ಭಾರತ ದೇಶದಲ್ಲಿ ಕ್ರಿಕೆಟ್ ಆಟಕ್ಕೆ ವಿಶೇಷವಾದ ಸ್ಥಾನ ಇದೆ. ದೇಶದ ರಾಷ್ಟ್ರೀಯ ಕ್ರೀಡೆ ಹಾಕಿ ಆದರೂ ಭಾರತೀಯರಲ್ಲಿ ಕ್ರಿಕೆಟ್ ಆಟದತ್ತ ಇರುವ ಒಲವು, ಆಸಕ್ತಿ ಬೇರಾವುದೇ ಆಟದಲ್ಲೂ ಕಾಣಲು ಸಿಗುವುದಿಲ್ಲ. ಹಳ್ಳಿಯಿಂದ ದಿಲ್ಲಿಯವರೆಗೆ ಗಲ್ಲಿಗಲ್ಲಿಗಳಲ್ಲೂ ಕ್ರಿಕೆಟ್ ಆಡುವವರನ್ನು ಕಾಣಬಹುದು. ವಿಕೆಟ್ ಇಲ್ಲದಿದ್ದರೂ ಕಲ್ಲನ್ನೇ ವಿಕೆಟ್ ಆಗಿ ಬಳಸಿ ಆಡುವುದು, ಬ್ಯಾಟ್ ಇಲ್ಲದಿದ್ದರೂ, ಒಂದು ಮರದ ತುಂಡನ್ನೇ ಬ್ಯಾಟ್ ಆಗಿ ಬಳಸುವುದು, ಆಡಲು ಎಷ್ಟೇ ದೊಡ್ಡ ಮೈದಾನವೇ ಸಿಗಲಿ ಅಥವಾ ಮನೆಯ ಅಂಗಳವೇ ಆಗಲಿ, ಎಷ್ಟು ಜನರು ಇದ್ದಾರೆ ಅನ್ನುವುದರ ಮೇಲೆ ತಮ್ಮದೇ ಆದ ನಿಯಮಗಳನ್ನು ರೂಪಿಸಿ ಆಡುವ ಅದೆಷ್ಟೋ ಜನರೇ ಇದಕ್ಕೆ ಸಾಕ್ಷಿ.
ಇದಕ್ಕೆ ಸರಿ ಹೊಂದುವಂತೆ ಅಂತರರಾಷ್ಟ್ರೀಯ ಮಟ್ಟದಲ್ಲೂ ಭಾರತದ ರಾಷ್ಟ್ರೀಯ ಕ್ರಿಕೆಟ್ ತಂಡ ಅತ್ಯಮೋಘ ಸಾಧನೆಗಳನ್ನು ಮಾಡಿವೆ. ಏಕದಿನ ವಿಶ್ವಕಪ್, ಟಿ20 ವಿಶ್ವಕಪ್, ಚಾಂಪಿಯನ್ಸ್ ಟ್ರೋಫಿ, ಟೆಸ್ಟ್ ಮೇಸ್ ಹೀಗೆ ಎಲ್ಲವನ್ನೂ ಬಾಚಿದೆ. ಇತ್ತೀಚೆಗೆ ಆರಂಭವಾದ ಟೆಸ್ಟ್ ಚಾಂಪಿಯನ್ಶಿಪ್ ನಲ್ಲೂ ಸತತ ಎರಡು ಬಾರಿ ಫೈನಲ್ ಪ್ರವೇಶ ಮಾಡಿರುವುದು ತಂಡದ ಸಾಧನೆಗೆ ಹಿಡಿದ ಕೈಗನ್ನಡಿ.
ಈ ನಡುವೆ, ದೇಶದಲ್ಲಿ ಮತ್ತಷ್ಟು ಜನರನ್ನು ಕ್ರಿಕೆಟ್ನತ್ತ ಆಕರ್ಷಿಸಿದ್ದು ಮತ್ತು ಬಹಳಷ್ಟು ಹೊಡಿಬಡಿ ಆಟಗಾರರನ್ನು ತಯಾರಿಸಿರುವುದರ ಶ್ರೇಯ ಐಪಿಎಲ್ ಟೂರ್ನಿಗೆ ಸಲ್ಲುತ್ತದೆ. 2008 ರಲ್ಲಿ ಆರಂಭವಾದ ಈ ಟೂರ್ನಿ, ಕೋವಿಡ್ ಸಂದರ್ಭದಲ್ಲೂ ಯಶಸ್ವಿಯಾಗಿ ನಡೆದು ಈಗ 16ನೇ ಆವೃತ್ತಿ ನಡೆಯುತ್ತಿದೆ. ಆರಂಭಿಕ ದಿನಗಳಿಂದಲೂ, ವರ್ಷಗಳುರುಳಿದಂತೆ ಹೆಚ್ಚಿನ ಸಂಖ್ಯೆಯ ಪ್ರೇಕ್ಷಕರನ್ನು, ಕ್ರೀಡಾಭಿಮಾನಿಗಳನ್ನು ತಲುಪುತ್ತಿರುವ ಐಪಿಎಲ್ ಈ ಬಾರಿ ಕೆಲವು ಹೊಸ ನಿಯಮಗಳನ್ನು ಪರಿಚಯಿಸಿ, ಟೂರ್ನಿಯನ್ನು ಮತ್ತಷ್ಟು ರೋಚಕಗೊಳಿಸಲು ನಿರ್ಧರಿಸಿದೆ. ಈಗಾಗಲೇ 2023ರ ಆವೃತ್ತಿ ಶುರುವಾಗಿದ್ದು, ಹೊಸ ನಿಯಮಗಳೂ ಜಾರಿಯಾಗಿವೆ.
• ಟಾಸ್ ಬಳಿಕ ಆಡುವ ಬಳಗದ ಆಯ್ಕೆ
ಸಾಮಾನ್ಯವಾಗಿ, ಪಂದ್ಯ ಶುರು ಆಗುವ ಮೊದಲೇ ತಂಡದ ನಾಯಕ ತಮ್ಮ ತಂಡವನ್ನು ಪ್ರಕಟಿಸಬೇಕಾಗಿತ್ತು. ಅಂದರೆ, ಟಾಸ್ಗೆ ಬರುವ ಸಂದರ್ಭದಲ್ಲಿಯೇ ಆಡುವ ಬಣದ ನಿರ್ಧಾರ ಆಗಿರುತ್ತಿತ್ತು. ಆದರೆ, ಈ ಬಾರಿಯ ಐಪಿಎಲ್ನಲ್ಲಿ ಟಾಸ್ ಆದ ಬಳಿಕ, ಮೊದಲು ಬ್ಯಾಟಿಂಗ್ ಅಥವಾ ಫೀಲ್ಡಿಂಗ್ ಎಂಬುವುದನ್ನು ನಿರ್ಧರಿಸಿದ ಬಳಿಕ ತಮ್ಮ ಆಡುವ ಬಳಗವನ್ನು ನಾಯಕ ಪ್ರಕಟಿಸಬೇಕು. ಇದು ತಂಡಗಳಿಗೆ ಬಹಳ ಅನುಕೂಲವಾಗಲಿದೆ.
• ಆಡುವ ಬಳಗ 11ರ ಬದಲು 16!
ಮೊದಲ ಬಾರಿಗೆ ಬದಲಿ ಆಟಗಾರರ ಪರಿಚಯ
ಕ್ರಿಕೆಟ್ನಲ್ಲಿ ಒಂದು ತಂಡ ಎಂದರೆ 11 ಜನ ಆಟಗಾರರು. ಆದರೆ ಈ ಬಾರಿಯ ಐಪಿಎಲ್ನಲ್ಲಿ ಪ್ರತಿ ತಂಡವು 16 ಮಂದಿಯ ಆಡುವ ಬಳಗವನ್ನು ಪ್ರಕಟಿಸಬೇಕು. ಇದರಲ್ಲಿ 11 ಜನರನ್ನು ಹೊರತುಪಡಿಸಿ, ಉಳಿದ ಐವರು ಬದಲಿ ಆಟಗಾರರು. ಬ್ಯಾಟಿಂಗ್ ಮಾಡುವಾಗ ಒಬ್ಬ ಹೆಚ್ಚುವರಿ ಬ್ಯಾಟರ್ ಅನ್ನು ಬಳಸಿ, ಬಳಿಕ ಬೌಲಿಂಗ್ ಸಂದರ್ಭ ಒಬ್ಬ ಬ್ಯಾಟರ್ ಅನ್ನು ಹೊರಗಿಟ್ಟು, ಹೆಚ್ಚುವರಿ ಬೌಲರ್ ಅನ್ನು ತಂಡದಲ್ಲಿ ಸೇರಿಸಬಹುದು. ಆ ಬದಲಿ ಆಟಗಾರರನ್ನು 16ರ ತಂಡದಲ್ಲಿ ಮೊದಲೇ ಸೇರಿಸಿರಬೇಕು.
ಐವರು ಬದಲಿ ಆಟಗಾರರ ಪೈಕಿ ಒಬ್ಬರನ್ನು ಇಂಪ್ಯಾಕ್ಟ್ ಪ್ಲೇಯರ್ ಎಂದು ಗುರುತಿಸಬೇಕು. ಆ ಆಟಗಾರ ಯಾವುದೇ ಹಂತದಲ್ಲೂ ತಂಡವನ್ನು ಸೇರಿ ಆಟವಾಡಬಹುದಾಗಿದೆ.
• ವೈಡ್, ನೋಬಾಲ್ಗೂ ರೀವ್ಯೂವ್!
ಕ್ರಿಕೆಟ್ ಪಂದ್ಯಗಳಲ್ಲಿ ಈ ಹಿಂದೆ ಹಲವು ಬಾರಿ ವೈಡ್ ಹಾಗೂ ನೋಬಾಲ್ ಬಗ್ಗೆ ಅಂಪಾಯರ್ ಗಳು ನೀಡುವ ನಿರ್ಧಾರ ವಿವಾದವನ್ನು ಸೃಷ್ಟಿಸಿದೆ. ಹಾಗಾಗಿ, ಈ ಬಗ್ಗೆ ಅನುಮಾನವಿದ್ದರೆ ಇನ್ನು ಮುಂದೆ ಅದನ್ನೂ ರಿವ್ಯೂವ್ ಮಾಡಬಹುದು. ಈ ಮೂಲಕ ಕೇವಲ ಔಟ್ ನಿರ್ಧಾರಗಳಿಗೆ ಇದ್ದ ರಿವೀವ್ ಆಯ್ಕೆ, ಈಗ ವೈಡ್ ನೋಬಾಲ್ ಗೂ ವಿಸ್ತರಿಸಲಾಗಿದೆ.
• ಪ್ರತಿ ಇನ್ನಿಂಗ್ಸ್ ನಲ್ಲೂ ತಲಾ 2 ಡಿಆರ್ಎಸ್ ಮನವಿ!
ಪಂದ್ಯದ ಪ್ರತಿ ಇನ್ನಿಂಗ್ಸ್ ನಲ್ಲೂ, ಅಂದರೆ ಬ್ಯಾಟಿಂಗ್ ಮಾಡುವಾಗ ಹಾಗೂ ಬೌಲಿಂಗ್ ವೇಳೆಯಲ್ಲಿ ಪ್ರತಿ ತಂಡವು ಎರಡು ಬಾರಿ ಡಿಆರ್ಎಸ್ ಮನವಿಯನ್ನು ಸಲ್ಲಿಸಬಹುದು.
• ವಿಕೆಟ್ ಬಿದ್ದಾಗ ಹೊಸ ಬ್ಯಾಟರ್ಗೆ ಸ್ಟ್ರೈಕ್
ಸಾಮಾನ್ಯವಾಗಿ, ಕ್ರಿಕೆಟ್ನಲ್ಲಿ ಕ್ಯಾಚ್ ಕೊಟ್ಟು ಬ್ಯಾಟರ್ ಔಟ್ ಆದರೆ ಆಗ ಮತ್ತೊಂದು ಬದಿಯಲ್ಲಿ ಇದ್ದ ಬ್ಯಾಟರ್ ಸ್ಟ್ರೈಕ್ಗೆ ಬಂದು ಇನ್ನಿಂಗ್ಸ್ ಮುಂದುವರೆಸಬಹುದಿತ್ತು. ಆದರೆ ಇನ್ನು ಮುಂದೆ, ಹೊಸ ಬ್ಯಾಟರ್ ಬ್ಯಾಟ್ ಮಾಡಬೇಕು. ಈ ಹಿಂದೆ, ಬ್ಯಾಟರ್ ಬೌಲ್ಡ್ ಅಥವಾ ಸ್ಟಂಪ್ ಔಟ್ ಆದಾಗ ಮಾತ್ರ ಹೊಸ ಬ್ಯಾಟರ್ ಕ್ರೀಸ್ಗೆ ಬರುತ್ತಿದ್ದರು. ಆದರೆ ಇನ್ನು ಎಲ್ಲಾ ಸಂದರ್ಭಗಳಲ್ಲೂ ಹೊಸ ಬ್ಯಾಟರ್ ನೇರ ಬ್ಯಾಟಿಂಗ್ಗೆ ಇಳಿಯಬೇಕು. ಒಂದು ವೇಳೆ ಬ್ಯಾಟರ್, ಒಂದು ಓವರ್ನ ಕೊನೆಯ ಎಸೆತದಲ್ಲಿ ಔಟ್ ಆದರೆ ಈ ನಿಯಮ ಅನ್ವಯಿಸುವುದಿಲ್ಲ.
• ಫೀಲ್ಡಿಂಗ್ ಸಂದರ್ಭ ವಿಕೆಟ್ ಕೀಪರ್ ಅಥವಾ ಫೀಲ್ಡರ್ಗಳ ಯಾವುದಾದರು ನಡೆ ಅನುಮಾನಾಸ್ಪದವಾಗಿ ಕಂಡು ಬಂದರೆ ಅಥವಾ ಯಾವುದಾದರೂ ಸಂಶಯಕ್ಕೆ ದಾರಿ ಮಾಡಿ ಕೊಟ್ಟರೆ, ಆಗ ಬ್ಯಾಟಿಂಗ್ ಮಾಡುವ ತಂಡಕ್ಕೆ 5 ರನ್ ಪೆನಾಲ್ಟಿಯಾಗಿ ನೀಡಲಾಗುತ್ತದೆ.
ಐಪಿಎಲ್ ನಲ್ಲಿ ಪರಿಚಯಿಸಲಾಗಿರುವ ಹಲವು ನಿಯಮಗಳು ಇನ್ನೂ ಅಂತರರಾಷ್ಟ್ರೀಯ ಟಿ20 ಕ್ರಿಕೆಟ್ನಲ್ಲಿ ಜಾರಿಯಾಗಿಲ್ಲ.
ಹೀಗಿದ್ದರೂ, ಐಪಿಎಲ್ ನಲ್ಲಿ ನಿಯಮಗಳು ಜಾರಿಯಾಗಿ, ಯಶಸ್ವಿಯೂ ಆಗಿರುವುದು, ಈ ಬಗ್ಗೆ ಐಸಿಸಿ ತೀರ್ಮಾನ ಕೈಗೊಂಡು ಕೆಲವು ನಿಯಮಗಳನ್ನು ಅಂತರರಾಷ್ಟ್ರೀಯ ಪಂದ್ಯಗಳಿಗೂ ಪರಿಚಯಿಸುವುದು ಉತ್ತಮ.