ಇಂದಿನ ಜನರೇಶನ್ನಲ್ಲಿ ಗ್ಯಾಸ್ಟ್ರಿಕ್ ಅನ್ನೋದು ಸರ್ವೇಸಾಮಾನ್ಯವಾಗಿ ಬಿಟ್ಟಿದೆ. ಯಾರನ್ನು ಕೇಳಿದರೂ ಕೂಡ ನನಗೆ ಗ್ಯಾಸ್ಟ್ರಿಕ್ ಸಮಸ್ಯೆ ಇದೆ ಎಂದು ಹೇಳಿಕೊಳ್ಳುತ್ತಾರೆ. ಹಾಗೆ ಹೇಳಿದಾಗ ಮನೆಯಲ್ಲಿ ಯಾರಾದರೂ ಜೀರ್ಣ ವ್ಯವಸ್ಥೆ ಸಮಸ್ಯೆಯಾದರೆ ಇಂಗು ಮಾತ್ರೆ ಸೇವಿಸಲು ಸಲಹೆ ನೀಡುವುದು ರೂಢಿ. ಇಂಗು ಸೇವನೆಯು ಜೀರ್ಣಕ್ರಿಯೆಯನ್ನು ಆರೋಗ್ಯವಾಗಿರಿಸುತ್ತದೆ.
ಎಲ್ಲರ ಮನೆಯಲ್ಲಿಯು ಇಂಗು ಅಡುಗೆಗೆ ಬಳಸುವ ಬಗ್ಗೆ ನಿಮಗೆ ಗೊತ್ತಿದೆ. ಇಂಗು ಇಲ್ಲದೆ ಮಾಡುವ ಕೆಲವು ಖಾದ್ಯಗಳು ಅಪೂರ್ಣವೆನ್ನಿಸುತ್ತವೆ. ಇಂಗು ಅಡುಗೆಗೆ ಸುವಾಸನೆ, ಪರಿಮಳ ಮತ್ತು ರುಚಿ ಜೊತೆಗೆ ಆರೋಗ್ಯ ಪ್ರಯೋಜನ ಸಹ ನೀಡುತ್ತದೆ.
ಇಂಗು ಸೇವನೆ ಜೀರ್ಣಾಂಗ ವ್ಯವಸ್ಥೆಯನ್ನು ಚೆನ್ನಾಗಿಡುತ್ತದೆ. ಜೀರ್ಣಕಾರಿ ಕಿಣ್ವಗಳ ಚಟುವಟಿಕೆಯನ್ನು ಉತ್ತೇಜಿಸುತ್ತದೆ. ಜೀರ್ಣಾಂಗ ವ್ಯವಸ್ಥೆಯು ಸಕ್ರಿಯವಾಗಿರಲು ಸಹಾಯ ಮಾಡುತ್ತದೆ. ಅಲ್ಲದೆ ಇದರಿಂದ ಪಿತ್ತರಸದ ಉತ್ಪಾದನೆ ಹೆಚ್ಚಿಸುತ್ತದೆ, ಆಸಿಡ್ ರಿಫ್ಲಕ್ಸ್ ಸಮಸ್ಯೆ ಕಡಿಮೆ ಮಾಡುತ್ತದೆ. ರಕ್ತದ ಸಕ್ಕರೆ ಮಟ್ಟ ಸಾಮಾನ್ಯವಾಗಿರಿಸುತ್ತದೆ.
ಇಂಗು ಫೀನಾಲಿಕ್ ಆಮ್ಲ ಮತ್ತು ಟ್ಯಾನಿನ್ ಹೊಂದಿದೆ. ಇದು ಮಧುಮೇಹ ರೋಗಿಗಳ ದೇಹದಲ್ಲಿ ರಕ್ತದ ಸಕ್ಕರೆಯ ಮಟ್ಟ ಸಾಮಾನ್ಯ ಸ್ಥಿತಿಯಲ್ಲಿಡುತ್ತದೆ. ಕಫಾ ಮತ್ತು ನೋಯುತ್ತಿರುವ ಗಂಟಲು ಸಮಸ್ಯೆ ಕಡಿಮೆ ಮಾಡುತ್ತದೆ. ಹೊಟ್ಟೆ ನೋವು, ಅಸ್ವಸ್ಥತೆ, ಉಬ್ಬುವುದು ಮತ್ತು ಅಜೀರ್ಣ,ಗ್ಯಾಸ್ಟ್ರಿಕ್, ಮಲಬದ್ಧತೆ, ಅತಿಸಾರವನ್ನು ಇಂಗು ಸೇವನೆ ಕಡಿಮೆ ಮಾಡುತ್ತದೆ.
ಇಂಗು ಮಾತ್ರೆ ತಯಾರಿಕೆ ಮನೆಯಲ್ಲಿ ಮಾಡಿಟ್ಟುಕೊಂಡರೆ ಅದನ್ನು ಬೇಕಾದಾಗ ಉಪಯೋಗಿಸಿ ಕೆಲವು ಸಮಸ್ಯೆಗಳನ್ನು ತಡೆಗಟ್ಟಬಹುದು.
ಇದಕ್ಕೆ ಬೇಕಾಗುವ ಸಾಮಗ್ರಿಗಳು:
ಜೀರಿಗೆ ಪುಡಿ, ಒಣ ಮಾವಿನ ಪುಡಿ, ನಿಂಬೆ ರಸ, ಇಂಗು, ಕಪ್ಪು ಉಪ್ಪು, ಕರಿಮೆಣಸಿನ ಪುಡಿ, ಅಜ್ವೈನ್, ಸಕ್ಕರೆ ಬೇಕು.
ಇಂಗು ಮಾತ್ರೆ ತಯಾರಿಸುವ ವಿಧಾನ:
ಮೊದಲು ಒಂದು ಪಾತ್ರೆಯಲ್ಲಿ ಜೀರಿಗೆ ಪುಡಿ ಹಾಕಿ. ನಂತರ ಅದಕ್ಕೆ ಇಂಗು ಸೇರಿಸಿ. ನಂತರ ಕರಿಮೆಣಸಿನ ಪುಡಿ, ಕಪ್ಪು ಉಪ್ಪು ಮತ್ತು ಮಾವಿನಕಾಯಿ ಪುಡಿ ಸೇರಿಸಿ. ಬೇಕೆನ್ನಿಸಿದರೆ ಸಕ್ಕರೆ ಪುಡಿ ಸೇರಿಸಬಹುದು. ಎಲ್ಲವನ್ನೂ ಮಿಕ್ಸ್ ಮಾಡಿ. ಅದಕ್ಕೆ ನಿಂಬೆ ರಸ ಸೇರಿಸಿ, ನೀರನ್ನು ಸೇರಿಸಿ ಚೆನ್ನಾಗಿ ಮಿಕ್ಸ್ ಮಾಡಿ. ನಂತರ ಚಿಕ್ಕ ಚಿಕ್ಕ ಉಂಡೆ ತಯಾರಿಸಿ. ಈಗ ಇಂಗು ಗೋಲಿ ಸಿದ್ಧವಾಗಿದೆ. ಇದನ್ನು ಡಬ್ಬದಲ್ಲಿ ಸಂಗ್ರಹಿಸಿಟುಕೊಂಡು ಅಜೀರ್ಣ,ಗ್ಯಾಸ್ಟ್ರಿಕ್ ಸಮಸ್ಯೆ ಎನಿಸಿದಾಗ ಇದನ್ನು ಬಾಯಲ್ಲಿ ಹಾಕಿಕೊಂಡರೆ ನಿಮ್ಮ ಸಮಸ್ಯೆಯಿಂದ ಹೊರ ಬರಬಹುದು.