ಭಾರತದಲ್ಲಿ ಬೆಳೆಯಲಾಗುವ ಬಾಸುಮತಿ ಅಲ್ಲದ ಬಿಳಿ ಅಕ್ಕಿಯನ್ನು ಹೊರ ದೇಶಗಳಿಗೆ ರಫ್ತು ಮಾಡದಂತೆ ಕೇಂದ್ರ ಸರಕಾರ ಆದೇಶ ಹೊರಡಿಸಿರುವ ಹಿನ್ನೆಲೆಯಲ್ಲಿ, ಅಮೆರಿಕದಲ್ಲಿ ಅಕ್ಕಿ ಅಭಾವ ಸೃಷ್ಟಿಯಾಗಿದೆ. ಅಮೆರಿಕದಲ್ಲಿ ಅಕ್ಕಿ ಖರೀದಿಸಲು ಭಾರತೀಯರು ಮುಗಿಬಿದ್ದಿದ್ದು, ಶಾಪಿಂಗ್ ಮಾಲ್ಗಳು ಹಾಗೂ ಕಾಸ್ಟ್ಕೋ ಮಾರುಕಟ್ಟೆಯಲ್ಲಿ ದೊಡ್ಡಮಟ್ಟದ ಸರತಿ ಸಾಲು ಕಾಣುತ್ತಿವೆ.
ಭಾರತ ಸರ್ಕಾರ ಬಾಸುಮತಿ ಹೊರತಾದ ಅಕ್ಕಿ ರಫ್ತಿನ ಮೇಲೆ ನಿಷೇಧ ಹೇರಿದೆ. ಡಿಜಿಎಫ್ಟಿ ಆದೇಶದಿಂದ ಶೇ.80ರಷ್ಟು ಅಕ್ಕಿ ರಫ್ತಿನ ಮೇಲೆ ಪ್ರಭಾವ ಬೀರಲಿದೆ. ಭಾರತದಲ್ಲಿ ಅಕ್ಕಿ ದರ ಕಡಿಮೆಯಾಗಲಿದ್ದರೆ, ಜಾಗತಿಕವಾಗಿ ಅಕ್ಕಿ ಬೆಲೆ ಭಾರೀ ಏರಿಕೆಯಾಗಲಿದೆ. ಅಕ್ಕಿ ಅಭಾವ ಸೃಷ್ಟಿಯಾಗುವ ಆತಂಕದಲ್ಲಿರುವ ಭಾರತೀಯರು ಚೀಲಗಟ್ಟಲೇ ಅಕ್ಕಿ ಖರೀದಿಸುತ್ತಿರುವುದು ಕಂಡುಬರುತ್ತಿದೆ.
ಅಕ್ಕಿದರ ಹೆಚ್ಚಳ:
ಅಕ್ಕಿಯನ್ನು ತರಲು ಮಳಿಗೆಗಳು ಭಾರತೀಯರು ಹೆಚ್ಚಿನ ಪ್ರಮಾಣದಲ್ಲಿ ಧಾವಿಸುತ್ತಿದ್ದಾರೆ. ಇಂಡಿಯನ್ ಸ್ಟೋರ್ಗಳು ಒಬ್ಬರಿಗೆ ಒಂದೇ ಚೀಲ ಸೂತ್ರ ಅನುಸರಿಸುತ್ತಿವೆ. ಅದಲ್ಲದೇ, ಬಹಳಷ್ಟು ಮಳಿಗೆಗಳಲ್ಲಿ ಅಕ್ಕಿ ದರ ಭಾರೀ ಪ್ರಮಾಣದಲ್ಲಿ ಏರಿಕೆಯಾಗಿದೆ. ಈ ಮೊದಲು 25 ಕೆಜಿ ಅಕ್ಕಿ ಮೂಟೆಗೆ 22 ಡಾಲರ್ಗಳಿಗಿಂತ ಕಡಿಮೆ ಬೆಲೆ ಇತ್ತು. ಆದರೆ, ಈಗ ಅದರ ದರ 32 ರಿಂದ 47 ಡಾಲರ್ವರೆಗೆ ಏರಿಕೆ ಆಗಿದೆ.ಅಕ್ಕಿ ಬೆಲೆಯ ದಿಢೀರ್ ಏರಿಕೆಗೆ ಗ್ರಾಹಕರು ಕಿಡಿಕಾರಿದ್ದಾರೆ. ಈಗಾಗಲೇ ದಾಸ್ತಾನಿರುವ ಅಕ್ಕಿಯ ಬೆಲೆಯನ್ನು ಏಕೆ ಏರಿಸಿದ್ದಾರೆ ಎಂದು ಭಾರತೀಯರು ಪ್ರಶ್ನಿಸುತ್ತಿದ್ದಾರೆ.
ಅಕ್ಕಿಗಾಗಿ ಜಗಳ:
ಅಮೆರಿಕದ ಸ್ಟೋರ್ಗಳಲ್ಲಿ ಅಕ್ಕಿ ಖರೀದಿಸಲು ಜಗಳಗಳು ನಡೆಯುತ್ತಿರುವ ವಿಡಿಯೋಗಳು ಇಂಟರ್ನೆಟ್ನಲ್ಲಿ ವೈರಲ್ ಆಗುತ್ತಿವೆ. ಜನರು ಒಂದೇ ಒಂದು ಅಕ್ಕಿ ಚೀಲಕ್ಕಾಗಿ ಜಗಳವಾಡುತ್ತಿರುವ ವಿಡಿಯೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗಿದೆ.
ಕಳೆದ ಸೆಪ್ಟಂಬರ್ ನಲ್ಲಿ ನುಚ್ಚು ಅಕ್ಕಿಯ ರಫ್ತನ್ನು ಭಾರತ ತಡೆ ಹಿಡಿದಿದ್ದಾಗಲೇ ಅಕ್ಕಿಯ ಬೆಲೆ ಅಂತಾರಾಷ್ಟ್ರೀಯ ಮಾರುಕಟ್ಟೆಯಲ್ಲಿ ನುಚ್ಚು ಅಕ್ಕಿಯ ಬೆಲೆ ಹೆಚ್ಚಾಗಿತ್ತು. ಇದೀಗ ಬಿಳಿ ಅಕ್ಕಿಯ ರಫ್ತನ್ನು ಭಾರತ ತಡೆ ಹಿಡಿದಿರುವುದು ವಿದೇಶಗಳಲ್ಲಿ ಅಕ್ಕಿಯ ಬೆಲೆಯು ಮತ್ತಷ್ಟು ಹೆಚ್ಚಳಕ್ಕೆ ನಾಂದಿ ಹಾಡಲಿದೆ ಎಂದು ಹೇಳಲಾಗುತ್ತಿದೆ.