ಮಾಧ್ಯಮ ಸಮಾಜದ ಒಂದು ಅಂಗ. ಸಮಾಜ ಸುಧಾರಣೆ ಕೇವಲ ಮಾಧ್ಯಮದ ಕೆಲಸ ಅಲ್ಲ. ಆದರೆ ಮಾಧ್ಯಮವನ್ನು ಒಂದು ಅತ್ಯಂತ ಪರಿಣಾಮಕಾರಿಯಾದ ಅಸ್ತ್ರವಾಗಿ ಬಳಸುವ ಅವಕಾಶ ಇದೆ. ನಾಲ್ಕನೆಯ ಅಂಗವೆಂದೇ ಕರೆಯಲಾಗುವ ಮಾಧ್ಯಮ ಇಂದು ಅದ್ಭುತ ತಾಂತ್ರಿಕ ಬೆಳವಣಿಗೆಯೊಂದಿಗೆ ಸಶಕ್ತವಾಗಿ ಮತ್ತು ವ್ಯಾಪಕವಾಗಿ ಬೆಳೆದುನಿಂತಿದೆ. ನಾವು ಮಾಧ್ಯಮದ ಜನ media persons ಯಾವರೀತಿ ಈ ಅಸ್ತ್ರ ವನ್ನು ಬಳಸುತ್ತೇವೆ ಎನ್ನುವುದು ಮುಖ್ಯ.
ಮಾಧ್ಯಮ ಕ್ಷೇತ್ರ ಆರೋಗ್ಯಕರವಾಗಿರಬೇಕಾದರೆ ಆರೋಗ್ಯಕರ ಸಮಾಜವೂ ಇರಬೇಕಾದ್ದಗತ್ಯ. ಅನಾರೋಗ್ಯಕರ ವಾತಾವರಣದಲ್ಲಿ ಆರೋಗ್ಯಕರ ಮಾಧ್ಯಮ ರೂಪುಗೊಳ್ಳುವದು ಸಾಧ್ಯವಿಲ್ಲ. ಇಂದು ಮಾಧ್ಯಮದ ಮೇಲೆ ಹಲವು ಬಗೆಯ ಒತ್ತಡಗಳಿವೆ. ಅನೆಕ ಸವಾಲುಗಳನ್ನು ಎದುರಿಸುತ್ತಲೇ ಪತ್ರಕರ್ತ ತನ್ನ ಕೆಲಸ ಮಾಡಬೇಕಾಗಿದೆ. ಮಾಧ್ಯಮದ ಜನರನ್ನು ಸ್ವಹಿತಾಸಕ್ತಿಗಾಗಿ ಬಳಸಿಕೊಳ್ಳುವ ಮತ್ತು ಸಾಧ್ಯವಾದರೆ ತಮ್ಮ ಹಿಡಿತಕ್ಕೆ ತೆಗೆದುಕೊಳ್ಳವ ಪ್ರಯತ್ನಗಳು ನಡೆಯುತ್ತಲೇ ಇರುತ್ತವೆ. ಇಂತಹ ಪ್ರತಿಕೂಲ ವಾತಾವರಣದ ನಡುವೆಯೇ ಕರ್ತವ್ಯ ನಿರ್ವಹಿಸಬೇಕಾದ ಪತ್ರಕರ್ತ ತನ್ನ ಬದುಕನ್ನೂ ಸುರಕ್ಷಿತವಾಗಿರಿಸಿಕೊಳ್ಳಬೇಕಾದ ಅನಿವಾರ್ಯತೆಯಿದೆ.
ಅಷ್ಟಾಗಿಯೂ ಪತ್ರಕರ್ತ ತನ್ನ ಕೆಲ ಜವಾಬ್ದಾರಿಗಳಿಂದ ನುಣುಚಿಕೊಳ್ಳಲು ಬರುವದಿಲ್ಲ. ಸಾಮಾಜಿಕ ಬದ್ಧತೆ ಮತ್ತು ಸಾಮಾಜಿಕ ಹೊಣೆಗಾರಿಕೆಯೊಂದಿಗೇ ಆತ ಕೆಲಸ ಮಾಡಬೇಕಾಗಿದೆ. ಅದರೊಂದಿಗೇ ಪತ್ರಕರ್ತನಿಗೆ ಸ್ವಯಂ ಆಚಾರ ಸಂಹಿತೆಯೂ ಇರಬೇಕಾಗುತ್ತದೆ. ಮಾಧ್ಯಮ ಕ್ಷೇತ್ರಕ್ಕೆ ಕಾಲಿಟ್ಟ ತಕ್ಷಣ ತಾವು ಎಲ್ಲವನ್ನೂ ಬಲ್ಲವರು, ಎಲ್ಲದರ ಬಗ್ಗೆಯೂ ತಾವು ತೀರ್ಪು ನೀಡಬಲ್ಲವರು ಎಂದು ಭಾವಿಸಿಕೊಳ್ಳುವವರಿಗೇನು ಇಂದು ಬರಗಾಲವಿಲ್ಲ. ಈ ಸ್ವೇಚ್ಛಾ ಮನೋಭಾವ ಮಾಧ್ಯಮದ ಕುರಿತಾಗಿಯೇ ಕೆಟ್ಟ ಭಾವನೆ ಉಂಟಾಗಲು ಕಾರಣವಾಗಬಹುದು. ಕೆಲ ಮಟ್ಟಿಗೆ ಆಗಿದೆ ಕೂಡಾ.
ಶಕ್ತಿಯುತವಾದ ಇಲೆಕ್ಟ್ರಾನಿಕ್ ಮೀಡಿಯಾವನ್ನು ನಾವಿಂದು ಜನರಲ್ಲಿ , ವಿಶೇಷವಾಗಿ ಮಕ್ಕಳಲ್ಲಿ ವೈಜ್ಞಾನಿಕ ಮನೋಭಾವ ಬೆಳೆಸುವದಕ್ಕೆ ಬಳಸಿಕೊಳ್ಳಬೇಕಾಗಿದೆ. ಬೇಸರದ ಸಂಗತಿ ಎಂದರೆ ಟಿವಿ ಚಾನೆಲ್ ಗಳು ಇಂದು ಮೂಢನಂಬಿಕೆಗಳನ್ನು ಬೆಳೆಸುವಂತಹ ಕಾರ್ಯಕ್ರಮಗಳನ್ನು ಪ್ರಸಾರ ಮಾಡುತ್ತಿವೆ. ಕುಟುಂಬದಲ್ಲಿ ವಿಷಬೀಜ ಬಿತ್ತುವ, ಮನೆಹಾಳು ಮಾಡುವ ವಸ್ತು ವಿಷಯಗಳನ್ನೊಳಗೊಂಡ ಧಾರಾವಾಹಿಗಳ ಮೂಲಕ ಇವು ಸಮಾಜದ ವಾತಾವರಣ ಹದಗೆಡಿಸುವ ಕೆಲಸ ಮಾಡುತ್ತಿವೆ. ಇವನ್ನೆಲ್ಲ ಸಮರ್ಥಿಸಿಕೊಳ್ಳುವದು ಹೇಗೆ ಸಾಧ್ಯ?
ಪತ್ರಿಕಾರಂಗದ ಆರಂಭದ ಕಾಲದಲ್ಲಿ ಯಾರು ಬೇಕಾದವರು ಅಂದರೆ ಬರೆಯಲು ಬಾರದವರೂ ಪತ್ರಿಕೆ ಹೊರತರುತ್ತಿರಲಿಲ್ಲ. ಕನ್ನಡ ಪಂಡಿತರು, ಹಿರಿಯ ಸಾಹಿತಿ ಶಿಕ್ಷಕರು ಪತ್ರಿಕಾ ಸಂಪಾದಕರಾಗಿರುತ್ತಿದ್ದರು. ಅಲ್ಲದೇ ಸಮಾಜಕ್ಕೆ ನೀತಿ, ಜ್ಞಾನ, ಸದ್ಧರ್ಮ ಸದಾಚಾರಗಳ ಸಂದೇಶ ನೀಡುವದೇ ಪತ್ರಿಕೆಗಳ ಉದ್ದೇಶ ಎಂಬ ಭಾವನೆ ಇತ್ತು. ಆದರೆ ಇಂದು ಅದೊಂದು ಉದ್ಯಮಸ್ವರೂಪ ತಾಳಿರುವದರಿಂದ ಲಾಭನಷ್ಟದ ಲೆಕ್ಕಾಚಾರ ಮುಖ್ಯವಾಗಿದೆ. ತಾಂತ್ರಿಕವಾಗಿ ಎಷ್ಟೇ ಬೆಳವಣಿಗೆ ಸಾಧಿಸಿದರೂ ತಾತ್ವಿಕ, ನೈತಿಕ, ಮತ್ತು ಸಾಂಸ್ಕೃತಿಕ ಅಂಶಗಳನ್ನು ಕಡೆಗಣಿಸಿದರೆ ಅದು ನಿಜವಾದ ಬೆಳವಣಿಗೆ ಎನ್ನಲಾಗದು. ಆದ್ದರಿಂದ ಮಾಧ್ಯಮ ತಾನು ಮೊದಲು ಆರೋಗ್ಯಕರವಾದ ರೀತಿಯಲ್ಲಿ ಬೆಳೆದು ಸಮಾಜವನ್ನೂ ಆರೋಗ್ಯಕರವಾಗಿ ಬೆಳೆಸುವ ಕೆಲಸದಲ್ಲಿ ತನ್ನ ವಿಶೇಷ ಕೊಡುಗೆಯನ್ನು ನೀಡಲಿ ಎಂದು ಆಶಿಸಬೇಕಾಗಿದೆ