ಬೆಂಗಳೂರು: ರಾಜ್ಯದ ವಿವಿಧ ಜಿಲ್ಲೆಗಳಲ್ಲಿ ವಿದ್ಯುತ್ ಬಳಕೆದಾರರು ಮೇ ತಿಂಗಳಿನ ವಿದ್ಯುತ್ ಬಿಲ್ ಕುರಿತು ಆಕ್ರೋಶ ವ್ಯಕ್ತಪಡಿಸುತ್ತಿದ್ದಾರೆ. ಏಪ್ರಿಲ್ ತಿಂಗಳಿನ ವಿದ್ಯುತ್ ಬಿಲ್ ಗೆ ಹೋಲಿಸಿದರೆಮೇ ತಿಂಗಳಿನ ಬಿಲ್ ಬಹುತೇಕ ರಾಜ್ಯಾದ್ಯಂತ ಶೇಕಡಾ 10 ರಿಂದ 50 ರಷ್ಟು ಜಾಸ್ತಿ ಬಂದಿದೆ.
ಕಾಂಗ್ರೆಸ್ ಸರ್ಕಾರ ಅಧಿಕಾರಕ್ಕೆ ಬರುವುದಕ್ಕೂ ಮೊದಲು ಚುನಾವಣಾ ಪ್ರಣಾಳಿಕೆಯಲ್ಲಿ 200 ಯೂನಿಟ್ ಗಳ ವರೆಗೆ ಎಲ್ಲರಿಗೂ ಉಚಿತ ವಿದ್ಯುತ್ ನೀಡಲಾಗುವುದು ಎಂದು ಗ್ಯಾರಂಟಿ ಕಾರ್ಡ್ ಗಳ ಮೂಲಕವೇ ಭರವಸೆ ನೀಡಿತ್ತು.
ಅಲ್ಲದೆ ಅಂದಿನ ಬಿಜೆಪಿ ಸರ್ಕಾರ ಭ್ರಷ್ಟಾಚಾರದಲ್ಲಿ ಮುಳುಗಿದ್ದು 40 ಶೇಕಡಾವಾರು ಲೆಕ್ಕದಲ್ಲಿ ಕಮಿಷನ್ ಪಡೆಯುತಿದ್ದು ಕಾಂಗ್ರೆಸ್ ಅಧಿಕಾರಕ್ಕೆ ಬಂದರೆ ಕಮೀಷನ್ ಇಲ್ಲದೆ ಬ್ರಷ್ಟಾಚಾರ ಇಲ್ಲದೆ ಉತ್ತಮ ಆಡಳಿತ ನೀಡುವುದಾಗಿಯೂ ಬಿಜೆಪಿ ತಿನ್ನುತ್ತಿದ್ದ ಕಮಿಷನ್ ಹಣವನ್ನು ಉಳಿಸಿ 5 ಗ್ಯಾರಂಟಿ ಯೋಜನೆಗಳಿಗೆ ಹಣ ನೀಡುವುದಾಗಿಯೂ ಹೇಳಿಕೊಂಡಿತ್ತು. ಕಾಂಗ್ರೆಸ್ ನ ಈ ಭರವಸೆಯಿಂದಾಗಿಯೇ ಜನರು ಮಾರು ಹೋಗಿ ಕಾಂಗ್ರೆಸ್ ಅಧಿಕಾರಕ್ಕೂ ಬಂದಿತು.
ನಂಗೂ ಫ್ರೀ, ನಿಂಗೂ ಫ್ರೀ ಎಂದಿದ್ದ ಕಾಂಗ್ರೆಸ್ ನಾಯಕರು ಪಕ್ಷ ಅಧಿಕಾರಕ್ಕೆ ಬಂದ ಬೆನ್ನಲ್ಲೇ ಉಲ್ಟಾ ಹೊಡೆದರು. ತಾನು ನೀಡಿದ್ದ 5 ಭರವಸೆ ಈಡೇರಿಸುವುದಕ್ಕೆ ಬದ್ದ , ತಾನು ಬಿಜೆಪಿಯಂತೆ ವಚನ ಭ್ರಷ್ಟ ಅಲ್ಲ ಎಂದು ಹೇಳುತ್ತಲೇ ಸರ್ಕಾರ ಗ್ಯಾರಂಟಿ ಯೋಜನೆಗಳಿಗೆ ಷರತ್ತುಗಳು ಅನ್ವಯ ಎಂದು ಹೇಳಿತು. ಅದು ಹೇಗಾದರೂ ಸಾಯಲಿ ತಮಗೆ ಉಚಿತ ಯೋಜನೆ ಸಿಕ್ಕರೆ ಸಾಕೆಂದು ಜನತೆ ಅದಕ್ಕೂ ಸುಮ್ಮನಾಗಿ ಉಚಿತಕ್ಕೆ ಕಾಯತೊಡಗಿದರು. ಆದರೆ ಉಚಿತ ನೀಡುವುದಕ್ಕಿಂತಲೂ ಮೊದಲು ವಿದ್ಯುತ್ ಬಿಲ್ ಎರ್ರಾಬಿರ್ರಿ ಏರಿಕೆ ಆಗಿರುವುದಕ್ಕೆ ಜನತೆ ತೀವ್ರ ಆಕ್ರೋಶ ವ್ಯಕ್ತಪಡಿಸಿದ್ದು ಉಚಿತದ ಆಸೆ ತೋರಿಸಿ ಬಿಲ್ ಹೆಚ್ಚಿಸಿದ್ದಕ್ಕೆ ಸರ್ಕಾರಕ್ಕೆ ಹಿಡಿಶಾಪ ಹಾಕುತ್ತಿದ್ದಾರೆ.
ರಾಜ್ಯದಲ್ಲಿ ಅಧಿಕಾರಕ್ಕೆ ಬಂದ ನಂತರ ಮುಖ್ಯಮಂತ್ರಿ ಸಿದ್ದರಾಮಯ್ಯ ಅವರು ವಾರ್ಷಿಕ ಸರಾಸರಿ ಬಳಕೆಗೆ ಶೇಕಡಾ 10 ರಷ್ಟು ಸೇರಿಸಿ ಅಷ್ಟನ್ನು ಮಾತ್ರ ಉಚಿತವಾಗಿ ನೀಡಲಾಗುವುದು ಎಂದು ಘೋಷಿಸಿದರು.
ಈ ಕುರಿತು ಸಾಮಾಜಿಕ ತಾಣಗಳಲ್ಲಿ ಗ್ರಾಹಕರು ವಿದ್ಯುತ್ ಬಿಲ್ ಹೆಚ್ಚಳದ ಕುರಿತು ಸರ್ಕಾರದ ವಿರುದ್ದ ಟೀಕಾಪ್ರಹಾರವನ್ನೇ ನಡೆಸುತ್ತಿದ್ದಾರೆ. ಅನೇಕ ಊರುಗಳಲ್ಲಿ ವಿದ್ಯುತ್ ಬಿಲ್ ಸಂಗ್ರಹಕಾರರಿಗೂ ಹಲ್ಲೆ ನಡೆಸಿದ ಉದಾಹರಣೆ ಇದೆ. ಅಂದ ಹಾಗೆ ವಿದ್ಯುತ್ ಬಿಲ್ ಹೆಚ್ಚಳಕ್ಕೆ ನೈಜ ಕಾರಣ ಬೇರೆಯೇ ಇದೆ. ನೂರು ಯೂನಿಟ್ ಒಳಗಿನ ಬಳಕೆದಾರರಿಗೆ ವಿದ್ಯುತ್ ಬಿಲ್ ಅಲ್ಪ ಹೆಚ್ಚಳವಾಗಿದ್ದರೆ 200 ಯೂನಿಟ್ ಮೀರಿದ ಬಳಕೆದಾರರಿಗೆ ಬಿಲ್ ದುಪ್ಪಟ್ಟಾಗಿದೆ.
ಕರ್ನಾಟಕ ವಿದ್ಯುಚ್ಛಕ್ತಿ ನಿಯಂತ್ರಣ ಆಯೋಗವು (ಕೆಇಆರ್ಸಿ) ಪ್ರಸಕ್ತ ಸಾಲಿನ ಏಪ್ರಿಲ್ 1ರಿಂದ ಪೂರ್ವಾನ್ವಯವಾಗುವಂತೆ ವಿದ್ಯುತ್ ದರ ಹೆಚ್ಚಿಸಿ ಆದೇಶ ಹೊರಡಿಸಿದ್ದು, ಜೂನ್ ತಿಂಗಳಿನಿಂದ ಗ್ರಾಹಕರಿಗೆ ಎರಡು ಸ್ತರಗಳಲ್ಲಿ (ಸ್ಲ್ಯಾಬ್ಗಳಲ್ಲಿ) ವಿದ್ಯುತ್ ಯೂನಿಟ್ ದರ ನಿಗದಿಪಡಿಸಲಾಗಿದೆ.
ರಾಜ್ಯ ವಿದ್ಯುಚ್ಚಕ್ತಿ ನಿಯಂತ್ರಣಾ ಆಯೋಗ ಕಳೆದ ಮೇ 12ರಂದು ಹೊರಡಿಸಿದ ಆದೇಶದ ಪ್ರಕಾರ, ಗ್ರಾಹಕರು ಬಳಸಿದ 100 ಯೂನಿಟ್ವರೆಗಿನ ವಿದ್ಯುತ್ಗೆ ಪ್ರತಿ ಯೂನಿಟ್ಗೆ ₹4.15 ಪೈಸೆ ವಿಧಿಸಲಾಗುತ್ತದೆ. 100 ಯೂನಿಟ್ ಮೀರಿದರೆ, ಬಳಸಿದ ಅಷ್ಟೂ ಯೂನಿಟ್ ವಿದ್ಯುತ್ಗೆ ₹7ರಂತೆ ದರ ವಿಧಿಸಲಾಗುತ್ತದೆ. ಹೀಗಾಗಿ, ಮೇ ತಿಂಗಳಲ್ಲಿ 100 ಯೂನಿಟ್ಗಿಂತ ಹೆಚ್ಚು ವಿದ್ಯುತ್ ಬಳಕೆ ಮಾಡಿದ ಗ್ರಾಹಕರಿಗೆ ಪ್ರತಿ ಯೂನಿಟ್ಗೆ ₹7ರಂತೆ ದರ ಲೆಕ್ಕ ಹಾಕಿ ಬಿಲ್ ನೀಡಲಾಗಿದೆ ಎಂದು ವಿದ್ಯುತ್ ಸರಬರಾಜು ಕಂಪೆನಿ ಮೂಲಗಳು ತಿಳಿಸಿವೆ.
ಈ ಹಿಂದೆ ಮೂರು ಹಂತಗಳಲ್ಲಿ ಮೊದಲ 50 ಯೂನಿಟ್ವರೆಗೆ ಪ್ರತಿ ಯೂನಿಟ್ಗೆ ₹4.10 ಪೈಸೆ, ನಂತರದ 50 ಯೂನಿಟ್ವರೆಗೆ ಪ್ರತಿ ಯೂನಿಟ್ಗೆ ₹5.60 ಪೈಸೆಯಂತೆ, ನಂತರ ಪ್ರತಿ ಯೂನಿಟ್ಗೆ ₹7.15 ಪೈಸೆಯಂತೆ ದರ ವಿಧಿಸಲಾಗುತ್ತಿತ್ತು.
ಕಡಿಮೆ ವಿದ್ಯುತ್ ಬಳಸುವವರಿಗೆ ಕಡಿಮೆ ದರ, ಹೆಚ್ಚು ವಿದ್ಯುತ್ ಬಳಕೆದಾರರಿಗೆ ಪ್ರತಿ ಯೂನಿಟ್ಗೆ ಹೆಚ್ಚಿನ ದರದ ಪದ್ಧತಿ ಇತ್ತು. ಹೀಗೆ ನಾಲ್ಕು ಸ್ತರಗಳಲ್ಲಿ ವಿಧಿಸುತ್ತಿದ್ದ ದರವನ್ನು ಎರಡು ಸ್ತರಕ್ಕೆ ಬದಲಾವಣೆ ಮಾಡಲಾಯಿತು. ಇದರಿಂದಾಗಿ, ಜೂನ್ ತಿಂಗಳಿನಲ್ಲಿ ನೀಡಲಾದ ವಿದ್ಯುತ್ ಬಿಲ್ನಲ್ಲಿ ಮೇ ತಿಂಗಳಿಗೆ ಹೋಲಿಸಿದರೆ ಭಾರಿ ಹೆಚ್ಚಳವಾಗಿದೆ.
100 ಯೂನಿಟ್ ಒಳಗಿನವರಿಗಷ್ಟೇ ಕಡಿಮೆ ಬಿಲ್ ಬಂದಿದೆ. 120 ಯೂನಿಟ್ ಬಳಸುತ್ತಿದ್ದವರಿಗೆ ಮೊದಲ 50 ಯೂನಿಟ್ವರೆಗೆ ₹4.10 ರಂತೆ ₹205, ನಂತರದ 70 ಯೂನಿಟ್ವರೆಗೆ ₹5.60ರಂತೆ ₹392 ಹಾಗೂ 20 ಯೂನಿಟ್ಗೆ ತಲಾ ₹7.15 ರಂತೆ ₹ 143 ಸೇರಿ ₹ 740 ಬಿಲ್ ಬರುತ್ತಿತ್ತು. ಈಗ 120 ಯೂನಿಟ್ ಬಳಸಿದವರಿಗೆ ₹840 ಬಿಲ್ ಬಂದಿದೆ. ಅಂದರೆ ಏಕಾಏಕಿ ₹100 ಹೆಚ್ಚಳವಾದಂತಾಗಿದೆ.