ಹೊಟೇಲ್ ಅಥವಾ ಹೋಂ ಸ್ಟೇ ಅನ್ನೋದು ಈಗಿನ ಕಾಲದಲ್ಲಿ ಹೆಚ್ಚು ಬೇಡಿಕೆ ಇರುವ ಹಾಲಿಡೇ ಸ್ಪಾಟ್. ರಜೆ ದಿನಗಳಲ್ಲಿ ಫ್ರೆಂಡ್ಸ್, ಕೊಲೀಗ್ಸ್ ಅಥವಾ ಕುಟುಂಬದ ಜತೆ ಹೋಗೋಕೆ ಅತ್ಯುತ್ತಮ ಜಾಗವಾಗಿದೆ.
ಅದರಲ್ಲೂ ಹಳೇ ಕಾಲದ ಮನೆಗಳಿಗೆ ಹೊಸ ಲುಕ್ ಕೊಟ್ಟು ಅದನ್ನ ವಿಭಿನ್ನ ರೀತಿಯಲ್ಲಿ ಇಂಟೀರಿಯರ್ಸ್ ಮಾಡಿಸಿ ಹೋಂ ಸ್ಟೇ ಆಗಿ ಬದಲಾಯಿಸೋ ಕೆಲಸ ಇದೆಯಲ್ಲಾ.. ಅಬ್ಬಾ.. ಅದ್ಭುತ.. ಹಾಗೇ ಅದನ್ನ ಮುನ್ನಡೆಸಿಕೊಂಡು ಹೋಗೋ ಕೆಲಸವೂ ಅಷ್ಟೇ ಜವಬ್ದಾರಿಯುತವಾದದ್ದು.
ಇದಕ್ಕೆ ಉದಾಹರಣೆಯಂತೆ ಭಾರತದಲ್ಲಿ 130 ವರ್ಷ ಹಳೆಯ ವಸಾಹತುಶಾಹಿ ಯುಗದಲ್ಲಿ ನಿರ್ಮಿಸಲಾಗಿದ್ದ ಹೊಟೆಲ್ ಅನ್ನು ಈಗ ಬ್ಲೂ ಬುಕ್ ಹೊಟೆಲ್ ಆಗಿ ವಿನ್ಯಾಸ ಮಾಡಿರುವುದು ವಿಶೇಷವಾಗಿದೆ.
ಎಲ್ಲಿರೋದು ಈ ಬ್ಲೂ ಬುಕ್ ಹೊಟೆಲ್?
ಇದಿರೋದು ಉತ್ತರಕಾಂಡದ ಜಿಯೋಕೊಟ್ ಕಣಿವೆ ಪ್ರದೇಶದಲ್ಲಿ. ರಾಷ್ಟ್ರ ರಾಜಧಾನಿ ದೆಹಲಿಯಿಂದ 6 ಗಂಟೆಗಳ ಕಾಲದ ಜರ್ನಿ ಇದಾಗಿದೆ.
ಯಾವಾಗ ನಿರ್ಮಾಣಗೊಂಡಿದ್ದು?
ಬ್ರಿಟಿಷ್ ಮಹಿಳೆ ಮೇಡಮ್ ಡ್ಯುರೆಲ್ ಆಗಿನ ಕಾಲದಲ್ಲಿ ಅವರ ಬಿಳಿ ಜನರ ವಿಶ್ರಾಂತಿಗಾಗಿ ನಿರ್ಮಿಸಿದ್ದು ಹೊಟೆಲ್ ಜಾಗ.
ಈಗಲೂ ಈ ಜಾಗವನ್ನು ಎರಡು ಭಾಗಗಳಾಗಿ ವಿಂಗಡಿಸಲಾಗಿದ್ದು, ಒಂದು ಭಾಗವನ್ನು 1890ರ ಕಾಲದಲ್ಲಿನ ಮೇಡಮ್ ಡ್ಯುರೆಲ್ ಅವರು ವಾಸಿಸುತ್ತಿದ್ದ ಸ್ಥಳವನ್ನು ಹಾಗೆ ಉಳಿಸಿಕೊಳ್ಳಲಾಗಿದೆ. ಹಳೆಯ ವಿಕ್ಟೋರಿಯನ್ ಶೈಲಿಯ ಪೀಠೋಪಕರಣಗಳು, ವಿನ್ಯಾಸಗಳನ್ನು ಜಗತ್ತಿಗೆ ಮೋಡಿ ಮಾಡುವಂತೆ ಉಳಿಸಿಕೊಂಡು ಬರಲಾಗಿದೆ.
ಬ್ಲೂ ಬುಕ್ ಹೊಟೆಲ್ ನ ಸಂಸ್ಥಾಪಕ ಶ್ರೇಯ್ ಗುಪ್ತಾ. ಈ ಹೊಟೆಲ್ ಇಂಟೀರಿಯರ್ಸ್ ಗಾಗಿ ದೇಶದ ವಿವಿಧೆಡೆಯಿಂದ ಎಲ್ಲಾ ರೀತಿಯ ವಿನ್ಯಾಸಗಳನ್ನು ತರಿಸಿದ್ದಾರೆ. ಗುಜರಾತಿನಿಂದ ಅಡುಗೆ ಪಾತ್ರೆಗಳು, ಹಿತ್ತಾಳೆ ಸಾಮಾಗ್ರಿಗಳನ್ನು ಮೊರದಾಬಾದ್ ನಿಂದ, ಇನ್ನು ದೆಹಲಿಯ ಕೀರ್ತಿ ನಗರದಲ್ಲಿ ಪೀಠೋಪಕರಣಗಳನ್ನು ತರಿಸಲಾಗಿದೆ.
ಇನ್ನು ಎರಡನೇ ಭಾಗವನ್ನು ಈಗಿನ ಕಾಲಕ್ಕೆ ತಕ್ಕಂತೆ ರೂಪುಗೊಳಿಸಲಾಗಿದೆ. ಇಲ್ಲಿನ ಪ್ರತಿ ಕೋಣೆಗೂ ʼಚಾಪ್ಟರ್ʼ ಎಂದು ಲೇಬಲ್ ಮಾಡಲಾಗಿದೆ.
ಆರಂಭದ ಹಂತ ಹೇಗಿತ್ತು?
ಆರಂಭದಲ್ಲಿ ಮೇಡಮ್ ಡ್ಯುರೆಲ್ ಅವರಿಂದ ಖರೀದಿಸಿದ ಮಾಲೀಕರು ಕೇವಲ ಮೊದಲ ಮಹಡಿಯನ್ನು ನಿರ್ಮಿಸಿದರು.
ಇನ್ನು ನೆಲ ಅಂತಸ್ಥಿನ ಮೇಲ್ಚಾವಣಿಯನ್ನು ಮೊದಲ ಮಹಡಿ ನಿರ್ಮಿಸುವಾಗ ಜಾಗೃತೆವಹಿಸಿದ್ದು, ಅದಕ್ಕೆ ಯಾವುದೇ ರೀತಿಯ ಹೊಡೆತ ಬೀಳದಂತೆ ನೋಡಿಕೊಳ್ಳಲಾಗಿದೆ. ಆದರೆ ಅಲ್ಲಿ ಕಲ್ಲಿನ ಗೋಡೆಗಳಿದ್ದರೂ ಕೂಡ ಹಳೆಯ ಕಾಲದ ಹಾಗೆ ಪೀಠೋಪಕರಣಗಳನ್ನು ಬಳಸಿಲ್ಲ. ಈಗಿನ ಕಾಲಕ್ಕೆ ತಕ್ಕಂತಹದನ್ನೇ ಇರಿಸಿರುವುದರ ಬಗ್ಗೆ ಖಚಿತಪಡಿಸಿಕೊಳ್ಳಲಾಗಿದೆ.
ಪರಿಸರ ಹೇಗಿದೆ?
ಬ್ಲೂ ಬುಕ್ ಹೊಟೆಲ್ ನ ಸುತ್ತಮುತ್ತ ಬರೋಬ್ಬರಿ 200 ಚದುರ ಅಡಿ ಜಾದಲ್ಲಿ ಉದ್ಯಾನವನ ಹೊಂದಿದ್ದು, ಅದರಲ್ಲಿ ಗಿಡಮೂಲಿಕೆ, ನಿಂಬೆಹಣ್ಣು ಸೇರಿ ಹಲವು ಸಸ್ಯಗಳು ಬೆಳೆಯುತ್ತವೆ. ಇವುಗಳನ್ನು ಹೆಚ್ಚಾಗಿ ಅಲ್ಲಿನ ಊಟದಲ್ಲಿ ಬಳಸಲಾಗುತ್ತದೆ.
ಅಷ್ಟೇ ಅಲ್ಲ ಇಲ್ಲಿನ 60 ವಿವಿಧ ಜಾತಿಯ ಪಕ್ಷಿ ಸಂಕುಲಗಳು ಪ್ರವಾಸಿಗರ ಆಕರ್ಷಣೆಗಳಲ್ಲಿ ಒಂದಾಗಿದೆ.
ನೋ ಪ್ಲಾಸ್ಟಿಕ್!
ಇಡೀ ಹೊಟೆಲ್ ನಲ್ಲಿ ಪ್ಲಾಸ್ಟಿಕ್ ಬದಲಿಗೆ ಗಾಜು, ಮರ ಹಾಗೂ ಲೋಹದ ವಸ್ತುಗಳನ್ನು ಬಳಸಲಾಗಿದೆ.
ಇಲ್ಲಿ ಪ್ಲೇಟ್ ಮೀಲ್ಸ್ ಗಿಂತ ಬಫೆಟ್ ಸಿಸ್ಟಮ್ ಅನ್ನು ಪಾಲಿಸಲಾಗುತ್ತದೆ. ಈ ಮೂಲಕ ಊಟ ವ್ಯರ್ಥವಾಗದಿರಲಿ ಎನ್ನುವ ಆಲೋಚನೆ. ಊಟದ ವೇಳೆ ಪ್ಲಾಸ್ಟಿಕ್ ಸ್ಪೂನ್, ತಟ್ಟೆ ಗಳನ್ನು ಇಲ್ಲಿ ಬಳಸಲಾಗುವುದಿಲ್ಲ. ಇಷ್ಟು ಮಾತ್ರವಲ್ಲದೆ ಇಲ್ಲಿ ಹಸಿ ಕಸ ಹಾಗೂ ಒಣ ಕಸ ಎಂದು ವಿಂಗಡಿಸಲಾಗುತ್ತದೆ. ಮರುಬಳಕೆ ಮಾಡಲು ಇಲ್ಲಿನ ಮಿಶ್ರಗಳನ್ನು ಉದ್ಯಾನವನಕ್ಕೆ ಗೊಬ್ಬರವಾಗಿ ಬಳಸಲಾಗುತ್ತದೆ.
ಅಷ್ಟೇ ಅಲ್ಲ ಬಿದಿರಿನಿಂದ ತಯಾರಿಸಲಾಗಿರುವ ಟೂತ್ಬ್ರಶ್ಗಳು, ಬಾಚಣಿಗೆಗಳು ಮತ್ತು ರೇಜರ್ಗಳಂತಹ ನೀಡಲಾಗುತ್ತದೆ ಮತ್ತು ಚರ್ಮ ಮತ್ತು ಕೂದಲ ರಕ್ಷಣೆಯ ವಸ್ತುಗಳು ಆಯುರ್ವೇದ ಗುಣಗಳನ್ನು ಹೊಂದಿರುತ್ತವೆ.
ಅಲ್ಲಿನ ವಿಶೇಷತೆ ಏನು?
ಅಲ್ಲಿ ಉಳಿದುಕೊಳ್ಳುವ ಗೆಸ್ಟ್ ಗಳು ಸುತ್ತಮುತ್ತಲಿನ ಹಳ್ಳಿಗಳಿಗೆ ಹೋಗಬಹುದು ಹಾಗೂ ಅಲ್ಲಿನ ಹಳ್ಳಿ ಜನರ ಬಳಿ ಮಾತನಾಡಿ ಆ ಹಳ್ಳಿಯ ಇತಿಹಾಸ ಹಾಗೂ ಕಥೆಯನ್ನು ತಿಳಿಯಬಹುದಾಗಿದೆ.
ಮತ್ತೊಂದು ವಿಶೇಷ ವಿಚಾರವೆಂದರೆ ಅಲ್ಲಿನ ಹತ್ತಿರದ ಸಣ್ಣ ವ್ಯಾಪಾರಿಗಳಾದ ಕುಮಾವೊನಿ ಫಾರ್ಮ್ ಕೆಫೆ ಮತ್ತು ಮುಸ್ಕೋಟಿಯಾ ಫಾರ್ಮ್ಗಳಿಗೆ ಭೇಟಿ ನೀಡಬಹುದು. ಅಷ್ಟೇ ಅಲ್ಲ ಇಲ್ಲಿ ಅಥೆಂಟಿಕ್ ಅಂದರೆ ಸಾಂಪ್ರಾದಾಯಕ ಕುಮಾವೊನಿ ಆಹಾರ ನೀಡುತ್ತದೆ.
ಬ್ಲೂ ಬುಕ್ ಹೋಟೆಲ್ ನ ಜಾಗೃತಿ ಕೆಲಸ
ಐಷಾರಾಮಿ ಜೀನವ ಶೈಲಿಯ ಜೊತೆಗೆ ಅಲ್ಲಿನ ಸ್ಥಳಿಯರ ಜೀವನ ಶೈಲಿಯನ್ನು ಹಾಗೂ ಪರಿಸರವನ್ನು ಹಾಳು ಮಾಡದಂತೆ ನೋಡಿಕೊಳ್ಳುತ್ತಿದೆ.
ಕಸದ ಸುರಕ್ಷಿತ ವಿಲೇವಾರಿ, ಒಳಚರಂಡಿ ಸಂಸ್ಕರಣೆ, ನೀರು ಹಂಚಿಕೆ, ಶಾಲಾ ಮಕ್ಕಳಿಗೆ ಸಹಕಾರ, ವೈದ್ಯಕೀಯ ಮೂಲ ಸೌಕರ್ಯಕ್ಕೆ ಅಗತ್ಯ ನೆರವು ನೀಡುತ್ತಿದೆ.
ಇನ್ನು ಅಲ್ಲಿನ ಹಳ್ಳಿಯ ಜನರಿಗೆ ಬ್ಲೂ ಬುಕ್ ನಲ್ಲಿ ಉದ್ಯೋಗ ಅವಕಾಶ ನೀಡಿದ್ದು, ಸುತ್ತಮುತ್ತಲಿನ ಜನರಿಗೆ ಪಹಾಡಿ ಮಟನ್ ಮತ್ತು ಪನೀರ್, ಭಟ್ಟ್ ಕಿ ಚುರ್ಕಾನಿ ದಾಲ್, ಲಾಯ್ ಪಾಲಕ್ ಕಿ ಸಬ್ಜಿ ನಂತಹ ಭಕ್ಷ್ಯಗಳನ್ನು ಸಾಂಪ್ರದಾಯಿಕ ಕುಮಾವೋನಿ ಆಹಾರ ಸಿದ್ದಪಡಿಸಲು ಹಳ್ಳಿ ಜನರಿಗೆ ಉದ್ಯೋಗ ನೀಡಲಾಗಿದೆ.
ಹೌದಲ್ವಾ! ನಾವು ಎಷ್ಟೇ ಈಗಿನ ಕಾಲದವರಾಗಿದ್ದರೂ ಕೂಡ ನಮ್ಮ ಹಿಂದಿನ ಕೆಲವು ವಸ್ತು, ಕಟ್ಟಡಗಳು, ಸ್ಥಳಗಳನ್ನು ಹಾಗೆಯೇ ಉಳಿಸಿಕೊಂಡರೆ ಅದನ್ನು ಮುಂದೊಂದು ದಿನ ಅದರಿಂದ ಎಷ್ಟೆಲ್ಲಾ ಲಾಭ ಹಾಗೂ ಖುಷಿ ಸಿಗುತ್ತದೆ ಅಂತ.
ನಮ್ಮ ಸುತ್ತಲಿನ ಪರಿಸರವನ್ನು ಸಂಪೂರ್ಣ ನಾಶ ಮಾಡಿ ಐಷಾರಾಮಿ ಜೀವನ ಮಾಡುವುದಕ್ಕಿಂತ ಹೊಸ ಚಿಗುರು, ಹಳೇ ಬೇರು ಅನ್ನೋ ಹಾಗೆ ಹಳೆಯದನ್ನು ಉಳಿಸಿಕೊಂಡು ಅದ್ಭುತವಾಗಿ ಜೀವನ ನಡೆಸಬಹುದು ಅನ್ನೋದಕ್ಕೆ ಬ್ಲೂ ಬುಕ್ ಹೊಟೇಲ್ ನ ವಿನ್ಯಾಸದ ಮಾದರಿ ನಮಗೆ ಉತ್ತಮ ಉದಾಹರಣೆಯಾಗಿದೆ ಅಲ್ವಾ!
ನೀವು ಯಾವುದಾದರು ಇಂತಹ ಪರಿಸರ ಸ್ನೇಹಿ ಜಾಗಗಳಿಗೆ ಭೇಟಿ ನೀಡಿದ್ದರೆ ಕಮೆಂಟ್ ಬಾಕ್ಸ್ ನಲ್ಲಿ ತಪ್ಪದೇ ಕಮೆಂಟ್ ಮಾಡಿ