ಪ್ರಪಂಚದಾದ್ಯಂತ ಇಂದು ಮಕ್ಕಳು ವಿವಿಧ ಕಾರಣಗಳಿಂದ ಮದ್ಯ ಹಾಗೂ ಮಾದಕ ವಸ್ತುಗಳ ಚಟಕ್ಕೆ ಬಲಿಯಾಗುತ್ತಿರುವುದು ವಿಷಾದನೀಯ ಸಂಗತಿ. 1.37 ಬಿಲಿಯನ್ ಜನಸಂಖ್ಯೆಯನ್ನು ಹೊಂದಿರುವ ಭಾರತವು ವಿಶ್ವದ ಎರಡನೇ ಅತಿ ಹೆಚ್ಚು ಜನಸಂಖ್ಯೆ ಹೊಂದಿರುವ ದೇಶವಾಗಿದೆ. ದೇಶದ ಒಟ್ಟು ಜನಸಂಖ್ಯೆಯಲ್ಲಿ 39% ಮಕ್ಕಳು ಆಗಿದ್ದಾರೆ. ಮಾದಕ ವಸ್ತುಗಳ ಸೇವನೆಗೆ ಒಳಗಾಗದ ಮಕ್ಕಳು ಮತ್ತು ಹದಿಹರೆಯದವರು ಪ್ರಪಂಚದಾದ್ಯಂತ ಸಾರ್ವಜನಿಕ ಆರೋಗ್ಯ ಸಮಸ್ಯೆಯಾಗಿ ಮಾರ್ಪಟ್ಟಿದೆ. ಈ ನಿಟ್ಟಿನಲ್ಲಿ ಮಕ್ಕಳ ಹಿತಕ್ಕಾಗಿ ಶ್ರಮಿಸುತ್ತಿರುವ ಸಿಬ್ಬಂದಿಗಳು, ತಂದೆ ತಾಯಂದಿರು ಮತ್ತು ಪೋಷಕರ ಮೇಲೆ ಮಹತ್ವದ ಜವಾಬ್ದಾರಿಯಾಗಿದೆ.
ಮಕ್ಕಳು ಮತ್ತು ಹದಿಹರೆಯದವರಲ್ಲಿ ಮಾದಕ ವಸ್ತುಗಳ ಸೇವನೆ ದುಷ್ಟರಿಣಾಮಗಳು ಸಂಪೂರ್ಣವಾಗಿ ಅರ್ಥಮಾಡಿಕೊಂಡಿರುವುದಿಲ್ಲ. ಹೀಗಾಗಿ, ಬೇರೆ ಬೇರೆ ಕಾರಣಗಳಿಂದ ಮಾದಕ ವಸ್ತುಗಳ ಸೇವನೆಗೆ ಮುಂದಾಗಿ ಅವುಗಳ ಚಟಕ್ಕೆ ಒಳಗಾಗುತ್ತಾರೆ.
ಕಾರಣಗಳು ಹಲವಾರು:
ಇದಕ್ಕೆ ಬೇಕಾದ ಪ್ರಮುಖ ಕಾರಣಗಳನ್ನು ನೋಡುತ್ತಾ ಹೋದರೆ ಹಲವಾರು. ಕುಟುಂಬದ ಸದಸ್ಯರ ಮೇಲ್ವಿಚಾರಣೆ ಕೊರತೆ, ಸಮಾನ ವಯಸ್ಕರ ಅಥವಾ ಸ್ನೇಹಿತರ ಒತ್ತಡಗಳು, ಆಸಕ್ತಿ ಅಥವಾ ಕೂತುಹಲದಿಂದ ಮಾದಕ ವಸ್ತುಗಳ ಸೇವನೆ, ಬೇರೆಯವರನ್ನು ನೋಡಿ ಅನುಕರಣೆ ಮಾಡುವುದು. ಮನರಂಜನೆ ಪಡೆಯಲು ಮತ್ತು ಮಾದ್ಯಮಗಳಲ್ಲಿ ನೋಡಿ ವಿಶೇಷವಾದ ಸಂತೋಷ ಸಿಗುವುದೆಂದು ಭ್ರಮೆಪಟ್ಟು ಮಾದಕ ಸೇವನೆ ಮಾಡುವರು. ಕುಟುಂಬದ ಸದಸ್ಯರು ಮತ್ತು ಸಮಾನ ವಯಸ್ಕರು ಮಾದಕ ಸೇವನೆಗಳಿಗೆ ಒಳಗಾಗಿದ್ದಲ್ಲಿ ಮಕ್ಕಳು ಅಂತಹ ಮಾದಕ ಸೇವನೆ ಮಾಡುತ್ತಿರುವುದನ್ನು ಅನುಕರಣೆ ಮಾಡುವರು. ಶಾಲೆ ಅಥವಾ ಸುತ್ತಮುತ್ತಲಿನ ಪರಿಸರದಲ್ಲಿ ಮಾದಕ ವಸ್ತುಗಳು ಸುಲಭವಾಗಿ ದೊರೆಯುವುದು, ಕಾನೂನು ನಿಯಮಗಳಿಗೆ ಬದ್ದರಾಗದ ಸ್ನೇಹಿತರಲ್ಲಿ ಮಾದಕ ವಸ್ತುಗಳ ಸೇವನೆ ಮತ್ತು ಇವರ ಸಹವಾಸ, ಮಗುವು ತನ್ನ ಮೇಲೆ ನಿಯಂತ್ರಣ ಇಲ್ಲದಿರುವುದು ಮತ್ತು ತಾಳ್ಮೆ ಇಲ್ಲದಿರುವುದು, ಬೇಗನೆ ಆಸೆ ಪೊರೈಸೆಕೊಳ್ಳುವ ಪ್ರವೃತ್ತಿ. ಈ ರೀತಿಯ ಕಾರಣಗಳು ಮಕ್ಕಳು ಮತ್ತು ಹದಿಹರೆಯದವರಲ್ಲಿ ಮಾದಕ ವಸ್ತುಗಳ ಸೇವನೆ ಹೆಚ್ಚಾಗುವಂತೆ ಮಾಡುತ್ತದೆ.
ವಿವಿಧ ಮಾದಕ ವಸ್ತುಗಳ ಸೇವನೆ
ಮಕ್ಕಳು ಮತ್ತು ಹದಿಹರೆಯದವರು ಸೇವಿಸುವ ವಿವಿಧ ರೀತಿಯ ಮದ್ಯ ಮತ್ತು ಮಾದಕ ವಸ್ತುಗಳೆಂದರೆ ತಂಬಾಕು ಸೇವನೆ, ಗಾಂಜಾ ಸೇವನೆ, ಸಿಗರೇಟು ಸೇದುವುದು, ಹೊಗೆಸೊಪ್ಪು ಸೇದುವುದು, ಸಾರಾಯಿ/ವಿಸ್ಕಿ ಸೇವನೆ, ಪೆಟ್ರೋಲ್ ವಾಸನೆ ಹೀರಿಕೊಳ್ಳುವುದು, ಸೀಮೆ ಎಣ್ಣೆ ವಾಸನೆ ಹೀರಿಕೊಳ್ಳುವುದು, ಗುಟ್ಕಾ ಸೇವನೆ, ನಿದ್ರೆ ಗುಳಿಗೆ ಸೇವನೆ, ನೋವು ನಿವಾರಕ ಮಾತ್ರೆಗಳ ಪದೇ ಪದೇ ಸೇವನೆ, ಬೀಡಿ, ಹೊಗೆ ಸೊಪ್ಪು ಸೇವನೆ, ಸಾರಾಯಿ/ವಿಸ್ಕಿ ಸೇವನೆ, ಪೆಟ್ರೋಲ್ ವಾಸನೆ ತೆಗೆದುಕೊಳ್ಳುವುದು, ಸೀಮೆ ಎಣ್ಣೆ ವಾಸನೆ ತೆಗೆದುಕೊಳ್ಳುವುದು, ಜೆರಾಕ್ಸ್ ಇಂಕ್ ವಾಸನೆ ತೆಗೆದುಕೊಳ್ಳುವುದು, ನೇಲ್ ಪಾಲಿಸ್ ಸೇವನೆ ಹೀರಿಕೊಳ್ಳುವುದು, ರಿಮೂವರ್ ವಸ್ತುಗಳನ್ನು ಮೂಸಿ ನೋಡುವುದು, ಆಯೋಡೆಕ್ಸ್ ಪೆಯಿನ್ ಬಾಮ್ಗಳನ್ನು ಬ್ರೆಡ್ಗೆ ಹಚ್ಚಿ ತಿನ್ನುವುದು ಇತ್ಯಾದಿ.
ಮಾದಕ ವಸ್ತುಗಳ ಸೇವನೆಯಿಂದ ಆಗುವ ಪರಿಣಾಮಗಳು
ಆರೋಗ್ಯ, ಶೈಕ್ಷಣಿಕ, ದೈನಂದಿನ ಚಟುವಟಿಕೆಗಳು, ನಿದ್ರೆ, ಹಸಿವು, ದೈಹಿಕ ಮತ್ತು ಮಾನಸಿಕ ಆರೋಗ್ಯದ ಮೇಲೆ ಪರಿಣಾಮಬೀರುತ್ತದೆ. ಧೀರ್ಘಕಾಲಿಕ ಮಾದಕ ವಸ್ತುಗಳ ಸೇವನೆ ಗಂಭೀರ ಕಾಯಿಲೆಗಳಿಗೆ ದಾರಿಮಾಡಿಕೊಡುತ್ತದೆ. ಮಾದಕ ವಸ್ತುಗಳ ಸೇವನೆಗೆ ಅಂಟಿಕೊಂಡಿರುವ ಪಾಲಕರಿಂದ ಮಕ್ಕಳು ಕಡಿಮೆ ಬೆಂಬಲ ಮತ್ತು ಪೋಷಣೆ ಪಡೆಯುತ್ತಾರೆ.
ಚಿಕಿತ್ಸೆ ಮತ್ತು ಆಪ್ತಸಮಾಲೋಚನೆ ಬೇಕು
ಮಾದಕ ಸೇವನೆ ಚಟಕ್ಕೆ ಒಳಗಾಗಿರುವ ಮಕ್ಕಳಿಗೆ ವೈದ್ಯಕೀಯ ತಪಾಸಣೆ ಬಹುಮುಖ್ಯ. ಕೆಲವು ಸಂದರ್ಭಗಳಲ್ಲಿ ಅತಿಯಾದ ಮಾದಕ ಸೇವನೆಯಿಂದ ದೇಹದ ವಿವಿಧ ಭಾಗಗಳಲ್ಲಿ ತೊಂದರೆಗಳಾಗುತ್ತವೆ. ಮಾನಸಿಕ ತಜ್ಞರು ಮಾದಕ ವಸ್ತುಗಳಿಗೆ ಅಂಟಿಕೊಂಡಿರುವುದನ್ನು ವೈಯಕ್ತಿಕ ಸಂದರ್ಶನದ ಮೂಲಕ ಗುರುತಿಸುತ್ತಾರೆ. ಇಂತಹ ಸನ್ನೀವೇಶಗಳಲ್ಲಿ ಅಗತ್ಯವಿದ್ದರೆ ದಾಖಲು ಮಾಡಿ ಸೂಕ್ತ ಚಿಕಿತ್ಸೆ ಮತ್ತು ಆಪ್ತಸಮಾಲೋಚನೆಯನ್ನು ಮಾಡುತ್ತಾರೆ.
ಮಾದಕ ಸೇವನೆ ಹೇಗೆ ತಡೆಗಟ್ಟಬಹುದು
ಮಗುವಿನ ದೈನಂದಿನ ಚಟುವಟಿಕೆಗಳ ಮೇಲೆ ಕುಟುಂಬದ ಸದಸ್ಯರು ತಪ್ಪದೇ ಮೇಲ್ವಿಚಾರಣೆ ಮಾಡಬೇಕು. ಮಾದಕ ವಸ್ತುಗಳ ಸೇವನೆಯ ದುಷ್ಪರಿಣಾಮಗಳ ಬಗ್ಗೆ ಮಕ್ಕಳಿಗೆ ತಿಳಿಹೇಳುವುದು. ಕುಟುಂಬದ ಪರಿಸರದಲ್ಲಿ ಹಿರಿಯರು ಮಾದಕ ಸೇವನೆ ವಸ್ತುಗಳನ್ನು ಸೇವಿಸದಿರುವುದು. ಶಾಲೆಯ ಶಿಕ್ಷಕರು ಮಕ್ಕಳ ಮೇಲೆ ಮೇಲ್ವಿಚಾರಣೆಯನ್ನು ಮಾಡಬೇಕು. ಮಾದಕ ವಸ್ತುಗಳ ಸೇವನೆ ದುಷ್ಠರಿಣಾಮಗಳ ಬಗ್ಗೆ ಮಕ್ಕಳಲ್ಲಿ ಅರಿವನ್ನು ಮೂಡಿಸುವ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳುವುದು. ಉದಾಹರಣೆಗೆ: ಚರ್ಚಾ ಸ್ಪರ್ಧೆ, ಮಾದಕ ಸೇವನೆಯಿಂದ ದೇಹದ ಮೇಲೆ ಆಗುವ ಪರಿಣಾಮಗಳ ಬಗ್ಗೆ ಚಿತ್ರಗಳನ್ನು ತೋರಿಸುವುದು ಇತ್ಯಾದಿ. ಮಾದಕ ಸೇವನೆಯಿಂದ ತೀವ್ರ ಅನಾರೋಗ್ಯಕ್ಕೆ ಒಳಗಾಗಿರುವ ಮಗುವಿಗೆ ವೈದ್ಯರಿಂದ ತುರ್ತು ಚಿಕಿತ್ಸೆ ಕೊಡಿಸಬೇಕು. ಆಪ್ತಸಮಾಲೋಚನೆ ಕೊಡಿಸುವುದರಿಂದ ಮಕ್ಕಳು ಆರೋಗ್ಯ ಶೈಲಿಯನ್ನು ರೂಢಿಸಿಕೊಳ್ಳುತ್ತವೆ.
ಮಕ್ಕಳ ಸಹಾಯವಾಣಿ
ಒಂದು ವೇಳೆ ಮಕ್ಕಳಲ್ಲಿ ಇಂತಹ ಮಾದಕ ವಸ್ತುಗಳ ಸೇವನೆ ಅತಿಯಾಗಿ ಕಂಡು ಬಂದಲ್ಲಿ, ಪಾಲಕರು ಮಕ್ಕಳ ಸಹಾವಾಣಿ 1068 ಗೆ ಕರೆ ಮಾಡಿ ರಕ್ಷಣೆ, ಪಾಲನೆ, ಮಾರ್ಗದರ್ಶನ ಮತ್ತು ಭಾವನಾತ್ಮಕ ಬೆಂಬಲವನ್ನು ಪಡೆದುಕೊಳ್ಳಬಹುದು. ಅಥವಾ ಹತ್ತಿರದ ವೈದ್ಯರನ್ನು ಸಂಪರ್ಕಿಸಿ ಮಾರ್ಗದರ್ಶನವನ್ನು ಪಡೆದುಕೊಳ್ಳಬಹುದು.