಯವಿಲ್ಲ. ಅಪ್ಪ ಎಂದರೆ ಆಕಾಶ ಎನ್ನುತ್ತಾರೆ. ಅವರ ತ್ಯಾಗ, ಪ್ರೀತಿ ಆಕಾಶದಷ್ಟೇ ನಿಶ್ಕಲ್ಮಶ ಮತ್ತು ವಿಸ್ತಾರ. ಅಮ್ಮ ಮಗುವನ್ನು ಒಂಬತ್ತು ತಿಂಗಳು ತನ್ನ ಗರ್ಭದಲ್ಲಿರಿಸಿ, ತನ್ನ ಕಂದಮ್ಮನಿಗೆ ಏನೂ ತೊಂದರೆಯಾಗದಂತೆ ನೋಡಿಕೊಂಡರೆ. ಅಪ್ಪ ತನ್ನ ಇಡೀ ಸರ್ವಸ್ವವನ್ನೇ ತನ್ನ ಮಗುವಿಗಾಗಿ ಒತ್ತೆ ಇಟ್ಟು ಮಗುವಿನ ಜೀವನಕ್ಕೆ ಸಂಪೂರ್ಣ ಆಸರೆಯಾಗಿ ನಿಲ್ಲುತ್ತಾರೆ.
ಎಲ್ಲರೂ ಸಾಮಾನ್ಯವಾಗಿ ತಾಯಿ ಮಾಡೋ ತ್ಯಾಗವನ್ನು ಮಾತ್ರ ಮೆಲುಕು ಹಾಕುತ್ತಾರೆ. ಆದರೆ ತಾಯಿಯಂತೆಯೇ ತಂದೆಯೂ ಮಕ್ಕಳಿಗಾಗಿ ತನ್ನ ಜೀವನವನ್ನು ಮುಡುಪಾಗಿಟ್ಟರೂ ಕೂಡಾ ಎಲೆಮರೆ ಕಾಯಿಯಂತೆ ಅಪ್ಪ ಉಳಿದು ಬಿಡುತ್ತಾರೆ. ಬದುಕು ರೂಪಿಸಿದ, ಜೀವನ ಪಾಠ ಕಲಿಸಿದ, ಕಿರು ಬೆರಳ ಹಿಡಿದು ಮುನ್ನಡೆಸಿದ ಅಕ್ಕರೆಯ ಅಪ್ಪನಿಗೊಂದು ಕೃತಜ್ಞತೆ ಹೇಳುವ ದಿನವಿದು.
ವಿಶ್ವ ಅಪ್ಪಂದಿರ ದಿನದ ಇತಿಹಾಸ:
ಪ್ರತಿವರ್ಷ ಜೂನ್ ತಿಂಗಳ ಮೂರನೆಯ ಭಾನುವಾರವನ್ನು ವಿಶ್ವ ಅಪ್ಪಂದಿರ ದಿನವನ್ನಾಗಿ ಆಚರಿಸಲಾಗುತ್ತದೆ. ರಾಷ್ಟ್ರೀಯ ತಂದೆಯಂದಿರ ದಿನಾಚರಣೆ ಸಮಿತಿಯ ಪ್ರಕಾರ 1910ರಲ್ಲಿ ವಾಷಿಂಗ್ಟನ್ನಲ್ಲಿ ಮೊದಲ ಬಾರಿಗೆ ಅಪ್ಪಂದಿನ ದಿನವನ್ನು ಆಚರಿಸಲಾಗಿತ್ತು. ಅಪ್ಪಂದಿರ ತ್ಯಾಗ, ಪ್ರೀತಿಯನ್ನು ಸ್ಮರಿಸಿಕೊಳ್ಳಲು, ನಾವು ಅವರ ಮೇಲಿತ್ತ ಪ್ರೀತಿ, ಅಭಿಮಾನವನ್ನು ತೋರ್ಪಡಿಸಲು ದಿನವನ್ನು ಆಚರಿಸಲಾಗುತ್ತದೆ. ಸ್ಪೇನ್ ಮತ್ತು ಪೋರ್ಚುಗಲ್ನಂತಹ ದೇಶಗಳು ಮಾರ್ಚ್ 19ರಂದು ಸೇಂಟ್ ಜೋಸೆಫ್ ದಿನದಂದು ತಂದೆಯ ದಿನಾಚರಣೆಯನ್ನು ಆಚರಿಸುತ್ತಾರೆ. ತೈವಾನ್ನಲ್ಲಿ ಆಗಸ್ಟ್ 8ರಂದು ಹಾಗೂ ಥೈಲಾಂಡ್ನಲ್ಲಿ ಡಿಸೆಂಬರ್ 5ರಂದು ಆಚರಿಸಲಾಗುತ್ತದೆ.
ಸೋನೋರ ಸ್ಮಾರ್ಟ್ ಡಾಡ್ ನಿಂದ ತಂದೆಯ ದಿನಾಚರಣೆ ಪ್ರಾರಂಭ:
ಅಮೆರಿಕ ಮೂಲದ ಸೋನೋರ ಸ್ಮಾರ್ಟ್ ಡಾಡ್ ಎಂಬಾಕೆ ಮೊಟ್ಟ ಮೊದಲ ಬಾರಿಗೆ ಅಪ್ಪನ ದಿನಾಚರಣೆಯನ್ನು ಆರಂಭಿಸದಳು. ಅದಕ್ಕೆ ಕಾರಣ ಕೂಡ ಇದೆ. ಸೋನೋರ ಸ್ಮಾರ್ಟ್ ಡಾಡ್ ಹಾಗೂ ಆಕೆಯ ಐವರು ಸಹೋದರ-ಸಹೋದರಿಯರು ಸಣ್ಣ ಪ್ರಾಯದಲ್ಲೇ ತಾಯಿಯನ್ನು ಕಳೆದುಕೊಂಡಿದ್ದರು. ತದ ನಂದರ ಇವರ ತಂದೆಯೇ ಇವರಿಗೆ ತಾಯಿಯಾಗಿದ್ದರು. ಮಕ್ಕಳ ಪೋಷಣೆ,. ವಿದ್ಯಾಭ್ಯಾಸ, ಮಕ್ಕಳ ಆರೈಕೆ ಎಲ್ಲವೂ ಇವರ ತಂದೆ ನೋಡಿಕೊಳ್ಳುತ್ತಿದ್ದರು. ತಂದೆಯ ಆಶ್ರಯದಲ್ಲೇ ಮಕ್ಕಳು ಬೆಳೆದರು. ತಾಯಿ ಇಲ್ಲ ಎಂಬ ನೋವನ್ನು ಇವರ ತಂದೆ ದೂರ ಮಾಡಿದ್ದರು. ತಂದೆಯ ತ್ಯಾಗ, ಪ್ರೀತಿಗಾಗಿ ಸೋನೋರ ಸ್ಮಾರ್ಟ್ ಡಾಡ್ ತಂದೆಯ ದಿನಾಚರಣೆಯನ್ನು ಮೊಟ್ಟ ಮೊದಲಿಗೆ ಆಚರಿಸಿದರು. ಇದು ಅಮೆರಿಕದಲ್ಲಿ ಭಾರೀ ಜನಪ್ರಿಯತೆ ಪಡೆದುಕೊಂಡಿತು.
ಅಪ್ಪಂದಿರ ದಿನದ ಮಹತ್ವ:
ರಾತ್ರಿ ಹಗಲು ಕಷ್ಟ ಪಟ್ಟು ದುಡಿದು ಕುಟುಂಬವನ್ನು ನಿರ್ವಹಿಸುವ ತಂದೆಯ ಕೊಡುಗೆಯನ್ನು ಅರಿತುಕೊಳ್ಳುವ ಮತ್ತು ಗೌರವಿಸುವ ಉದ್ದೇಶದಿಂದ ತಂದೆಯ ದಿನವನ್ನು ಪ್ರಪಂಚದಾದ್ಯಂತ ಆಚರಿಸಲಾಗುತ್ತದೆ. . ತಂದೆ ಮಕ್ಕಳಿಗಾಗಿ ಮಾಡಿರುವ ತ್ಯಾಗಕ್ಕೆ ಗೌರವ ಕೊಡುವ ದಿನ ಎಂದೇ ಈ ದಿನ ಖ್ಯಾತಿ ಪಡೆದಿದೆ.
ಅದೆಷ್ಟೋ ನೋವು-ಸಂಕಟಗಳನ್ನು ನುಂಗಿ ಮನೆಯವರ ಹಿತಕ್ಕಾಗಿ ದಿನವಿಡೀ ದುಡಿಯುವ ಅಪ್ಪನ ಋಣವನ್ನು ತೀರಿಸಲು ಸಾಧ್ಯವಿಲ್ಲ. ಮಕ್ಕಳು ಹುಟ್ಟಿದಾಗಿನಿಂದ ಉಜ್ವಲ ಭವಿಷ್ಯ ಕಾಣುವವರೆಗೂ ಕೈ ಹಿಡಿದು ನಡೆಸುವ ಪ್ರತ್ಯಕ್ಷ ದೇವರಾಗಿರುವ ಅಪ್ಪನಿಗೊಂದು ಸಲಾಂ.