ಕೋಲಾರ: ಜಿಲ್ಲೆಯಲ್ಲಿ ಈದ್ ಮಿಲಾದ್ ಹಬ್ಬದ ಆಚರಣೆಯ ಸಂದರ್ಭದಲ್ಲಿ ಕತ್ತಿಯನ್ನು ಪ್ರದರ್ಶಿಸಿದ ಘಟನೆ ಕುರಿತು ಪೋಲೀಸರು ಎರಡು ಪ್ರತ್ಯೇಕ ಪ್ರಕರಣಗಳನ್ನು ದಾಖಲಿಸಿಕೊಂಡಿದ್ದಾರೆ. ಹಬ್ಬದ ಪ್ರಯುಕ್ತ ಕತ್ತಿಯಿಂದ ಸ್ವಾಗತ ಕಮಾನು ಮಾಡಿ ಹಾಕಿದ್ದ ಅಸ್ಲಾಂ ಪಾಷಾ, ಚಾಂದ್ ಪಾಷಾ, ಮನ್ಸೂರ್ ಆಲಿ, ಮೊಹಮದ್ ಬಿಲಾಲ್, ಸಾಧಿಕ್ ಪಾಷಾ ಎಂಬುವರ ಮೇಲೆ ಪ್ರಕರಣ ದಾಖಲಾಗಿದೆ. ಅಲ್ಲದೆ ಈದ್ ಮಿಲಾದ್ ಮೆರವಣಿಗೆ ವೇಳೆ ಕುದುರೆ ಮೇಲೆ ಕುಳಿತು ಕತ್ತಿ ಜಳಪಿಸಿದ್ದ ಮೊಹಮ್ಮದ್ ಸಗೀರ್ ಎಂಬಾತನ ಮೇಲೆ ಪ್ರಕರಣ ದಾಖಲಾಗಿದೆ.
ಕೋಲಾರದಲ್ಲಿ ಹಬ್ಬದ ಆಚರಣೆಯ ಸಂದರ್ಭದಲ್ಲಿ ಕತ್ತಿಯ ಕಮಾನು ಮಾಡಿರುವ ಕುರಿತು ಸಂಸದ ಮುನಿಸ್ವಾಮಿ ಬೆಂಗಳೂರಿನಲ್ಲಿ ಪತ್ರಿಕಾಗೋಷ್ಠಿ ನಡೆಸಿ ತೀವ್ರ ಆಕ್ಷೇಪ ವ್ಯಕ್ತಪಡಿಸಿದ್ದರು, ನಂತರ ಪೋಲೀಸರು ಮದ್ಯ ಪ್ರವೇಶಿಸಿ 200 ಕೆಜಿ ತೂಕದ ಕತ್ತಿಯ ದ್ವಾರಬಾಗಿಲು ತೆರವು ಮಾಡಿಸಿದ್ದರು.
ಕೋಲಾರದಲ್ಲಿ ಗುರುವಾರ ನಡೆದ ಈದ್ ಮಿಲಾದ್-ಉನ್-ನಬಿ ಆಚರಣೆಯಲ್ಲಿ ಅಂಜುಮನ್-ಎ-ಇಸ್ಲಾಂ ಎಂಬ ಮುಸ್ಲಿಂ ಸಂಘಟನೆಯು ಸುಂದರೀಕರಣದ ಉದ್ದೇಶಕ್ಕಾಗಿ ಕತ್ತಿಯ ಆಕಾರದ ಎರಡು ಹೋರ್ಡಿಂಗ್ಗಳನ್ನು ಅಳವಡಿಕೆಗೆ ಪಾಲಿಕೆ ಅಧಿಕಾರಿಗಳಿಂದ ಅನುಮತಿ ಪಡೆಯದೆ ನಡೆಸಲಾಗಿದೆ ಎಂದು ಕೋಲಾರ ಪೊಲೀಸರು ತಿಳಿಸಿದ್ದಾರೆ. ಅಂಜುಮನ್-ಎ-ಇಸ್ಲಾಂನ ಸಂಘಟಕರು ಈದ್ ಮಿಲಾದ್ ಮೆರವಣಿಗೆಯ ಸೌಂದರ್ಯವನ್ನು ಹೆಚ್ಚಿಸಲು ಈ ಹೋರ್ಡಿಂಗ್ಗಳನ್ನು ನಿರ್ಮಿಸಿದ್ದಾರೆ, ನಂತರ ಪೋಲೀಸರ ಸೂಚನೆಯ ಮೇರೆಗೆ ಸಂಘಟಕರು ಸ್ವಯಂ ಪ್ರೇರಿತವಾಗಿ ಹೋರ್ಡಿಂಗ್ಗಳನ್ನು ತೆಗೆದಿದ್ದಾರೆ ಎಂದು ಕೋಲಾರ ಎಸ್ಪಿ ಎಂ ನಾರಾಯಣ ತಿಳಿಸಿದ್ದಾರೆ.
ಸಂತೋಷ, ಸಡಗರದಿಂದ ಸಂಭ್ರಮಿಸಬೇಕಾದ ಹಬ್ಬದ ಆಚರಣೆಯ ಸಂದರ್ಭದಲ್ಲಿ ಕತ್ತಿಯನ್ನು ಪ್ರದರ್ಶಿಸಿರುವುದು ಹಿಂದೂ ಸಂಘಟನೆಗಳ ತೀವ್ರ ಆಕ್ರೋಶಕ್ಕೆ ಕಾರಣವಾಗಿತ್ತು.