ಶ್ರೀಲಂಕಾ ರಾಜಧಾನಿ ಕೊಲೊಂಬೋದಲ್ಲಿರುವ ಮಿಲಿಟರಿ ಆಸ್ಪತ್ರೆಯಲ್ಲಿನ ವೈದ್ಯರು ವಿಶ್ವದ ಅತಿ ದೊಡ್ಡ ಕಿಡ್ನಿ ಕಲ್ಲನ್ನು ತೆಗೆಯುವ ಮೂಲಕ ಗಿನ್ನೆಸ್ ದಾಖಲೆಯನ್ನು ನಿರ್ಮಿಸಿದ್ದಾರೆ. ಸುಮಾರು 801 ಗ್ರಾಂ ತೂಕವಿರುವ 13.372 ಸೆ.ಮೀ (5.264 ಇಂಚು) ಉದ್ದವಿರುವ ಕಿಡ್ನಿ ಸ್ಟೋನ್ ಹೊರತೆಗೆಯಲಾಗಿದ್ದು ಇದು ಮೂತ್ರಪಿಂಡದಿಂದ ಹೊರತೆಗೆಯಲಾದ ಅತಿ ದೊಡ್ಡ ಕಲ್ಲಾಗಿದೆ.
2004ರಲ್ಲಿ ಭಾರತೀಯ ವೈದ್ಯರು 13 ಸೆಂಟಿ ಮೀಟರ್ ಉದ್ದದ ಕಿಡ್ನಿ ಕಲ್ಲನ್ನು ಹೊರಗೆ ತೆಗೆದಿದ್ದರು. ಇದೇ ಈವರೆಗಿನ ಅತಿ ದೊಡ್ಡ ಕಿಡ್ನಿ ಕಲ್ಲು ಎಂದು ಗಿನ್ನೆಸ್ ದಾಖಲೆ ನಿರ್ಮಿಸಿತ್ತು. ಇದೀಗ ಭಾರತದ ದಾಖಲೆಯನ್ನು ಶ್ರೀಲಂಕಾದ ವೈದ್ಯರು ಮುರಿದಿದ್ದಾರೆ. 2008ರಲ್ಲಿ ಪಾಕಿಸ್ತಾನದಲ್ಲಿ ಅತಿ ದೊಡ್ಡ ಕಿಡ್ನಿ ಕಲ್ಲನ್ನು ಅಲ್ಲಿನ ವೈದ್ಯರು ಹೊರಗೆ ತೆಗೆದಿದ್ದರು. ಆ ಕಿಡ್ನಿ ಕಲ್ಲು 620 ಗ್ರಾಂ ತೂಕ ಹೊಂದಿತ್ತು.
ವಿಶ್ವದ ಅತಿ ದೊಡ್ಡ ಕಿಡ್ನಿ ಕಲ್ಲನ್ನು ಶ್ರೀಲಂಕಾ ದೇಶದ ರಾಜಧಾನಿ ಕೊಲಂಬೋದ ಸೇನಾ ಆಸ್ಪತ್ರೆಯಲ್ಲಿ ಜೂನ್ 1, 2023ರಂದು ಹೊರಗೆ ತೆಗೆಯಲಾಗಿದೆ ಎಂದು ಗಿನ್ನೆಸ್ ವಿಶ್ವ ದಾಖಲೆ ಸಂಘಟಕರೂ ಕೂಡಾ ಅಧಿಕೃತ ಪ್ರಕಟಣೆ ಹೊರಡಿಸಿದ್ದಾರೆ.
ಶ್ರೀಲಂಕಾದ ಕೊಲಂಬೋದಲ್ಲಿ ಇರುವ ಸೇನಾ ಆಸ್ಪತ್ರೆಯ ಮೂತ್ರ ಶಾಸ್ತ್ರಜ್ಞ ಲೆಫ್ಟಿನೆಂಟ್ ಕರ್ನಲ್ ಡಾ. ಕೆ. ಸುದರ್ಶನ್ ಹಾಗೂ ಅವರ ತಂಡ ಈ ಅಪರೂಪದ ಶಸ್ತ್ರ ಚಿಕಿತ್ಸೆ ಸರಾಸರಿ ಪುರುಷ ಮೂತ್ರಪಿಂಡದ ತೂಕಕ್ಕಿಂತ ಐದು ಪಟ್ಟು ಹೆಚ್ಚು ಈ ಮೂತ್ರಪಿಂಡದ ಕಲ್ಲನ್ನು ಹೊರತೆಗೆದಿದ್ದಾರೆ ಎಂದು ಶ್ರೀಲಂಕಾ ಸೇನೆಯ ಮಾಧ್ಯಮ ಪ್ರಕಟಣೆಯಲ್ಲಿ ತಿಳಿಸಲಾಗಿದೆ.
ಕಿಡ್ನಿಯಲ್ಲಿ ಕಲ್ಲು ಉಂಟಾಗುವುದು ಹೇಗೆ?
ಮೂತ್ರವು ಕಿಡ್ನಿಯಿಂದ ಹೊರಗೆ ಸಾಗುವಾಗ ಕೆಲವು ವೇಳೆ ದ್ರವವು ಘನ ರೂಪಕ್ಕೆ ತಿರುಗುವ ಸಾಧ್ಯತೆಗಳು ಇರುತ್ತವೆ. ಮೂತ್ರದಲ್ಲಿ ಇರುವ ಕೆಮಿಕಲ್ ಕಾಂಪೋಂಡ್ಸ್ ಆದ ಕ್ಯಾಲ್ಶಿಯಂ, ಸೋಡಿಯಂ, ಪೊಟ್ಯಾಶಿಯ , ಯೂರಿಕ್ ಆಸಿಡ್ ಮುಂತಾದ ಕೆಮಿಕಲ್ಸ್ ಇರತ್ತೆ. ಒಂದುವೇಳೆ ಮೂತ್ರದಲ್ಲಿಈ ಕಣಗಳು ಹೆಚ್ಚಾಗಿದ್ದರೆ ಹರಳುಗಳ ರೂಪ ಪಡೆಯುತ್ತದೆ. ದಿನಕಳೆದಂತೆ ಇವು ಬೆಳೆಯುತ್ತಾ ದೊಡ್ಡ ಕಲ್ಲಾಗಿ ಪರಿಣಮಿಸುತ್ತವೆ.
ಸಾಮಾನ್ಯವಾಗಿ ಕಿಡ್ನಿಯಲ್ಲಿ ಕಲ್ಲು ಉಂಟಾಗಲು 80 ರಷ್ಟು ಕ್ಯಾಲ್ಶಿಯಂ ಕಾರಣವಾಗಿರತ್ತೆ. ಮೂತ್ರದಲ್ಲಿನ ಇತರ ಕಣಗಳಿಂದ ಕಲ್ಲು ಉಂಟಾಗುವುದು ಕಡಿಮೆ. ಕಡಿಮೆ ಪ್ರಮಾಣದಲ್ಲಿ ನೀರು ಕುಡಿಯುವುದರಿಂದ, ದೈಹಿಕ ಚಟುವಟಿಕೆ ಇಲ್ಲದಿದ್ದರೆ ಕಿಡ್ನಿ ಕಲ್ಲು ರೂಪುಗೊಳ್ಳುವ ಸಾಧ್ಯತೆ ಇರುತ್ತದೆ. ಜೊತೆಗೆ ಅತಿಯಾಗಿ ಸಕ್ಕರೆ ಹಾಗೂ ಉಪ್ಪು ಸೇವಿಸಿದರೂ ಕಿಡ್ನಿ ಕಲ್ಲು ರೂಪುಗೊಳ್ಳುವ ಸಾಧ್ಯತೆ ಇರುತ್ತದೆ. ಕಿಡ್ನಿಯಲ್ಲಿ ಕಲ್ಲು ಉಂಟಾದ ಬಳಿಕ ಬೆನ್ನು, ಕಿಬ್ಬೊಟ್ಟೆ ಮತ್ತು ಹೊಟ್ಟೆಯ ಇತರ ಭಾಗದಲ್ಲಿ ನೋವು ಕಂಡುಬರುವುದು. ಕಲ್ಲು ದೊಡ್ಡದಾಗಿದ್ದರೆ ಆಗ ಆ ಭಾಗ ಊದಿಕೊಳ್ಳುತ್ತದೆ.