ಒಂದು ಮೂರ್ತಿಯನ್ನು ಶಿಲ್ಪಿ ಕೆತ್ತನೆ ಮಾಡಿದ ನಂತರ ಎಲ್ಲರೂ ಮೂರ್ತಿಯನ್ನೇ ಗುಣಗಾನ ಮಾಡುತ್ತಾರೆ ಹೊರತು ಶಿಲ್ಪಿಯನ್ನು ಯಾರು ಕೇಳುವುದಿಲ್ಲ. ಇದು ರೂಢಿಯೂ ಹೌದು. ಸಾಧನೆಗೆ ವಯಸ್ಸಿನ ಅಡ್ಡಿಯಾಗಲ್ಲ. ಉತ್ಸಾಹ ಕಠಿಣ ಪರಿಶಮ್ರ ಇದ್ದರೆ, ವಯಸ್ಸು ಎಷ್ಟೇ ಆಗಿದ್ದರೂ ಯಶಸ್ಸು ನಮ್ಮದಾಗುತ್ತದೆ ಎಂಬುದನ್ನು ಕೇಳಿದ್ದೇವೆ. ಚೆಸ್ನಲ್ಲಿ ಇತಿಹಾಸ ಸೃಷ್ಟಿಸಿರುವ ಭಾರತದ ಧ್ರುವತಾರೆ, ಗ್ರ್ಯಾಂಡ್ ಮಾಸ್ಟರ್ ಪ್ರಜ್ಞಾನಂದ (R Praggnanandhaa) ವಿಚಾರದಲ್ಲಿ ಈ ಮಾತು ಅಕ್ಷರಶಃ ನಿಜವಾಗಿದೆ.
ಚೆಸ್ ವಿಶ್ವಕಪ್ ಇತಿಹಾಸದಲ್ಲಿ ಚರಿತ್ರೆ ಬರೆದಿರುವ ರಮೇಶ್ ಬಾಬು ಪ್ರಜ್ಞಾನಂದ, ಈ ಟೂರ್ನಿಯಲ್ಲಿ ಫೈನಲ್ ಪ್ರವೇಶಿಸಿದ ಎರಡನೇ ಭಾರತೀಯ ಎಂಬ ಹೆಗ್ಗಳಿಕೆಗೂ ಭಾಜನರಾಗಿದ್ದಾರೆ. ಅತಿ ಸಾಮಾನ್ಯ ಮಧ್ಯಮ ವರ್ಗದ ಕುಟುಂಬದ ಈತ, ದಿಗ್ಗಜ ಚೆಸ್ ಚಾಂಪಿಯನ್ಗಳಿಗೇ ನಡುಕ ಹುಟ್ಟಿಸುತ್ತಿದ್ದಾನೆ. ಭಾರತದ ಕೀರ್ತಿ ಪತಾಕೆ ಮುಗಿಲೆತ್ತರಕ್ಕೆ, ಹಾರಿಸಿದ ಭಾರತದ ಈ ಲಿಟಲ್ ಗ್ರ್ಯಾಂಡ್ ಮಾಸ್ಟರ್ ಚೆಸ್ ಕಲಿತದ್ದು ಯಾರಿಂದ ಎಂಬ ಕುತೂಹಲವಿದೆ. ಅದಕ್ಕೆ ಉತ್ತರ ಇಲ್ಲಿದೆ.
ತನ್ನ ತಾಯಿಯ ಜೊತೆಗೆ ದೇಶ ವಿದೇಶ ಸುತ್ತುತ್ತಿರುವ 18 ವರ್ಷದ ಆಟಗಾರ, ಬಾಲ್ಯದಲ್ಲೇ ವಿಶ್ವ ಮಟ್ಟದಲ್ಲಿ ಗಮನ ಸೆಳೆದಿದ್ದಾನೆ. 2005ರ ಆಗಸ್ಟ್ 5ರಂದು ಜನಿಸಿದ ಈ ಚತರು ಅತ್ಯಂತ ಬುದ್ದಿವಂತಿಕೆಯ ಹುಡುಗ. ಚಿಕ್ಕ ವಯಸ್ಸಿನಲ್ಲೇ ಚೆಸ್ ದಿಗ್ಗಜನನ್ನೇ ಶೇಕ್ ಮಾಡುತ್ತಿರುವ ಈತ 2022ರಲ್ಲಿ ಗ್ರ್ಯಾಂಡ್ ಮಾಸ್ಟರ್ ಪ್ರಶಸ್ತಿ ಗೆದ್ದರು. 2013ರಲ್ಲಿ ಅಂಡರ್-8 ವರ್ಲ್ಡ್ ಯೂತ್ ಚೆಸ್ ಚಾಂಪಿಯನ್ಶಿಪ್ ಪ್ರಶಸ್ತಿ.. ಹೀಗೆ ಚಿಕ್ಕ ವಯಸ್ಸಿನಲ್ಲೇ ಹಲವು ದಾಖಲೆಗಳನ್ನು ಮಾಡಿದ್ದಾರೆ.
ಚೆಸ್ ಕಲಿತಿದ್ದು ಯಾರಿಂದ?
ಚಿಕ್ಕ ವಯಸ್ಸಿನಲ್ಲೇ ಪ್ರಪಂಚವನ್ನು ಆಳುತ್ತಿರುವ, ದಿಗ್ಗಜ ವಿಶ್ವನಾಥನ್ ಆನಂದ್ ಅವರ ಉತ್ತರಾಧಿಕಾರಿ ಎಂದೇ ಕರೆಸಿಕೊಳ್ಳುತ್ತಿರುವ ಆರ್ ಪ್ರಜ್ಞಾನಂದ ಚೆಸ್ ಆರಂಭಿಸಿದ್ದೇ ಕೇವಲ 3.5 ವರ್ಷದಲ್ಲಿ. ಅದು ಅವರ ಸಹೋದರಿ ಅವರಿಂದ ಕಲಿತದ್ದು. ಸಹೋದರಿ ವೈಶಾಲಿ ಅವರು ತನ್ನ ತಮ್ಮ ಪ್ರಜ್ಞಾನಂದನಿಗೆ ಚೆಸ್ ಹೇಳಿಕೊಟ್ಟರು ಎಂಬುದು ವಿಶೇಷ. ವೈಶಾಲಿಯೇ ಪ್ರಜ್ಞಾನಂದನಿಗೆ ಚೆಸ್ ತರಗತಿ ತೆಗೆದುಕೊಳ್ಳುತ್ತಿದ್ದರು. ಅಕ್ಕ ವೈಶಾಲಿಯೇನು ಸಾಮಾನ್ಯಳಲ್ಲ ಇವಳು ಸಹ ಚೆಸ್ ಚಾಂಪಿಯನ್ ಆಗಿದ್ದಾಳೆ. ಈ ಸಾಧನೆ ಎಂತಹದೆಂದರೆ ಈಕೆ ಭಾರತದಲ್ಲೇ ಕಾರ್ಲಸನ್ ನನ್ನು ಭಾರತದಲ್ಲೇ ಸೋಲಿಸಿದ ಕೀರ್ತಿ ಇವಳದ್ದಾಗಿದೆ.
ವಿಶ್ವದ ನಂಬರ್ 1 ಆಟಗಾರ ನಾರ್ವೆಯ ಮ್ಯಾಗ್ನಸ್ ಕಾರ್ಲ್ಸನ್ ವಿರುದ್ಧ ಸೋಲು ಕಂಡರು. ಆದರೆ, ಆತನ ಸಾಧನೆಗೆ ಸಂಪೂರ್ಣ ಶ್ರೇಯ, ತಾಯಿ ನಾಗಲಕ್ಷ್ಮಿ ಅವರಿಗೆ ಸಲ್ಲಲೇಬೇಕು. ಸೆಮಿಫೈನಲ್ ಮುಗಿಸಿದ ಸಂದರ್ಶನವೊಂದರಲ್ಲಿ ಭಾರತದ ಕಣ್ಮಣಿ ಪ್ರಜ್ಞಾನಂದ, ತನ್ನ ಬೆಂಬಲದ ಕುರಿತು ವರ್ಣಿಸಿದ್ದಾರೆ. ನಾನು ಈ ಹಂತಕ್ಕೆ ಬಂದಿದ್ದೇನೆ ಅಂದರೆ, ಅದು ನನ್ನ ತಾಯಿಯ ಬೆಂಬಲ, ಸಹಕಾರದಿಂದ. ನನ್ನ ತಾಯಿ ಯಾವಾಗಲೂ ಬೆಂಬಲ ನೀಡುತ್ತಾರೆ. ಎಷ್ಟೋ ಬಾರಿ ಸೋತ ನಂತರ ಅವರು, ಸಮಾಧಾನಪಡಿಸುತ್ತಾರೆ. ಶಾಂತಿಪಡಿಸುತ್ತಾರೆ. ಧೈರ್ಯ ಹೇಳುತ್ತಾರೆ. ಧೃತಿಗೆಡದಂತೆ ನೋಡಿಕೊಳ್ಳುತ್ತಾರೆ. ನನಗೆ, ನನ್ನ ತಾಯಿಯೇ ದೊಡ್ಡ ಬೆಂಬಲ, ಶಕ್ತಿ ಎಂದು ಹೇಳಿದ್ದ ಪ್ರಜ್ಞಾನಂದ.
ಅನ್ನ-ರಸಂ ಊಟ
ಪೋಷಕರು ಚೆಸ್ ಬೋರ್ಡ್ ತಂದುಕೊಟ್ಟರೂ, ಚೆಸ್ ಕಲಿಸಿದ್ದು ಮಾತ್ರ ಅವರ ಅಕ್ಕ ವೈಶಾಲಿ. ಆದರೆ, ಪ್ರಗ್ನಾನಂದ ಅವರ ಯಶಸ್ಸಿನ ಶ್ರೇಯಸ್ಸು ಅವರ ತಾಯಿ ನಾಗಲಕ್ಷ್ಮಿ ಅವರಿಗೆ ಸಲ್ಲುತ್ತದೆ. ಅವರೇ ಆತನನ್ನು ತರಗತಿಗಳಿಗೆ ಕರೆದೊಯ್ಯುತ್ತಿದ್ದರು. ಇಲ್ಲೊಂದು ವಿಶೇಷ ಗೊತ್ತಾ ವಿದೇಶಿ ಟೂರ್ನಿಗಳಿಗೆ ಪ್ರಯಾಣಿಸಿದಾಗ ಪ್ರಜ್ಞಾನಂದನ ಜೊತೆ ಅವರ ಅಮ್ಮ ಕಡ್ಡಾಯವಾಗಿ ಹೋಗುತ್ತಾರೆ. ಬರಿ ಹೋಗುವುದಷ್ಟೇ ಅಲ್ಲ, ಇಂಡಕ್ಷನ್ ಸ್ಟೌ ಮತ್ತು ರೈಸ್ ಕುಕ್ಕರ್, ಅಕ್ಕಿ, ರಸಂ ಪದಾರ್ಥಗಳನ್ನೂ ಸಹ ಒಯ್ಯುತ್ತಾರೆ.
ಯಾಕಂದರೆ ಪ್ರಜ್ಞಾನಂದ ಎಲ್ಲೇ ಹೋದರೂ, ಅವನಿಗೆ ಮನೆಯ ಊಟವೇ ಬೇಕು. ಇದೇ ಕಾರಣಕ್ಕಾಗಿ ಮಗನು ಭಾಗವಹಿಸುವ ಎಲ್ಲಾ ಟೂರ್ನಿಗಳಲ್ಲಿ ಆತನ ಆರೋಗ್ಯ ಕಾಪಾಡುವ ಮತ್ತು ಆತ್ಮ ವಿಶ್ವಾಸ ಹೆಚ್ಚಿಸುವುದರ ಜೊತೆಗೆ ಮನೆಯ ಊಟ ಸಿದ್ಧಪಡಿಸಿಕೊಡುತ್ತಾರೆ. ತಪ್ಪದೇ ಅನ್ನ ರಸಂ ಪ್ರಜ್ಞಾನಂದನಿಗೆ ಅಡುಗೆ ಮಾಡಿಕೊಡುತ್ತಾರೆ ನಾಗಲಕ್ಷ್ಮಿ. ಪ್ರಜ್ಞಾನಂದ ಅವರು ಮನೆಯಿಂದ ಸಾವಿರಾರು ಮೈಲುಗಳಷ್ಟು ದೂರದಲ್ಲಿದ್ದರೂ ಮನೆಯಲ್ಲಿ ಬೇಯಿಸಿದ ಆಹಾರವನ್ನು ಸೇವಿಸುತ್ತಾರೆ ಅಂದರೆ ಅವರ ಅಮ್ಮನೇ ಕಾರಣ.
ತಾಯಿಯ ಪರಿಶ್ರಮಕ್ಕೆ ಭಾರಿ ಮೆಚ್ಚುಗೆ
ಪ್ರಜ್ಞಾನಂದ ಅವರ ತಾಯಿ ನಾಗಲಕ್ಷ್ಮಿ ನಡೆಗೆ ಭಾರಿ ಮೆಚ್ಚುಗೆ ವ್ಯಕ್ತವಾಗಿದೆ. ತಾಯಿಯ ಪರಿಶ್ರಮಕ್ಕೆ ಕೆಲ ದಿನಗಳ ಹಿಂದೆ ಅನೇಕ ಕ್ರೀಡಾ ದಿಗ್ಗಜರೂ ಮೆಚ್ಚುಗೆ ವ್ಯಕ್ತಪಡಿಸಿದ್ದರು. ಈ ತಾಯಿ-ಮಗನ ಪ್ರೀತಿಯನ್ನು ಹೊಗಳಲು ಪದಗಳೇ ಸಿಗುತ್ತಿಲ್ಲ ಎಂದು ಹಲವರು ಹೇಳಿದ್ದೂ ಇದೆ. ನೆಟ್ಟಿಗರಿಂದಲೂ ಭಾರಿ ಪ್ರಶಂಸೆ ವ್ಯಕ್ತವಾಗಿತ್ತು. ಪ್ರತಿಯೊಬ್ಬರು ಪ್ರಜ್ಞಾನಂದನ ತಾಯಿ ಅವರನ್ನು ಶ್ಲಾಘಿಸಿದ್ದಾರೆ.
ಅಪಾರ ದೈವ ಭಕ್ತ
ಪ್ರಜ್ಞಾನಂದ ಪರಮ ದೈವ ಭಕ್ತ ಎನ್ನಲು ಆತನ ಹಣೆಯ ಮೇಲಿರುವ ವಿಭೂತಿಯೇ ಸಾಕ್ಷಿ. ಟೂರ್ನಿಯಲ್ಲಿ ಭಾರತದಲ್ಲೇ ಇರಲಿ, ವಿದೇಶದಲ್ಲೇ ಇರಲಿ ವಿಭೂತಿ ಹಚ್ಚಿಯೇ ಇರುತ್ತಾರೆ. ವಿಭೂತಿ ನನ್ನ ಹಣೆಯಲ್ಲಿದ್ದರೆ ನನಗೇನೋ ಒಂದು ಶಕ್ತಿ ಎಂದು ಹಿಂದೊಮ್ಮೆ ಹೇಳಿದ್ದರು. ತಮಿಳು ನಾಡಿನ ಈತ ಒಬ್ಬ ಮಧ್ಯಮ ವರ್ಗದ ಕುಟುಂಬಕ್ಕೆ ಸೇರಿದವರು. ಅವರ ತಂದೆ ಬ್ಯಾಂಕ್ ಉದ್ಯೋಗಿಯಾಗಿದ್ದರು. ಕಷ್ಟದ ದಿನಗಳಿಂದ ಬೆಳೆದ ಈತ ಇಂದು ಇಡೀ ವಿಶ್ವವೇ ತಿರುಗಿ ನೋಡುವಂತೆ ಮಾಡಿದ್ದಾರೆ.