ಬಂಡೀಪುರ ರಾಷ್ಟ್ರೀಯ ಉದ್ಯಾನ ಸ್ಥಾಪನೆಯಾಗಿ 50 ವರ್ಷ ಪೂರೈಸುತ್ತಿರುವ ಹಿನ್ನೆಲೆಯಲ್ಲಿಸುವರ್ಣ ಮಹೋತ್ಸವ ಅಂಗವಾಗಿ ಅರಣ್ಯ ಇಲಾಖೆ ‘ಬಂಡೀಪುರ ಯುವ ಮಿತ್ರ’ ಯೋಜನೆ’ ಯನ್ನು ಜಾರಿಗೆ ತಂದಿದೆ.
“ಬಂಡೀಪುರ ಯುವ ಮಿತ್ರ” ಯೋಜನೆಯಡಿ ಪ್ರತಿ ಸೋಮವಾರದಿಂದ ಶುಕ್ರವಾರದವರೆಗೆ ಸರ್ಕಾರಿ ಶಾಲೆಗಳ ವಿದ್ಯಾರ್ಥಿಗಳಿಗೆ ಪ್ರಕೃತಿ ಶಿಕ್ಷಣ ನೀಡುವ ಸಲುವಾಗಿ ಉಚಿತ ಸಫಾರಿ ಆಯೋಜಿಸಲಾಗಿದೆ. ವಿದ್ಯಾರ್ಥಿ ದೆಸೆಯಿಂದಲೇ ಪರಿಸರ ಹಾಗೂ ವನ್ಯಜಿವಿಗಳ ಬಗ್ಗೆ ಪ್ರೀತಿ ಮೂಡುವಂತೆ ಮಾಡಲು ಅರಣ್ಯ ಇಲಾಖೆ ಯೋಜನೆ ರೂಪಿಸಿದ್ದು, ಇದಕ್ಕಾಗಿ ತಲಾ 26 ಲಕ್ಷ ರೂ. ವೆಚ್ಚದಲ್ಲಿ 30 ಆಸನ ಸಾಮರ್ಥ್ಯದ ಎರಡು ಬಸ್ಗಳನ್ನು ವ್ಯವಸ್ಥೆ ಮಾಡಲಾಗಿದೆ.
ಭಾರತದಲ್ಲಿಯೇ ಇದೇ ಮೊದಲ ಬಾರಿಗೆ ಇಂತಹ ಯೋಜನೆ ಜಾರಿಗೆ ತಂದಿರುವ ಹೆಗ್ಗಳಿಕೆಗೆ ಬಂಡೀಪುರದ ಅರಣ್ಯ ಅಧಿಕಾರಿಗಳು ಪಾತ್ರರಾಗಿದ್ದಾರೆ. ಈಗಾಗಲೇ ನೂರಾರು ಸಂಖ್ಯೆಯಲ್ಲಿ ವಿದ್ಯಾರ್ಥಿಗಳಿಗೆ ಅರಿವು ಮೂಡಿಸುವ ಜೊತೆಗೆ ಕಾಡಿನ ದರ್ಶನ ಮಾಡಿಸಲಾಗಿದೆ. ಮೊದಲ ಹಂತದಲ್ಲಿ ಬಂಡೀಪುರ ಸುತ್ತಮುತ್ತ ಇರುವ ಶಾಲೆಗಳ ಮಕ್ಕಳಿಗೆ ಉಚಿತವಾಗಿ ಸಫಾರಿ ವ್ಯವಸ್ಥೆ ಕಲ್ಪಿಸಿ, ನಂತರ ಕಾಡಿನ ಬಗ್ಗೆ ಅರಿವು, ಬಂಡೀಪುರದ ಮಹತ್ವ, ಮಾನವ ಮತ್ತು ಕಾಡು ಪ್ರಾಣಿಗಳ ಸಂಘರ್ಷಗಳ ಬಗ್ಗೆ ಮಾಹಿತಿ ಹಾಗೂ ಅರಣ್ಯ ಸಂಬಂಧಿತ ವಿಚಾರಗಳನ್ನು ಮಕ್ಕಳಿಗೆ ತಿಳಿಹೇಳುವ ಕೆಲಸ ಮಾಡಲಾಗುತ್ತಿದೆ. ಯುವಪೀಳಿಗೆಗೆ ವನ್ಯ ಸಂಪತ್ತು ಸಂರಕ್ಷಣೆಯ ಬಗ್ಗೆ ಕಾಳಜಿ ಮೂಡಿಸುವ ಸಲುವಾಗಿ ಅರಣ್ಯ ಇಲಾಖೆ ಕೈಗೊಂಡಿರುವ ಇಂತಹ ಮಹತ್ವದ ಕಾರ್ಯಕ್ಕೆ ಎಲ್ಲೆಡೆ ಮೆಚ್ಚುಗೆ ವ್ಯಕ್ತವಾಗಿದೆ.
ಬಂಡೀಪುರ ರಾಷ್ಟ್ರೀಯ ಉದ್ಯಾನದ ಇತಿಹಾಸ:
1898ರಲ್ಲಿ ಬ್ರಿಟಿಷ್ ರಾಜ್ ಇದ್ದ ಸಂದರ್ಭದಲ್ಲಿ ಇದು ರಿಸವ್ರ್ ಫಾರೆಸ್ಟ್ ಆಗಿತ್ತು. ನಂತರ ಮೈಸೂರು ರಾಜ ಮನೆತನದವರ ಆಸಕ್ತಿ ಫಲವಾಗಿ 1931ರಲ್ಲಿ 90 ಚ.ಕಿ.ಮೀ. ವಿಸ್ತೀರ್ಣದ ಪ್ರದೇಶ ಗೇಮ್ ರಿಸರ್ವರ್ ಆಗಿತ್ತು. 1941ರಲ್ಲಿ 800 ಚ.ಕಿ.ಮೀ ಪ್ರದೇಶ ವೇಣುಗೋಪಾಲಸ್ವಾಮಿ ವೈಲ್ಡ್ಲೈಫ್ ಪಾರ್ಕ್ ಆಯಿತು. 1973ರಲ್ಲಿ874.2 ಚ.ಕಿ.ಮೀ ಪ್ರದೇಶ ಬಂಡೀಪುರ ರಾಷ್ಟ್ರೀಯ ಉದ್ಯಾನವಾಗಿ ಘೋಷಣೆಯಾಯಿತು. ಈ ಪೈಕಿ 690 ಚ.ಕಿ.ಮೀ ಟೈಗರ್ ರಿಸವ್ರ್ ಆಗಿದ್ದು, ಈಚೆಗೆ 1283,39 ಚ.ಕಿ.ಮೀ ಪ್ರದೇಶ ಹುಲಿ ಯೋಜನೆಗೆ ಸೇರಿತು. ಇದರಲ್ಲಿ872.24 ಕಿ.ಮೀ ಕೋರ್ಜೋನ್, 410.15 ಕಿ.ಮೀ ಬಫರ್ ಜೋನ್ ಆಗಿದೆ. ಟೂರಿಸಂಗೆ 82.ಕಿ.ಮೀ, ಆಡಳಿತ ಕಚೇರಿ ಸಲುವಾಗಿ 1.ಕಿ.ಮೀ ಮೀಸಲಿದೆ. ಉದ್ಯಾನದ ದಕ್ಷಿಣಕ್ಕೆ ತುಮಿಳುನಾಡಿನ ಮಧುಮಲೈ, ವಾಯುವ್ಯ ದಿಕ್ಕಿಗೆ ವೈನಾಡ್ ವೈಲ್ಡ್ ಲೈಫ್ ಸೆಂಚುರಿ ಇದ್ದು, ಈ ಮೂರರ ಒಟ್ಟು ವಿಸ್ತೀರ್ಣ 5 ಸಾವಿರ 5 ನೂರು ಚ.ಕಿ.ಮೀ. ಈ ಪ್ರದೇಶದಲ್ಲಿಕಬಿನಿ, ನುಗು, ಮಾಯಾರ್ ನದಿಗಳು ಹರಿಯುತ್ತವೆ.