ಬೀದಿಬದಿಯ ಆಹಾರ ಅನಾರೋಗ್ಯಕರ ಎಂದು ಭಾವಿಸಿರುತ್ತೇವೆ. ಸಹಜವಾಗಿ ಆಹಾರ ಎಲ್ಲಿಯೇ ಮಾರಾಟ ಮಾಡುತ್ತಿದ್ದರೂ, ಶುಚಿತ್ವದತ್ತ ವಿಶೇಷ ಗಮನ ನೀಡಬೇಕು. ಆದರೆ ಮಳೆಗಾಲದಲ್ಲಿ ಬೀದಿಯಲ್ಲಿ ಜೋಳದ ಅಂಗಡಿ ಕಂಡರೆ ಎಂತಹವರೇ ಆದರೂ ಮತ್ತೊಂದು ಯೋಚನೆ ಮಾಡದೇ ಬಿಸಿ ಬಿಸಿ ಜೋಳವನ್ನು ತಿನ್ನುತ್ತಾರೆ. ನಿಜಕ್ಕೂ ಬೀದಿ ಬದಿ ಸಿಗುವ ಆಹಾರ ಸೇವಿಸುವುದರಿಂದ ಆರೋಗ್ಯ ಹದಗೆಡುವ ಸಾಧ್ಯತೆಯೇ ಹೆಚ್ಚು. ಆದರೆ ಮಳೆಗಾಲದಲ್ಲಿ ರಸ್ತೆಯಲ್ಲಿ ಗಾಡಿ ಮೇಲೆ ಮಾರುವ ಸುಟ್ಟ ಜೋಳ ತಿನ್ನುವುದರಿಂದ ಎಷ್ಟೆಲ್ಲಾ ಆರೋಗ್ಯ ಲಾಭಗಳಿದೆ ಎಂದು ತಿಳಿದರೆ ನೀವು ಕೂಡ ಅದನ್ನು ಸೇವಿಸಲು ಮುಂದಾಗುತ್ತೀರಾ.
ಮಳೆಗಾಲದಲ್ಲಿ ಸುಟ್ಟ ಮೆಕ್ಕೆಜೋಳ ತಿನ್ನುವುದರಿಂದ ಸಿಗುವ ಆರೋಗ್ಯ ಲಾಭ ತಿಳಿದುಕೊಂಡರೆ, ನೀವು ಪ್ರತಿದಿನ ಸೇವಿಸಲು ಆರಂಭಿಸುತ್ತೀರಿ. ಹಾಗಂತ ಬೀದಿ ಬದಿಯಲ್ಲಿ ಸಿಗುವ ಜೋಳವನ್ನು ಮಾತ್ರ ತಿನ್ನಬೇಕು ಅಂತನಿಲ್ಲ. ಬೇಕಾದರೆ ಮನೆಯಲ್ಲಿಯೇ ನೀವು ಜೋಳವನ್ನು ಸುಟ್ಟು ಕೂಡ ತಿನ್ನಬಹುದು.
ಏಕೆಂದರೆ ಸುಟ್ಟ ಮೆಕ್ಕೆಜೋಳ ನಿಮ್ಮನ್ನು ಮಳೆಗಾಲದಲ್ಲಿ ವಿವಿಧ ರೀತಿಯ ವೈರಸ್ಗಳು ಮತ್ತು ಬ್ಯಾಕ್ಟೀರಿಯಾಗಳಿಂದ ರಕ್ಷಿಸುತ್ತದೆ.ಇದು ನಿಮ್ಮನ್ನು ವಿವಿಧ ರೋಗಾಣುಗಳ ದಾಳಿಯಿಂದ ಕಾಪಾಡುತ್ತದೆ. ಏಕೆಂದರೆ ಮೆಕ್ಕೆ ಜೋಳದಲ್ಲಿ ವಿಟಮಿನ್ ಬಿ1, ಬಿ5 ಮತ್ತು ವಿಟಮಿನ್ ಸಿ ಸಮೃದ್ಧವಾಗಿದೆ.
ಸಾಮಾನ್ಯವಾಗಿ ಮಳೆ ನೀರಿನಲ್ಲಿ ಆಮ್ಲ ತುಂಬಿರುತ್ತದೆ. ಮಳೆಯ ನೀರಿನಲ್ಲಿ ನೆನೆದರೆ ಚರ್ಮಕ್ಕೆ ಹಾನಿಯಾಗುವ ಸಾಧ್ಯತೆ ಹೆಚ್ಚು. ಹಾಗಾಗಿ ಈ ಹಾನಿಯನ್ನು ತಡೆಗಟ್ಟಲು ಸುಟ್ಟ ಮೆಕ್ಕೆಜೋಳ ತಿನ್ನಿ. ಏಕೆಂದರೆ ಇದರಲ್ಲಿ ವಿಟಮಿನ್ ಸಿ ಇದ್ದು, ಚರ್ಮದ ಕಾಯಿಲೆಯನ್ನು ದೂರಗೊಳಿಸುತ್ತದೆ.
ಜೋಳದಲ್ಲಿ ಬಹಳಷ್ಟು ವಿಟಮಿನ್ ಎ ಮತ್ತು ಸಿ ಹೇರಳವಾಗಿರುತ್ತದೆ. ಆದ್ದರಿಂದ ಕಣ್ಣಿನ ಆರೋಗ್ಯದ ಬಗ್ಗೆ ಕಾಳಜಿವಹಿಸುವವರು ಮಳೆಗಾಲದಲ್ಲಿ ಸುಟ್ಟ ಜೋಳವನ್ನು ತಿನ್ನುವುದು ತುಂಬಾ ಉತ್ತಮ. ಮತ್ತು ಮಾನ್ಸೂನ್ನಲ್ಲಿ ಕೂದಲು ಪದೇ ಪದೇ ಸಿಕ್ಕಾಗುತ್ತದೆ. ಜೊತೆಗೆ ಒರಟಾಗುತ್ತದೆ. ಇಂತಹ ಪರಿಸ್ಥಿತಿಯಲ್ಲಿ ನೀವು ಮೆಕ್ಕೆ ಜೋಳ ತಿನ್ನುವ ಮೂಲಕ ಇದರ ಪ್ರಯೋಜನಗಳನ್ನು ಪಡೆಯಬಹುದು. ಜೋಳ ತಿನ್ನುವುದರಿಂದ ಕೂದಲು ತೇವಾಂಶದಿಂದ ಕೂಡಿರುತ್ತದೆ. ಇದು ಕೂದಲಿನ ಬೆಳವಣಿಗೆಗೆ ಸಹಾಯ ಮಾಡುತ್ತದೆ ಎನ್ನುವುದನ್ನು ಮರೆಯಬಾರದು. ಅಲ್ಲದೆ ಜೋಳ ಪೌಷ್ಟಿಕಾಂಶದಿಂದ ಕೂಡಿದ್ದು ಅದು ತೂಕವಿಳಿಸಲು ಕೂಡ ಸಹಾಯ ಮಾಡುತ್ತದೆ ಆದ್ದರಿಂದ ಮಳೆಗಾಲದಲ್ಲಿ ಬೋರ್ ಆಗುವಾಗ ಸಮಯವನ್ನು ಕಳೆಯಲು ಈ ಸುಟ್ಟ ಮೆಕ್ಕೆಜೋಳವನ್ನು ತಿನ್ನುವುದು ತುಂಬಾ ಆರೋಗ್ಯಕರವಾಗಿರುತ್ತದೆ.