ಜೆರುಸಲೇಮ್: ಹಮಾಸ್ ಉಗ್ರರ ಮೇಲೆ ಇಸ್ರೇಲ್ ತನ್ನ ಧಾಳಿಯನ್ನು ತೀವ್ರಗೊಳಿಸಿರುವ ಬೆನ್ನಲ್ಲೇ ಇದೀಗ ಲೆಬೆನಾನ್ ಮೂಲದ ಹೆಜ್ಬುಲ್ಲಾ ಉಗ್ರರು ಹಮಾಸ್ ಗೆ ಬೇಂಬಲವಾಗಿ ಕಣಕ್ಕಿಳಿದಿದ್ದಾರೆ. ಲೆಬೆನಾನ್ ಗಡಿಯಿಂದ ಬುಧವಾರ ಹೆಜ್ಬುಲ್ಲಾ ಉಗ್ರರು ಮತ್ತೊಂದು ನರಮೇಧ ನಡೆಸಲು ಮುಂದಾಗಿದ್ದಾರೆ.
ಇಸ್ರೆಲ್ ಗಾಜಾ ಪಟ್ಟಿಯ ಮೇಲೆ ಧಾಳಿಯನ್ನು ತೀವ್ರಗೊಳಿಸಿದ ಬೆನ್ನಲ್ಲೇ ಲೆಬೆನಾನ್ ಉಗ್ರರು ನಿನ್ನೆ ರಾಕೆಟ್ ದಾಳಿ ಮೂಲಕ ಇಸ್ರೇಲ್ ಹೆಲಿಕಾಪ್ಟರ್ ಹೊಡೆದುರುಳಿಸಿದ್ದರು. ಇಸ್ರೇಲ್ನತ್ತ ತೂರಿ ಬಂದ ಉಗ್ರರ ರಾಕೆಟ್ನಿಂದ ಹಲವು ಜೀವಹಾನಿಗಳು ಸಂಭವಿಸಿತ್ತು. ಇತ್ತ ಅಮೆರಿಕ ಎಚ್ಚರಿಕೆ ನಡುವೆಯೂ ಲೆಬೆನಾನ್ ಉಗ್ರರು ಪ್ರತಿ ದಾಳಿ ಆರಂಭಿಸಿದ್ದಾರೆ.
ರಷ್ಯಾ ಉಕ್ರೇನ್ ಯುದ್ಧದ ವೇಳೆ ಉಕ್ರೇನ್ನಲ್ಲಿ ಸಿಲುಕಿದ್ದ ಬರೋಬ್ಬರಿ 20,000 ಭಾರತೀಯರನ್ನು ಕೇಂದ್ರ ಸರ್ಕಾರವು ಆಪರೇಷನ್ ಗಂಗಾ ಮೂಲಕ ಸುರಕ್ಷಿತವಾಗಿ ಭಾರತಕ್ಕೆ ಕರೆತಂದಿತ್ತು. ಈ ಕಾರ್ಯಾಚರಣೆ ವೇಳೆ ರಷ್ಯಾ ಯುದ್ಧವನ್ನೇ ಸ್ಥಗಿತಗೊಳಿಸಿತ್ತು. ಮೇಲೆ ರಷ್ಯಾ ಯುದ್ದ ಆರಂಭಿಸಿದ ಬೆನ್ನಲ್ಲೇ ಭಾರತ ಆಪರೇಶನ್ ಗಂಗಾ ಕಾರ್ಯಾಚರಣೆ ಮೂಲಕ ಸುರಕ್ಷಿತವಾಗಿ ಭಾರತೀಯರನ್ನು ತವರಿಗೆ ಕರೆತಂದಿತ್ತು. ಇದೀಗ ಇಸ್ರೇಲ್ ನಲ್ಲಿ ಕ್ಷಣ ಕ್ಷಣಕ್ಕೂ ಧಾಳಿ ತೀವ್ರವಾಗುತ್ತಿರುವ ಹಿನ್ನೆಲೆಯಲ್ಲಿ ಅಲ್ಲಿರುವ ಭಾರತೀಯರನ್ನು ಸುರಕ್ಷಿತವಾಗಿ ಕರೆತರಲು ಭಾರತ ಆಪರೇಶನ್ ಅಜಯ್ ಎಂಬ ಕಾರ್ಯಾಚರಣೆ ಆರಂಭಿಸಿದೆ. ಚಾರ್ಟೆಟ್ ವಿಮಾನದ ಮೂಲಕ ಭಾರತಕ್ಕೆ ಮರಳಲು ಇಚ್ಚಿಸುವ ಭಾರತೀಯರನ್ನು ಅತ್ಯಂತ ಸುರಕ್ಷಿತವಾಗಿ ತವರಿಗೆ ಕರೆತರಲಾಗುತ್ತದೆ ಎಂದು ವಿದೇಶಾಂಗ ಸಚಿವ ಎಸ್ ಜೈಶಂಕರ್ ಹೇಳಿದ್ದಾರೆ.
ಇಸ್ರೇಲ್ನಲ್ಲಿ ಸಿಲುಕಿರುವ ಭಾರತೀಯರು ಈಗಾಗಲೇ ಅಲ್ಲಿನ ರಾಯಭಾರ ಕಚೇರಿ ವೆಬ್ಸೈಟ್ ಮೂಲಕ ನೋಂದಣಿ ಮಾಡಿಕೊಂಡಿದ್ದು ಮೊದಲ ಬ್ಯಾಚ್ ಗುರುವಾರ ಇಸ್ರೇಲ್ನಿಂದ ಹೊರಡಲಿದೆ. ಭಾರತದ ವಿಮಾನದ ಹಾರಾಟದ ವೇಳೆ ಇಸ್ರೇಲಿ ಸೈನಿಕರು ಸಂಪೂರ್ಣ ರಕ್ಷಣೆ ಒದಗಿಸಲಿದ್ದಾರೆ ಎಂದು ಇಸೇಲ್ ಸರ್ಕಾರವು ಭರವಸೆ ನೀಡಿದೆ. ಅಲ್ಲಿ ಸುಮಾರು 50 ಸಾವಿರ ಭಾರತೀಯರು ಸಿಲುಕಿದ್ದಾರೆ ಎಂದು ಹೇಳಲಾಗಿದೆ.
ಗಾಜಾಪಟ್ಟಿಯ ಹಮಾಸ್ ಉಗ್ರರನ್ನು ಸರ್ವನಾಶ ಮಾಡುವುದಾಗಿ ಪ್ರತಿಜ್ಞೆ ಮಾಡಿರುವ ಇಸ್ರೇಲ್, ಬುಧವಾರ ಕ್ಷಿಪಣಿಗಳ ಮಳೆಯನ್ನೇ ಸುರಿಸಿದೆ. ಗಾಜಾಪಟ್ಟಿಗೆ ಎಲ್ಲಾ ದಿಕ್ಕುಗಳಿಂದಲೂ ಸಂಪರ್ಕ ಕಡಿತಗೊಳಿಸಿದ್ದು, ಶೀಘ್ರದಲ್ಲೇ ಭೂದಾಳಿ ನಡೆಯಲಿದೆ. ಹಮಾಸ್ ಬೆಂಬಲಕ್ಕೆ ಬರುವ ಸಾದ್ಯತೆ ಉಳ್ಳ ಈಜಿಪ್ಟ್ , ಲೆಬನಾನ್ ಇತರ ದೇಶಗಳಿಗೂ ಎಚ್ಚರಿಕೆ ನೀಡಿರುವ ಇಸ್ರೇಲ್ ಮತ್ತೊಂದು ಮಹತ್ವದ ಬೆಳವಣಿಗೆಯೊಂದರಲ್ಲಿ ತನ್ನ ವೈಮಾನಿಕ ದಾಳಿ ಮೇಲೆ ನಿಗಾ ಇಡಲು ಹಮಾಸ್ ಉಗ್ರರು ಬಳಸುತ್ತಿದ್ದ ‘ಅಡ್ವಾನ್ಸ್ ಡಿಟೆಕ್ಷನ್ ಸಿಸ್ಟಂ’ ಅನ್ನು ಇಸ್ರೇಲಿ ಸೇನೆ ಸಂಪೂರ್ಣವಾಗಿ ನಿರ್ನಾಮ ಮಾಡಿದೆ. ಅಲ್ಲದೆ ಹಮಾಸ್ಗೆ ಹಣಕಾಸು ಪೂರೈಕೆ ಮಾಡುತ್ತಿದ್ದ 2 ಬ್ಯಾಂಕ್ ಶಾಖೆಗಳು, ಒಂದು ಸುರಂಗ, ಹಮಾಸ್ ಉಗ್ರರ ಕಾರ್ಯಾಚರಣೆಯ 2 ಕಮಾಂಡ್ ಕ್ಯಾಂಪ್ಗಳು, ಆಯುಧ ಸಂಗ್ರಹಣಾ ವ್ಯವಸ್ಥೆ, ತರಬೇತಿಗೆ ಬಳಕೆಯಾಗುತ್ತಿದ್ದ 2 ಪ್ರದೇಶಗಳು, ಶಸ್ತ್ರಾಸ್ತ್ರ ಉತ್ಪಾದನಾ ಘಟಕಗಳನ್ನು ನಾಶ ಮಾಡಲಾಗಿದೆ ಎಂದು ಇಸ್ರೇಲ್ ಸೇನೆ ಹೇಳಿದೆ.
ಇಸ್ರೇಲ್-ಹಮಾಸ್ ಯುದ್ಧದಲ್ಲಿ ಮೃತಪಟ್ಟವರ ಸಂಖ್ಯೆ 4000 ಅನ್ನು ದಾಟಿದೆ. ಇಸ್ರೆಲ್ ಧಾಳಿಯಿಂದ ಕಟ್ಟಡಗಳು ನೆಲಸಮಗೊಂಡು ಅವುಗಳಡಿಯಲ್ಲಿ ಅಸಂಖ್ಯ ಜನರು ಸಿಲುಕಿದ್ದಾರೆ ಎಂದು ಹೇಳಲಾಗಿದೆ.
40 ಕಿ.ಮೀ. ಉದ್ದ ಹಾಗೂ 10 ಕಿ.ಮೀ. ಅಗಲದ, 23 ಲಕ್ಷ ಜನಸಂಖ್ಯೆಯ ಗಾಜಾಪಟ್ಟಿಯ ಒಂದು ದಿಕ್ಕಿನಲ್ಲಿ ಮೆಡಿಟರೇನಿಯನ್ ಸಮುದ್ರ ಹಾಗೂ ಇನ್ನುಳಿದ ಮೂರು ದಿಕ್ಕಿನಲ್ಲಿ ಇಸ್ರೇಲ್ ಇದೆ. ಒಂದು ತುದಿಯಲ್ಲಿ ಈಜಿಪ್ಟ್ ಜೊತೆಗೆ ಸಣ್ಣ ಗಡಿ ಇದೆ. ಪ್ಯಾಲೆಸ್ತೀನ್ನ ಆಡಳಿತದಲ್ಲಿದ್ದ ಗಾಜಾಪಟ್ಟಿಯನ್ನು 2007ರಲ್ಲಿ ಹಮಾಸ್ ಉಗ್ರರು ವಶಪಡಿಸಿಕೊಂಡ ಮೇಲೆ ಈಜಿಪ್ಟ್ ಕೂಡ ಆ ಗಡಿಯನ್ನು ಮುಚ್ಚಿದೆ. ಆದರೆ ಇಂಧನ, ಔಷಧ ಹಾಗೂ ತುರ್ತು ಅಗತ್ಯಗಳಿಗಾಗಿ ಆ ಗಡಿ ಸೀಮಿತ ಪ್ರಮಾಣದಲ್ಲಿ ಈಗಲೂ ಬಳಕೆಯಾಗುತ್ತಿತ್ತು. ಈಗ ಅದನ್ನು ಬಂದ್ ಮಾಡಿದ್ದು ಗಾಜಾಪಟ್ಟಿ ಬಾಹ್ಯ ಜಗತ್ತಿನಿಂದ ಸಂಪೂರ್ಣ ಸಂಪರ್ಕ ಕಳೆದುಕೊಂಡಿದೆ.
ಗಾಜಾಪಟ್ಟಿಯಲ್ಲಿ ವಿದ್ಯುತ್ ಪೂರೈಕೆಗೆ ಸಂಪೂರ್ಣವಾಗಿ ಜನರೇಟರ್ಗಳನ್ನೇ ಅವಲಂಬಿಸಲಾಗಿದೆ. ಇಂಧನ ಪೂರೈಕೆ ಸ್ಥಗಿತಗೊಂಡಿರುವುದರಿಂದ ಅವು ಬಂದ್ ಆಗಿವೆ. ಹೀಗಾಗಿ ಇಡೀ ಗಾಜಾಪಟ್ಟಿಯೀಗ ಕತ್ತಲಲ್ಲಿ ಸಿಲುಕಿದೆ. ಹೊರಗಿನಿಂದ ಔಷಧಗಳೂ ಪೂರೈಕೆಯಾಗುವುದು ನಿಂತಿದೆ. ಹೀಗಾಗಿ ಯುದ್ಧದಿಂದಾಗಿ ಆಸ್ಪತ್ರೆಗಳಿಗೆ ದಾಖಲಾಗುತ್ತಿರುವ ಜನರಿಗೆ ಚಿಕಿತ್ಸೆ ನೀಡಲು ಔಷಧಗಳು ಇಲ್ಲದಂತಾಗಿದೆ. ಆಸ್ಪತ್ರೆಗಳು ಕೂಡ ಕತ್ತಲಿನಲ್ಲಿ ಮುಳುಗಿವೆ. ಗಾಜಾ ಪಟ್ಟಿಯಲ್ಲಿ ಸುಮಾರು 12 ಸಾವಿರ ಕಟ್ಟಡಗಳನ್ನು ಕ್ಷಿಪಣಿಗಳ ಮೂಲಕ ಇಸ್ರೆಲ್ ಧ್ವಂಸ ಮಾಡಿದೆ.
ಇಸ್ರೇಲ್ನ ಕ್ಷಿಪಣಿಗಳು ಗಾಜಾಪಟ್ಟಿಯಲ್ಲಿರುವ ಇಸ್ಲಾಮಿಕ್ ವಿವಿ ಮೇಲೆ ದಾಳಿ ನಡೆಸಿ ನೆಲಸಮಗೊಳಿಸಿವೆ. ಈ ವಿಶ್ವವಿದ್ಯಾಲಯವು ಹಮಾಸ್ ಉಗ್ರರಿಗೆ ತರಬೇತಿ ಕ್ಯಾಂಪ್ ರೀತಿ ಬಳಕೆಯಾಗುತ್ತಿತ್ತು. ಜೊತೆಗೆ ಅಲ್ಲಿ ಶಸ್ತ್ರಾಸ್ತ್ರಗಳನ್ನು ಕೂಡ ತಯಾರಿಸಲಾಗುತ್ತಿತ್ತು. ಭಯೋತ್ಪಾದನೆಗೆ ಹಣ ಸಂಗ್ರಹಿಸಲು ಅಲ್ಲಿ ಹಮಾಸ್ ಉಗ್ರರು ವಿಚಾರ ಸಂಕಿರಣಗಳನ್ನು ನಡೆಸುತ್ತಿದ್ದರು.
ಹಾಮಾಸ್ ಉಗ್ರರು ಕ್ಷಿಪಣಿ ಧಾಳಿಯಿಂದ ರಕ್ಷಿಸಿಕೊಳ್ಳಲು ಬಂಕರ್ ಗಳಲ್ಲಿ ಆಶ್ರಯ ಪಡೆದಿದ್ದಾರೆ ಎಂದು ಇಸ್ರೇಲಿ ಗುಪ್ತಚರ ಮೂಲಗಳು ತಿಳಿಸಿದ್ದು ಆ ಬಂಕರ್ ಗಳನ್ನು ಗುರುತಿಸಲಾಗಿದ್ದು ಭೂ ಧಾಳಿ ಮೂಲಕ ಧ್ವಂಸ ಮಾಡಲು ಇವುಗಳನ್ನು ನಾಶ ಮಾಡಲು ಮುಂದಾಗಿದೆ.
ಈ ಯುದ್ದದ ಕುರಿತು ಕೂಡಲೇ ಇಸ್ಲಾಮಿಕ್ ಒಕ್ಕೂಟದ ಸಭೆ ಕರೆಯುವಂತೆ ಸೌದಿ ಅರೆಬಿಯಾ ಮತ್ತು ಇರಾನ್ ಒಕ್ಕೂಟವನ್ನು ಆಗ್ರಹಿಸಿವೆ. ಅಮೇರಿಕದಿಂದ ಭಾರೀ ಶಸ್ತ್ರಾಸ್ತ್ರ ಗಳನ್ನು ಹೊತ್ತ ಹಡಗುಗಳು ಶೀಘ್ರದಲ್ಲೇ ಇಸ್ರೇಲ್ ತಲುಪಲಿವೆ ಎಂದು ಮೂಲಗಳು ತಿಳಿಸಿವೆ. ಇಸ್ರೇಲಿ ಪಡೆಗಳಿಗೆ ಸಾಥ್ ನೀಡಲು ವಿವಿದ ದೇಶಗಳಲ್ಲಿ ನೆಲೆಸಿರುವ ಇಸ್ರೆಲಿ ನಾಗರಿಕರು ಧಾವಿಸುತಿದ್ದಾರೆ.