ಹಾವೇರಿ : ಸತತವಾಗಿ ಶಿಗ್ಗಾoವ್-ಸವಣೂರ ಕ್ಷೇತ್ರದಲ್ಲಿ ಗೆಲ್ಲುವ ಮೂಲಕ ಬಸವರಾಜ ಬೊಮ್ಮಾಯಿ ಮುಖ್ಯಮಂತ್ರಿ ಸ್ಥಾನ ಅಲಂಕರಿಸಿದ್ದಾರೆ.
ನಾಡಿನ ಜನರ ಗಮನ ಸೆಳೆದಿರುವ ಅದೃಷ್ಟದ ಮುಖ್ಯಮಂತ್ರಿ ಬಸವರಾಜ ಬೊಮ್ಮಾಯಿ ಅವರಿಗೆ ಸೋಲಿನ ಭೀತಿ ಕಾಡುತ್ತಿದೆಯಾ ಎಂಬ ಪ್ರಶ್ನೆ ಎದುರಾಗಿದೆ.
ಚಾಣಕ್ಷ ರಾಜಕಾರಣಿ ಎಂದೇ ಬಿಂಬಿತವಾಗಿರುವ ಬೊಮ್ಮಾಯಿ ಶಿಗ್ಗಾವಿ-ಸವಣೂರ ಕ್ಷೇತ್ರದ ಆಳ ಅಗಲ ಬಲ್ಲವರು.
ಈಚೆಗೆ ನಡೆದ ಪಂಚಮಸಾಲಿ ಮೀಸಲಾತಿ ಹೋರಾಟದ ಪರಿಣಾಮ ಸಿಎಂ ಬೊಮ್ಮಾಯಿ ತಮ್ಮ ತವರು ಕ್ಷೇತ್ರದಲ್ಲೇ ಸಾಂಪ್ರದಾಯಿಕ ಮತಗಳಿಂದ ದೂರವಾಗುವ ಆತಂಕ ಮನೆಮಾಡಿದೆ. ಸ್ವಂತ ಕ್ಷೇತ್ರದಲ್ಲೇ ವಿರೋಧದ ಧ್ವನಿ ಹೊಗೆಯಾಡುತ್ತಿದೆ.
ನಿಜವಾಗಿಯೂ ಗೆಲ್ತಾರಾ ಸಿಎಂ?
ಈಗಾಗಲೇ ಜನತಾ ಪರಿವಾರದಿಂದ ರಾಜಕಾರಣಕ್ಕೆ ಬಂದ ಸಿಎಂ ಬೊಮ್ಮಾಯಿ, ಆರಂಭದಲ್ಲಿ ತಂದೆ ಎಸ್. ಆರ್. ಬೊಮ್ಮಾಯಿ ಕೃಪಾಕಟಾಕ್ಷದಿಂದ ಮುನ್ನಲೆಗೆ ಬರುವಂತಾಯಿತು.
ನಂತರದ ದಿನಗಳಲ್ಲಿ ಬದಲಾದ ರಾಜಕೀಯ ಚಿತ್ರಣದ ಪರಿಣಾಮ ಹುಬ್ಬಳ್ಳಿಯಿಂದ ಶಿಗ್ಗಾವಿ-ಸವಣೂರ ಮತಕ್ಷೇತ್ರಕ್ಕೆ ವಲಸೆ ಬಂದ ಸಿಎಂ ಬೊಮ್ಮಾಯಿ ಅವರಿಗೆ ಲಿಂಗಾಯತ ಸಮಾಜದ ಒಳಪಂಗಡಗಳಾದ ಪಂಚಮಸಾಲಿ, ಸಾದರ ಮತಗಳು ದೊಡ್ಡ ಮಟ್ಟದಲ್ಲಿ ಕೈಹಿಡಿದವು. ಇದರ ಜೊತೆಗೆ ಪಕ್ಷಾತೀತವಾಗಿ ಮುಸ್ಲಿಂ ಸಮಾಜವು ಬೆಂಬಲಿಸಿದ ಪರಿಣಾಮ ಕ್ಷೇತ್ರದಲ್ಲಿ ಸಿಎಂ ಬೊಮ್ಮಾಯಿ ಅವರಿಗೆ ಪ್ರಬಲ ಎದುರಾಳಿಗಳೇ ಇಲ್ಲ ಎನ್ನುವ ವಾತಾವರಣ ಸೃಷ್ಟಿಯಾಯಿತು. ಆದರೆ ಈ ಸಾರಿ ಚುನಾವಣೆಯಲ್ಲಿ ಸಮುದಾಯದ ಹಿರಿಯ ನಾಯಕ ಕಾಂಗ್ರೆಸ್ ಮಾಜಿ ಸಚಿವ ವಿನಯ್ ಕುಲಕರ್ಣಿ ಸ್ಪರ್ಧೆ ಮಾಡುವ ಲಕ್ಷಣ ಗೋಚರಿಸುತಿದ್ದಂತೆ ಸಾಕಷ್ಟು ಸೋಲಿನ ಭೀತಿ ಸಿಎಂ ಬೊಮ್ಮಾಯಿ ಅವರಿಗೆ ಎದುರಾಯಿತು. ಆದರೆ ಧಾರವಾಡ ಗ್ರಾಮೀಣ ಕ್ಷೇತ್ರಕ್ಕೆ ವಿನಯ್ ಕುಲಕರ್ಣಿ ಹೆಸರು ಅಂತಿಮಗೊಳ್ಳುತ್ತಿದಂತೆ ನೆಮ್ಮದಿಯ ನಿಟ್ಟುಸಿರು ಬಿಟ್ಟಿದ್ದಾರೆ ಸಿಎಂ.
ಸಿಎಂಗೆ ತಟ್ಟಲ್ಲಿದೆಯಾ ಬಂಡಾಯದ ಬಿಸಿ:
ಮಾಜಿ ವಿಧಾನ ಪರಿಷತ್ ಸದಸ್ಯ ಹಾಗೂ ಹಾಲಿ ಪಕ್ಷೇತರ ಅಭ್ಯರ್ಥಿ ಸೋಮಣ್ಣ ಬೇವಿನಮರದ ಮತ್ತು ಮಾಜಿ ಲೋಕಸಭಾ ಸದಸ್ಯ ಮಂಜುನಾಥ ಕುನ್ನೂರ ಕ್ಷೇತ್ರದಲ್ಲಿ ಸಿಎಂ ವಿರುದ್ಧ ತೊಡೆ ತಟ್ಟಿದ್ದಾರೆ. ಆದರೆ 2019 ಚುನಾವಣೆಯಲ್ಲಿ ಪಕ್ಷೇತರ ಅಭ್ಯರ್ಥಿಯಾಗಿ ಸ್ಪರ್ಧೆಸಿದ ಸೋಮಣ್ಣ ಬೇವಿನಮರದ ಹೀನಾಯಾವಾಗಿ ಸೋಲನುಭವಿಸಿದರು. ಇನ್ನು 2008 ರಲ್ಲಿ ಟಿಕೆಟ್ ಸಿಗದೇ ಬಿಜೆಪಿಯಿಂದ ಕಾಂಗ್ರೆಸ್ ಗೆ ಪಕ್ಷಾಂತರ ಮಾಡಿ ಮತ್ತೆ ಮೋದಿ ಅಲೆಯಲ್ಲಿ ಬಿಜೆಪಿಗೆ ಬಂದ ಮಂಜುನಾಥ ಕುನ್ನೂರ ಅವರಿಗೆ ಜನರ ಬೆಂಬಲ ಸಿಗೋದು ಅನುಮಾನ.
ಕೈ ಹಿಡಿಯಲ್ಲಿವೆಯೇ ಅಭಿವೃದ್ಧಿ ಕಾರ್ಯ?
ಬೊಮ್ಮಾಯಿ ಚುನಾಯಿತವಾದ ನಂತರ ಕ್ಷೇತ್ರದಲ್ಲಿ ಸಾಕಷ್ಟು ಅಭಿವೃದ್ಧಿ ಕಾರ್ಯವನ್ನು ಕೈಗೊಂಡಿದ್ದಾರೆ. ಶಿಗ್ಗಾವಿ l- ಸವಣೂರ ಕ್ಷೇತ್ರದ ಬಹುದಿನದ ಬೇಡಿಕೆ ಯಾಗಿದ್ದ ವರದಾ ನದಿ ಜೋಡಣೆ, ಕ್ಷೇತ್ರದ ರಸ್ತೆ ಕಾಮಗಾರಿ ಹಾಗೂ ಕೈಗಾರಿಕಾ ಅಭಿವೃದ್ಧಿಯನ್ನು ಕ್ಷೇತ್ರದ ಜನರು ಪರಿಗಣಿಸಿ ಸಿಎಂ ಬೊಮ್ಮಾಯಿ ಅವರಿಗೆ ಜಯಮಾಲೆ ಹಾಕುತ್ತಾರಾ ಎಂಬುದನ್ನು ಕಾದು ನೋಡಬೇಕಿದೆ.