ಬೆಂಗಳೂರು: ತುಳುನಾಡ ಪ್ರಸಿದ್ಧ ಕ್ರೀಡೆ ಕಂಬಳ ರಾಜಧಾನಿಯಲ್ಲಿ ನವೆಂಬರ್ 25 ಹಾಗೂ 26 ರಂದು ಅರಮನೆ ಮೈದಾನದಲ್ಲಿ ನಡೆಯಲಿದೆ. ಪುತ್ತೂರು ಶಾಸಕ ಅಶೋಕ್ ಕುಮಾರ್ ರೈ ನೇತೃತ್ವದಲ್ಲಿ ಬೆಂಗಳೂರು ಕಂಬಳ ನಡೆಯಲಿದೆ.
ಈ ಸಲದ ಕಂಬಳಕ್ಕೆ ಬಾಲಿವುಡ್ ನಟಿ ಐಶ್ವರ್ಯ ರೈ ಹಾಗೂ ಸೂಪರ್ ಸ್ಟಾರ್ ರಜನಿಕಾಂತ್ ಆಗಮಿಸಲಿದ್ದಾರೆ ಎಂಬ ಮಾಹಿತಿ ತಿಳಿದು ಬಂದಿದೆ.
ಬೆಂಗಳೂರಿನಲ್ಲಿ ಕರಾವಳಿ ಕಂಬಳ ಕಲರವ ಈಗಾಗಲೇ ಶುರುವಾಗಿದೆ. ಬೆಂಗಳೂರಿನಲ್ಲಿ ಕಂಬಳ ನಡೆಯೋ ಸುದ್ದಿ ಈಗಾಗಲೇ ವೈರಲ್ ಆಗಿದ್ದು ಕಂಬಳ ಪ್ರೇಮಿಗಳು ಈ ಒಂದು ದಿನಕ್ಕಾಗಿ ಭಾರೀ ಕುತೂಹಲದಿಂದ ಕಾಯುತ್ತಿದ್ದಾರೆ.
ಬೆಂಗಳೂರು ಕಂಬಳದಲ್ಲಿ 125ಕ್ಕೂ ಅಧಿಕ ಜೋಡಿ ಕೋಣಗಳು ಭಾಗವಹಿಸಲಿದೆ. ಬೆಂಗಳೂರು ಕಂಬಳದಲ್ಲಿ ವಿಶೇಷ ತಾರಾ ಮೆರಗು ಕೂಡಾ ಇರಲಿದ್ದು ಈ ಸುದ್ದಿಯೇ ಸಿನಿಮಾ ಪ್ರೇಮಿಗಳಿಗೆ ಭರ್ಜರಿ ಎಕ್ಸೈಟಿಂಗ್ ಆಗಿದೆ.
ನಟ ರಜನಿಕಾಂತ್,ಬಾಲಿವುಡ್ ನಟಿ ಐಶ್ವರ್ಯಾರೈ ವಿಶೇಷ ತಾರಾ ಮೆರಗು ಇರಲಿದ್ದು ಸ್ಯಾಂಡಲ್ ವುಡ್ ನ ನಟ-ನಟಿಯರೂ ಬೆಂಗಳೂರು ಕಂಬಳದಲ್ಲಿ ಭಾಗಿಯಾಗಲಿದ್ದಾರೆ. ಬೆಂಗಳೂರು ಕಂಬಳವನ್ನು ಸಿಎಂ ಸಿದ್ಧರಾಮಯ್ಯ ಉದ್ಘಾಟನೆ ಮಾಡಲಿದ್ದಾರೆ.
ಬೆಂಗಳೂರು ಅರಮನೆ ಮೈದಾನದಲ್ಲಿ 145 ಮೀ ಉದ್ದದ ಕಂಬಳದ ಕರೆ ನಿರ್ಮಾಣ ಮಾಡಲಾಗುತ್ತದೆ. ಈ ಒಂದು ಬೆಂಗಳೂರು ಕಂಬಳಕ್ಕಾಗಿ ಈಗಾಗಲೇ ಸುಮಾರು 6 ಕೋಟಿ ರೂಪಾಯಿ ವೆಚ್ಚದಲ್ಲಿ ಸಿದ್ಧತೆ ನಡೆದಿದೆ.
ಏಕಕಾಲದಲ್ಲಿ ಹದಿನೈದು ಸಾವಿರ ಜನ ಕಂಬಳ ವೀಕ್ಷಿಸಲು ಅವಕಾಶ ಮಾಡಲಾಗಿದೆ. ಕಂಬಳಕ್ಕೆ 9ಲಕ್ಷಕ್ಕೂ ಅಧಿಕ ಜನ ಸೇರುವ ನಿರೀಕ್ಷೆ ಇದೆ. ಕಂಬಳದಲ್ಲಿ ತುಳುನಾಡಿನ ಆಹಾರ ಮೇಳವೂ ಲಭ್ಯವಾಗಲಿದ್ದು ಸಿಲಿಕಾನ್ ಸಿಟಿ ಜನ ಕರಾವಳಿಯ ಆಹಾರ ಆಸ್ವಾದಿಸಬಹುದು.
ಕೋಣಗಳಿಗೆ ಆಹಾರ,ನೀರು ಮಂಗಳೂರಿನಿಂದಲೇ ಪೂರೈಕೆಯಾಗಲಿದೆ. ವಿಶೇಷ ಬೆಂಗಾವಲು ವಾಹನ, ಪಶುವೈದ್ಯರ ಸಹಿತ ಮಂಗಳೂರಿನಿಂದ ಬೆಂಗಳೂರಿಗೆ ಬರಲಿರುವ ಕಂಬಳದ ಕೋಣಗಳಿಗಾಗಿಯೂ ವಿಶೇಷ ಸಿದ್ಧತೆ ಮಾಡಲಾಗಿದೆ.