ಸಾಕಷ್ಟು ಸಂಗತಿ-ಸಾಧನೆಗಳು ಗಿನ್ನೆಸ್ ರೆಕಾರ್ಡ್ಸ್ನಲ್ಲಿ ದಾಖಲಾಗುತ್ತವೆ. ಅವುಗಳಲ್ಲಿ ಸಾಮಾನ್ಯವಾಗಿ ಹಲವು ಸಾರ್ವಜನಿಕವಾಗಿ ಅಂಥ ಪ್ರಯೋಜನಕ್ಕೆ ಬರದಂಥವೂ ಇರುತ್ತವೆ. ಆದರೆ ಇಲ್ಲೊಬ್ಬಳು ತಾಯಿಯ ಗಿನ್ನೆಸ್ ದಾಖಲೆ ಆಕೆಯನ್ನು ಮಹಾತಾಯಿ ಎಂದು ಕರೆಯುವಂತೆ ಮಾಡಿದೆ.
ಎರಡು ಮಕ್ಕಳ ತಾಯಿ ಆಗಿರುವ ಈಕೆ ಅವಧಿಪೂರ್ವವಾಗಿ ಜನಿಸಿದ ಸಾವಿರಾರು ಶಿಶುಗಳಿಗಾಗಿ ಎದೆಹಾಲು ನೀಡುವ ಮೂಲಕ ಮಹಾತಾಯಿ ಎನಿಸಿಕೊಂಡಿದ್ದಾರೆ. ಮಾತ್ರವಲ್ಲ, ಹೀಗೆ ಎದೆಹಾಲು ನೀಡಿದ್ದಕ್ಕೇ ಗಿನ್ನೆಸ್ ದಾಖಲೆಗೂ ಪಾತ್ರರಾಗಿದ್ದಾರೆ.
ಎಲಿಜಬೆತ್ ಆ್ಯಂಡರ್ಸನ್ ಸಿಯೆರಾ ಎಂಬ ಈಕೆ ಅತ್ಯಧಿಕ ಪ್ರಮಾಣದಲ್ಲಿ ಎದೆಹಾಲು ದೇಣಿಗೆಯಾಗಿ ನೀಡಿ ಗಿನ್ನೆಸ್ ದಾಖಲೆ ಪಟ್ಟಿಯಲ್ಲಿ ಸೇರಿದ್ದಾರೆ. ಯುನೈಟೆಡ್ ಸ್ಟೇಟ್ಸ್ನ ಒರೆಗಾಂವ್ನ ಅಲೊಹಾ ನಿವಾಸಿಯಾಗಿರುವ ಎಲಿಜಬೆತ್, 2015ರ ಫೆಬ್ರವರಿ 20ರಿಂದ 2018ರ ಜೂ. 20ರ ವರೆಗೆ 1599.68 ಲೀಟರ್ ಎದೆಹಾಲನ್ನು ನೀಡಿದ್ದಾರೆ. ಆ ಮೂಲಕ ಅವಧಿಪೂರ್ವವಾಗಿ ಜನಿಸಿದ್ದ ಸಾವಿರಾರು ಶಿಶುಗಳ ಬದುಕು ಉಳಿಸಿಕೊಳ್ಳುವಲ್ಲಿ ಮಹತ್ವದ ಪಾತ್ರ ವಹಿಸಿದ್ದಾರೆ.
ಇದು ನಾನು 2015ರಿಂದ 2018ರ ಮಧ್ಯೆ ನೀಡಿದ್ದ ಹಾಲಿನ ಪ್ರಮಾಣವಷ್ಟೇ ಎಂದಿರುವ ಎಲಿಜಬೆತ್, ಇದುವರೆಗೆ ಒಟ್ಟು 3.5 ಲಕ್ಷ ಔನ್ಸ್ಗಳಿಗೂ ಅಧಿಕ ಎದೆಹಾಲು ನೀಡಿದ್ದಾರಂತೆ. ನನ್ನ ದೇಹ ಪ್ರೊಲ್ಯಾಕ್ಟಿನ್ ಎಂಬ ಹಾರ್ಮೋನನ್ನು ಅಧಿಕ ಪ್ರಮಾಣದಲ್ಲಿ ಸ್ರವಿಸುತ್ತಿರುವುದರಿಂದ ಇಷ್ಟೊಂದು ಹಾಲು ಉತ್ಪಾದನೆ ಆಗುತ್ತಿದೆ ಎಂದಿರುವ ಎಲಿಜಬೆತ್, ತನ್ನ ಈ ದಾಖಲೆಯಲ್ಲಿ ಮಿಲ್ಕ್ ಪಂಪ್ ಉಪಕರಣದ ಮಹತ್ವವನ್ನೂ ಹೇಳಿಕೊಂಡಿದ್ದಾರೆ.