ರಾಜಕೀಯ ಆಡಳಿತದಲ್ಲಿ ಭ್ರಷ್ಟಾಚಾರದ ಬೇರುಗಳು ಎಷ್ಟೊಂದು ಆಳವಾಗಿ ನೆಲಕ್ಕಿಳಿದಿವೆ ಯೆಂದರೆ ಅವನ್ನು ಮೂಲಸಹಿತ ಕಿತ್ತೊಗೆಯುವುದು ಅಸಾಧ್ಯವೆನ್ನುವಂತಹ ಪರಿಸ್ಥಿತಿ ನಿರ್ಮಾಣವಾಗಿದೆ. ಅಧಿಕಾರಕ್ಕೆ ಯಾರೇ ಬರಲಿ, ಭ್ರಚ್ಟಾಚಾರವನ್ನು ಹತ್ತಿಕ್ಕುವ ಬದಲು , ಭ್ರಷ್ಟರಿಗೇ ರಕ್ಷಣೆ ನೀಡಿ ಆ ಮೂಲಕ ತಮ್ಮ ಸಂಪತ್ತನ್ನು ಹೆಚ್ಚಿಸಿಕೊಳ್ಳಲು ಪ್ರಯತ್ನಿಸುವುದು ಇಂದು ಸರ್ವೇಸಾಮಾನ್ಯ ಸಂಗತಿಯೆನಿಸಿಬಿಟ್ಟಿದೆ. ಬಾಯಲ್ಲಿ ಪ್ರಾಮಾಣಿಕತೆಯ ಬಕ ವೇದಾಂತ ಹೇಳುವ ನಾಯಕರಿಗಂತೂ ಬರಗಾಲವಿಲ್ಲ. ತಮ್ಮಷ್ಟು ಸಂಭಾವಿತರು ಜಗತ್ತಿನಲ್ಲೇ ಇಲ್ಲ ಎನ್ನುವಂತೆ ಬಿಂಬಿಸಲು ಪ್ರಯತ್ನಿಸುತ್ತಾರೆ. ರಾಜ್ಯದಲ್ಲಿ ಹಿಂದಿನ ಬಿಜೆಪಿ ಸರಕಾರದ ಅವಧಿಯಲ್ಲಿ ಭಾರೀ ಭ್ರಷ್ಟಾಚಾರ ನಡೆಯಿತೆಂದು ಆರೋಪಿಸುತ್ತಲೇ ಅಧಿಕಾರಕ್ಕೆ ಬಂದ ಕಾಂಗ್ರೆಸ್ ಸರಕಾರ ರಚನೆಯಾಗಿ ಕೇವಲ ಮೂರು ನಾಲ್ಕು ತಿಂಗಳುಗಳಾಗುವಷ್ಟರಲ್ಲಿಯೇ ಭ್ರಷ್ಟಾಚಾರದ ಹೊಗೆಯಾಡತೊಡಗಿರುವುದು ವಿಪರ್ಯಾಸದ ವಿಚಾರವೇ ಸರಿ. ಹೊಗೆಯಾಡುತ್ತಿದೆ ಎಂದರೆ ಅಲ್ಲಿ ಬೆಂಕಿ ಇದೆ ಎಂದೇ ಅರ್ಥ. ಕಳೆದ ನಾಲ್ಕು ದಿವಸಗಳಲ್ಲೇ ಬೆಂಗಳೂರಿನಲ್ಲಿ ನಡೆದ ಎರಡು ಐಟಿ ದಾಳಿಗಳಲ್ಲಿ ಎಂಬತ್ತು ಕೋಟಿಗೂ ಹೆಚ್ಚು ನಗದು ಹಣದ ಅಕ್ರಮ ಸಂಗ್ರಹ ಪತ್ತೆಯಾಗಿರುವುದು ಹಲವು ಬಗೆಯ ಸಂದೇಹಗಳಿಗೆ ಎಡೆ ಮಾಡಿಕೊಟ್ಟಿದೆ. ರಾಜ್ಯದ ಆಡಳಿತ ಪಕ್ಷವಾದ ಕಾಂಗ್ರೆಸ್ಸನ್ನು ಅದರ ಹೈಕಮಾಂಡ್ ಮುಂಬರುವ ತೆಲಂಗಾಣ ಮತ್ತಿತರ ರಾಜ್ಯಗಳ ಚುನಾವಣೆಗಾಗಿ ಹಣ ಸಂಗ್ರಹಿಸುವುದಕ್ಕಾಗಿ ಬಳಸಿಕೊಳ್ಳುತ್ತಿದೆಯೆಂಬ ಮಾತು ಕೇಳಿಬರುತ್ತಿದೆ. ಒಂದೆಡೆ ಕಾಂಗ್ರೆಸ್ಸಿಗೆ ತನ್ನ ಐದು ಗ್ಯಾರಂಟಿಗಳ ಈಡೇರಿಕೆಗಾಗಿಯೂ ಹಣ ಒದಗಿಸಬೇಕಾಗಿದೆ. ಇನ್ನೊಂದೆಡೆ ವರಿಷ್ಠರ ಅಪೇಕ್ಷೆಯನ್ನೂ ಈಡೇರಿಸಬೇಕಾಗಿದೆ. ಈ ಇಕ್ಕಟ್ಟಿನಲ್ಲಿ ಸಿಕ್ಕುಬಿದ್ದಿರುವ ಕಾಂಗ್ರೆಸ್ ನಾಯಕರು ಸರಕಾರಿ ಗುತ್ತಿಗೆದಾರರನ್ನೂ ಅಧಿಕಾರಿಗಳನ್ನೂ ಇದಕ್ಕೆ ಬಳಸಿಕೊಳ್ಳುತ್ತಿದ್ದಾರೆರಂಬ ಮಾತು ಇದ್ದೇಇದೆ. ಪತ್ರಿಕೆಯಲ್ಲಿ ಬಂದಿರುವ ಸುದ್ದಿಗಳಂತೆ ಬಿಬಿಎಂಪಿ, ನೀರಾವರಿ ಮೊದಲಾದ ಇಲಾಖೆಗಳ ಕಾಮಗಾರಿ ಹಣದಲ್ಲಿ ಶೇ. ೭ ರಷ್ಟು ಕಮಿಷನ್ ಸಂಗ್ರಹಿಸಲಾಗುತ್ತಿದೆಯಂತೆ. ಇದೂ ಸಾಲದೆಂಬಂತೆ ಮೈಸೂರು ದಸರಾಕ್ಕೆ ಕಾರ್ಯಕ್ರಮ ನೀಡುವ ಹಿರಿಯ ಕಲಾವಿದರಗೆ ನೀಡುವ ಸಂಭಾವನೆಯಲ್ಲೂ ಅಧಿಕಾರಿಗಳು ಕಮಿಷನ್ನು ಕೇಳುತ್ತಿದ್ದಾರೆಂಬ ವದಂತಿ ಹರಡಿರುವುದು ಸಹ ಸರಕಾರಕ್ಕೆ ಮುಜುಗರವನ್ನುಂಟುಮಾಡಿದೆ.
.ಮುಖ್ಯಮಂತ್ರಿ, ಉಪಮುಖ್ಯ ಮಂತ್ರಿಗಳೆಲ್ಲ ಇದು ವಿರೋಧ ಪಕ್ಷದವರ ಸುಳ್ಳು ರಾಜಕೀಯ ಅಪಪ್ರಚಾರ ಎಂದು ತಳ್ಳಿಹಾಕಬಹುದು. ಆದರೆ ಅಷ್ಟರಿಂದ ಜನರಲ್ಲಿ ಮೂಡಿರುವ ಸಂದೇಹ ನಿವಾರಣೆ ಆಗಲಾರದು. ಸೂಕ್ತ ತನಿಖೆಯಿಂದ ಸತ್ಯ ಸಂಗತಿ ಹೊರಬರಬೇಕಾಗಿದೆ. ಈಗ ಸರಕಾರದ ಸುತ್ತ ಹೊಗೆಯಾಡುತ್ತಿರುವ ಸಂದೇಹಗಳನ್ನು ಕೇವಲ ಊಹಾಪೋಹ, ವದಂತಿ ಎಂದು ಸುಲಭವಾಗಿ ತಳ್ಳಿಹಾಕುವಂತಿಲ್ಲ. ಸರಕಾರ ತನ್ನ ಪ್ರಾಮಾಣಿಕತೆಯನ್ನು ತಾನೇ ಸಿದ್ಧಪಡಿಸಿ ತೋರಿಸಬೇಕಾಗಿದೆ.
ಹಳೇ ಚಾಳಿ ಎಲ್ಲಿ ಹೋಗಲು ಸಾಧ್ಯವಿದೆ? ಹುಟ್ಟುಗುಣ ಘಟ್ಟ ಹತ್ತಿದರೂ ಹೋಗದು ಎನ್ನುವ ನಾಣ್ಣುಡಿಯೇ ಇದೆ. ಬಿಜೆಪಿ ಮೇಲೆ ಶೇ. ೪೦ ಕಮಿಶನ್ ಆರೋಪ ಮಾಡುತ್ತ ಅಧಿಕಾರಕ್ಕೆ ಬಂದಿರುವ ಕಾಂಗ್ರೆಸ್ಸು ಈಗ ತನ್ನ ಮೂಲ ಚಾಳಿಯತ್ತ ಹೆಜ್ಜೆ ಇಡತೊಡಗಿದೆ. ಬಿಲದಿಂದ ಒಂದೊಂದಾಗಿ ಹಾವುಗಳು ಹೊರಬರತೊಡಗಿವೆ. ಒಂದೊಂದೇ ಪ್ರಕರಣಗಳು ತಲೆ ಎತ್ತ ತೊಡಗಿವೆ. ಆರೋಪಗಳನ್ನು ಮಾಡಿದಾಗೆಲ್ಲ ಅದು ಸುಳ್ಳು, ರಾಜಕೀಯಪ್ರೇರಿತ, ಬಿಜೆಪಿ ಅಭ್ಯಾಸ ಅದು ಎಂದೆಲ್ಲ ಹೇಳಿ ಪಾರಾಗಲು ಪ್ರಯತ್ನಿಸುವುದರಲ್ಲಿ ಯಾವ ಅರ್ಥವೂ ಇಲ್ಲ.
ಕಾಂಗ್ರೆಸ್ಸಿನ ಮೂಲ ಗುಣ ಅದೆಲ್ಲಿ ಹೋಗಲು ಸಾಧ್ಯ ಇದೆ. ಹೇಗಾದರೂ ಒಂದಿಷ್ಟು ಹಣ ಗಳಿಸಲೆಂದೇ ಅಧಿಕಾರಕ್ಕೆ ಬರುವ ರಾಜಕೀಯ ಪಕ್ಷಗಳೆಲ್ಲ ಅದೆಷ್ಟು ಪ್ರಾಮಾಣಿಕ ಎನ್ನುವುದು ಎಲ್ಲರಿಗು ಗೊತ್ತಿರುವ ಸಂಗತಿಯೇ. ಬಿಜೆಪಿ ಜೆಡಿಎಸ್ ಗಳು ಮಹಾ ಪ್ರಾಮಾಣಿಕ ರೆಂದು ಇದರರ್ಥವಲ್ಲ. ಇಂದು ಅಧಿಕಾರಕ್ಕೆ ಬರುವ ಎಲ್ಲರೂ ತಿನ್ನುವುದನ್ನು ಕಲಿತಿದ್ದಾರೆ. ತಾನು ಮಹಾ ಸಂಭಾವಿತ ಎಂದು ಯಾರೂ ಪೋಸ್ ಕೊಡುವ ಸ್ಥಿತಿಯಲ್ಲಿಲ್ಲ. ಕೊಟ್ಟರೂ ಜನ ನಂಬುವುದಿಲ್ಲ.
ಈ ಅಪ್ರಾಮಾಣಿಕ ರಾಜಕಾರಣಿಗಳಿಂದಾಗಿ ಅಧಿಕಾರಿಗಳು, ಇಂಜಿನಿಯರುಗಳು, ಗುತ್ತಿಗೆದಾರರು ಎಲ್ಲರೂ ಭ್ರಷ್ಟ ವ್ಯವಹಾರ ಕಲಿತಿದ್ದಾರೆ. ಇದು ಮಹಾದೊಡ್ಡ ರಹಸ್ಯವೇನೂ ಅಲ್ಲ. ಹಿರಿಯ ಕಲಾವಿದರೊಬ್ಬರಿಂದ ಕಾರ್ಯಕ್ರಮಕ್ಕಾಗಿ ಲಂಚ ಕೇಳಿದ ವಿಷಯವೂ ಅಷ್ಟೇ. ಅದು ಹಿಂದೆಯೂ ಇತ್ತು. ಈಗಲೂ ಇದೆ. ಕೆಲ ಕಾಂಗ್ರೆಸ್ ಕುರುಡು ಅಭಿಮಾನಿಗಳು ಅದನ್ನು ಸುಳ್ಳು ಎಂದು ಸಾಧಿಸಲು ಹೊರಟಿರುವುದು ಸಹ ಹಾಸ್ಯಾಸ್ಪದವೇ ಸರಿ. ಮಹಾಭ್ರಷ್ಟರ ಮೇಲೆ ದಾಳಿಯಾದರೆ ಸಾಕು ಅದು ರಾಜಕೀಯ ದಾಳಿ ಎಂದು ಹೇಳಿಬಿಟ್ಟರೆ ಮುಗಿಯಿತು. ಇದು ಭ್ರಷ್ಟಾಚಾರಕ್ಕೆ ಪ್ರೋತ್ಸಾಹ ಕೊಟ್ಟಂತಲ್ಲವೆ?
ಬಹಳ ಕಾಲ ಭ್ರಷ್ಟಾಚಾರ ಮಾಡದೇ ತಣ್ಣಗಿರಲು ಕಾಂಗ್ರೆಸ್ಸಿಗೆ ಸಾಧ್ಯವಿಲ್ಲ. ಇದನ್ನು ನಾನು ಹಿಂದೆಯೇ ಒಮ್ಮೆ ಬರೆದಿದ್ದೇನೆ. ಬಲಂ ಬಲಂ ಅಭ್ಯಾಸ ಬಲಂ ಎಂಬಂತೆ ಕಾಂಗ್ರೆಸ್ ನಾಯಕರಿಗೂ ಈಗ ಕೈ ತುರಿಕೆ ಪ್ರಾರಂಭವಾಗಿದೆ. ಮುಂದಿನ ದಿನಗಳಲ್ಲಿ ಇದು ಇನ್ನಷ್ಟು ಬೆಳೆಯಲಿದೆ. ಆ ಪಕ್ಷಕ್ಕೆ ತನ್ನ ಹೈಕಮಾಂಡಿಗೆ ಬಲ ಕೊಡಬೇಕಾದ ಅನಿವಾರ್ಯತೆಯೂ ಇದೆ. ಮುಂಬರುವ ಚುನಾವಣೆಗಳಿಗೆ ಕರ್ನಾಟಕದಿಂದ ಬಹಳ ದೊಡ್ಡ ಪ್ರಮಾಣದ ನೆರವು ನಿರೀಕ್ಷಿಸುವುದು ಸಹಜ. ಏಕೆಂದರೆ ಕಾಂಗ್ರೆಸ್ ಅಧಿಕಾರದಲ್ಲಿರುವ ದೊಡ್ಡ ರಾಜ್ಯ ಕರ್ನಾಟಕ. ನಮ್ಮ ಜನರಿಗೆ ಬೇಕಾಗಿರುವುದು ಉಚಿತಗಳು. ರಾಜ್ಯದ ಅಭಿವೃದ್ಧಿ ಬಗ್ಗೆ ಚಿಂತಿಸುವವರು ಕಡಿಮೆ. ಸರಕಾರದ ಪ್ರಾಮಾಣಿಕತೆ ತಗೊಂಡು ಆಗಬೇಕಾದ್ದಾದರೂ ಏನಿದೆ ಜನರಿಗೆ, ಅಲ್ಲವೆ?