ಹಾಸನ: ಜಿಲ್ಲೆಯ ಸಕಲೇಶಪುರ ವ್ಯಾಪ್ತಿಯ ಮೂರ್ಕಣ್ಣು ಗುಡ್ಡದಲ್ಲಿ 15 ಎಕರೆ ಅರಣ್ಯದಲ್ಲಿ ನಿರ್ಮಿಸಲಾಗಿದ್ದ ಬೃಹತ್ ರೆಸಾರ್ಟ್ ಅನ್ನು ಅರಣ್ಯ ಇಲಾಖೆ ಅಧಿಕಾರಿಗಳು ಮಂಗಳವಾರ ವಶಪಡಿಸಿಕೊಂಡಿದ್ದಾರೆ.
ಅರಣ್ಯ ಭೂಮಿ ಒತ್ತುವರಿ ಮಾಡಿರುವ ಕುರಿತು ಕಳೆದ 2022ರ ಮಾರ್ಚ್ನಿಂದ ಸ್ಟೋನ್ ವ್ಯಾಲಿ ರೆಸಾರ್ಟ್ಗೆ ಅರಣ್ಯ ಇಲಾಖೆ ನೋಟಿಸ್ ಜಾರಿ ಮಾಡಿ ಆಸ್ತಿಯ ಮಾಲೀಕರು ಮತ್ತು ಸಕಲೇಶಪುರ ತಹಶೀಲ್ದಾರ್ ಸೇರಿದಂತೆ ಐವರ ವಿರುದ್ಧ ಪ್ರಕರಣ ದಾಖಲಿಸಿತ್ತು. ಕಂದಾಯ ಇಲಾಖೆಯ ಕುಮ್ಮಕ್ಕಿನಿಂದಲೇ ಅರಣ್ಯ ಭೂಮಿಯನ್ನು ಕಬಳಿಸಲಾಗಿತ್ತು. ಒಟ್ಟು 14 ಎಕರೆ 36 ಗುಂಟಾ ಭೂಮಿ, ಅತಿಕ್ರಮಣಕ್ಕೆ ಒಳಪಟ್ಟಿದ್ದು, 7,938 ಎಕರೆ 38 ಗುಂಟಾ ಮೀಸಲು ಅರಣ್ಯದ ಭಾಗವಾಗಿತ್ತು, ಈ ಅರಣ್ಯ ಭೂಮಿಯನ್ನು 1920 ರಲ್ಲಿ ಮೈಸೂರು ಮಹಾರಾಜರು ಮೈಸೂರು ಅರಣ್ಯ ನಿಯಂತ್ರಣ ಕಾಯ್ದೆ 1900 ರ ಅಡಿಯಲ್ಲಿ ಅರಣ್ಯ ಎಂದು ಕಾಯ್ದಿರಿಸಿದ್ದರು.
ರೆಸಾರ್ಟ್ ಮಾಲೀಕ ಸುಭಾಷ್ ಸ್ಟೀಫನ್ ಅರಣ್ಯ ಇಲಾಕೆಯ ಅಧಿಕೃತ ಅಧಿಕಾರಿಯ ಮುಂದೆ ಹಾಜರಾಗಿ 10 ಎಕರೆ ಮೇಲಿನ ಹಕ್ಕು ಹಿಂಪಡೆಯುವದಾಗಿ ಹೇಳಿದರು. ವಿಚಾರಣೆ ವೇಳೆ ದೇವಾಲದಕೆರೆ ಗ್ರಾಮಲೆಕ್ಕಿಗರು ಐದು ಎಕರೆ ಜಾಗವನ್ನು ಅಕ್ರಮವಾಗಿ ಮಂಜೂರು ಮಾಡಿದ್ದು, ಅಗತ್ಯ ದಾಖಲೆಗಳಿಲ್ಲದೆ ಮ್ಯುಟೇಶನ್ ಮಾಡಲಾಗಿದೆ ಎಂದು ತಿಳಿಸಿದರು. ವ್ಯಾಪ್ತಿಯ ಅರಣ್ಯಾಧಿಕಾರಿಗಳು ರಾಜ್ಯ ಸರ್ಕಾರಕ್ಕೆ ಸಲ್ಲಿಸಿರುವ ವರದಿಯಲ್ಲಿ ಒಟ್ಟು 14 ಎಕರೆ 36 ಗುಂಟಾ ಒತ್ತುವರಿಯಾಗಿದೆ ಎಂದು ತಿಳಿಸಿದ್ದಾರೆ.
ಸಕಲೇಶಪುರ ವಲಯ ಅರಣ್ಯಾಧಿಕಾರಿ ಶಿಲ್ಪಾ ಆವರ ಪ್ರಕಾರ ಅರಣ್ಯ ಭೂಮಿಯನ್ನು ಒತ್ತುವರಿ ಮಾಡಿಕೊಂಡು ವಿಶಾಲವಾದ ಕಟ್ಟಡವನ್ನು ನಿರ್ಮಿಸಲು ಶ್ರೀಮಂತ ಶೋಲಾ ಅರಣ್ಯಗಳನ್ನು ನಾಶಪಡಿಸಲಾಗಿದೆ. ರಸ್ತೆಗಳು, ಈಜುಕೊಳ, ಟ್ಯಾಂಕ್ ಮತ್ತು ವಾಣಿಜ್ಯ ಚಟುವಟಿಕೆಗಳಿಗಾಗಿ ಇತರ ಸೌಕರ್ಯಗಳನ್ನು ನಿರ್ಮಿಸಲಾಗಿದೆ ಎಂದು ಹೇಳಿದರು. ಅರಣ್ಯಗಳಲ್ಲದೆ, ಚರಂಡಿ ಜಾಲಗಳು ಮತ್ತು ಜೌಗು ಪ್ರದೇಶಗಳನ್ನು ಸಹ ಬದಲಾಯಿಸಲಾಗಿದೆ ಎಂದು ವರದಿಯೊಂದು ತಿಳಿಸಿದೆ.
2022ರ ಜುಲೈ 26ರಂದು ಹೊರಡಿಸಿದ ಆದೇಶದಲ್ಲಿ ಅಂದಿನ ಉಪ ಅರಣ್ಯ ಸಂರಕ್ಷಣಾಧಿಕಾರಿ, ಅರಣ್ಯ ಸಂಚಾರಿ ದಳ, ಹಾಸನ, ಇವರ ವರದಿಯಂತೆ 14 ಎಕರೆ 36 ಗುಂಟಾ, ಕಂದಾಯ ಇಲಾಖೆಯಿಂದ ಅಕ್ರಮವಾಗಿ ಮಂಜೂರಾದ ಐದು ಎಕರೆ ಸೇರಿದಂತೆ 14 ಎಕರೆ 36 ಗುಂಟಾ ಒತ್ತುವರಿಯಾಗಿದೆ. ಒತ್ತುವರಿದಾರರಿಗೆ ತೆರವು ಮಾಡಲು 30 ದಿನಗಳ ಕಾಲಾವಕಾಶ ನೀಡಲಾಗಿದೆ. ಭೂಮಿಯನ್ನು ಯಥಾಸ್ಥಿತಿಗೆ ತರಲು ತಗಲುವ ವೆಚ್ಚವನ್ನು ಅತಿಕ್ರಮಣದಾರರು ಭರಿಸುವಂತೆ ತಿಳಿಸುವುದರೊಂದಿಗೆ ಭೂಮಿಯನ್ನು ವಶಕ್ಕೆ ಪಡೆದು ಅತಿಕ್ರಮಣವನ್ನು ತೆರವುಗೊಳಿಸುವಂತೆ ಆದೇಶದಲ್ಲಿ ಇಲಾಖೆ ಅಧಿಕಾರಿಗಳಿಗೆ ಸೂಚಿಸಲಾಗಿದೆ. ಈ ಆದೇಶದ ಅನ್ವಯ ಮೇಲ್ಮನವಿ ಸಲ್ಲಿಸಲು ಅತಿಕ್ರಮಣದಾರರಿಗೆ ಸಾಕಷ್ಟು ಸಮಯ ನೀಡಲಾಗಿದೆ. ಅಂತಿಮವಾಗಿ ಇಲಾಖೆ ಈ ಬಗ್ಗೆ ಕ್ರಮಕೈಗೊಂಡಿದೆ, ಎಂದು ಅಧಿಕಾರಿಯೊಬ್ಬರು ತಿಳಿಸಿದರು.