ಇನ್ಫೋಸಿಸ್ ಫೌಂಡೇಶನ್ ಅಧ್ಯಕ್ಷೆ, ಲೇಖಕಿ, ಸಮಾಜಸೇವಕಿಯಾಗಿರುವ ಸುಧಾ ಮೂರ್ತಿಯವರು ಮಾಂಸಾಹಾರದ ಕುರಿತು ನೀಡಿರುವ ಹೇಳಿಕೆ ಕುರಿತು ಸಾಮಾಜಿಕ ಜಾಲತಾಣದಲ್ಲಿ ಪರ ವಿರೋಧ ಚರ್ಚೆಗಳು ನಡೆಯುತ್ತಿದೆ. ಶುದ್ಧ ಸಸ್ಯಾಹಾರಿಯಾಗಿರುವ ತಾವು ವಿದೇಶಕ್ಕೆ ತೆರಳಿದಾಗ ಸಸ್ಯಾಹಾರಿ ಹೋಟೆಲ್ಗಳನ್ನೇ ಹುಡುಕುವುದಾಗಿ ತಿಳಿಸಿದ್ದರು ಇದು ಇದು ಆಹಾರ ಕ್ರಮದ ಕುರಿತಾದ ಚರ್ಚೆ ಹುಟ್ಟುಹಾಕಿದೆ.
ಸುಧಾ ಮೂರ್ತಿಯವರು ಇತ್ತೀಚೆಗೆ ಟಿವಿ ನಿರೂಪಕ ಕುನಲ್ ವಿಜಯಕುಮಾರ್ ಅವರ ‘ಖಾನೆ ಮೇ ಕೌನ್ ಹೈ’ (ತಿನ್ನುವುದರಲ್ಲಿ ಏನಿದೆ?) ಎಂಬ ಶೋ ಕಾರ್ಯಕ್ರಮದಲ್ಲಿ ಭಾಗವಹಿಸಿದ್ದರು. ಅದರಲ್ಲಿ ಅವರು ಮಾತನಾಡುತ್ತಾ ‘ನಾನು ಮಾಡುವ ಕೆಲಸದಲ್ಲಿ ಹೊಸದನ್ನು, ಸಾಹಸವನ್ನು ಹುಡುಕಲು ಪ್ರಯತ್ನಿಸುತ್ತಿರುತ್ತೇನೆ, ಆದರೆ ತಿನ್ನುವ ಆಹಾರದಲ್ಲಲ್ಲ. ನಾನು ಹೊರದೇಶಕ್ಕೆ ಹೋಗುವಾಗಲೆಲ್ಲ ಆಹಾರದ ಬ್ಯಾಗ್ ಮತ್ತು ಅಡುಗೆಗೆ ಬೇಕಾದ ಸರಳ ಸುಲಭ ವಸ್ತುಗಳನ್ನು ತೆಗೆದುಕೊಂಡು ಹೋಗುತ್ತೇನೆ. ನಾನು ಶುದ್ಧ ಸಸ್ಯಾಹಾರಿ, ಮೊಟ್ಟೆ, ಈರುಳ್ಳಿ, ಬೆಳ್ಳುಳ್ಳಿ ಕೂಡ ಸೇವಿಸುವುದಿಲ್ಲ. ಹೊರಗೆ ಹೋದರೆ ಶುದ್ಧ ಸಸ್ಯಾಹಾರಿ ಹೊಟೇಲ್ ನ್ನು ಹುಡುಕುತ್ತೇನೆ, ಸಸ್ಯಾಹಾರಿ ಮತ್ತು ಮಾಂಸಾಹಾರಿ ಅಡುಗೆಗಳಿಗೆ ಒಂದೇ ಸ್ಪೂನ್ ಬಳಸಿದರೆ ಎಂಬ ಆತಂಕ ನನಗೆ, ಹೀಗಾಗಿ ವಿದೇಶಕ್ಕೆ ಹೋಗುವಾಗ ಸ್ಪೂನ್ ಕೂಡ ಜೊತೆಗೆ ಒಯ್ಯುತ್ತೇನೆ, ರವೆ ಹುರಿದು ಕೊಂಡೊಯ್ಯುತ್ತೇನೆ, ಬಿಸಿನೀರು ಜೊತೆಗೆ ತೆಗೆದುಕೊಂಡು ಹೋಗುತ್ತೇನೆ ಎಂದು ಹೇಳಿರುವ ಮಾತು ಇದೀಗ ಟ್ರೋಲ್ ಆಗುತ್ತಿದೆ.
ಸುಧಾಮೂರ್ತಿ ವಿರುದ್ಧ ಟೀಕೆ:
ಸುಧಾ ಮೂರ್ತಿಯವರು ಮಾಂಸಾಹಾರವನ್ನು ಕೀಳಾಗಿ ಕಂಡಿದ್ದಾರೆ ಎಂಬ ಅಭಿಪ್ರಾಯ ವ್ಯಕ್ತವಾಗಿದೆ. ಆಹಾರದ ಹಕ್ಕನ್ನು ಅವರು ಅವಮಾನಿಸಿದ್ದಾರೆ ಎಂದೂ ದೂರಲಾಗಿದೆ. ಆದರೆ ಇನ್ನು ಅನೇಕರು ಸುಧಾಮೂರ್ತಿ ಅವರ ಅಭಿಪ್ರಾಯ ಸಹಜ ಮತ್ತು ಸಾಮಾನ್ಯವಾಗಿದೆ. ಅದಕ್ಕೆ ಬೇರೆ ಅರ್ಥಗಳನ್ನು ಕಲ್ಪಿಸುವ ಮೂಲಕ ವಿನಾಕಾರಣ ವಿವಾದ ಸೃಷ್ಟಿಸಲಾಗುತ್ತಿದೆ ಎಂದು ಅನೇಕರು ಅವರ ಪರ ವಾದಿಸಿದ್ದಾರೆ. ಇನ್ನು ಕೆಲವರು ಆಹಾರ, ಸ್ಪೂನ್ ಮಾತ್ರ ಏಕೆ ತೆಗೆದುಕೊಂಡು ಹೋಗುತ್ತಾರೆ, ಬೇಕಾದರೆ ಮನೆಯಿಂದ ಕುರ್ಚಿ, ಮೇಜು, ಬೆಡ್ ನ್ನು ತೆಗೆದುಕೊಂಡು ಹೋಗಲಿ, ಬೇರೆಯವರು ಬಳಸಿದ ವಸ್ತುಗಳು ಅವರಿಗೆ ಅಪಥ್ಯವಾಗುತ್ತದೆಯಲ್ಲವೇ ಎಂದು ಹಲವರು ಟೀಕೆ ಮಾಡಿದರೆ ಇನ್ನು ಕೆಲವರು ಸುಧಾಮೂರ್ತಿಯವರು ತಮ್ಮ ಮನೆಯನ್ನೇ ವಿದೇಶಕ್ಕೆ ಹೋಗುವಾಗ ಒಯ್ಯುತ್ತಾರೇನೋ ಎಂದು ಟೀಕಿಸಿದ್ದಾರೆ. ಮಾಂಸಾಹಾರಿಗಳು ಉಸಿರಾಡಿ ಬಿಟ್ಟ ಗಾಳಿಯನ್ನು ಅವರು ಉಸಿರಾಡುವುದಿಲ್ಲವೇ? ಎಂದು ಪ್ರಶ್ನಿಸಿದ್ದಾರೆ. ಸುಧಾಮೂರ್ತಿ ಅವರನ್ನು ಟೀಕಿಸುತ್ತಿರುವವರು, ಅವರ ಅಳಿಯ ಹಾಗೂ ಬ್ರಿಟನ್ ಪ್ರಧಾನಿ ರಿಷಿ ಸುನಕ್ ಅವರನ್ನೂ ಚರ್ಚೆಯಲ್ಲಿ ಎಳೆದು ತಂದಿದ್ದಾರೆ. ಕೆಲವು ಸಮಯದ ಹಿಂದೆ ರಿಷಿ ಸುನಕ್ ಅವರು ಮಾಂಸಾಹಾರವನ್ನು ತಟ್ಟೆಗಳಲ್ಲಿ ಹಿಡಿದುಕೊಂಡಿರುವ ಫೋಟೋ ವೈರಲ್ ಆಗಿತ್ತು. ಅಳಿಯನ ಮನೆಗೆ ಹೋದಾಗ ಸುಧಾಮೂರ್ತಿ ಅವರು ಊಟ ಮಾಡುವುದಿಲ್ಲವೇ ಎಂದು ಪ್ರಶ್ನಿಸಿದ್ದಾರೆ.
ಸುಧಾಮೂರ್ತಿ ಪರ ವಾದ:
ಸಾಮಾಜಿಕ ಜಾಲತಾಣದಲ್ಲಿ ಕೆಲವರು ಸುಧಾಮೂರ್ತಿ ಪರ ಬ್ಯಾಟಿಂಗ್ ಮಾಡಿದ್ದು, ಆಹಾರದ ಹಕ್ಕು ಸಸ್ಯಾಹಾರಿಗಳಿಗೆ ಇಲ್ಲವೇ ಎಂದು ಮರು ಪ್ರಶ್ನೆ ಹಾಕಿದ್ದಾರೆ. ಮಾಂಸಾಹಾರ ಸೇವನೆ ಹೇಗೆ ಜನರ ಹಕ್ಕು ಆಗುತ್ತದೆಯೋ, ಮಾಂಸಾಹಾರದಿಂದ ಸಂಪೂರ್ಣ ದೂರ ಇದ್ದು, ತಮಗೆ ಬೇಕಾದ ಆಹಾರ ಸೇವನೆ ಮಾಡುವುದು ಕೂಡ ಹಕ್ಕು. ಸುಧಾಮೂರ್ತಿ ಅವರ ಸಸ್ಯಾಹಾರದ ಪಾಲನೆಯನ್ನು ಅಣಕಿಸುವುದು ಕೀಳುಮಟ್ಟದ ಮನಸ್ಥಿತಿ ಎಂದು ವಾಗ್ದಾಳಿ ನಡೆಸಿದ್ದಾರೆ. ಮಾಂಸಾಹಾರಿಗಳಿಗೆ ಸಸ್ಯಾಹಾರಿಗಳ ಬಗ್ಗೆ ಅಸಹನೆ ಏಕೆ? ಸಸ್ಯಾಹಾರ ಮಾತ್ರ ಸೇವಿಸುವುದು ಎಂಬ ಹೇಳಿಕೆ ಕಾರಣಕ್ಕೆ ಅವರ ಆಯ್ಕೆಯನ್ನು ಟೀಕಿಸುವ ಅಧಿಕಾರ ಯಾರಿಗಿದೆ? ಎಂದು ಕೇಳಿದ್ದಾರೆ. ಅನೇಕ ಭಾರತೀಯರು ವಿದೇಶಕ್ಕೆ ಪ್ರಯಾಣಿಸುವಾಗ ಆಹಾರವನ್ನು ಪ್ಯಾಕ್ ಮಾಡಿಕೊಳ್ಳುತ್ತಾರೆ. ಆಹಾರ ಒಂದು ಆಯ್ಕೆ. ಸುಧಾಮೂರ್ತಿ ಅವರು ನಮ್ಮ ಮನೆಗಳಲ್ಲಿ ಮಾತನಾಡುವ ಬೇರೆ ಯಾವುದೇ ಹಿರಿಯ ಮಹಿಳೆಯಂತೆಯೇ ಇದ್ದಾರೆ ಎಂದು ಒಬ್ಬರು ಹೇಳಿದ್ದಾರೆ.