ಕೊಡಗು: ಬೇಸಿಗೆಯ ಬೇಗೆಗೆ ಅರೇಬಿಕಾ ಕಾಫಿಗಿಡಗಳು ಒಣಗಿ ರೋಗಭಾದೆಗೆ ತುತ್ತಾಗಿದ್ದವು, ಆದರೆ ಈಗ ಮಳೆಬಿದ್ದರೂ ಕೂಡ ಬೇಳೆಗಾರರನ್ನು ರೋಗಭಾದೆ ಬೆಂಬಿಡದೇ ಕಾಡುತ್ತಿದೆ. ಕಾಫಿ ಗಿಡ ಹೂ ಬಿಡಲು ಪ್ರತಿ ವರ್ಷ ಫೆಬ್ರವರಿಯಲ್ಲಿ ಮಳೆಯಾಗುತ್ತಿತ್ತು ಆದರೆ ಈ ಬಾರಿ ಏಪ್ರಿಲ್ ತಿಂಗಳು ಬಂದರೂ ಕೂಡ ಮಳೆ ಬದರೇ ಬೇಳೆಗಾರರಲ್ಲಿ ಆತಂಕವನ್ನು ಮೂಡಿಸಿತ್ತು. ಇದೀಗ ಮಳೆ ಬಂದರೂ ಕೂಡ ಕಾಫಿ ಗಿಡಗಳು ಬಿಳಿಕಾಂಡಕೊರಕ ಕೀಟಭಾದೆಗೆ ತುತ್ತಾಗಿವೆ. ಕಾಫಿ ಗಿಡಗಳ ಎಲೆಗಳ ಬಣ್ಣ ಬದಲಾಗಿದ್ದು, ಉದುರಲು ಪ್ರಾರಂಬಿಸಿರುವುದು ಬೇಳೆಗಾರರಲ್ಲಿ ಆತಂಕವನ್ನು ಹೆಚ್ಚಿಸಿದೆ.
ಬಿಳಿಕಾಂಡಕೊರಕಗಳು ಕಾಫಿ ಗಿಡದ ಕಾಂಡವನ್ನು ಕೊರೆದು ತಿನ್ನುತ್ತಿರುವುದರಿಂದ, ಫಸಲು ಕೊಡುತ್ತಿದ್ದ ಗಿಡಗಳು ಸಾಯುತ್ತಿವೆ. ಹತ್ತು ವರ್ಷಗಳ ಹಳೆಯದಾದ ಗಿಡಗಳು ಸಾಯುತ್ತಿರುವುದರಿಂದ ಬೆಳೆಗಾರರು ಕಂಗಾಲಾಗಿದ್ದಾರೆ. ಹೊಸದಾಗಿ ಕಾಫಿ ಗಿಡ ನೆಟ್ಟು ಫಸಲು ಸಿಗಬೇಕಾದರೆ ನಾಲ್ಕರಿಂದ ಐದು ವರ್ಷಗಳು ಬೇಕಾಗುತ್ತದೆ ಆದರಿಂದ ಬೇಳೆಗಾರರು ಆರ್ಥಿಕ ನಷ್ಟ ಅನುಭವಿಸಬೇಕಾಗಿದೆ.
ಕಾಂಡಗಳಲ್ಲಿರುವ ಕೀಟಗಳು ಹಾರಿ, ಇನ್ನೊಂದು ಆರೋಗ್ಯವಂತ ಬುಡಕ್ಕೆ ಸೇರುವುದರಿಂದ, ಮಳೆಬಿದ್ದ ಮೇಲೆ ಕಾಂಡಕೊರಕ ಕೀಟಬಾಧೆಯ ಗಿಡಗಳನ್ನು ಕಿತ್ತು ಸುಡಬೇಕು. ಆದರೆ ಈ ಬಾರಿ ಮಳೆ ವಿಳಂವವಾಗಿ ಬಂದ ಕಾರಣ ಕೆಲವು ಬೆಳೆಗಾರರು ಕಣ್ಣಿಗೆ ಕಂಡ ರೋಗಪೀಡಿತ ಕಾಫಿ ಗಿಡಗಳನ್ನು ಈಗಾಗಲೇ ಕಿತ್ತು ಸುಟ್ಟು ಹಾಕಿದ್ದಾರೆ. ಇನ್ನೂ ಬುಡಗಳಿಗೆ ಒಳ್ಳೆಯ ಬೆಲೆ ಇದ್ದು, ಕೆಲವರು ಕಿತ್ತ ಬುಡಗಳನ್ನು ಮಾರಾಟ ಮಾಡುತ್ತಿದ್ದಾರೆ.
ಪ್ರತಿವರ್ಷ ಫೆಬ್ರವರಿ, ಮಾರ್ಚ್, ಏಪ್ರಿಲ್, ಮೇ ತಿಂಗಳಲ್ಲಿ ಕೀಟ ಪೀಡಿತ ಗಿಡಗಳನ್ನು ತೆಗೆಯಬೇಕು. ಕ್ರಿಮಿನಾಶಕ ಸಿಂಪಡಿಸಬೇಕು, ಅಕ್ಟೋಬರ್ನಿಂದ ಡಿಸೆಂಬರ್ ತನಕ ಕೀಟ ನಿಯಂತ್ರಣದ ಕೆಲಸವನ್ನು ಪುನರಾವರ್ತನೆ ಮಾಡಬೇಕು. ಈ ಕೆಲಸವನ್ನು ಎಲ್ಲಾ ಬೆಳೆಗಾರರು ಸಾಮೂಹಿಕವಾಗಿ ನಿಗದಿತ ಸಮಯದಲ್ಲಿ ಮಾಡಿದರೆ ರೋಗಬಾಧೆ ಹತೋಟಿ ಸಾಧ್ಯ ಎಂಬುದು ತಜ್ಞರ ಸಲಹೆ.
ಕೊಡಗು ಜಿಲ್ಲೆಯಲ್ಲಿ ಅತಿಹೆಚ್ಚು ಅರೇಬಿಕಾ ಕಾಫಿ ಬೆಳೆಯುವ ಸೋಮವಾರಪೇಟೆ ತಾಲೂಕಿನಲ್ಲಿ ಈ ವರ್ಷ 50 ಕೆ.ಜಿ. ತೂಕದ ಅರೇಬಿಕಾ ಪಾರ್ಚ್ಮೆಂಟ್ಗೆ 16 ಸಾವಿರ ರೂ. ಹಾಗೂ ಅರೇಬಿಕಾ ಚೆರ್ರಿಗೆ 7 ಸಾವಿರ ರೂ. ಸಿಕ್ಕಿದೆ. ಎಕರೆಯೊಂದರಲ್ಲಿ 600 ರಿಂದ 700 ಕಾಫಿಗಿಡಗಳು ಇದ್ದರೆ, ಅದರಲ್ಲಿ ಫಸಲು ಕೊಡುವ 50 ರಿಂದ 70 ಗಿಡಗಳು ಕಾಂಡಕೊರಕ ಕೀಟಬಾಧೆಗೆ ತುತ್ತಾಗಿವೆ. ಶನಿವಾರಸಂತೆ, ಕೊಡ್ಲಿಪೇಟೆ, ಸೋಮವಾರ ಪೇಟೆ, ಶಾಂತಳ್ಳಿ, ಸುಂಟಿಕೊಪ್ಪ ಹೋಬಳಿ ವ್ಯಾಪ್ತಿಯ ಗ್ರಾಮಗಳ ಕಾಫಿ ತೋಟದಲ್ಲಿ ಕಾಂಡಕೊರಕ ಕೀಟಬಾಧೆ ಹೆಚ್ಚಾಗಿದೆ.